Tuluk Hruaitu A Rak Umnak Lungkua

"Jesuh Krih hi Bethlehem khuapawng lungkua ah a rak chuak" tiah kum zabu pahnihnak Krihfa hmasa hna pa timi, Justin Martyr le Origen of Alexandria nih an ti. Greek Orthodox Archdiaocese of America zong nih, hi dirhmun hi an pawm.

Zeicatiah Jesuh chuah lio ah hin, tukhal le satil cawntu hna nih hin, himbawmnak hmun asimi lungkua ah an tuu le caw hna hi, an rak chiah tawn caah asi. Jesuh chuah lio hi, a liamcia kum 1900 renglo lio asi caah, a sining dik tak kan thei kho lem lai lo.

Hlanlio chan ah, minung tampi cu lungkua khua an rak sa. Kan ngakchiat lio ah, lo vah tikah lungkua ah kan rak riak theu. Ram riah le lo duah ka ah lungkua ah kan rak riak theu. Tuluk, Tibet le Afghanistan ram tibantuk hna ah hin, hlan ah minung tampi hi lungkua ah an rak um tawn.

Asinian lungkua ah a rak um balmi pa Tuluk ram hruaitu ah a cang timi cu khuaruahhar taktak thil asi. Hi bantuk thil hna hi, minung tuanbia ah tampi a um kho mi thil asi lo. Tuanbia bantuk in chim awk lawngah a um khomi tuanbia bantuk a si.

Pre. Xi Jinping

Atu lio Tuluk hruaitu Pre. Xi Jinping hi a ngakchiat lio ahcun, Liangjiahe timi khuate lungkua ah a rak thangmi a si an ti. October 19, 2015 news ah an chuah. Cu lungkua i a rak ummi pate cu nihin ni ah, vawleicung minung tambik ram, ralkap thazaang thawngbik le sipuazi cak bik ram pakhat i hruaitu lutlai asi timi cu, thil khuaruahhar asi.

Cuka hmun cu Tuluk ram i sifak bik hmunhma pakhat asi caah, cu ka hrawng lungkua ahcun Tulukmi million a sawm in lungkua ah khua an sa rih ko ti asi. Xi Jinping zong hi cuka lungkua ahcun 1968-1975 tiang a rak um ti asi. BBC catialtu Carrie Gracie hi cuka hmun lungkua hrawngah khual a va tlawng i, Xi Jinping a rak umnak lungkua zong cu a va hmuh. Cu lungkua cu ralkap nih fek taktak in nihin ni ahcun an congh ti asi.

Xi Jinping a rak umnak lungkua

Vawleicung pasal thatha le mizaza hna hi an chuahka ahcun mi tampi cu sifak fate hna an si ve ko. Innlo ngeilo hna an si. Ngaktah buangro te hna an si. Nulepa aa thenmi hna an si i, a cheu cu umnak ngei setsai lo in nuei le paei sin thangmi hna an rak si. Cu bantuk minung nih cun kan vawlei hi an rak then ko.

Vawleicung khamhtu Jesuh zong cawlrawl kuang ah a chuak ko. Luchiahnak hmanh a ngei lo. Ralpi II thawhtertu Hitler cu apa a ho si set theihlomi asi. Vawleicung computer "dothlennak tuahtu" tiah timi Steve Jobs cu midang nih cawmmi pa pakhat a rak si ko. Kawlram siangpahrang ram lianbik pakhat a rak dirhtu Alaungpaya te hna hi, khuate Mushobo timi khua tein a rak chuakmi an si. Mirang ralkap hmanh nih an rak tih bikmi Kawlram ralbawi minthang Maha Bandoola cu Dabayin timi khua fate in a chuakmtei sifak fa a rak si. Hi bantuk mizaza tuanbia chim cawk lo aum.

Cucaah Xi Jinping nunnak zoh tikah, lungkua i a rak ummi pa Tuluk President a cang kho timi cu khuaruahhar thil asi. Tuluk ram cu nihin ni ah vawleicung ah sipuazi le ralkap hriamnam ah a cak bik pahnihnak asi. Minung tam ah pakhatnak asi. Cu ram hruaitu pa cu, "Lungkua ah a rak um mi asi" timi cu, vawleicung caah tuanbia khuaruahhar asi. Nupi dawh taktak le fanu dawh taktak a ngei fawn.

Xi Jinping le nupi

Cu bantuk in lungkua ummi zong, vawleicung ram ropui bik pakhat i President an si kho ko. Cucaah i zuam le caanrem caantha hmuh fuh ahcun, aho paoh hi hruaitu minthangthang ah chuah khawh asi ve ko. Cucaah Kawl phungtluk ah "Zuam ahcun pathian si khawh asi" an tinak asi.

Laimi tuanbia zoh u sih. Tikir khua cu, khua hmunhma tha asi ruam lo. Sathar le saza tlawnnak lawngah a rem komi khua bantuk asi ko nain, cu khua in pei Kawlram pumpi Vice President Henry Van Thio a chuah ve ko cu. Laimi dirhmun in tuak ahcun, Xi Jinping zong lungkua ah a rak um ve ko timi tluk asi. Tikir khua cu lungpang a tam; hmunhma a chia. Pacawmnak hmanh a har i, khuate taktak te asi ko nain, cu ka khua in Vice President a chuak timi cu, thil khuaruahhar asi. "A taktak si sehlaw a tha tuk hnga?" timi tuanbia bantuk asi.

Cucaah Xi Jinping le Pu Henry Van Thio an tuanbia le nunnak zoh in, Laimi mino vialte hna zong nih, "Kei zong President hna ka si kho ve; ram hruaitu le miphun hna pa ka si kho ve ko" timi lungput ngeih khawh ding a herh.

Tikir khuate tein Vice Pre phan khomi Pu Henry Van Thio