Pathian zummi Krihfa Hlaphuahtu, Carl Roberg nih cun, van le vawlei a chung ummi vialte le minung kan sining hna hi a zoh i, "How Great Thou Art" (Zeitluk in dah na lianhngan ko) timi, Pathian thangthat hla hitin a phuah:-
Bawipa Pathian na tuahmi thil vialte hi...Ka ruah tikah ka lung nih a phan lo..
Arfi le khuadawm le khuari hna nih khin...Na thilti khawhnak kha an langhter ko...
Van cu chim lo in, vawleicung thil kan kut nih a tongh i, kan mit nih a hmuh khawhmi hna hmanh hi ruah lengmang tikah khuaruahhar an rak si ko. Zei ah kan rel setsai lomi le kan duh paoh in kan lamh i, biapi tuk ah kan chiah lo mi kan vawleipi hmanh hi, khuaruahhar taktak asi ko. A kong hi cawn le hlathlai len zong ah theih le hngalh khawh ding a rak si lo. Cu nih alanghtermi cu, Pathian thil sermi hna hi, a pelpawi te hmanh kan hngal kho naisai rih hna lo tinak alanghter.
Vawlei kong hi na ruat bal ve dek maw? Hi vawlei pi hi daite in a um mi in na ruah men lai. Asi lo. Kan vawleipi hi van ah vaa a zuan bantuk in pingpalo ah a zuang i aa chawk cuahmah vemi thil menmen a si ko. Hi vawlei hi kum 4.54 billion atar cangmi vawlei asi. Ding tein tah tikah meng 3,959 a sau. Vawlei nih meng million 93 a thlatnak in Nika hi a hel. Vawleipi hi second 1 ah meng 18.5 in a tli i, sumilam 1 ah meng 66,000 tluk in a tli pengmi vawleipi a si. Cu suimilam pakhat ah meng 66,000 in a tlik cuahmah bu ah, nang le kei dai tein kan um khawhmi cu khuaruahhar asi.
Kan umnak vawlei pingpalo ah a zuang thluahmah lio
Hi acunglei hmanthlak hi van zoh tuah hmanh. Kan vawleipi hi, arfi le thlapa le adang vawlei tampi lakah, suimilam pakhat ah meng 66,000 in a tli i aa chawk cuahmah ve ko. Arfi, thlapa, adang vawlei 800 renglo le van ah a zuangmi lungtum (asteroid) hna he i pah lo tein aa chawk peng ve ko.
Vancung cu chim lo i, kan lamhmi vawleipi hmanh ah, arfi le thlapa bantuk in aa chawk cuahmah komi le hnin lo tein nang le kei daite in kan ummi ruah hman ah, "
Pathian nih a tuahmi vialte hna hi, ruah tikah lung nih a phan lo..." timi kha a tling taktak. Vancung thil cangmi chinchin nih cun an langhter chinchin ko hnga lo maw?
Mifim mi cu an fim deuhdeuh i, Pathian thilser khuaruahhar asinak an hmuh deuhdeuh. Pathian thil ser khuaruahhar asinak cu, American scientist mifim mi hna nih, van ah an hmuhmi vancung thil thar hna nih hin, an langhter khun ko.
Hi American scientist mifim hna cu an fim taktak. An thilti khawhnak a san tuk caah kan ramricu vancung khi asi an ti. Kan phak khawhnak adonghnak ramri cu, "van khi a si" an ti i, "
the sky is the limit" tiah an ti. Kan nih kan phak khawh tawk cu van tiang khi asi an ti cu! Chim duhmi cu a donghnak tiang khi kan tii khawhmi ramri asi an ti duhnak asi.
Cu tluk cun an fim, an thiam, an thawng i vancung i thil umtuning hna khi theih le hngalh khawh an i zuam. Vancung a sannak ah an kai deuhdeuh. Thil vialte theih an i zuam deuhdeuh. An kai deuhdeuh le an theih khawh lomi a tam deuhdeuh; an kai deuh deuh an theihlomi a tam deuhdeuh. An kai deuhdeuh, zuamcawhtu thar an ngei deuhdeuh.
Cu zuamcawhtu thil hna theih khawh ding caah, an i zuam deuhdeuh. Cucaah cu vancung thil umtuning theih khawhnak ding caah, minung nih phak khawh lo naqk hmun zongah, "vawlei lem" (cu-tuh) an ser i, vancung a sannak bik thil hmuh khawh an i zuam.
Cu thil hmuh khawhnak ding caah, a tha bik le a sangbik an tuahmi cu,
Hubble Space Telescope timi durbing lian taktak pi aa bunhmi, "vawlei-lem" (cu-tuh) hi a si. Hubble Space Telescope cu US cozah nih 1990 kum an sermi a si.
Vawlei A Helnak Hmun: meng 347 a sang
Thlah Kum: April 24, 1990
Vacung Arannak: 4.66 meng/second
Tangka Dihmi: 2.5 billion USD
Durbing Alianhnak: 2.4 meters (7.9 ft)
Hubble Space Telescope a rian cu, vawlei in meng million tam tuk in a va hlami, vancung arfi lak khi hman thlak le vawlei ah kuat a si. Hi telescope riantuannak thawng in, US scientist pawl nih cu hlan ah hmuh ballo mi arfi hna le arfi thar aa sem cuahmah mi hna a hmuh hna. Cun "Black hole" kong zong ah tampi ruahnak thar a chuahter.
Hubble Telescope vawlei in meng 347 hlatnak ah aa hel lio
Hi Hubble Space Telescope in an hei zoh tik le hman an hei thlak tikah, a dong kho lo mi thil (universe) an hei hmuh chin lengmang. A dong rua lai tiah ruahmi kha a dong kho ti lo. Cupinah a um rua tiah an rak theih lomi arfi phun dangdang aa dawh taktakmi tampi an hei hmuh hna.
Cu arfi hna cu acheu a runrun in an um; a cheu cu tivachung nga aa dawhmi bantuk in an i dawh. Duh an nung tuk. Cu Hubble Space Telescope nih a thlakmi hmanthlak tlawmpal hi ka van tar.
Hi hmanthlak ka hmuh fate ka thinlung ah a chuak pengmi hla cu, "
Bawipa Pathian na tuahmi thil vialte hi ka ruah tikah ka lung nih aphan lo...." timi hla lengmang asi ko.
Orion Nabula arfi
Lihel bantuk in aa zaimi Galaxy
Black Eye Galaxy
Vancung rulhreu tiah an timi
Arfi aa bumi kha an thlakmi hna asi
Mit a lawh tuk caah Pathian mit an timi arfi pawl
Christmas calendar (advent calendar) an timi
Pathian mit arfi
HST nih a thlakmi black hole
2012 ah an hmuh tharmi arfi no ngaimi asi
Hell bantuk in a linmi arfi an si
Minung hi zeite kan rak si lo. Kan rak hme tuk. Kan thilti khawhnak zong a rak hme tuk. Heh tiah fimthiamnak le hngalhnak kan kawl nain Bawipa Pathian nih a tuahmi thil hna hi hngalh khawh an rak si rih lo.
Hi arfi dawhdawh mit nih a hmuh khawhlomi hna, Hubble Telescope lawng nih a hmuh khawhmi hna, van hmuh tikah ahcun "Sertu a um" timi cu zumh lo awk a tha lo. Hi khuaruahhar thil vialte hna na hmuh tikah, Pathian a um le um lo kongah na lung ar duh ti hlah.
Hi thil vialte hna a sertu a um ti kha zum ko. Cucu minung kan caah a hlawk cemmi le hna a ngam cem mi thil asi ko. Fiang te in cucu na ruat kho ve dek maw?
Galilee Philhlonak timi hlaphuahtu nih cun, "Fiang tein hmu kho u sih law, vawlei dihlak biakinn asi...Sermi thil vialte hna zong hi....Pathian lamkaltu an si dih" tiah ati bantuk in, Hubble Telescope nih a kan hmuhsakmi khuaruahhar thil vialte hna hi, hmuh thiam ahcun Pathian lamkaltu an si dih ko.
Nang tah na hmu thiam ve maw?
Chinchiah
1. Photos are from google.com and bing.com
