Kum 5 Ngakchia Nute Apa Nih Hlei In A Thlak

America hi ram tha tuk asinain mithah lainawn an ngamh tukmi hi a thatlonak bik pakhat asi. Pathian nih pekmi nunnak hi, biapi ah a chia lo i zei ah a rellomi an tam tuk. Sualnak ngeilomi minung hremtuar ingmi an rak tam tuk. Hi chungah sualnak ngeilo ngakchia hi an tuar khun.

USA hi vawleicung seh riantuannak a thangchomi (industrialized nation) lak ah ngakchia zohkhenhnak leiah a chia bik ah aa tel. Kum fatin in ngakchia serhsat (abuse) hi 3,000,000 reports a um i, cu chungah ngakchia 6,000,000 tluk an i tel. Nifatin in ngakchia 4-7 karlak hi, tha tein zohkhenh lo ruang le vuakden serhsat ruangah an thi ti a si. Kum fatin in ngakchia 6.3 millions hi tha tein an zohkhenh hna lo ruangah cozah nih an lak hna i an ven hna. Cu chungah 3 millions cu an kongkau hlathlai hau taktakmi an si ti a si.

USA ah nu le pa hna, chungkhar, nau zohtu le misual kut tong sualmi hna ruangah, ngakchia hi serhsatnat an tuar ngaingai.

Second 6 chungah ngakchia 1 hi serhsat an tuar. Hi ca na rel dih tik ahcun, ngakchia tam tuk serhsat an rak tuar cang.

Laimi careltu hna nih tuak u sih law ti ka duhmi cu, "Fa le hi tha tein zohkhenh, kilven, cawmken, thithruai, cawnpiak, kilven, dawt le kutrit, kan huam tung hna lo ahcun nu zong pa zong fa pakhatte zong ngeih lo ding asi." Kan fale dawt le zohkhenh cu fale an i sem cangka in Pathian nih a khaukhih chihmi tuanvo pakhat asi ti kha kan philh lo a hau. Nu le va nuamhnak, zudin saei, vahvaih, riantuan le tangka kawl lawng ruat lo in, kan fale zohkhenh le an himbawmnak ding caah tuanvo lak chih kha, Pathian nih nu le pa cungah a khinmi tuanvo asi, Cu tuanvo a la duhlo mi cu, Pathian lung aa lawm lo i Pathian thluachuah a um kho lo.

Hi atanglei Thawngthang pakhat hi zoh hmanh. "Hringtu pa nih fanu te hlei in va hlonh rulmal cu?" Ruah ah tuk a sum tuk. Hringtu pa le ral i can cu dah lung a fak hringhran ko. Thawng cu hitin asi.

                                 Skyway Bridge

St. Petersburg, Florida, khua i palik bawi pakhat cu zan tim ah inn lawi aa timh lio asi. Amah hmai ahcun, PT Cruiser pakhat cu suimilam pakhat ah meng 100 in a tlik kha a hei hmuh. Cu motor cu Skyway Bridge hlei cung a phak lai ah a dir. Driver cu a chuak. Ngakchia pakhat aa chuahpi i, hlei tlang in ngakchia cu Tampa Bay tii chung ah a hei thlak. Cun driver cu motor ah a lut than i, thlanglei ah aa mawngh i a kal.

911 an auh hna. Ngakchia nute, Phoebe Jonchuk, cu tii chung ah an va lak. Asinain an khamh kho ti lo i zinglei 2:44 Am ah athi. St. Petersburg palik chimrelnak nawl ngeimi Yolando Fernandez nih "Ngakchia nute cu heh tiah thaw an pek nain a nung kho ti lo" tiah a ti.

Apa John Jonchuk (k.25)  cu minutes 30 hnu ah palik bawi Manatee Sheriff bawi hna nih an rak tlaih i, Nilini (Jan 9) zing ah St. Petersburg i Pinellas County Jail ah ah bia hal ding in thawng ah an thlak.

Apa cu mithah lainawn hmuh le motor in palik harnak pek timi hmuh in taza an cuai lio asi.


       John Jonchuk thawnginn ah a phakpi lio
---------------------

Hi thawng bantuk hi USA ah a um lengmang. Fale tampi cu midang kut ah temtuar lo in nu le pa kut ah an temtuar i, nu le pa kut in an nunnak a liam thei tawn.

Jesuh nih ngakchia a dawt bang in nu le pa hna nih kan fale hi dawt ding cu Pathian duhnak asi ti thei bu tein fale dawt le zohkhenh zuam cio ding asi.