Vawleicung Tihnung Bikmi Motor Lam

Ram le Miphun Thanchonak Caah Karakoram Lampi

Ram le minung kan thanchonak caah lamsul that le pehtlaihnak tha ngeih hi a herh cemmi thil pakhat asi. Cucaah a fimmi le a rummi ram ahcun lam hi biapi taktak ah an chiah. Lamsul a that i pehtlaihnak a that paoh ahcun zeizong vialte kha a tlamtlin a fawi tuk cang. 

Lairam le Mizoram hi fingtlang a sang i, horkuang an thuh caah "Mi vanchia kan si" tiah atimi tampi an um. Yangon le Mandalay tibantuk Kawlrawn le Shan ram le Karen ram tibantuk a rawn ngaingaimi ramkulh hna phak hnu ahcun, Laitlang lam nak in a chia deuhmi lam hi, vawleicungah an um ti lai lo ti tluk in ruah a rak si. 

Asinain Pathian dawtnak in ramdang kan kal tikah, video, hmanthlak le computer hna in vawlei ramkip highway hna zoh tikah, Lairam nakin a let tam tuk in tih a rak nungmi le a chiakhami fingtlang le horkuang ah lam tampi an cawhmi hna hmuh khawh asi.

Cucaah cozah a thami, ram rum le ram fim ahcun fing le tlang vialte kha an cik, an khorh, an reu, an tan hna i motor kalnak lam thatha an ser ko hna. Cucaah minung hmanh fawi te in kal khawhlonak hmun ah lam lianlian le lam thatha an ser ko hna. 

Hi atanglei lam lianlian hna an cawhnak hmunhma he epchun ahcun Lairam cu Kawlrawn tluk asi ti awk in a um. Hi tluk chennak le fingtlang lak hmanh ah lam lianlian an cawh ahcun, Lairam hna ahcun lam lianlian ngeih ve ding kan si ko cang hnga lo maw? Kan Lairam cozah nih tah Lairam thanchonak caah zeibantuk lam thatha dah a kan tuah piak awk a si ve? Hi tluk a harnak hmanh ah pei lam lianlian an cawh hna ahcun Lairam ah hi lam nak thatha ser khawh ve ding kan si hnga lo maw?   

Lairam ramhruaitu hna nih, Lairam thanchonak ding caah lamsul fak taktak in tha an pek a hau cang. Atanglei hmanthlak hna hi, miphun dang nih zeitluk in dah an ram le miphun thanchonak cah lamsul an rak ser timi, an hmanthlak kan i zohchun awk ah ka tarmi hna an si. Hi lampi sernak caah, minung nunnak tampi a liam; tangka thazaang tampi a dih; thilri rawhralnak le sunghbaunak tam taktak a chuah hnu lawngah, hi knuaruahhar lamlianlian hi an ser hna.

Hi bantuk hmunhma harsatnak le tihnunnak hmanh ah, bus ke truk lianlian aa kian khomi lam an cawh ahcun, Lairam ah teh kan cawh khawh ding asi ve ko hnga lo maw? Lairam cozah nih zeidah an kan tuah piak lai? 

--------------------------------------------

Hi atanglei hmanthlak (10) tiang hi Tuluk ram ummi lampi hna an si. Minung hmanh kal khawh lo dingmi hmun ah, lungpang kha an vih hna i, lungpang chng in motor kampi an ser hna. Thil khuaruahhar asi. Zu le thiahlei bang in lungkua chung bak in motor lianlian bus tiang an kal khawhmi ruah ah, thil khuaruahhar taktak asi. Tuluk cu nihin ni ah tlanglawng lam le motor lam cawh ah vawleicung ah Number One ram asi. Shanghai in Europe tiang hmanh tlanglawng peh ding an timh cuahmah lio asi i, ram ropui taktak asi. 

Tianmen Mountain Road (China)

24-Zig Road (China)

Guoliang Tunnel Road (China)

Acung hmanthlak-2 hi Guoliang Tunnel Road (China) an si

Tuluk ram lam?

Taiwan ram zong hi tikulh ram asi nain, tlang a sang i horkuang an thuk ngai ve. Atanglei lampi hi, Taiwan ram i lampi an si. Pakhat cu Toroko Tivapi zulh in cawhmi lam asi caah, Toroko Gorge road tiah an ti. Lungpang kha hmun tampi ah van vih, an cik, an rei i motor lampi an cawh. Nihin ni ahcun, Tourist tampi nih an tlawn duh ngaingaimi lampi asi i, tangka tampi a chuahtertu lampi ah a cang. 

Lam chiakha zong hi, a caan ahcun tangka hmuhnak lampi an rak si ve ko. Lairam lam chiakha zong ramdang tangka hmuhnak lam an si kho ve ko.

Toroko Gorge Road

Stelvio Pass (atang hmanthlak) hi Europe ram ah a larmi le minthang taktakmi lampi asi. Thirrang aa citmi nih an hman ngaingai. Italy ram chaklei ah a um. Pe 9,045 a sannak hmun ah a um. Alps Tlang nichuahlei ah
 a sangbikmi katayza pahmi lam asi. 

Stelvio Pass (Italy


Bolivia ram i Death Road an timi hi vawleicung ah tihnung bikmi lam ah an chia ko nain, naite in cun vawleicung ah mi tambik an thihnak number one lampi cu Bayburt Highway asi. Hi lam hi mithi an tam tuk caah, "Highway to Hell" tiah min an sak. 

Bayburt Road (Turkey)

Atanglei hmanthlak pahnih hna hi Bolivia ram ummi Highway hmanthlak an si. Accident a tam tuknak le minung an thih tuknak lampi asi caah, "Death Road" (Thihnak Lampi) tiah min an sak. North Yungas Road, Camilas de Yungas ti zongah an auh. Cun Croico Road, Road of Death, Road of Fate ti zong in min phunphun in an auh. 1996 ah hin a tlawmbik ah minung 200-300 karlak hi accident in an thi lai tiah an ruah. 

Bolivia khualipi La Paz hi rili in pe 13,000 renglo sannak ah a um. La Paz in lam hi pe 15,260 a sannak tlangkar ah a va kai hmasat hnu ah, chuk ah pe 3,900 tluk sang i a ummi Croico tiang a va zuang than. Tlangkar le tlangcir lungpang lakah cawhmi asi. Lamthlang lei hi pe 2,000 a sannak a tam tuk. A chen tuk caah le diltlang a san tuk caah, atu le tu a min. Ruah a sur tikah lam diltlang in tisor an luang. Lam a chilh i, tih a nung taktakmi lam asi.  

Lam a bit tuk caah le a chen tuk caah vawleicungah mithi tam bik a umnak lam a si. Hi lam hi Bolivia khualipi La Paz in chaklei Yungan Peng ummi Croico khuapi kalnak lam asi. Mah lam dah ti lo cu lam dang zulh ding aum lo caah, tih a nung tuk nain an zulh peng ko. 1998 in thirrang (cycle) aa citmi minung 18 accident in an thi cang. Meng 35 a sau i, motor lane pakhat lawng a um. Tih a nun tuk caah 1995 ah Inter-American Development Bank nih "Vawleicung tihnung bikmi lam" tiah an ti. Tih a nun tuk caah ramdang in thirrang aa cit duhmi tourist tampi nih an va zoh i, tangka hmuhnak lam pakhat ah a tla. 

Bolivia ummi "Thihnak Lampi" timi lam

Machu Picchu hi hlanlio Inca miphun umnak tlangpar khua asi.Lungpang sak taktakmi cungah lunginn an sak hna. A chen tuk caah le a san tuk caah, hitluk lunglianin hi hmun ah zeitindah khua an rak ser khawh hnga timi hi, nihin ni mifim hna hngalh khawhlomi thil pakhat asi. 

Machu Picchu Inca Ruin Road (Peru, S. America)

France ram hna zong hi Apls tlang he aa tlaimi asi caah, an ram lam hi tlangpar cung akaimi tampi a um. An rum caah a cho ngaimi lam kha phei ngai le dawh ngai in an tuah khawh. Aa kuaih tuk caah motor accident a um lengmangnak hmun asi ve.

Col De Turini (France)

Atanglei lampi hi Nepal ram ummi Koirala Highway timi asi. Nepal ram cu vawleicung tlang sangbik Everest Tlangpar umnak asi caah, tlang sang i tiva le horkuang an thuk taktak. Horkuang le tivakam tete ah khua tlak an si caah, lam cawh a har ngaingai. Benepa Bardibas Highway ti zongah an ti. Japan cozah bawmhnak in an cawhmi asi i, 1996 in an thawk i, July 2015 ah an lim. Hi lam hi Nepal ram khualipi Khatmandu le Nichuahlei ummi Terai peng a pehtu lam asi.

Koirala Highway (Nepal)

Atanglei hmanthlak pahnih hna hi Kawlram le Tuluk ram kar ummi lam an si. Burma Road timi hi Japan ral lio ah a rannak in an rak cawhmi lam asi i, ralkap lam asi. A min a thang taktak i, Nitlaklei hla zong ah an phuahmi lam asi. Nihin ni tiang in an hman rih.

Kawlram-Tuluk ram kar lam asi rua? (www.tourasia.ch)

Ralpi II lio minthang taktakmi Burma Road

Atanglei lam  hna hi, India ram chung ummi lam an si. India hi hmun rawn zong a tam i, tlang sang zong a tam. Horkuang thuk zong tampi a um. India ram hi motor lam lei ah an thangcho ngai ve. Asia ahcun India, Tuluk, Japan, South Korea hi lam thabik a ngeimi ram an si. India cu a pawngkam ram vialte he ramri tiang pehtlaihnak lam thatha a co ve mi ram asi i, zeitluk in dah lam hi thazaang an pek timi cu Mizoram a phanmi Laimi nih cun theih dih asi ko. 

Hmunhma a har tuk nak hmun zong ah lam hi a tha nalo in an pemh hna i, atanglei lam hna zoh ahcun, India ram highway hi khuaruahhar in tih an nung i a dawh zong an i dawh timi kha hmuh khawh asi. Lam hi zeitluk in dah usa an pek timi cu an hmanthlak zoh ah theih khawh asi. 

Leh Manali Highway

Kinnau Rd

Munnar Rd

Keylong-Kishtwar Rd

Spiti valley

natioonal highway 22

Jozi La Pass (India)

Hindu biaknak ah abiapimi Nar-Narayan Tlangpar lam (India)

Nanda Devi Biosphere Reserve kalnak (India)

Kinnaur, Himachal Pradesh, India lampi

Kinnaur, Himachal Pradesh, India

Hi New Zealand ummi lampi hi, suikhur cotu hna caah 1883 in 1890 kar ah, an kut bak in an rak cawhmi asi i, nihin ni ahcun zoh nuam caah an hman i, tangka tampi luhtertu lampi pakhat ah aa cang.

Skippers Road (New Zealand)

Atanglei lam hi Karakoram Highway asi. Meng 807.8 a sau. India-China Frienship Highway tiah min an sak. Ram hnih bawm in an cawhmi, Pakistan-China ramri a pehtu asi. Himalayan Tlangthluan pehpar Karakoram Tlangthluan cungah a ummi asi i, vawleicung ah kataya phahmi a sang bikmi lam pakhta asi. A sannak cem cu, Pe 15,397 tiang a sang. Karakoram hi Pakistan-China ramri ah a ummi asi i, hlanlio chanpi in a min  athangmi hmunhma asi. Hi lampi hi 1959 in an thawk i 1979 ah an dih. Hi lam an ser chungah, Tuluk lamcotu 200 le Pakistan lamcotu 810 an thi. Ram le miphun thanchonak caah lamsul tha ser ruangah minung nunnak zong tampi a rak liam ve ko. 

Zeithil paoh man a liam a rak hau. Highway zong a man a rak tlawm lo. 

Karakoram Highway pawng i tikhal tlang hna

------------------------------------------------------------------------------------------------------------------------


Remark
Photos are taken from varous sources from www.google.com/search

2016 Thimnak Ah Ahodah Teitu Asi Lai? (Donald Trump Vs. Hillary Clinton?)

1997 in USA ka phan i, Election voi (4) ka ton cang. Aa zuammi hna cu hitin an si. Teitu hna hi anakmi in tialmi hna hi an si. Campaign an thawkka in ka zoh lengmang hna i, tu kum cu a nih nih a tei lai timi hi, ka rak khanhhman tawn theu. Hi voi (4) thimnak chung ah hin ka ruahning tein an tling peng rih.

1. 2000 ahcun George W. Bush (R)-Al Gore (D)
2. 2004 ahcun George W. Bush (R)-John Kerry (D)
3.  2008 ahcun John MacCain (R)   -Barak Obama (D)
4. 2012 ahcun  Mitt Romney (R) -Barak Obama  (D)

2016 Election i aa zuam dingmi hna cu-Donald Trump (R) le Hilliary Clinton (D)- an si. An sining le ruahning aa dang taktakmi minung pahnih aa zuam. Cucaah, 2016 Election hi, phun dang in chim ahcun, USA ah nu le pa zuamnak election asi i, USA tuanbia a thlengtu ding thimnak asi.

2008  Election lio ah minak cihlah-Barak Obama-president a tlin tikah USA ah vunhawng a nakmi zong President an si kho ve ko timi tuanbia a rak tial. 2016 Election ah, Hillary Clinton a tlin ahcun "USA ah nu zong President tuan khawh asi. Nu le pa kan i ruang ko" timi tuanbia a tial than lai. Cucaah "2008 le 2016 Election nih USA tuanbia thlengtu Election an si kho veve. Democratic nih an tei veve ahcun, minung ruannak (equality) timi lei ah, Democratic Party cu US ah tuanbia tialtu Party zong an si than lai.

2016 US Election hitin a si lai tiah an ruah (www.foxnews.com)

Lungthli Ruahlo Vokke

Donald Trump hi Hotel le Reas Estate sipuazi a tuanmi rian asi. Miss Universe Pagient ngeitu asi. A rum taktak ve. Chicago, New York, Las Vegas le khua dangdang ah Trump Tower timi inn sangsang tampi a ngeitu asi. Mi ropui le lianngan taktak cu asi ve. Mi men lo taktak asi i, mi tampi nih cun USA sipuazi zong a thatter ko lai i, Terrorist zong a kham khawh deuh hna lai tiah an ruah.

Asinain cu hlan a sining ruah ahcun, "Ngaknu dawh zoh le ngaknu he umti lawngte a rak tuaktanmi khan asi ko." Ruahlo taktak in Republican Party in President caah a tling sualmi asi.

Trump Tower (Las Vegas)

Trump Tower (New York)

Chicago Trump Tower

Trump nominee a tlinnak ruang pakhat cu, George W. Bush santlaih lo ruangah an party an vaivuanh tuk caah asi tiah ka ruah. Zeicatiah 2003 Iraq Tuknak ruangah le US sipuazi a tlak tukmi ruangah Republicn Party hi an tuanbia a chia tuk. Pre. George W. Bush hi Republican Party vaivuan in a tuahtu asi. Bush Cozah nih US hi "Regime" bantuk a rak hruai hna. Lih an rak chim i ramdang ah raltuk an duh tuk. Cu ruangah Tea Party a chuak. An mah cu Republican Party ah an um ko nain, Tea Party pawl cu, Republican Party he an ruahnak aa kalh ngai tawn. An theipar cu an party ah lungruallonak le zaang dernak tampi a chuak. Cucaah 2012 zong ah Obama a chuahnak aruang pakhat asi.

Trump a tlintertu thil dang pathum cu-(1) Terrorist ruang; (2) Illegal Immigrant; (3) US ah Muslim an karh tukmi ruang asi. Cu pinah, USA ah Mirang milu an tumchuk deuh ziahmah i, Mirang hi an thin a phang. An thin zong hung chin lengmang. Cu lio caan ah, Donald Trump hi puarhrang ngai in a rak chuah tikah, Mirang tampi nih an dirkamh. Amah a dirkamhtu hi "convervative" ngaimi le a cian deuhmi lawngte an si. Republican mipi tam deuh nih, Trump bantuk in a cianmi president hi USA ah hruaitu siseh ti an duh caah, Republican Party ah Trump a tlinnak asi.

Clinton  te nupa buaibainak hitin People Makazine ah an tial

Hillary Clinton zong hi caan tha ruangah a tling sualmi asi ve. Thil buai tamtuk a ngei ve. Secretary of State atuan lio ah "pumpak email" a hmanmi kong ah tampi aa chuah sual. Mi nih zumhlonak ah an hman. Libya ram Bengazi i US Embassy an kahmi le riantuantu an thih ruangah "a daithlang" timi in mawh tampi a phur. 2003 ah Iraq tuk ding in vote a rak pek ve mi zong an party chungah mithmai a zortertu asi. Cun "Whitewater Controversy" timi "innlo lei tangka hram an chiahmi" ruangah siseh, Bill Clinton nih nu aa duh timi kong ah siseh, Clinton te nupa hi, buainak fak ngaingai an tong bal. Cu nih cun an tuanbia a ciatter ngai. Asinain Democratic Party ah mi za taktak aa pekmi an um lo caah, a za bik asi i a tlin venak asi.

Cucaah Donald Trump le Hillary Clinton hi, "Lungthli ruahlo vokke" timi ah an chuak veve. Caan tha an i hmuh fuh veve caah, President caah an tlin veve nak asi. US mipi nih cun an duh tuk ve hna lo. USA rampi hruai ding ahcun an i tlak veve lo tiah atimi tampi an um i, 2016 Election cu, aho hmanh vote kan pe lai lo atimi tampi an um cang. An duh veve hna lo caah asi.

2016 Election Aa Dannak

2016 Election hi, USA i election ka hmuhmi vialte lakah a phun aa dang bikmi asi. Tu kum election hi a linh zong a linsa taktak. Zeicatiah American tuanbia kum 240 a kalmi cangmi chungah, nu le pa President an i cuh hi a tu a voikhatnak asi caah asi. Hillary Clinton hi, US i Party lianmi nih President caah a voikhatnak bik an thimmi nu zong asi. Nu ropui taktak asi. Tutan i Hillary a tlin lo ahcun, hi hnu kum 50 chungah USA ah nu nih President an tlai kho ti lai lo tiah ka ruah. Cucaah tu kum thimnak cu a linsa taktak.

A linhsatnak bik a ruang tampi a ummi lakah a tanglei hna hi biapi cem an si.

1. US tuanbia kum 240 chungah President caah nu le pa a voikhatnak bik zuam kum asi.

2. An pahnih in biaknak muisam a keng lo cem veve an si.

3. An ruahmi (Issue) a ralkah ve taktak. Tahchunhnak ah, Trump nih Mexico ramri kham ding ati. Illegal minung viatle dawi dih ding le Muslim pawl kham ding ti bak asi. Hillary nih cu vialte cu "Constitution asi lo ati i a duh ve lo." Syria, Ukraine, N. Korea, Russia le Iraq kongah an hmuh ning aa dang ngaingai. Gun control upadi kong zongah ruahnak an i dang taktak.

4. Hillary cu uknak le cozah lei ah hmuhtonmi tampi a ngei. Donald Trump hi cu hmuh tonmi a ngei tuk lo. Business lei lawngah hmuhtonmi a ngei.

5. Terrorist kongah Donald Trump nih USA a ven khawh deuh lai ti asi. Hillary cu nu asi i, a nem deuh caah a kan veng kho lai lo ti asi.

6. Hillary nih Russia hi dohkalh peng a duh. Donald Trump nih komh a duh.

7. Hillary nih North Korea hi dohkalh peng aduh Donald Trump nih komh a duh.

8. Hillary nih "Immigration" lei in mark hmuh aa zuam i, Donald Trump nih "immigration" lei ah rengh deuh a hau timi lei in mark hmuh aa tim ve.

9. Donald Trump nih "Terrorist hi cian taktak in kan tongh hna ahcun an lo lai tiah a ruah. Hillary nih cun an zual lai tiah a ruah."

10. Policy kongah Donald Trump hi "economy siseh, foreign policy siseh fiang tein a ngei lo ti asi. "America Will Great Again" tiah a ti ko nain, "Zeitindah great again asi khawh than lai? Zeitindah economy ka tuah lai timi policy hi a tliangmi a ngei lo" ti asi. Hillary cu policy tliang tein a ngei ti asi.

Hi bantuk in hmuhning aa dang taktakmi minung pahnih-nu le pa- an i cuh caah hin 2016 Election cu a linsa taktak ko.

Asiahcun aho dah teitu asi lai? 

Primary election lio ahcun an mah Party veve chung lawng zuam asi caah, a cak bik dingmi hi theih fawi ngai a rak si. Atu cu USA ram pumpi States 50 ah zuam ding asi tik ah, chim awk a har ngaingai. Poltics timi cu bawlungchuih he an tahchunh. Bawlung hi zeitindah a rilh lai timi theih a har bantuk in politics zong ah hin, aa tluk ngaimi minung pahnih lakah, anih nih a tei lai timi hi chim awk a rak har tuk. Zeicatiah thim lai te ah tum khawh le kai khawh an si veve caah asi. Bia kaa khat chim palh asiloah an sualnak fak nawn pakhat hmuh piak sual ahcun loh khawh asi tawn caah asi.

Nihin ni thil sining zoh lengmang tik ah, a ra laimi November election ah hin, Hilliary Clinton nih a tei lai tiah, politics thiammi tam deuh nih an ruah. Republicn Convention an dih ka le Democractic Convention an dih ka te in thil sining ka zoh lengmang tikah, 2016 Election ahcun Hillary hi teitu asi lai tiah ka ruah ve (Politics cu bawlungchuih he aa lawh caah ka palh kho ko nain a ruang tu ka chim lai)

A ruang?

1. USA ah hin pa nak in nu vote pemi an tam deuh cang. Tahchunhnak ah, 2008 Election lio ah kum tlingmi vote pemi an tuak tikah, nu 70.4 million nih vote an pek i pa 60.7 million lawng nih vote an pek. Kum tlingmi nu 65.7% nih vote an pek lio ah pa cu 61.5% lawng nih vote an pek. Cu chungah 56% nih Barak Obama an pek i, 43% nih John McCain an pek. USA Nu hi "a thlite cawlcanghnak" (Grassroot movement) ah an rak cak ngaingai. Pa cu vote pek an huam ti lo ti asi. 2016 ah hin, nu le nu an i tanh cang. Party nak in "Gender issue" hi tu kum ah tam deuh Hillary nih mark a laknak asi. 2016 Election ah hin, nu nih an tanhmi paoh an tling kho cang.

2. USA ah nu hi, an lahkhah a niam deuh zungzal. An catang le degree aa khah hmanh ah, an rian a niam deuh peng ti asi. Zei rian paoh ah hnamhnawl deuh an si. Biakinn tiang in hnanhnawl deuh an si. Cucaah "nu le pa ruanlonak" cu Hillary nih biatak tein a aupi tikah, mark a kainak asi. Cucu Gender Issue thiamthiam asi. Midland ka tlawn lio ah, Pre. Bush te chungkhar he aa daw taktakmi Midland Republican Secretary nih a rak simi nu ka hal i, "Hillary hi a tha deuh ko lai. Amah hi ka vote te ko lai" tiah a rak timi ka ruah ah, Hillary nih hin party ramri lonh in, nu sinah mee tampi a hmuh te lai tiah ruah asi.

3. Donald Trump cu "Mexico ramri kan kham lai? Illegal ummi paohpaoh ka dawi vek hna lai" atimi ruang ah, Spanish nih an duh huat ngaingai. Trump nih a tuak lo mi cu, USA ah hin Spanish vote lo in President tlin awk a har tuk cang ti hi asi. Illegal ummi a huat ngai hna hmanh ah chim rih lo ding asi. Hillary Clinton cu Spanish pawl vote lak hi aa zuam i, atu i Vice President ah aa thimmi pa zong Spanish asi. Illegal ummi pawl zong dawt ding le path to citizenship tuah piak ding timi Obama Policy kha atak i a tuah khawh lo zongah a dirpi caah, Spanish vote tam deuh cu amah sin ah a kal lai. Chim ngam asi.

4. America ah Minak vote tello in President tlin khawh asi ti lo. Donald Trump cu Minak nih an huat ngaingai. Black Life Matter timi hrimhrim nih cun an huat tuk. Cucah Minak vote tam deuh cu Hillary Clinton ah a kal than lai. Chim ngam asi.

5. "USA ah Muslim pawl luh ka kham lai" tiah a timi nih, US Muslim nih an huat. Donald Trump nih hin, zei bantuk Muslim sin hmanh in vote a hmu lai lo. US ah Muslim hi 3.3 million (2015) an um i, US minung dihlak i 1% an si. Vote tampi an ngei cang. Muslim 99.9% nih cun, Trump an vote lai lo. 0.09% nih cun palh sual ruangah an vote khawh men. Hillary cu Muslim pawl huatmi bia zong a chim theng lo. "Constitution ning in kan kal awk asi" tiah ati caah, mi tlawmtuai asimi biaknak dang pawl nih an duh deuh. Cucu politician taktak lungput cu asi.

6. "Minority" timi, mi tlawmtuai asimi miphun-Minak, Spanish, Asian le miphun dangdang an si. Hi hna hi mi tampi cu US citizen an si cang. Hi hna nih a dan tlangpi in Trump an duh lo. Ka fale hmanh nih Trump cu an huat tuk. Mirang miphun deuh lawng nih an duh. Cucaah Trump nih hin, "minority vote" hi tampi a hmu te lai lo.

7. USA hmun kip ah "pew research" an tuah tikah, Mirang hmanh ah hin "educated" timi "mifim cathiam deuh le khuaruat deuh nih" cun Trump policy hi USA caah tihnung le thiltha lo asi tiah an ruah caah, an duh lo ti asi. Cucaah mifim cathiam vote hi tampi asung lai.

8. Trump hi thilbuai (problem) tam tuk a ngei. A biachim holhrelnak ah, aa chuah sual a tam. Hruaitu pakhat nih chimlo dingmi tam tuk a chim. Tuah lo dingmi tam tuk a tuah. Cucaah a biachim le cawlcangh zoh ah a lungdongmi an tam tuk.

9. A pawi bikmi pakhat cu Republican Party in aa pe ko nain, Republican Party chungin hruaitu upa tampi nih an duh lo mi hi asi. An tanpi lo. Acheu cu Trump dohtu bu hmanh an party chung lila in an i ser than i, Trump a sunghnak ding caah khua an khang. An Party chung hmanh hin Trump duhmi le duhlomi an i then. Party chungah lungthin khahlonak tam tuk a chuahter. Amah a dirpitu ding asimi hna hmanh nih an dirpi ti lo. A doh tu in an doh tikah, cu bantuk dirhmun cun President tlin ding a har tuk cang. Republican tampi cu vote hmanh kan pe lai lo ti a si. Trump zong an duh lo i, Hillary zong an duh lo caah asi.

10. Republican Party an i tuai lio le an buai tuk lio ah, Demoratic cu an rak i hlum diam. Cucu Republican caah thil pawi taktak asi. 2003 Iraq Tuknak lio i, raltuknak lei atang bikmi Paul Wolfowitz hmanh nih Hillary ka vote men lai tiah ati tik ahcun, Republican Party hi an lung aa rual lo taktak ti a lang ko. Republican an dernak cu Democratic caah an thawnnak le vanthatnak ah tla.

11. USA hi politics ah State in an i then. Republican nih an tei zungzalmi state an um i, Democratic nih an tei zungzalmi state an um ve. Cun aa thleng lengmangmi "Swing State" hi thimnak ah bia a khiaktu an si tawn. Ohio, Florida tibantuk pawl hi. Atu lio dirhmun zoh tikah Swing States pawl ah Trump hi an duh tuk lo. Hilliary Clinton hi a mark a sang deuh peng rih.

12. Trump campaign manager zong aa phuak cang. Nihin ni ah Trump a dirpitu hi hruaitu cak ngaingai an um lo. USA cozah uknak ah hruaitu minthang taktak zong an um lo. Republican Party in hruaitu minthang deuh nih an dirkamh lo. Cucu Trump caah zaangdernak bak asi.

13. Trump hi atuanbia a tha lo. Politics ah aa tel tuk bal lo. Experience a ngei lo. Tax kongah, sipuazi a tuahnak kongah, innlo a sak i tuanbia chia tampi a tialmi ruangah, "a tuanbia credit a tha lo." Mi tampi nih an zuum lo. "Bia a chim lio ah, "Believe me" (Ka zum u) tiah voi tam tuk a chimmi kha, zumh awk a tlak lo tuk caah asi tiah an ti ve cang. US ah mi nih zumhlomi President tlin ding a fawi lo.

14. Trump hi a "political strategy" timi "politics tuahning" aa palh. Muslim huatnak a chuahtermi ah a palh. Spanish pawl le Minak pawl huatmi phun a chuahtermi ah aa palh. "Terrorist" lei rumro in thih-phaih rumro in aa lakmi hi aa palh. USA ahcun "fear" (tihphannak) politics phun hi Pre. George W. Bush nih a rak hman tuk cang le an rem tuk ti lo. Cucaah "fear tactics" le "Scare tactics" phun cu rian a tuan ti lo. Anih hi "Mi nih tih hna seh law ka duh hna seh" timi phun rumro a chim i, cucu 2016 Election ah rian a tuan kho dingmi idea asi lo.

Cucaah a cunglei thilri tampi ruangah hin 2016 ah Donald Trump sungh khawhnak a lam a um i, Hillary Clinton hi teitu si khawhnak a lam a um. Hillary hi a rak zaa taktak. Amah belte cu "nu" asi caah le USA an nunphung ah "nu" president chuah ding cu a har tuk caah cucu kokek dawntu nganpi a ngei ve. Hillary hi, mi nih an uar khunnak pakhat cu "A pasal a upat. A nihsawh lo. Ava chiatnak kaa khat a chim lo. Cucu mi nih an thangthat tuknak asi."

Hillary Clinton hi experience tampi a ngei. Senator zong asi. Secretary of State zong a rak tuan bal. Ramkhel kongah, Trump he an experiene aa thlau tuk. Nu nih an duh. Hlasak thiam le minthang thang nih an duh. Nu le pa kemh pawl nih an duh. Spanish le Minak nih Trump nakin an duh deuh. Muslim nih Trump an huat caah Hillary lei ah an vote a kal fawn lai.

Keimah pumpak ruahnak ahcun an pahnih in biaknak lei misa cu an si veve lo. Pathian a duh ngaimi an si veve lo. Pre. Obama chan ah hin Krihfa biaknak nih kan duh lo ngaimi "chiatha khat umtinak" te hna hi an fehter tik ah, an luan tuk caah a duhlomi zong tampi an um kho ve.

US President thimnak hi zoh tikah, Party pakhat nih caan hnih an peh ahcun, a adang Party hi an tling ve tawn. Cu kanan in tuak ahcun, tu tan thimnak cu Repbulican caan asi ti awk asi. Asinain Foxnews.com nih an tuaknak ah 2016 ah Clinton nih vote 227 a hmuh lai i, Trump nih 191 a hmuh lai tiah an ruah. Fox News cu Republican lei deuh tangmi asi i, Democractic Party hi a sawiseltu peng an si. Cucu a dik ahcun, 2016 zong hi Democratic Party nih tei dawh an si.

Election tuahnak ding caah caan tampi a duh rih. A karlak ah thil aa thleng kho peng. Poltics cu bawlungchuih bantuk asi. Zeitindah bawlung a rilh lai timi hi theih khawh chung a har bantuk in, 2016 Election ah a hodah teitu asilai timi cu 100% kan chim kho lai lo nain, tu chun ni thil sining in tuak ahcun Hillary Clinton lei ah bawlung a rilh ning cu a hawih ko cang timi kha hmuh khawh asi.

Asinain bawlung a rilh tikah zeidah dawntu asi lai? Zeiti hawih in dah aa mer lai timi cu chim khawh chung asilo bantuk in 2016 Election zong ah USA an politics bawlung hi zeitin dah aa mer lai i, zeitindah a rilh lai timi cu lungsau tein zoh cuanh cio ding asi ko!!!!

"Paris of America" timi Cincinnati Khua

Kan fafarual in Devou Park ah

USA ah khua min thang tampi a um. Cu lak ah Cincinnati khua zong hi, dawh ah min a thangmi le chim ve mi khua pakhat asi.

Cincinnati cu Ohio thlanglei hriang bik, Ohio River kam ah a ummi asi. Kentucky State he Ohio River nih a dan hna i, hlei sangpipi in an i peh. Cincinnati khua a heltu lampi (Beltway) nih hin, Ohio le Kentucky chaklei a huap chih. Cincinnati International Airport zong hi Kentucky ah a um caah, Cincinnati-Northern Kentucky International Airport tiah min an auh.

Ohio River hi, Mississippi River tiva tengnge nganbik a si. Pre. Abram Lincoln te hna an rak i chawh lengmang tivapi pakhat asi. Hlanlio motor le tlanglawng um hlan ahcun tiva tilawng lawng hi umkalnak ah rak hman asi caah, Ohio i sehzung le sipuazi tam deuh cu hi Ohio River tivakam ah an rak um hna. Cucaah Cincinnati zong hi nihin ni tiang Ohio i Business Center khua pakhat ah a tlaknak asi. A rum ngaingami le rian a tam ngaingaimi khua pakhat asi.

1997 in Dayton ka phan. Cu lio ah Sayagyi Lian Bik cu Cincinnati ah bible sianginn a rak kai. Bus in ka va tlawng tawn i, Cincinnati hi voi tam ngaite ka phan. Khua nuam tuk arak si caah, ka kal caan paoh ah zanlei sangah khua kan rak cuan tawn i, lung a rak leng tuk.

Laimi duhsah tein kan karh i, Dayton kan um lio ah Cincinnati ah kan rak i pum tawn hna. 2006 in hmun khat pumhtinak kan thawk hna i, Columbus kan pem kum 2008 tiang Cincinnati ah kan i pum. Cucaah Cincinnati cu kan khua bantuk ah kan i tuahmi asi. Chiatni thatni ah kan kal peng. Pathian dawtnak in Cinnati Area ah Laimi duhsah tein an karh i, atu ahcun 600 kuakap khua an sa. Krihfabu pahnih-Calvary Chin Baptist Church (CCBC) le Zion Chin Baptist Church (ZCBC) an um hna i, Laimi khua pakhat ah a tla ve cang.

Cincinnati Zan

June thla donghnak zarh ka fapa le pahnih-Nathan Lian le Daneil Thawngtha Lian he Zion Chin Baptist Church kan va tlawng hna. Ningani zanlei in Zarhpini zanlei tiang kan va cam. Nuam ngai in caan kan hmang. Zarhpini pumh dih in kan parual in kan umnak Columbus khua lei ah tlun kan i thawh.

Kan tlun pah ah ka fale cu Cincinnati alangh cemnak tlangpar Devou Park timi ah ka kaipi hna. Devou Park cu Kentucky area ah a um i, Ohio River cungte ah a um. Cu ka tlangpar in cun Cincinnati cu chuk zoh in zoh asi. Ka thinlung te ah, Olive Tlang in Jerusalem cuanh bantuk te khi ka lawhter. Zoh cimlo khi asi ko. Cincinnati aa dawhnak bik hmun Downtown vialte le Ohio Tivapi kam vialte a lang dih. Hi hmun in cuanh ahcun, Cincinnati cu aa dawh taktak.

Devou Park cu a nuam tuk i, tluntak le kaltak sian ding in a um ti lo. Zarhpini zanlei sang asi i, ngaknu tlangval khua a cuantimi tete le chungkhar tete zong kan hmuh hna. Hika tlangpar cu lung a leng tuk.

Tlangpar ah zunput a um. Motor parking tha taktak zong a um. Inn tha taktak pakhat a um i, cuka hmun cu thitumhnak hmun le training hmun ah an hman tawnmi asi.  Kan pafarual in suimilam pakhat tluk khua kan cuan i, Columbus lei ah kan tlung than.

Cinnati Metropolitan Map

Cincinnati Downtown

Cincinnati khua hi khua dawh le khua lian ngaingai asi. Sipuazi zong a tha i, bank lianlian le company lianlian an umnak khua a si. 1788 ah an rak tlakmi asi i, khuahlun ngai asi. 1802 ah Khuate tiah an rak ti i, 1819 ahcun khuapi ah an rak chiah. Ohio River kam ah a um caah, pehtlaihnak le phurthlunhnak ah min a thang taktakmi le a rak rum ngaingaimi khua asi.

Cincinnati timi khua lawng ahcun, 2014 ah minung 298,165 an um i, USA ah lianh ah 65 nak asi i, Ohio ah 3 nak asi. Cincinnati Metropolitan Area tu ahcun khua le sang tampi aa tel i, Kentucky Area le India area zong tlawmpal ani tel chih caah a ngan ngaingai. USA ah Metropolitan Area timi khua hi 382 a um i, cu chung ah Cincinnati OH-KY-IN Metropolitan Area hi minung tam ah 28 nak asi i milu 2,157,719 (2015) an um (Metropolitan Area ahcun Columbus hi 32 nak lawng asi i, Indianapolis hi 34 nak asi).

Cinnati Metropolitan Map

Khuapi asi pinah downtown kamte ah USA lampi i motor tambik nih an hrawnmi lampi pakhat I-75 le adang lampi I-71 & I-74 an i ton caah, motor tam tuk aa tong i, zung tumkai caan ahcun motor umkal a har ngaingai. Lam aa tet tuk tawn caah, US President tiang nih an chim lengmangmi lam ton pakhat asi. 

Cincinnati University hi 1819 ah an dirhmi asi i, USA ah university lian bik 50 chungah aa tel ve mi asi. Cincinnati Children's Hospital Medical Center hi USA ah ngakchia sizung vialte lakah lianh ah 4 nak asi.

Cincinnati ah hin, US Fortune 500 company headquarter 3 an um. Cu hna cu Procter & Gamble, The Kroger Company le Macy's Inc an si. Rian tambik a chuahtu company hna cu Kroger (17,000 employees) le University of Cincinnati (15,162 employees) hna an si. Cincinnati Zoo saram zuatnak zong hi amin a thangmi zoo pakhat asi.  Horseshoe Casino zong downtown bak ah a um i, an khua ah sipuazi a thattertu pakhat asi ve. 
Cincinnati hi Ohio River kam ah a um caah, Ohio River cung ummi hlei sangsang nih a dawhter khun. Khua chungah inn sang le i nn pungsandawh tampi a um caah le, Music Hall te hna, Cincinnatian Hotel le Shillito Department Store minthang taktak hna an umnak asi caah, tourist tampi an ratnak khua asi i, duhnak in "Paris of America" tiah timi khua asi. 

Hi tluk in khua dawh le khua minthang asi caah, tlawn phu le zoh phu tuk khua asi. Cucaah, USA na um chung ah "Paris of America" timi khua cu, voikhat tal tlawn rak i zuam ve te. Na phanh ahcun na ngaichih hrimhrim lai lo. 

Paris of America timi khua ah, zoh ding tampi a ummi lakah, Devou Park kai ding cu philh te hlah. Devou Park cu hmunhma nuam tuk asi caah, ralrin ding pakhatte a um: 

"Tlangpar kai na philh lo bantuk in, tlangpar in tum ding zong philh te hlah." 

Cincinnati Downtown

Cincinnati ralchan Covington Khua (KY)

Ka fale pahnih-Daniel (L) le Nathan Lian (R) an si

Ka fapa Nathan Lian nih a ka thlakmi asi

Thutnak khuacuanhnak hmun asi

Devou Park le Cincinnati khua downtown

Devou Park i parking lot

An unau tein Devou Park ah

Hika ah sau ngaite an i thui

Zunput tha taktak zong tlangpar ah a um

Tlangpar ah a ummi Hall asi

A sannak cem ah ka dir i Cincinnati ka thlakmi asi

Zoh cim lo tatkak asi ko

Inn pumpi hi Hotel asi, 

Cincinnati Khua dawh

Houston Khua Ah Chikhatte Tlawnnak

July thla 29-31, 2016 ah Houston khua ummi Chin Christian Church of Houston (CCCH) ka va tlawng hna. Houston hna kan phan te lai timi ruah awk a har ngai nain, kan Lai hawi an um caah Pathian khuakhannak in ka va phanh tikah, Pathian le CCCH Krihfabu cungah kai lawm ngaingai.

CCCH pumhnak biakinn asi

Houston hi Texas State nichuah thlanglei deuh ah a um. US khua vialte lakah, hmuh ka duh bikmi khua pakhat asi. Zeicatiah NASA Space Center a umnak khua asi i, USA ah khua lian bik le khua min thangbik pakhat asi caah asi.

Vawleicung khua map vialte zoh tik ah, Houston le Moscow khua kulhnak motor lampi (beltway) hi, a tha bik an si ko rua tiah ka ruat. A thapthap in beltway an tuah hna i, aa dawh lawng siloin luhcuah a fawi ter i, khuachung mipi caah a that zong a tha khun.

Nitlak laite ah Houston Airport-George Bush Intercontinental Airport- ka va phan. CCCH mino upa nih an rak ka don i kai lawm tuk hringhran. Houston airport cu airport dawh le lian taktak a si. Amin zong "Intercontinental" tiah ti asi i, a min a pical taktak. Amin nih a ropui ter ngaingai. Vanlawng lianlian an tumkainak asi. Atu le tu vanlawng an tum, an kai mi zoh ah, airport lian taktak asi timi cu a fiang ko.

George Bush Intercontinental Airport

Kan tlun pah ah China Town ah zanriah khim tein kan ei pah. Khua a dawm pah caah khuacaan a nuam. Cu China Town cu Asian mi deuh lawngte an si. Rawldawr a tam, a tlaih bak in aa tlai. Motor a tam tuk caah motor parknak zong kan ting setsai lo. USA ah New York khualai ummi China Town dah ti lo cu, Houston China Town hi a hlunghlai bik le aa dawh bik China Town asi lai dah ka ti. Asian mi an tam caah, Kawlram zong a ka theihter ngai. Lung a leng ngaite.

China Town he aa hlat tuk lo nak ah India dawr zong tam ngaite a um. China Town hrawng ahcun lam min le dawr min vialte hi Tuluk Holh in tial chih dih an si. Cu thil zoh tikah, Tuluk hi USA zongah zeitluk in dah an lianh cang timi kha a langhter. Rev. Van Thawng Lian nih, "Houston ah hin Philippines miphun lawnglawng hmanh hi a ting in an um" tiah a ti i khuaruahhar ngai asi.

Airport aka dongtu Mino upa

Asian mi tampi an eidinnak China Town dawr 

Signboard zong Tuluk ca an tiah chih ve

CCCH cu khua lai ah an i pum. An biakinn hi Mirang biakinn an hlan chinmi asi i, biakinn dawh ngaingai asi. An Krihfaupa pakhat nih, "Kan biakinn hlan man hi thla khat ah $25 kan pek hna" ati i ka khuaruah a har ko. Dawtnak an ngeihnak kong ruah ah, lung aa lawm tuk.

Houston hi USA ah lianh ah palinak asi. New York, Los Angeles le Chicago changtu asi. Houston-The Woodlands-Sugar Land timi khua lianlian pathum fonhmihi Houston Metropolitan area ah an chiah i, cu area vialte cu killi meng 10,062 a kau i, minung 6,313,158 an um. USA ah minung tam ah (4) nak asi. Minung chah taktaknak le miphun kip cawhbur in umnak khua asi caah, khatlei ah ritnak sii tampi a um; misual tampi an um i rawhralnak zong a tam ngaingai nak khua pakhat asi.

Houston khua hi a lianh lawng siloin, atanglei thil dang ruangah a min a than khunnak assi:- (1) NASA Space Center; (2) Company liannlian headquarter a tammi; (3) Meiti chumhnak company lianlian an ummi; (4) Rili tilawng dinhnak lian taktak a ummi; (5) Vanlawngtual ngan taktak a ummi le (6) Biaknak leiah Lakewood Church te hna a ummi a si.

Houston ah, vawleicung meiti company min thangthang- Marathon, Sysco, Hulliburton le Conoco Phillips-an um. Hulliburton cu Vice-Pre. Dicheney nih a rak hruaimi company asi i, 2003 Iraq Tuk lio ah Iraq ram meiti contract a tlaitu an rak si i, buainak zong tampi a rak tongmi company asi. Rili tilawng dinhnak lianpi a um caah, meiti chumhnak sehzung zong tampi a umnak khua asi.

Meiti an khawhnak kudawng pipi an si

Meiti sehzung asi. Alang in ka thlakmi asi

Houston khua hi sipuazi a that taktaknak khua asi. USA ram pumpi ah rian a karh ran biknak khua asi. 2006 ah Forbes Makazine nih Houston hi Texas State ah sipuazi tuahnak a thatnakbik pakhatnak le USA ram pumpi ah (3) nak ah a chiah. USA ram pumpi Fortunes 500 company headquarters tambik umnak khua pahnihnak asi i, headquaters 25 a um. Amah nak in tam deuh a umnak cu New York lawnglawng asi.

Cu tluk cun Houston hi sipuazi a tha. Asian abik in Tuluk, Vietnam, India le Philippines mahtluk an tammi ruah tikah, sipuazi a that tuk caah asi lai timi a fiang ko. Cucaah Laimi cathiammi mino zong nih Houston le New York timi bantuk khualianlian ah khuasak khawh ve ding zong saduhthah a herh.

Asianmi an tamning ruah tik ah, Houston ah hin, Laimi tampi khuasa hna sehlaw, zeitluk in dah a va that hnga? Laimi thilti kho tampi khuasa ve hna sehlaw sipuazi ah minthang an i chuah kho ve ko lai tiah ka ruat.

Houston Downtown(www.nabg-us.org)

Houston khua hi downtown a kau. An downtown a sau fawn. A khua zoh tikah downtown hi hmun thum khan ah a um. Cu thil nih, Houston hi khuapi taktak asinak a langhter. Kan tlun pah ah downtown a pical cemnak cu kan pal pah. Inn an sang. Thlalang in sakmi inn a tleutleu tampi a um i khua dawh taktak asi. Lam an kauh pinah a dot zong a tam ngai te. An lam hi sur tah in an i tak ko. An khuakulhnak lam hi, chuak put in hrawnta ka duh nain, caan nih a kan zo lo i ka sia a herh ngaite.

Houston khualai lampi hmunkhat

China Town

China Town

 Rinni ah cawnnak kan ngei. Zing in zan tiang. Zarhpini zingka tein Lakewood Church timi Joel Osteen biakinn ah CCCH Youth pastor Saya Sang le hawi le nih an ka pumhpi. Lakewood Church cu hlan ah basket ball stadium asi i, minung 16,000 pumh khawhnak asi. Kan kal ni ahcun minung 8,000 tluk an i pum men lai tiah ka ruah (Joel Osteen church kong a dang ah ka tial). A voikhatnak aa pummi kan si caah, hmaisuang bik a tlar hnihnak ah kan thu kho ve i, caan hmangtu zong naihte in kan hmuh khawh hna le lung aa hmuih tuk hringhran. Pathian nih Lakewood Church thluachuah pe ko seh tiah thlaza ka campi ve hna.

Saya Sang le hawi le he Lakewood pulpit hmai ah

Lakewood Church

Chun kan i pumh dih in, Rev. Van Thawng Lian le a innchungnu nih Indian dawr ah Puri le lakphak thaw taktak an ka dangh. India dawr kan van luh cu, lung a leng tuk. Indiami tampi thil cawmi le lakphakti dingmi tampi an rak um. An khanghmi rimhmui cu a hmui ngai i, Aizawl, Imphal le Mandalay ka tlawn lio a ka theihter ngai. An Puri cu a thawt le a thaw; a lianh le a lian. Kan ei dih tik ahcun kan khim taktak.

Cu India dawr in an inn lei ah kan tin. An biakinn le inn cu aa hlat ngai. Lamsul a tha. An umnak sang cu sang thar ngai asi. Innlo an tha, an lian. Lamsul le thinkung an thar i, an sang a thianghlim ngaingai. Rev. Van Thawng Lian te inn zong inntha tatkatk asi. An inn kamte ah tibual dawh taktak a um i, an inn le tibual karlak ah dum an tuah i, an dum cu aa rem tuk hringhran.

Inn rangmi khi Rev. Van Thawng Lian inn asi

An inn kam ah tibual lian ngai a um. Tii cu a thianghlim i Texas nilinhnak ah dum dildel tein aum i aa dawh tuk hringhran. Rev. Van Thawng Lian te cu dum tha ngai an ngei. An dum ah Kawlram eidin aphunphun an cin i lung a leng tuk. An cinmi thilnung ka hngalh khawh tawk cu:

1. Anthur aphunphun
2. Hamhhmui
3. Kayoon-zuat
4. Makphek phunphun
5. Tipi-hmaihrem
6. Danhtalun
7. Retei
8. Sangphaw
9. Sentawk
10. Bawnbok
11. Khui-tohzuat
12. Hmaihremte
13. Phazian aphunphun
14. Zungpa-te-tii
15. Mai-an
16. Khachuan le piat
17. Putinan

Hi an dum ka hmuh hnu in Texas ah hin, Lairam le Kawlram eidin paohpaoh cu cin khawh asi ko lai tiah ka ruat. An kung le hnah an tha kho tuk. Asian mi tampi abik in Kawlrammi tampi um ahcun sipuazi ca in Lailei eidin cin khawh ding asi. Nikhatkhat cu Lailei eidin cinthlaknak in USA ah Laimi a paw aa cawmmi an tampi te lai tiah ruahchannak a um. 

A ka thlahtu Vl. Rung Hlun he NASA Space Center pawngah

A thaizing August nikhatni (Monday) cu NASA center ah Pa Rung nih a ka kalpi. Hmunhma ropui taktak asi. Cuka ahcun NASA Space Center kan zoh. Thlapa cung an rak kai lio i Mission Control an zungpi kan zoh. Cun SATURN V timi Thlapa cung kainak program i rocket an chiahnak inn te hna kan zoh. Acre 1,000 renglo kau asi caah, ke in kal khawh ding asi lo in, tlanglawng kan i cit. (Cuka kan lennak cu NASA Space Center timi in ka dang ah ca ka tial).

Cuka hmun ah zing 10:00am in zanlei 3:00PM tiang kan leng. Zoh ding a tam tuk i, len cim lo asi. Carel a huammi le science lei a uarmi caah cun tlun tak sian ding in a um lo. Caan le hmunhma nih ukmi kan si caah, tian sianglo in NASA Space Center cu kan chuahtak i, Vl. Rung Hlun nih airport ah a ka thlah than.

Airport kam hotel le innlo an si

George Bush Intercontinental Airport 

NASA Space center ka phanh tikah, ca an tialmi le video hna van zoh tik ah, Pathian nih kan "Zeizongte" (Universe) a rak serning ruah tik ah hin, khuaruahhar taktak asi kha ka fiang chin lengmang. Khuaruahhar thil hi a tam tuk.

Hlaphuahtu nih "Bawipa Pathian na tuahmi thil vialte hi ka ruah tikah ka lung nih  aphan lo" ati bantuk khan asi taktak ko. Minung fimnak zong ka lung nih a phanh lo bantuk in, Pathian thil sermi hmuh tik zongah ka lung nih a phan kho lo. NASA Space Center ka len hnu ah, ka thinlung ah a chuakmi cu, "Hi thil khuaruahhar vialte hna nih hin, Sertu Pathian a um ko" timi an langhter ti hi asi.

CCCH Member hna he philhlonak hmanthlak

                              ______________________________