Ram a ngei i, holh, ca le nunphung a ngeimi miphun caah a tha bikmi cu mah tein zalawng tein i uk le hruai hi a si. Cu zalawnnak (independence) cu ram le miphun thanchonak ah a herh bikmi hrampi a si. Miphun pakhat cu, miphun dang nih an uk i, cu a uktu miphun duh ning le a sermi phunghram in aa hruai chung paoh cu, a thancho hnga tluk in a thangcho kho bal lo. Cucaah vawlei cung ram tampi nih, ram rum le ram fim tang um kha an duh hlei lo i, mah tein uk ding caah thisen le thlanti chuak in zalawnnak kha an rak khel. Cuticun nihin ni zongah zalawnnak lak aa timmi miphun tampi an um.
Pennak Ram Kuainak
Vawlei tuanbia hlun zoh tikah, vawleicung pennak, uknak, ram le minung sining aa thleng peng. Hlanlio ah a rak cak ngaingaimi miphun lianlian hna kha an rawk i, an tuanbia aa thleng ve. Vawlei tuanbia ah pennak hlun bik a simi hna-Egyptian Empire, Assyria Empire, Babylonian Empire, Greek Empire, Roman Empire, Ottoman Empire, Mogolian Empire, Russian Empire, Portugal Empire, Spanish Empire le British Empire te hna an rak chuak. Culawng siloin kan mah chan chung bak ah Soviet Union te hna kahpathir bantuk in a khohchomi uknak an um ko. Hi hna hi an mah le chan ahcun an thawng tuk cio hna i, a kuai kho ding in ruah an rak si lo.
Sihmanhsehlaw chan tiluan nih a van kalpi. Thil sining, minung thil hngalh ning le sining aa thleng. A kuaiman kho lo in ruahmi pennak ram lianliann Empire lianlian cu an kuai, an man i, mah tein a ukmi zalawnnak ram tampi an chuak hna. Cuticun India le Kawlram tibantuk le Pacific le Atlantic Rilipi cung ram fatete nih zalawnnak an hmu hna. Kan mah chan bakah, kahpathir bantuk in a hakmi Soviet Union te hna an kuaiman i, ram 15 ah an i chuah. Hi ram 15 chung ummi ramkulh cheukhat cu, nihin ni zongah zalawnnak hmuh ding in an i zuam cuahmah.
Kum tam nawn an i kah hnu ah, Kosovo timi ram fate zong Serbia ram in zalawnnak an hmu. Russia le Tuluk nih cun an theihhngal lo nain, UN member tampi nih an theihhngalh cang. East Timor te hna zong nih a cak taktakmi Indonesian cozah kut in zalawnnak an hmu ve. A hnu bik ah South Sudan ram hna nih Sudan ram in zalawnnak an hmu.
Cuticun vawlei cu pakhat lawng asinain cu vawlei pakhat chung ah ram pakhat hnu pakhat an chuak i, vawleicungah ram a karh chin lengmang i, UN chungtel zong an karh chin lengmang ve. South Sudan hi UN chungtel ah a hnu bik a lutmi ram a si i, amah he ram 193 an si cang. Hmailei zongah an karh than rih lai.
Independence Hmuh Aa Zuammi Hna
Nihinni vawlei ah, miphun kip nih an phan bikmi cu "Kan miphun le ram a lo lai" timi a si. Hihi miphun te cu chim lo miphunpi hmanh nih an phanmi a si. Cu phannak nih cun, nunphung le sining aa dangmi miphun fatete nih mah te in ram ngeih le uk kha an duh cio cang hna. An ram, an miphun, an nunphung (ca, holh, lamkui le sining) kha kilven le nunter an duh chin lengmang hna.
Cucaah tu chun ni ah hin, vawleicung hmun zakip hmun 134 hrawng ah miphun fatete nih zalawnnak hmuh ding in an cawlcang cuahmah hna. Zalawnnak hmuhnak ding caah, a cheu cu kum sawm in an rau lai i, a cheu cu kum 100 in an rau kho. A cheu cu vawlei dongh tiang zong a hmu lo dingmi an um kho men. A cheu cu zalawnnak hmu thai lo in an miphun ci tu a mit te lai i, an ram a lo lai. Cuticun an tuanbia hi vawlei tuanbia (world history) in a tlau te dingmi miphun zong tampi an um.
Atu lio ah zalawnnak hmuh aa timi ramkulh fatete tampi a ummi chung ah zalawnnak a hmu te ko lai tiah ruah bikmi miphun hna le an umnak ram hna cu a tanglei bantuk in an si:
1. Palestine (Israel)
2. Greenland (Denmark)
3. Quebec (Canada)
4. KRG/Kurdistan (Iraq)
5. Tibet (China)
6. Donetsk People's Republic(Ukraine)
7. Jamur & Kashmir (India)
8. Chechen Republic (Russia)
9. West Papua (Indonesia)
10. Republic of Uyghurstan (China)
11. Basque Country (Spain & France ram)
12. Scotland (UK)
13. Northern Ireland (UK)
14. Nagaland le Manipur (India)
Hi a lar bikmi ram 14 chungah Kurdistan (Iraq) hi tuan bik ah independence a hmu kho men tiah ruahmi a si. Atu an i tim cuahmah. Scotland hi mipi nih duh ahcun hmuh colh bak ding a si.
USA ram chung hmanh ah, Alaska, Hawaii, Puerto Rico le Texas te hna hmanh hi independence hmuh an duh rih. Zalawnnak hmuh ding hi an thinlung ah a nung rih. Nihin ni thil sining ahcun harnak tampi a um ko rih lai nain, Russia le China hna zong ah independence ram an i chap lai lo ti khawh a si lo. Empire Pennak ram lianlian an tlu ko hna i, United States zong hi, hi tining in a si peng lai timi cu, a ho hmanh nih chimngam a si lo.
Nihin ni vawlei hi aa thleng chin lengmang. Cucaah ram fatete zong nih mah te uk an duh chin lengmang i, an cawlcang ngaingai hna. Nihin ni ah, UNO zong nih theihhngalh lo in ram pakhat hnih lawng nih theihhngalhmi zalawnnak a thanh cangmi ram zong an um hna.
Cu chungah Georgia ram chung ummi, Abkhazia cu ral an tho i 1993 ah Georgia ralkap vialte an ram in an dawi dih hna. Republic of Abkhazia tiah min an i sak i "zalawngmi ram kan si" tiah an ti. UN chungtel ram pangani nih an theihngalh hna. South Ossetia zong 1991 ah ral an tho i, Georgia he an i kap than. 2008 ah "Zalawngmi ram kan si" tiah an thanh ve i, Russia le a dang UN chungtel ram pali nih an theihhngalh than hna.
2014 ah Ukraine nichuahlei ummi Donetsk People's Republic zong "Ukraine in ka chuak" tiah an ti ve. Nikhatkhat ah zalawnnak an hmu lai lo tiah chim khawh a si lo. Scotland cu "Zalawnnak kan la lai maw la lo?" timi mipi vote peknak an rak tuah i, lak a duhlomi nih tlawmte an tei deuh hna i, UK ram ah an um rih. Nikhatkhat ahcun independence an la lai lo ti khawh a si lo.
Hi vialte hmunhma 134 tluk ah independence an khel cuahmah i, hi chungah Kurdish Regional Government (KRG) timi hi September 25, 2017 ah Independence kan la lai maw la lo timi mipi duhnak lak ding an i tim. KRG hi tuan ah independence a hmu dingmi an si lai tiah ruah an si. An hmuh ding zong hi an caah thi tha a si. Thnapek ding a si. Iraq i an i benhnak cha cun, an mah kong an mah te nih an i caihkhan i, an mah tein an uk le tawlrel kha a let tamtuk in thil tha ding a si.
Zalawnnak Man
Vawleipumpi area cu a karh ti lo. Cucaah vawlei le ram hi i cuh chin lengmang. Ram kau taktak a ngeimi Russia hmanh nih "Crimea" cu a lak duh rih ko. Tuluk le India cu zeihmanh a umlonak tlangcar an i cuh peng rih ko. South China Sea ah, Tuluk nih rili a chilh i tikulh tamlak a ser chap ko hna. Cu ruangah innpa ram he huatnak le remlonak zong tampi a chuak. Cutluk cun vawlei ramfim hna nih, vawlei acre khat caah raltuk an ngamh cang.
Vawlei area aa chap ti lo nain zalawnnak ram cu aa chap chin lengmang. Hi pin lei zong ah aa chap peng rih ko lai. A ruang cu miphun fatete nih "Mah nunphung, biaknak, kokek sining, holh, ca le mah sining te kha zohkhenh le kilven an duh. Mah tein zalawng tein i uk le hruai an duh chin lengmang caah a si."
Cucaah, a cunglei kan tialmi zalawnnak a hmumi ram hna nih hin, fawi tein zalawnnak an rak hmu bal hna lo. Minung nih harnak tam tuk an tuar. Thlanti a put, thisen a luang. Nunnak tam tuk a liam hnu le khuaram rawhralnak tam tuk a um hnu ah, zalawnnak hi an hmuh cio hna. Cucaah "Zalawnnak cu a man a fak tuk" tiah an tinak a si. Zalawnnak cu a cawk in cawk a hau. A man pek dingmi cu, "thlanti, thisen le nunnak" a si. Nunnak thaap lo in zalawnnak a um kho lo.
Tahchunhnak ah, Mahattama Gandhi le India mipi nih Mirang kut in zalawnnak hmuhnak ding caah harnak tam tuk an rak tuar. Aung San le Kawlrammi nih Mirang kut in zalawnnak hmuhnak ding caah, Japan tiang an rak i rawih hna i harnak phun zakip tuar hnu ah Kawlram cu zalawnnak a hmu. Pu Laldenga nih, Union Territory in State dirhmun a phanhnak ding caah Mizomi nunnak tam ngai a liam. Zalawnnak ngaingai hmanh an hmu thai lo. Cutluk cun zalawnnak hi a man a fak.
Cucaah zalawnnak cu a man fak taktak in cawk a hau. Ngakchia, nu le tar tiang nih a man cawi a hau. Cu ti a man cawi hnu lawngah zalawnnak hmuh a si. A man a cawi kho lomi le cawi duhlomi nih zeitik hmanh ah zalawnnak hmuh khawh a si lo i, an donghnak ah an miphun an tlau i an tuanbia vawleicung in a lo tawn. Cu bantuk miphun a lomi hna cu Baibal Biakam Hlun chan-Edom, Canaan, Moab, le Israel phun (10) zong-an tlau thai ko. Hi vawleicung ah miphun tlaumi an tam tuk cang timi kha, vawlei tuanbia ah hmuh khawh a si.
Bia Donghnak
Laimi cheukhat cu Kawl cozah thluak le lungput nih a kan tei tuk. Cucaah federal hmanh khi a tihmi le duhlomik le ralchia mi kan um rih. Cucu thil pawi taktak a si. Kan lungput zeitluk in dah a niam i, a ral a chiat timi kha cu nih cun a langhter ko.
Federal hmanh kan tih ahcun zalawnnak he cun kan i hlat tuk cang. Laimi cheukhat nih ca an tialmi ka rel tawn. "Chin State cu independence hmuh ding kan i tlak lo? Kan si a fak tuk? Leicung leitang thil chuak kan ngei lo? Lamsul a chia tuk. Hmunrawn kan ngei lo? Leikuang kan ngei lo? Khawidah rawl kan lak lai? Zeitindah kan i cawm khawh lai?" tiah a timi ka hmuh len hna.
Hi tluk in vawleicung ah an va hmuh pek, hmuh lo pek ah independence hmun 134 hrawng ah an khel lio mi hna hi teh zeidah an si hlei? An ram hi Lairam nak in a tha deuh hlei maw? A rum deuh hlei maw? Thilchuak a tam deuh hlei maw?" timi ruah a hau. Independence a hmu cangmi ram tampi hna hi teh Lairam nakin an rum deuh le that deuh caah maw zalawnnak hmuh? Hi hna zalawnnak an hmuh ve ko ahcun, Lairam zong nih a si kho ve ko hnga lo maw?" timi hi kan ruah taktak a herh.
Cucaah vawleicung ah ram tam tuk nih zalawnnak an rak hmuh cang bantuk in a tu lio zongah a khel cuahmahmi tampi an um lio caan ah, "Kan nih Chin State hi teh zalawnnak hmuh a phu ve maw?" Hihi a phi ruah ding caah "Chin State hi independence hmuh a phu maw?" timi capar rak rel than te law tiah kan sawm.
Saturday, July 1, 2017
Friday, June 30, 2017
Leitla Lungkua
Leitla Lungkua |
Chaklei Laitlang ah hin, lungkua minthang tampi kan ngei hna lo. Falam Peng ummi Lailun lungkua, Thantlang peng ummi Leitla e La-aw tiva kam ummi Milukua hna hi an si. Thantlang peng ahcun nihin ni tiang hmuh cangmi kungkua vialte lakah, Leitla lungkua hi mi thang bikmi pakhat a si.
Nihin ni ah Lairam ah ramchung le ramleng tourist an luh duhnak hnga ding hi lam kawl a herh i, hi bantuk in thil phundang deuh a simi hmunhma hna hi, kawlhawl, hlathlai le dawhte le hmunhma nuam ah ser hi a herh. Mizoram zong khi Tourist Department an ngei i, cu nih cun an ram chung i phundang deuh a simi hmunhma poh khi heh tiah an ser i, tourist in tangka hmuhnak lam an kawl.
Minung zoh in a thuh ning theih khawh a si |
Lungkua chung lutmi hna |
Leitla lungkua luhnak hram ah hin, a cunglei hmanthlak bantuk in hnahcang kung dawh taktak an keu. Hnahcang kung zong an zuahmi hi, thiltha a si. Zeicatiah hnahcang nih lungkua a thawmh i a dawhter chin ve. Kokek dawhnak kha hrawk lo tein chiah a herh. Papalak zong thah ding an si lo. A karh tu in karhter ding le minung thinlung hlang ding in zohkhenh ding lehlam tu an si.
Leitla lungkua dawhtertu Hnahcangkung |
Acunglei hmanthlak hi Leitla kalmi hna nih a kan kuatmi a si. Lungkua a kaunak ah hin, minung 40 fai tlum khawh a si an ti. Lairam ahcun lungkua lian pawl a si men lai. A chungah a dirmi nute khi hei zoh in, hi lungkua hi zeitluk in dah a lianh timi cu tuaktan khawh a si. Minung a dirnak pinlei ah lungkua hi a va thuk ngai rih. Minung luh khawhlonak tiang a va kua peng rih ti a si.
Saikah khuami pakhat nih, "Hi lungkua ah hin, uico an luhter i, ka dang farlong 2/3 tluk a hlatnak ah a kua dang pakhat um i, cuka cun a rak chuak" tiah a rak ti. Cu ti a si taktak ahcun, a sau ngai lai tinak a si.
Atanglei hmanthlak zoh ah, Leitla lungkua hi a mui ngaingai timi a fiang. Hi tluk in meifar an vaan hmanh ah, a mui ngaingai. Nihin ni ahcun tha tein mei an van khawh cang tikah, papalak an um tuk ti lo tinak a si kho men. Papalak an loh tukmi zong cu, a pawi ngaingai.
Meifar vanh bu hmanh in a mui ngai |
1. Lungkua lutmi nih, papalang thah lo ding
2. Lungkua kam thingram hrawh lo ding
3. Lungkua chung lung le tuktak lak lo ding le hrawh lo ding
4. Eidin le hnawntam kaltak lo ding le thurhnomh lo ding
Hi bantuk in zulh ding phung tha tein tuah le lamsul tha tein ser piak khawh a herh. Cuticun lungkua a himbawm lai i, khual zong nih zoh duh awk te in aum peng lai.
Laimi cu thilnung kongah khua kan ruat lo ngai. Cucaah papalak hna hi thah bak lo ding in i phung ser a herh. Zeicatiah Leitla lungkua chungah papalak tampi um hna sehlaw, cuticun tiram le ramsa zoh ruah ah khualtlawngmi (eco-tourists) zong tampi an ra lai i, a pawng ummi khuate hna abik in Ruakhua caah tangka zeimawzat luhnak a chuak kho te dingmi a si.
Cun sianghleirun kaimi Laimi mifim cathiam Zoology le Botany cawngmi hna nih, saram le thingram kong hlat an duh tikah Leitla Lungkua le papalak hna hi, a man a sunglawi tuk te dingmi an si. Research tuah an duh tikah, fawi tein va hmuh awk le tlaih awk zong a um ding a si.
Leitla zoh duh ahcun, Hakha-Thantlang-Thangzang in Ruakhua tiang, motor le motor cycle in kal khawh a si. Zahnak Tlang hi lam a phei. Thangzang le Ruakhua kar zong motor lam phei dawh taktak an cawh i, umkal a nuam taktak ti a si. Thal ahcun a kih pinah, fingtlang aa dawh tuk i, lung a leng tuk tiah a tlungkalmi nih an chim. Kei zong hrawn ka duh ngaingai ve.
Thangzang-Ruakhua motor lam |
Chinchiah
1. Leitla Lungkua hi Ruakhua ram ah maw a um? Saikah ram ah dah timi hi, catialtu nih ka theihmi a si lo. Ruakhua ram ah a um tiah a ka chimtu nih an chimmi in ka tialmi a si ti kha langhter ka duh.
Wednesday, June 28, 2017
International Chin Baptist Mission Kong Theihtlei
ICBM hi khuaza vantoi ummi Chin miphun hna i bawm in tuanmi Mission rian nganpi a si. Chin miphun Krihfa tuanbia zoh tikah, tangka a dihmi thazaang in tuak ahcun ICBM program nakin a ngan deunmi mission riantuannak a um rih lo. Missionary palai thlahmi a tlawmtam in tuak ahcun CCOC hi a lian bik a si. ICBM riantuannak zong a ngan chin lengmang i, Pathian nih tampi thluachuah a pek.
Atu lio ah ICBM lungthin tharchuahnak le mission riantuanmi thazaang a thawn deuhnak ding caah, ICBM Program in Rev. Shing Kee Ling, Rev. Peng Thang le Lg. Noami Partha Sung zong USA ah khual an tlawn cuahmah lio a si.
Hi a tanglei ca hi Rev. Dr. Cung Lian Hup, Director, CBCUSA Mission Department nih a tialmi chung in lakmi a si. CBCUSA Mission Sunday (July
09, 2017) ah ICBM Kong Thawngthanh a Duhmi Caah ah tinhmi he a tialmi a si.
Atu lio ah ICBM lungthin tharchuahnak le mission riantuanmi thazaang a thawn deuhnak ding caah, ICBM Program in Rev. Shing Kee Ling, Rev. Peng Thang le Lg. Noami Partha Sung zong USA ah khual an tlawn cuahmah lio a si.
CBCUSA Office (Indianapolis) |
A min: International Chin Baptist Mission (ICBM)
A tuantu: CBCUSA Mission Department
A tuannak Hmun: Chin State (Mindat Peng, Paletwa Peng,
Kanpalet Peng) le Gangaw Peng
Thok Kum: July 2013
A tuanmi:
1. Missionary 76 a thlah hna.
2. Kan mission field 4 chung in sianghngakchia 56 cu
Hakha ah sianginn kan kai ter hna.
3. Kan mission field 4 chung in college sianghngakchia
7 cu Government University le College ah ca kan cawn ter hna. Pakhat cu Magwe Medical University ah a kai
lio.
4. Matupi Union Theological College ah sianghngakchia
10 kan cawm hna.
5. Nurse Aids
Training a awng cang i field ah rian a tuanmi Sayama 12 kan zohkhenh hna.
6. Nursery School (Mu-cu) ah saya 9 kan zohkhenh
hna. Mu-cu sianginn zong cu ICBM zohmi an si.
7. Simitlang Baptist Association (Mindat) in
sianghngakchia 30 cu Mindat khua ah sianginn kan kai ter hna.
8. Mindat,
Kanpalet, Paletwa, Gangaw peng le Simitlang Associations hna i zung riantuan tu
hna caah, thlakhat ah USD 1000 lengmang kan bawmh hna.
9. Atu tiang ah
Biakinn kan sak cangmi 10, kan sak liomi 5 an si.
10. Atu tiang
ah Pastor inn 5 kan sak piak cang hna.
Training le i zokhenhnak kan
tuanmi tete (tah chunhnak: ESSI timi mirang
ca cawnnak program le Thilthit Cawnnak tibantuk) kan tuanmi a um pah na in, kan
van langhter ti lo.
Paletwa ah thilthit training kaimi hna |
Nurse bawmtu sianginn kaitermi a dih cangmi hna |
Mindat ah sianginn kaitermi Simitlang siangngakchia |
Kawlram Riantuantu Hna:
Myanmar Director (Hakha): Pastor Thla Tin Thang
Administrative Officer
(Hakha): Rev. Van Lal Hngak
Office Secretary (Rangoon): Pi Sai Bor
CBCUSA Mission Department Committee:
Chairperson Rev.
Tial Lian
Vice Chairperson Rev.
Stephen Hre Kio
Secretary Rev.
Cung Lian Hup
Members: Rev.
Thawngling Mualhlun
Rev.
C Duh Kam
Rev.
Thlaawr Bawihrin
Rev.
Ngun Awi
Rev.
Chum Awi
Rev.
Zo Bawi
Rev.
Chan Thawng Lian
Rev.
Phun Ceu
Pastor
Dawt Peng
Pu
Khua ThawngMission Department Committee hruaitu hna |
Thursday, June 22, 2017
Tangka Tampi Hmuhnak A Simi Ohio Stadium
Ohio Stadium Kong Theihtlei
Sak kum | 1922 |
Architect | Howard Dwight Smith |
A dihmi | $1.3 million |
A voikhatnak bik Game | Ohio Wesleyan, Oct. 7, 1922 |
Dedication Game | Michigan , Oct. 21, 1922 |
Hawihlan tlummi zat | 66,210 |
A tu lio tlumi zat | 104,944 |
Minung tambik thut | 105,708 vs. Michigan, 2006 |
Artificial Turf Installed | 1970 |
Ram cin kum | 1990 |
Remh than | 1999-2001 |
Re-dedication | Akron, 2001 |
Stadium zapite a kauh | 2,892 ft. |
Stadium a tung vang | 919 feet X 679 feet |
Ohio Stadium hi Ohio State University (OSU) ngeihmi a si. Horseshoe Stadium ti zong ah min an sak. A ruang cu "Rang kedan" bantuk in a tungtlang a um caah a si. Aa thawkka ahcun Ohio State Buckeyes football team le OSU Marching Band caah an rak sakmi a si.
1996-1998 tiang Ohio Stadium cu Columbus Crew of Major League Soccer timi nih an rak hman. Crew Stadium an sak 1999 tiang an rak hman. Crew Stadium hi USA ram pumpi ah bawlung ca bakbak i sakmi certual hmasat bik a si. Columbus downtown chaklei ah a um.
Ohio Stadium hi 1923-2001 tiang, OSU lentecelhmi pawl le tlik zuammi pawl nih an rak hman. Concert phunphun tuahnak zong ah an hman i U2 te hna, The Rolling Stones, Pink Floyd le Metallica hna zong nih an rak hman. OSU Spring Commencement nih May thla paoh ah degree laknak ah an hman rih.
Cucaah Ohio Ramkulh ah thutnak a tambikmi stadium a si i, USA i football stadium ah lianh ah pathumnak a si i, tlik zuamnak stadium a silomi ahcun vawleicungah stadium lakah lianh ah palinak a si. A san zong a sang. A umnak hi khualai a si pin ah, OSU campus ah a ummi a si caah, minung an hlunghlai ngaingai. Chun he zan he minung an hlun pin ah, Football game zuamnak a um lio ahcun, a hlunghlai khun. Stadium hi an khat taktak tawn.
A caan ahcun mi an khat taktak
|
Ohio Stadium hi, 1922 ah rak sakmi a si caah a hlun ngai cang. Tuanbia ah min ngei ngaimi stadium a si caah, March 22, 1974 ah National Park Service nih National Register of Historic Places timi ah an chiah ve. Nihin ni zongah USA ah football ahcun a min a thang bikmi stadium pakhat a si.
Ohio Stadium hi USA ah lianh ah pathumnak a si i, tet deuh an thut ahcun 108,000 tluk an i tlum i, a buaktlak in tiket pakhat ah $79 a si i, voikhat lentecelh i an hmuhmi dihlak hi 7.15 millions tluk in an tuak. An hmanmi le laksawng le tuktak an zuh hnu ah, an miakmi hi 5.7 million khan lengmang a si tiah an ti. A zor deuh caan le tam deuh caan cu a um ve lai.
OSU Campus le Ohio Stadium |
Biadonghnak
USA ahcun lentecelh minthang hna cu an rum bak. Cun Club zong hi an rak rum tuk hna. Certual zong hi tangka hmuhnak ah an hman. Ohio Stadium pakhat lawng hmanh nih ticket in tangka tam tuk an hmuh. A pawngkam tuktan zuarmi hna nih an hmuhmi cu a tam tuk ding a si.
Lairam zong hi zeidang sipuazi tuahnak kan ngei tuk lo. Abik in lentecelhnak hi pawcawmnak ah an tla kho lo. Certual zong hi ngeih sawh in kan ngeih. Tangka hmuhnak ah an cang kho lo. Ohio Stadium bantuk in Lairam certual hna hi zeitik ah dah tangka hmuhnak an can ve te hnga timi ka ruat.
Thiltha cu cawn ah a tha. Zuam ve ah a tha. Hmailei ahcun Hakha le Thantlang tibantuk hna zong hi, kan certual hi tha deuh in ser, a kulh zong kulh ve le nuam tein tuah i, lentecelhnak le bawlungchuih zuamnak pipa um caan ahcun, tickets zong a zuar in zohter ve ding hi thiltha ding a si. A chuakmi tangka cu lente aa celhmi hna laksawng le tuktan ah hman khawh a si lai. Cun certual zohkhenhnak le kilvennak ah hman khawh a si lai. Cuticun a zohtu zong nih sikan ngei deuh le sullam ngei deuh in zoh khawh a si lai. Kan miphun zong kan thangcho deuh ngai lai.
ECBC Vawlei Theih Zungzalnak & Philhlonak Ca
Emmanuel Chin Baptist Church (ECBC) hi Franklin County, Columbus, Ohio ah a ummi Lai Krihfabu pakhat a si. 2009 ah Krihfabu dir hram aa thawk. Pathian dawtnak in 2012 ah vawlei acre 15 renglo kan cawk i, cu kan cawkmi cu a rawn ngai. Hmunhma nuam taktak a si. Kan cawknak zong $145,000 lawng a si. Hmunhma tha tuk a si caah, Bawipa nih a kan pekmi kan Bethel a si ko kan ti tawn.
A pawng ah inn tampi a um i, khuahriang a si nain Laimi caahcun a lai khan ah a tla. Kan Krihfabu member dawng 12 tluk nih inn a pawngte ah an cawk cang. Ke in kal khawhnak an si.
Vawlei kan cawk ka ahcun burbuk le thingkung fatete lawngte a si. Kan mah tein thingkung le burbuk vialte kan phuk dih. Cu hnu ah leithuangmi kan hlan hna i, vawlei kan remh dih. Hmun rawn a si caah, kan fale caah certual tuah piak a tha lai kan ti i, standard size certual pahnih kan tuah piak hna. Cu certual ahcun kum khat ah CYO bawlungpuai le CCSO bawlungpuai zuamnak kan tuah tawn.
Sunday school ngakchia nuamhnak ca siseh, Picnic le zeidang a herhmi nuamhnak zong kan tuah tawn. Hawikomhnak kan ngeih caan ahcun, kan nule nih eidin phunphun an ser. Kan mino nih juice, tii le tuktak a phunphun an zuar i kan i nuam tuk tawn.
Hi hmun ah hin, Kawlram lei in a kan tlawngmi biaknak le vawlei lei kan pa le tampi nih thla a kan campiak. Laimi kan pa bik pakhat a simi Rev. Dr. Steven Hre Kio zong a phan. Laimi ni pa can ah kan hmanmi hna Rev. Dr. Cung Lian Hup, Rev. Thawngling Mualhlun, Rev. Dr. Thla Awr Bawihrin, Rev. Lian Hre, Rev. Dr. Za That, Rev. James Tial Lian, CCU Principal Rev. Dr. Henry Siang Kung, UTC Principal Rev. Dr. Thawng Hnin Zam le hlasak thiam Moe Moe le Rev. Dr. Clifford Van Thang te hna zong an phan. Laimi dothlennak kan pa Pu Zing Cung zong a rak phan. Kan chim cawklomi Laimi hruaitu dang tampi an phan. 2015 i a CBCUSA khual sunghar Lawngtlai in Lairam LIKBK upa pawl zong an rak phan ve i, nuam taktak in caan kan hmangti hna.
CBCUSA ah kan pa bik a simi Rev. Dr. C. Duh Kam nih
"The Future Site of Emmanuel Chin Baptist Church" timi signboard zong 2014 ah a rak kan bunh piak. Cu signboard cu zumhnak in kan rak tar i, 2017 ahcun biakinn dir kho ding in Pathian nih thluachuah a kan pek.
Pathian dawtnak in January 2017 in biakinn sak kan thawk i, October ah lim le luh ding in saduh kan that.
Hi hmun ah hin 2012 in 2016 tiang nuam taktak in caan kan hmanti tawnnak a si. Ram a hninghno, Thingkung a bur i an tha. Ngaidem a tha tuk, Va le thilnung tete zong an tam. Hi hmun ah thla kan camti. Bawlung kan bengti. Bawlung kan chuihti, Ram kan riamti. Thingkung kan cingti. Kan umhar caan ah lamlennak ah kan hman. Cu tluk hmunhma tha ahcun kan Krihfabu hi kan rak i nuam tuk.
Biakinn kan van dirh tikah thingkung bur thatha kha kan hau dih hna. Nuam tuk in kan rak i celh tawnnak kan thingram bur vialte kan van hau dih hna i, an pam tuk hringhran. Khatlei ah inn kan sa i kan i lawm nain khatlei ah kan vawlei thing le thingram thing te kha ngaih a um tuk tawn. Kan rak i nuamh ning hna hi, nuamh taktak tein kan i nuam hna. Philh awk thalo in kan rak i nuam tawn hna.
Innlo a dir cang caah, kan thingram dawhdawh kha an lo dih cang i, techin fapar chan ah hi maw kan vawlei a rak si tiah kan tefa hna nih an hmuh khawhnak ding caah, a tanglei hmanthlak hna i, ECBC vawlei theih zungzalnak le philhlonak caah ka chiahmi hna an si (Edit than ding a si).
Indiana in Rev. Lal Cung Awi le hawi le a kan tlawn lio |
Pu Zing Cung, CNF Chairman a kan tlawn lio |
Lawngtlai lei LIKBK a kan tlawn lio |
Rev. Dr. Clifford Van Thang a kan tlawn lio |
Subscribe to:
Posts (Atom)
Hmurhuh Huh Lo Ruangah February Ahcun 500,000 An Thi Kho
Covid-19 zawtnak U.S a phanh ka tein CDC doctors le scientists le NIAID (National Institute of Allergy and Infectious Diseases) director Dr....
-
Lunglawmhnak Ni Tawite By Bawi Tei Kum rungvui in kan lung...
-
Jesuh nih "Si dawh lo ngai a simi bia" a rak chimmi pakhat a um. Cucu Thawngtha Cauk (Gospel) ah a ummi silo in, Lamkaltu chung tu...
-
Miphunpi tampi cu an miphun le nunphung aa tlakmi hi, an miphun hmelchunh (national symbol) ah an hman tawn hna. Cucu an tiram, an nunphung ...