Na Nunnak Ni Zeizat Dah A Tang?

"Na nunnak ni zeizat dah a tang?" Hi biahalnak hi na ruat bal maw? Na ruah lo ahcun atu ca na rel lio ah hin, ruat law tiah kan sawm.

Kei zong, nikhat hnu nikhat a liam thliahmah mi caan ah, hi biahalnak te hi ka ruat lengmang. Nang teh na ruat bal ve maw? Hihi a ruat lo mi caahcun, nunnak hi sullam ngeihter khawh asi lo.

A kan sertu Pathian nih minung a kan ser ning teh na ruat bal maw? A kan serning hi thing, lung, dar, kahi, suan le thir phun hna in a rak kan ser lo. Vawlei in a kan ser.Vawlei cu a neno cemmi, aa rawk fawi cemmi in sermi kan si ti ruah rih a hau.

Cu tluk a nennomi thilri in sermi kan si caah, kan titsa hi a rak fekfuan lo taktak. Cu tluk in a fekfuan lo mi, minung titsa te cu Cathiang nih zei he dah a kan tahchun kha?

1. Pangpar bang in a par i a uai thanmi (Job 14:2)
2. Zing ah dawh tein a keo, a thang, a par i zanlei ah a uai than mi belh (Ps.90:6)
3. Thladem in a tli i a peh lo mi (Job 14:2b)
4. Tiva a reu i a car bantuk in minung cu a thi i a tho than ti lo (Job 14:11,12)
5. Nunnak cu thaw menmen a si (Job 7:7)
6. Minmei a tian i a  lomi he a tahchunh (Job 7:9)
7. Ram le ram pangpar bantuk, a par i a til thanmi he tahchunh kan si (1 Pet 1:24)
8. Lonh khawhlomi ramri ser piakmi kan si (Job 14:5)
9. Kan ni-thla hna kha relpiakmi an si a ti (Job 14:
10. Kei dip in lakmi lei dip kir than ding tiah a kan ti (Gen.3:19c)
11. Zan mang bantuk (Ps.90:5b)
12. Voikhat thaw chem thluk le thlahawm memmen an si (Ps. 39:5,6)
13.

Vawlei in lakmi titsa cu vawlei ah kir than ding hi sertu Pathian program a rak si. Cucaah hi vawlei ah sau tlawngleng lo ding in, thir hna in ser lo in "vawlei," rawhral a fawi bikmi thil in a kan srnak a si. Cucaah kan kum hna zong khi a tawi ngai in a kan ser.

Cucaah kan kum hna hi an liam ning a rang ngai. Hi nunnak a liamning a rannak kong hi, Job nih hin fiang bik in a kan chimh. Job hi mirum zong asi nain minung nunnak kong hi aa fiang tuk i, amah nih hin zeitluk in dah nunnak a liam a rak timi cu hitin a kan chimh:-

1. Ka ni hna cu thiamtaktu thiampheifung nakin an rang deuh (Job 7:6)
2.  Kan ni hna cu a tlimi nakin an rang deuh (Job 9:25)
3. Vokkuanglawng khulrang ngai a kal bang an kal (Job 9:26)
4. Muvanlai nih sa a zuan hnawh bantuk in an rang (Job 9:26)

Nihin ni dirhmun in chim ahcun, kan ni hna hi "missile" (bomzuang) tluk in an rang a kan ti men lai. Cutluk in cun minung hi kan chan a tawi.

Cu kan kum cu k.120 cung nung ti lo ding in Genesis ah a rak khiah. Siangpahrang David chan ahcun, David nih a zoh lengmang tik ah, Pathian nih minung kan nun caan hi hitin a ser tiah a rak hmuh. Cu a rak hmuh lio caan hi BC 1100 kuakap asi nain nihin ni tiang cu hrawnghrang peng asi.
 Cu kan kum cu zeican dah asi ti a si kha?

"Kum 70 lawng asi ko. Thawn deuh le 80 asi a ti" (Pslm 90:10)

Hihi kan vawleicung ram rumbik in ram sifak bik tiang tuak tikah, zapi zaran nun kum hi 70-80 karlak lawng an rak si. Kawlram i minung nun kum cu 65.94 lawng asi ko. Chad ram nunnak hna cu kum 49.94 lawng asi. Job nih "Ka nun chung ni hi an tlawm ko lo maw? (Job 10:20/21) ah a ti bantuik in kan Ni hna hi an rak tlawm taktak.

Cu kan nun NI ni tlawmte hi, rel le tuak a herh. Cu lawng ahcun hi vawlei ah ni zeizat dah NI ka ngeih rih le zei can dah ka nun rih lai aa fiang kho lai. Cu lawng ahcun nunnak hi sullam a ngei lai i, man a  ngei kho lai. Cu asiloahcun nunnak hi "nun sawhsawh  le man ngei lo taktak in nun a fawite."

Asiahcun careltu hna, "Nang na nunnak ni zeizat dah a tang rih?" timi te kha kanan in zoh u sih.

Bible nih cun minung nunnak caan hi, kum 70 le kum 80 ceu asi a ti. Kum 70 a nung ding in ruat u sih. Zei cah dah a nun lai? Kum khat ah ni 365 a um caah, 70 x  365 = 25,550 a nung ding asi. Cu mipa/minu cu kum 40 a phanh cang asi ahcun, a nun ciami kum hna cu, 70x40=14,600 ni a nung cang.

Asiahcun hi vawlei ah ni zeizat dah nunnak nawl a ngeih rih timi kan tuak ta lai. A tang rihmi kum hna cu 25,550-14,600=10,950 asi.

Hi kum hna hi nikhat hnu nikhat in an lan thliahmah. Tlaih khawh lo in an liam ko hna. Ti lian nih thinghnah a fenh bantuk in, "Ti lian bantuk in minung cu a kan fenh" (Ps. 90:5).

Cucaah, "Kan nunnak hi, zeitluk in dah a tawi ti kha kan hngalhter law cuticun kan fim deuh hnga?" (Ps. 90:12) tiah Cathiang nih a kan ti bantuk in, kan nunnak ni hna hi rel le zeitluk in dah a tawi ti kha hngalh kan herh.

Cucaah careltu nang zong nih na nunnak tuak ve. Kum zeizat dah hi vawlei ah na nun cang? Hi pin ah kum zeizat dah na nun rih lai? Cu a tang rihmi NI hna ah hin zeitindah ka nun lai i, zeidah ka tuah lai? timi ruah a herh. Cuticun zeitluk in dah kan nunnak hi a tawi ti kha ruat le hngal in, taksa, thinlung le thlarau ah a fimmi si a herh.

Cubantuk si khawhnak ding caah, "Na Nunnak Ni Zeizat Dah A Tang?" ti hi na tuak bal ve maw?