Rilipi Tii Kaining A Rang Deuh Lai

"Lairam ca ahcun Rilipi tii a kai lai i, a kan phum lai" timi cu phan ding a um lo nain, rilikam khua tampi hna le Pacific Rilipi, India Rilipi le Atlantic Rilipi cung ummi tikulh ram fa tete caah cun, a taktak in an ton cuahmah cangmi thil tihnung taktak an si cang. Pacific Rilipi cung tikulh cheukhat cu an chuahtak cang hna i, a cheu cu rili tilet nih fak chinchin in a den chin lengmang cang hna. Nihin ni ah hin, rili tikulh tampi cu rili tii a almi nih a hrawh cang hna i, pawngkam rawh ruangh ah refugee hi an tlawm ti lo ti a si. Rilipi tii a kham khotu "mangrove tree" an cin hna i, cu dah ti lo cu van i runvennak ngaingai hi a fawi lo. An si a fah caah, rilipi tii kham ding cu a si kho fawn lo.

Vawleipumpi lumnak le rili tii kaimi kong hi, tambik a hlathlaimi le a tuaktan bikmi cu IPCC (U.N Intergervernmental Panel on Climate Change) an si. IPCC ah hin, ram kip scientists an i tel. "IPCC nih hlan lio deuh i an rak tuak ning nakin, rilipi tii kai ning hi a let hnih (2) in a rang deuh lai" tiah research a tuah tharmi nih an ti.

A ruang bik cu vawleipumpi lum ning hi an ruahnak leng in a ran deuh caah, a tii lem lo tiah rak ruahmi tikhal tlang chahchah kha tiit an timh caah a si. A bik in a fekfuan i a ti lem lai lo tiah an ruahmi Antarctic Tikhal Dar (Ice Sheet) kha tiit an i timh caah a si. Hi Tikhal Dar hi Antarctic Nichuahlei kam ah a ummi Tikhal Dar chahchah an si. Hi tikhal hi vawleicung tikhal a chah cemnak le a kih cemnak a si i, hlan deuh ahcun a ti kho lai lo tiah an rak ruahmi a si.

Hi kong hi Earth's Future timi journal ah an tial. Hlan ahcun hi Tikhal Darpipi hi an ti lem lai lo tiah an ruah nain, tiit an i tim cang ti a si. Hi Tikhal Darpipi hi an tit ahcun vawleicung rilipi tii hi pe 200 tiang deng a kai kho tiah an ti. A cheu rilikam khua ahcun tii a kaimi a thuk deuh lai i, a cheu ahcun a puan deuh lai ti a si. Hi an tuaktan ning zoh tik ah, a hlan ah an rak chim ballomi a si.

Scientist tam deuh an rak phanmi cu Arctic Ice timi Canada chaklei i tikhal tlang lianlian a tit dingmi hi biapi ah an rak phanmi a si. Hi Arctic Ice timi tu cu a ti tuk cang i, tilawng kal khawhnak in rilipi lam a awng cang lai ti a si. Cu tluk cu vawleipumpi linhnak nih tikhal tlang lianlian hi a titter hna.

IPCC tuaknak ahcun a tu ning tein tikhal an tiit ahcun kum 2100 ah rilipi tii hi pe hnih le lehmah 5 a kai lai tiah an rak ti. Earth's Future catialtu pawl tu nih cun a tu ning tein carbon te hna an chuah peng ko ahbcun 2100 ah rilipi tii pe li a kai lai tiah an ti.

National Geographic nih an tialnak ahcun Nichuahlei Antarctica i, tikhal darpipi hi a cheu hmun ahcun pe 12,000 an chah i, cucaah Nitlaklei Antarctica nakin a tikhal dar kha a fekfuan deuh i, vawleipumpi lumnak nih a tit kho ter tuk lai lo tiah an rak ruah.  Asinain Earth's Future catialtu nih an hmuhmi cu Nichuahlei Antarctica tikhal dar hna hi ruah ning tluk in an rak fek lem lo tiah an ti. Hi catialtu pawl hi Austin khua ummi University of Taxas le University of South Florida i scientist bu pawl an si.

Earth's Future scientist pawl nih an timi cu, "Vawleicung pumpi nih vawleipumpi lumtertu greenhouse gas hi, hi hnu kum tampi heh tiah an thumh ahcun, rilipi tii thangmi nih 2050 ah harnak a kan pek dingmi rawhnak hi, tlawmte cu a zor deuh lai" tiah an ti.

Rilipi tii thangmi nih a phum zau lai tiah an ruahmi Fanning Tikulh (Kiribati) 

Paris khua i U.N nih an tuahmi Paris Climate Agreement timi "Vawleipumpi greenhouse gas thumh ding" timi ramkip nih an i zuam ahcun, Antarctic tikhal darpipi a tit ning kha a tlawm deuh ngaingai lai tiah an ti. Paris Climate Agreement ah U.S dah ti lo cu, vawleicung ram vialte an i tel dih cang. President Donald Trump chan ah hin, U.S hi hawi a zawng lo i, E.U le a dang U.N ram vialte zong an thin a hung i, "U.S nai tel lo zong ah kan mah lawng in kan kal ko lai" tiah an ti phah. Zeitluk in fim le rum hmanh ah,  "Thil tha tuahnak ah, hawi zawnglomi rak si hi, thil pawi taktak a si." 

U.S hi vawleicung thli a hnomhter bik tu ram pahnihnak a si. Tuluk le amah lawng nih hin vawlei pumpi dihlak "greenhouse gas" zatceu dengmang an chuahter. U.S ngaingai aa tel lo ahcun, ramdang nih zeitlulk in thli thian an i zuam zong ah, U.S nih thli hnawmtam a chuah peng ko ahcun, vawleipumpi khuacaan lumnak doh cu a fawi ding a si lo.

A rangmi hi Antarctic Ice Sheet timi cu a si.

Tikhal tampi a um ve nak, Arctic Ice timi cu a timi a kau tuk cang

Ram kip nih biatak tein rilikam runvennak le vawleipumpi lumnak doh hi, khulrang tein an an tuah lo ahcun, atu kum zabu dih tik ahcun minung million 153 an umnak vawlei cu tii nih a phum lai ti a si. Cu vialte minung cu, a tu lio U.S.A minung i zatceu tluk an si tiah an ti. Tih a nung hringhran.

Scientist tampi nih hlathlainak dangdang an tuahmi zoh tik ah, U.S.A ah rilipi tii thangmi nih tambik harnak pek khawhmi rilikam khuapi hna cu, Miami, Houston, New Orleans, Charleston, New York, Boston, Fort Lauderdale hna hi harnak tan tong ngaingai lai ti a si. Cun rilipi tii a thangmi ruangah, Virginia ramkulh Norfolk khua le Louisiana Thlanglei rilikam hna ahcun rilipi tii kaimi nih vawlei acre tampi a phum cang. Khua zong an chuahtak pah len cang. Tourist tam taktak lennak Chesapeak Bay Area hna hi, rili tii chung ah khulrang ngai in an pil cang ti a si. Khua caan aa thlengmi ruangah, voidang ah ASIA ah vanruah tithlet in aa thle tawnmi kha, atu ahcun Oregon le California ah a bungh in aa bung tawn i, rikilam khua i rilipi tii kai ning hi, a rang deuh ngai ti a si.

Louisiana ah rili tii kaimi nih lam le vawlei acre tampi a phum cang

Research an tuahmi pakhat ah "Rilipi tii hi 2100 ah meter pakhat a kai ahcun Florida i tuanbia hmunhma 6,000 hi tii nih a hrawh lai" ti a si. University of Tennessee, Indiana University, Northern Kentucky University in scientist hna le a dang scientist cheukhat nih an timi cu, rilipi tii meter pakhat a thangmi nih U.S nichuah thlanglei tuanbia hmunhma innlo hi 19, 676 a rawk lai" tiah an ti ve. Nihin ni ah hin, scientist pawl chimmi hi, vawleipumpi lumnak kong ah, pakhat hmanh aa hlenmi a um rih lo ti a si.

A liamcia kum 30 hrawng an rak chimmi kha an hman cuahmah i, an tling cuahmah ko ti a si. An rak chim ning bantuk tein, vur zong a tam ti lo; ramkip ah thingram kanghnak a zual; tilian a chuak i, khua a hrem. Hi vialte hi khuacaan thlen ruang ah a rak cangmi an si. Hi pin zongah an chimmi hi a dik te ko lai tiah ruah a si.

Meter 3 kai ahcun a sennak viale cu a khuh dih lai ti a si

U.S. scientist nih an hmuhton cangmi in an chimmi cu tihnung ngaingai a si. 1992 nak in Florida kam rili hi a buaktlak in lehmah pali (4) a thang deuh cang ti a si. National Oceanic & Atmospheric Administration timi rilipi tii lumnak le khuacaan kong hlathlaitu hna nih, 2060 ahcun Miami kam rilipi tii hi pe thum (3) a thang deuh lai ti a si. A tu kumzabu a dongh (2100) ahcun, Florida rikilam innlo 934,000 hi rilipi tii thangmi nih a hrawh lai tiah Zillow nih a ti. Dollar in tuak tikah, billion 400 renglo a si an ti.

Hi bantuk in rilipi tii a kai lai caah, 2100 ahcun a tu Pre. Trump innpi Mar-A-Lago tim zong hi tii nih canceu tiang a phum te lai ti a si. A him hlei lai lo tiah an ti. Nai hrawng i Florida i Hurricane a hrangmi tilian hmanh ah a tongh hrulh ve cang i, hi area hi a himbawm lo taktakmi hmun pakhat a si cang ti a si. Rilipi ti cu mi thleidan a ngei lo i, mirum le mifim inn zong a hrial hlei lai lo tiah an ti.

2100 ahcun Mar-A-Lago hi hi tin tii nih a phum lai ti a si

Atu bantuk in vawleicung hmunkip ah rilipi tii a than caah, rilikam titlang vawlei an min; innlo a hrawh; tikulh tam ngai tii nih a phum cang pin ah, rilikam thingkung le ramkung hna i, rilipi tii a almi nih a thah thluahmah hna. Pacific tikulh tampi a hrawh cang i, tikulh ram tampi cu chun zong zan zong ah, thinphan dai lo in an um cang. Florida rilikam khua hna zong inn insurance man a kai i, lamtul le inn tam ngai a rawk cang.

Atu chun vawleicung minung vialte nih vawleipumpi linhnak hi, kan doh lo le vawlei a himnak hi kan i zuam lo ahcun, kan vawleipumpi cu Noah buanchukcho bantuk in, hmun kip ah harnak nih a kan den chin lengmang cang lai tiah mifim mi hna nih an ti.

Earth's Future pawl nih Antarctic Tikhal Darpipi an sining zoh in, rilipi tii kaining hi a let hnih in a rang deuh lai an timi hi a dik taktak ko ahcun, a tu kan hrinmi kan fale an thih hlan hrimhrim ah hin, vawleicung rilikam khua tampi cu, rilipi tii nih a phum te hna lai i, tuanbia khua ah an cang te kho men i, "Atlantis" khawi dah a um an ti bantuk in, rili tang ummi khua ah i cang te hna sehlaw theih lo a si.

Cu ti thil a can lo nak ding caah, tu chun vawleicung mi vialte nih hin, thlarau khamhnak kan ruah cuahmah lio ah, kan vawlei khamhnak zong ruah chih a herh ve ko hnga lo maw?

----------------------------------------------

Zohchihmi ca

1.  http://www.miaminewtimes.com/news/sea-level-rise-to-destroy-6000-florida-historic-sites

2. https://www.nytimes.com/2016/09/04/science/flooding-of-coast-caused-by-global-warming-has-already-begun.html

3. https://www.bloomberg.com/news/features/2017-04-19/the-nightmare-scenario-for-florida-s-coastal-homeowners

4. http://www.climatecentral.org/news/extreme-sea-level-rise-stakes-for-america-21387