Wuhan Khua Nawng Tlungmi Nih Minung Million 11 Harnak A Pek Hna

December 2019 ah Wuhan khua in, a tu lio vawleicung pumpi buaipimi Coronavirus timi Covid-19 hi a rak i thawk. Wuhan khua hi, Tuluk ram i sipuazi thatnak hmunhma pakhat a si. Innlo sangsang an um i, company lianlian an umnak khua a si. Sizung lianlian le sianghleirun sianginn lianlian an umnak khua a si.



Hi khua hi Coronavirus ruangah January 23 in an erh i, khualeng he pehtlaihnak an chah bak. Cu lio ah minung 17 lawng an rak thi. Minung 400 tluk an rak zaw. Vanlawng lam, tlanglawng lam, motor lam le tilawng lam vialte an phih dih. Wuhan khuami zong an chuak kho lo i, khua dangmi zong a leng in Wuhan ah an lut kho lo. Minung 11 million bak an erh hna. USA nih cun minung a zaza hmanh a kan erh kho lo i, Tuluk nih cun million 500 renglo a erh hna i, cu chung ah Wuhan khua hi fak bik in an erhmi a si.



Cu Wuhan khua cu April 8 ah, an on than. May 12 ah minung 6 an zawt than caah, Wuhan khua mi dihlak 11 million renglo zawtnak um maw um lo timi an test dih hna. An buai taktak ve. August 18 ahcun Wuhan khua cu Coronavirus in a zawmi pakhat hmanh an um ti lo ti a si.



Asinain Wuhan khua ah mizaw an um ti lo ti a si bak in, tilian a chuak colh ve. July 2 in kum tampi chung ah a lian bikmi nawng nih a tlun hnawh than hna. Yangtze River cunah ah hin, tii lianh ning an tah tik ah hin, Tuluk tuanbia ah tii a lianh bik a palinak a phan ti a si. Provinces 11-Hunan, Jiangxi, Guangxi, Guizhou, Sichuan, Hubei (Wuhan umnak), Chongqing, Anhui, Zhejiang, Fujian le Yunnan-ah ti lian cu fak taktak in a chuak.



Vawlei tampi a min. Innlo tampi a rawk. Nihin ni tiang ah inn 54,000 a rawk cang. Minung 744,000 an nih innlo an chuahtak. Provinces 26 ah hin, minung 81 hi an tlau asiloah an thi. Tivapi 443 ah tilian a chuak i, tivapi 33 ahcun tivapi hi tihnung dirhmun ah a phan ti a si. Minung million 63.46 kha nawng tilian nih harnak le sunghbaunak a pek hna. Business innlo tam tuk a hrawh. Nihin ni an tuaknak ah, Tuluk tilian nih hin US $11.76 billion tluk man hi rawhralnak le sunghbaunak a chuahpi cang tinak a si. August 20 (Nilini tiang) ah hin, minung 219 hrawng an thi cang ti a si.



Hlei le lamsul tam tuk a rawk. A cheu cu remh awk tha ti lo ding bantuk tiang in a rawk cang. Tuluk ram ah a fak bikmi nawng tilian a tlungmi a si tiah an ti. Coronavirus in luatnak an van hmuh bak ah, nawng tilian nih a chuah hnawh than hna i, Wuhan khua cu a dang harnak tangah an um than i, Wuhan khuami cu an tuar ngaingai ko.



Hi bantuk in harnak a phunphun, ruahsur le tilian an van tonmi ruang ah hin, Coronavirus dang zong a chuak than lai maw timi hi, lungrawk ngai in an um lio a si.



Tii a tam tuk caah Yangtze River cungah an tuahmi Three Gorges Dam timi tikham a pah sual lai ti hi phan a um ngaingai an ti. Cozah nih "A pah lai lo" tiah an ti ko nain, cu tikham hrawnghrang ummi khuami pawl cu an thin a phang ngaingai ko. Tii hi a lian tuk i, Three Gorges Dam ah a rak lutmi tii hi, second pakhat ah 50,000 cubic meters a lut ti a si.



Nihin ni an tuaknak ah, Tuluk tilian nih hin US $11.76 billion tluk man hi rawhralnak le sunghbaunak a chuahpi cang tinak a si. August 20 (Nilini tiang) ah hin,



Hi hnu ni zeimaw zat chung hi, Jiangxi le Hubei Province ah hin, ruah tam ngai a sur rih lai ti a si caah, fawi ah tilian hi zawr dawh a si lo. Ruahpi hi, Hubei, Anhui, Jiangxi le Zhejiang Province hna ah hin, "Red Alert" timi a senmi ralrinak an pek hna. Saram a thimi tampi an um i, lamkam ah khat lak in an ril ko hna i, a thuthengmi rim in khua hi a khat ti a si.



Hi ruahpi hi North Korea le South Korea lei zongah a va sur ve lai ti a si. Naite ah Japan ram ah a van sur chih i, Japan ram zong ah tilian hmun tampi ah a chuak i, rawhnak zong tampi a chuahpi ve.



Tuluk ram hi, tilian a fah khunnak hi, khua lianlian tam tuk a ummi, highway a tam tukmi, tivapi an khammi a tam tukmi hna hi a si tiah an ti. Vawleicung thanchonak nih thingram tam tuk a hrawh tik ah, vanruah kha thingram nih dawp ti lo in, tilu ah aa can colh caah tilian chuah hi a fawi tuknak a si tiah an ti. Tuluk ram hi tikhammi (Dam) a tam tuk caah le a cheu cu 1950 hrawng i khammi an si caah, a tu bantuk tilian nih a boah sual lai i, khua tampi a khuh sual lai timi hi, an thim a domh in an i domh lio a si.

Mississippi River Rili A Va Chuahnak Ah Chikkhatte Lennak

Nihin cu ka nunchung ah ka philh khawhlo dingmi ni  pakkhat a si. A caan cu February 15, 2020 a si. Zeicatiah ka chun mang pakhat a tlin ni  asi caah a si.  Zeica dah hi ni hi ka philh khawh ti lai lo timi a raung cu, hi tin a si. 

Kan ngakchiat lio tang 4 hrawng kan kai lio ah, Mississippi River timi tivapi kong hi, kan innpa cauk ah hmanthlak ah kan rak zoh tawn. Tang 7-8 kan phak tik ah, European minung hna nih America an rak luhnak, ramchung an tlawnnak, ram an ngiatchaihnak hna ah, Mississippi River kong cu tampi kan rak cawn. 

Cun Kum Sarih Raltuknak (Seven Years War) timi French le Indian raltuknak kong le a hnu ah French le British raltuknak kong kan rak cawng. Hi ral hi 1754 in aa thawk i Paris Treaty timi 1963 ah a dong. Cu raltuknak ahcun Mississippi River kong hi tam taktak aa tel. A ruang cu mah tivapi zulh ah hin, New Orleans timi khuapi a um i, ralkap sakhan tampi a rak um caah a si. 

Cun USA i sal zuatnak le sal luatnak ca i raldohnak zong ah hin, Mississippi River hrawnghrang hi a lar mi a si. American Ramchung Kahnak-Chaklei le thlanglei kahnak-kong kan cawn tik zong ah Mississippi River kong cu tam taktak aa tel. Cucaah U.S tuanbia cawngmi paoh nih cun, Mississippi River kong cu rel lo awk a tha lo. A kong kan rak theih tukmi a si caah, Mississippi River hmuh hi, ka rak duh hringhran. 

College kan kai tik ah, country music ah Mississippi timi hla dawh le tha taktak a rak chuak. Cu hla cu ngaih hi a rak nuam tuk. A sullam zong a tha i, Mississippi River hi zei tluk in dah a nuamh i, man a ngeih i, a sunlawi timi zong, cu hla nih cun a langhter.   

Mississippi River hi, USA ram laicer bak in a luangmi a si. Tiva tengnge tampi aa fonh hnu ah, tiva lian taktak ah aa chuahmi a si. Aa semnak cu Minnesota ummi Lake Itasca timi ah a si. Hihi Mississippi aa semnak tiah an ti nain, hi tibual zong cu tivate fa tete in a van i fonmi a si caah, zei tiva set hi dah Mississippi River thawknak a si timi khiah awk a that lo caah, Lake Itasca hi aa semnak tiah an tinak a si. Hi tibual hi hlan lio ah Glacier timi tikhal a timi in aa sermi tibual a si an ti. Cu tibual cu rili in pe 1,475 a sang. 

Mississippi River aa semnak Lake Itasca 

Mississippi River hi, rul bantuk in aa ngerhmi tivapi a si. Lake Itasca in aa thawk i, thlanglei ah a luang i ramkulh 32 a pal hna. Meng 2,320 a sau. State 10 ramri ah a cang. Mississippi River ah a va fonmi tivapi lian bik hna cu Ohio River (981 miles) le Missouri River (2,341 miles) an si. 

Mississippi River hi nga zong a tam taktak. Tiva thluangthluan hi, leikuang in a khat. Cun khuapi lianlian le khua dawhdawh tampi an um. USA hi Pathian nih a ser hrimhrim ko. Mississippi River, Missouri River le Ohio River hna le tiva tengnge hna hi, USA ramlai vialte hi an khat dih ti tluk in tiva an tam. Nelrawn le cinthlaknak a tha i, vawleicung ah hi nelrawnnak tha hi, khawika ram hmanh ah a um lai lo tiah ka ruat. Cu tluk cun, hi tiva hna nih hin, USA hi an hnawnter. 

Mississippi Riverf le US tivapi hna an luan ningcang

Mississippi River hmuh le rili a va chuahnak hi hmuh ka duh tuk hringhran i, nikhat khat ah va tlawng kho te ning law timi hi saduh ka that tawn i chun mang kan manh tawn. Asinain caan tha a um kho bal lo. Asinain cu ka chun mang cu February, 2020 ah a tling i, ka lung aa lawm taktak. A sining cu hi tin a si.

CBCUSA nih CCC, Hakha saknak caah, Louisiana ummi Laimi kan unau LCBC Krihfabu va tlawn ding in, tuanvo an ka pek i, February 14, 2020 ah ka New Orleans kuakap ummi Laimi ka va tlawng hna. An nih hi an umnak an i hlat tuk. Pumpak cio len ahcun a zarh in a rau ding si caah leng kho ding ka si lo. Cun an nih hi Sushi Business deuh lawngte a tuanmi an si caah, Zarhpini chun le zan ah an i pum kho lo. Rinni zan ah pumh a si caah, Ningani phak i, Zarhpini cu kan Khrifabu ECBC ah pumh manh ding in vanlawng ticket ka cawk cia. Cun Khrihfabu hruaitu thimnak zong an rak tuah i, Rinni zan ah thlacam piaknak zong keimah nih tuah ding in an khan. Thawngtha chim zong a si i, ka lung aa lawm taktak. 

Louisiana hi hlan deuh ah French colony a rak si i, Mirang le French zong fak taktak in an rak i kahnak hmunhma le dohnak hmunhma a si caah, hmuh ka duh taktakmi khuaram a si. A bik in New Orleans cu a min a thangmi khua, khuanuam le khua dawh taktak a si caah, hmuh ka duh tukmi a si. Cu pin ah Hurricane Katrina (2005) lio ah, New Orleans cu thli nih fak tuk in a hrawh ti nih fak tuk in a phum i, minung 1,833 an rak thihnak khua kha a si i, hmuh zong ka duh hrimhrim. 

Ningani zan ah Hruaitu Training suimilam 3 chung kan ngei. Cun kan i din hna. Cu training kai lio ah, ruah lo tuk ah, ka upa fa Pa Van Biak Lian nih Indianapolis ah mual a kan liamtak. Lam hlat tuk ah ka um caah le program let awk a that ti lo caah, ka cam lawlaw.

February 15 (Rinni) cu chun cu zei tuah awk a um lo. Saya Bawi cu ka hal i, "Mississippi River rili a va chuahnak le Louisiana State thlanglei a hriang bik hmun, motor lam a donghnak khi va zoh ka duh ko" tiah ka ti. "Chun cu zei tuah awk a um lo i, va leng ko u sih ca" tiah a ka ti i, motor a mawngh i, kan va leng. New Orleans khua kan pal pah. A thlanglei ahcun kan zuang lengmang i, suimilam 2 fai tluk kan kal ah, Mississippi River rili a va chuahnak kam ummi khua VENICE timi khua fate kan phan. New Orleans in meng 77 a hla. Lam a hmet pah tawn caah kan fum deuh caah kan rau pah ngai.

Hi khua hi, Mississippi River a donghnak ah a ummi khua a si. Hihi motor a lam a donghnak zong a si. Hi pin ahcun company phunphai pawl riantuannak inn lo lawng a um cang. Khua ngaingai a um ti lo. Hi Venice hi, Italy ram khua minthang taktak rili kam khua, Venice min hi rak bunh hna sehlaw a dawh. 

Hi khua kam te ah hin, Mississippi River hi, rili ah a va fon colh. Hi Venice khua pin ahcun Mississippi River hi tiva tampi ah aa then i, rili ah a va lut colh. Venice khua kam ahcun, Mississippi River cu, a lian taktak i, rili bantuk khi a si colh ko cang. Tiva aa thenmi karlak ah tikulh tampi a um i, tikulh le tiva teng hi, sur bantuk in an i tak. Tilawng lianlian le sau taktakmi pawl an kal zuahmah hmuh ahcun khuaruahhar a si. 

Venice khua kam. Mississippi River rili chuahnak pawngte a si

Cu khua cu Mississippi River nakin a niam deuh bantuk a lo. Mississippi River kha thir le lung le mirang vawlei le vawlei in an kham caah tii a lut kho lo i a si. Mississippi River cu a rawn tuk i, a luangmi zong a lo lo. Rili i a va luhnak cu a ngan tuk cang caah, rili bantuk khi a si ko cang. A langmi paohpoah cu rili he aa tlai cang i, mit dong khi a si cang. Rili a va chuahnak cu "Gulf of Mexico" timi rili ah a va si.  

Vanice khua a thlanglei ahcun kan zuang. Mississippi River cu tampi ah aa then i, tiva then pakhat karlak ummi tlang fawnghlei ah kan va lan. Map cu ka zoh pah. GPS zong kan hman pah nain, khawika theng kal ding kha a fian lo caah, lam le map zoh in kan kal. Motor a luh khawhnak a donghnak tiang kan lut lai kan ti. 

Lam cu kan hrawng i, an khar. Luh khwh a si ti lo Ngatlaimi company pawl area lawng khi a si cang caah kan kir. "Cozah nih a thlanglei bik hmunhma (poit) an timi a um hnga lo maw?" timi ka ruah cuahmah lio ah, sign board chia ngai aa tialmi pakhat kan hei hmuh i, cucu kan van naih deuh tik ahcun, a tanglei ca hi aa tial. "Louisiana thlanglei bik a donghnak na phan cang" timi ca a si. 

                                                                                        WELCOME

                                                                                  YOU HAVE REACHED 

                                                                            THE SOUTHERNMOST POINT 

                                                                                           IN LOUISIANA

                                                                                  GATE WAY TO THE GULF

Mah ca ka van rel cangka in, lunglomhnak in ka khat. Ka chun mang ka rak manh lengmangmi le map ka rak zoh lengmangmi kha a tling. Minung kan i lomhnak hi aa dang cio i, cu ka sign board ka hmuh bak in, ka lawmhnak a sang taktak. Zeicatiah ka chun mang a tlin caah a si. Ka lawmhnak cu, thlapa cung kaimi hna le Everest Tlangpar kaimi hna an i lawmhnak bantuk a si ve ko. 

Zeicatiah an nih zong an chun mang a tling i, an i lawmh bantuk in, "Nikhatkhat ah Mississippi River rili a va chuahnak hmuh hi ka rak duh tukmi, ka hmuh cang caah, thlapa cung kaimi an i lawmh tluk in ka lawm ve. Ka lunghmuih ve ko." 

Cu ka hrawng ahcun hman kan i thla i, minute 15 tluk kan um hnu ah kan kir than. Louisiana State a thlanglek bik hmun cu, tii a tam tuk. Tibual fatete a tam. A rawn. Vawlei a tha. Ram a hninghno tuk. Nga a tam. Vawleidaam a tam. 

Hi ka hmun hi, hlan lio ah nga tlaihnak company lianlian a rak umnak a si. Sipuazi zong a rak tha. Asinain Hurricane le tilian a tam caah minung nih an chuahtak ngai i minung an zor. Innlo rawp a tam. A ummi zong an si a fak ngai mi an lo. 

Venice khua in kan kir pah ah, lampi ah kan i pial pah lengmang. Mississippi River cung kalmi tilawng nganngan hman kan thla pah. Hlan lio i ral an rak i tuknak hmunhma kan zoh pah. Mississippi River kam ah hlan lio Civil War lio i ralkap sakhan lian taktak-Fort Jackson-timi hna kan va zoh pah. Mandalay Nandaw bantuk a si. Tlakrawh le tii in kulhmi sakhan lianpi a si.

Thlichia le tilian a tamnak hmun a si caah, inn hi an sang taktak. Sianginn le biakinn zong an ke a sang taktak in an sak hna. Inlay Tibual hrawng ummi "Kesaumi Inn" timi phun an si. Lairam parthlam kan timi bantuk an si. 

Lamkam cu cinthlaknak dum le zuatkhalhnak a tam. Ohio lei caah khuasik a si nain an nih lei ahcun thal chuakka bantuk a si i, a hninghno ngai. Ungkung phung le thingkung dawhdawh tampi a um. Lam cu Mississippi River kam in a kal i, pawngkam van zoh ah lung a leng tatak khi a si. 

Cu Mississippi River zulh in kan rak kai thluahmah lio ah, ka thinlung ah a chuakmi cu Mandalay University kan kai lio i, kan rak uar tukmi MISSISSIPPI timi hla a si. Cu hla cu a satu zong a thiam tuk. A aw a tha. A hla bia sullam a ngei. Hla-aw a tha. Mississippi River kam ka dir lio ah, cu hla cu ka hnatlam ah a leng thluahmah. Lung a leng tuk. 

Cu hla a donghnak cang ah cun, hi tin an phuah.

Mississippi----- I'll remember you
Whenever I should go away
I'll be longing for the day
That I will be in Grennville again
Mississippi--- you'll be on my mind
Everytime I hear this song
Mississippi roll along
Until the end…..time...

A sullam cu, 

"Mississippi --kan ngai ko lai

Lam hlat ka kal caan paoh ah..

Chun nitlak kan ngai ko lai ee

Grinville zong ah ka rak ra than te ko lai

Mississippi...ka thinglung ah na caam ko lai

Hi hla ka theih caan paoh ahcun

Mississippi cu a luang lengmang ve ko lai

Caan dongh tiang in...

Hla phuahtu nih, "Mississippi kan ngai ko lai...ka thinlung ah na caam ko lai...hi hla ka theih caan paoh ah, Mississippi cu a luang lengmnag ve ko lai...a dongh tiang in..." tiah a ti bantuk in, kei zong Mississippi hi, hi hla ka theih fate lawng silo in, ka nunchung ka philh kho ve ti lai lo. 

Kan len caan cu a tawi teian, thinlung ahcun zungzal a caam ve cang ko lai!!!

Mississippi River rili kam a va chuahnak Louisiana hlanghlei hriang bik

Louisiana State thlanglei bik ummi company sign board an si

Saya Bawi Bik Thawng he Louisiana State thlanglei a donghnak bik ah

----------------------------------------------------------------------------------------------------------------

Chinchiah

Hi ni ah chun nitlak a ka chawhpitu le ka saduhthah tlam a tlintertu Saya Bawi Bik Thawng cungah ka lawm. Ka hmuh khawh te lai tiah ka ruahlomi hmunhma ka phak khawh caah Pathian cungah ka lawm i, a min ka thangthat. A rem tik ahcun Mississippi River aa thawknak Lake Itasca zong phak hi saduh ka thahmi a si. Hi hmun hi, hmunhma pical tuk cu a si lo nain, vawleicung tiva lian bik pakhat le USA i tiva lian bik e minthang bik Mississippi River rili i a va chuahnak hmun le Louisiana State a thlanglei hriang bik hmun a si caah, va hmuh ve hrimhrim a phumi hmunhma pakhat a si. 

College ka kai lio ah, ka rak uar bikmi Country Music i an sak tawnmi hla pakhat, Mississippi timi hla ka van tar chih.  Pussycat timi group nih an sakmi a rak si. Capar ton tir cem ah video ka van chiah. 

Saya Bawi Bik Thawng he, Mississippi River rili a va chuahnak kam i kan dir lio ah, hi hla hi ka thinlung ah a chuak taktak i, a tanglei ah a biafang te ka van tar. 

Pussycat

Where you can hear a country song from far
And someone play the honky-tonk guitar
Where all the lights will go out one by one
The people join the song
And the wind takes it away

Where the Mississippi rolls down to the sea
And lovers found the place they'd like to be
How many times before the song was ending
Love and understanding
Everywhere around

Mississippi, I'll remember you
Whenever I should go away
I'll be longing for the day
That I will be in Grennville again
Mississippi, you'll be on my mind
Everytime I hear this song
Mississippi roll along
Until the end…

Bible Ah Tam Bik Aa Hmangmi Biafang 20

Bible ah hin, biafang phun tampi a um nain, "history" timi phun hna hi chanthar biafang khan bantuk an si caah, an um lo. Thingram zong Israel ram hrawnghrang thing min lawng an um. Saram zong Israel ram ummi saram min lawng an um i, a tling ve lo. 

Theology biafang cheukhat "Trinity" tibantuk hna hi bible ah a um lo. Jesuh thih hnu kum tampi hnu ah an lang. "Original sin" ti bantuk hna zong hi, Jesuh thih hnu kum tam tuk hnu ah a langmi biafang an si. "Zumhnak thlaici" timi zong hi nai tein a chuakmi biafang a si.  

Biafang cheukhat cu, a biapi tuk ko nain, tlawm ngai lawng aa hmangmi biafang hna an um. A cheu cu a biapit tuk rup in tam tuk aa hmangmi zong an um ve. 

Bible a dihlak in zoh tik ah tambik aa hmangmi pakhatnka biafang cu "Bawipa asiloah bawipa" (Lord or lord) timi a si. Pakhat cu a ngan in tialmi "Bawipa" (Lord) timi a si. Cu nih cun Khrihfa le Judah biaknak nih Pathian kan timi kha a sawh duhmi a si. Bible pumpi zoh tik ah, 7,759 a lang. Hihi a tam bik a si. 

A pahnihnak ah tambik a lang mi biafang cu Pathian (God) timi a si. Bible dihlak zoh tikah voi 3,977 a lang ve. King James Version ahcun 3,893 a lang ve i, Strong's Concordance tu ahcun 4,473 a lang ti a si. Bible pakhat le khat hi tlawmte an lehning aa dan tawn caah, a caan ahcun chim awk a tha lo mi a sum ve. 

Mirang Biblae ah "biafang peh" tu hi cu thawng tampi an lang hna. Tahchunhnak ah, KJV ah hin "le" (and) hi voi 46,000 a lang. Asinain Bible cheukhat ahcun 28,364 a lang ti a si. Bible pakhat le khat an lehning aa lawh lo caah a si.

A tanglei 20 hna hi, Mirang bible ahcun a tam bik biafang an si hna. 

1. AND- 28,364

2. THE - 28269

3. OF - 21257

4. THAT-12044

5. TO - 11683

6. IN -11285

7. HE - 9022

8. FOR-8684

9. UNTO - 8326

10. A - 7582

11. LORD-7365

12. HIS-7127

13. SHALL - 6796

14. I- 6664

15. THEY - 6638

16. NOT - 6579

17. BE - 6568

18. IS- 6442

19. THEM-6073

20. WITH - 5973

--------------------------------------------

Chinchiah

QUORA timi ah Godwin Goziem Jireh nih a tialmi chung in cherhchanmi a si. 

Ralpi Pahnihnak (World War II) Mithimi

Raltuk hi a thami thil cu a si lo nain, vawleicung tuanbia aa thawk hlan in raltuk a rak um cang. Bible ah Judahmi hna zumhnak pa le cithlahtu a simi Abraham chan in raltuk a rak um cang (Gen.14) timi kha kan hmuh. Vawlei tuanbia zoh ahcun Abraham chan hlan pi in raltuk cu a rak tam tuk cang. 

Raltuknak timi hi, huatnak le ralnak ruangah a chuakmi a si. Duhfah hakkauhnak, mah-zawn lawng ruahnak, midang ca zawnruahlonak le mah nih teitu le uktu si peng duhnak ruangah a chuakmi a si. Cucaah ral tuk cang hnu ahcun, rawhnak phun tam tuk a chuak i, cu lak ah rawhnak ngan bik a chuakmi cu minung thihnak le khawndennak hi a si. 

Cu ral vialte lak ah, Ralpi Pahnihnak hi minung a thimi le aa khwngdengmi an tam bik. Ralpi Pahnihnak a thimi hna an ram le milu zat an tialmi hi, zohchunh ding ah ka van tar. Raltuknak nih hin a suallomi thihnak le khawndennak le innlo rawhnak hi tam tuk a rak chuahpi.

Congressional Research Service tuaknak ah, USA lawng nih an sunghmi hi a mah chan lio tangka in tuak tik ah $4.1 trillion a si lai an ti. Japan nih bomb an thlak hna caah, Hawaii i Pearl Harbor hmanh ah hin, USA ralkap tam lak an rak thi i, tilawng le innlo tampi a rak rawk. 

Japan vanlawng nih Pearl Harbor an hrawh lio

Britain hi $4.3 trillion a sung ve ti a si. A dihmi zat taktak le mithi vialte zong hi tuak khawh a si lo. Innlo, khua, lamsul, sianginn, sizung le zeizong te aa rawkmi hi an tuak tik ah, amah lio tangka in $1,000,000,000,000 a dih lai ti a si. Laica le Lai holh cun chim awk a tha ti lo. Cu tluk cun raltuknak nih sunghbaunak a chuahpi.

A tanglei hi a tuaktu nih an hngalh khawh tawk a si. Kawlram le Lai Tlang zongah mithi an rak um ve nain an telh hna lo. Kawl miphun zong hi, Mirang le Japan cozah tangah tam ngai an rak thi ti a si. Ka dang ram zong telhlomi tampi an um kho men. A ruang cu kan nih ram hrawnghrang hi cazin lak a rak har tuk.

Ram kip mithi zat

Country	Military Deaths	Total Civilian and Military Deaths
Albania	30,000	30,200
Australia	39,800	40,500
Austria	261,000	384,700
Belgium	12,100	86,100
Brazil	1,000	2,000
Bulgaria	22,000	25,000
Canada	45,400	45,400
China	3-4,000,000	20,000,000
Czechoslovakia	25,000	345,000
Denmark	2,100	3,200
Dutch East Indies	--	3-4,000,000
Estonia	--	51,000
Ethiopia	5,000	100,000
Finland	95,000	97,000
France	217,600	567,600
French Indochina	--	1-1,500,000
Germany	5,533,000	6,600,000-8,800,000
Greece	20,000-35,000	300,000-800,000
Hungary	300,000	580,000
India	87,000	1,500,000-2,500,000
Italy	301,400	457,000
Japan	2,120,000	2,600,000-3,100,000
Korea	--	378,000-473,000
Latvia	--	227,000
Lithuania	--	353,000
Luxembourg	--	2,000
Malaya	--	100,000
Netherlands	17,000	301,000
New Zealand	11,900	11,900
Norway	3,000	9,500
Papua New Guinea	--	15,000
Philippines	57,000	500,000-1,000,000
Poland	240,000	5,600,000
Romania	300,000	833,000
Singapore	--	50,000
South Africa	11,900	11,900
Soviet Union	8,800,000-10,700,000	24,000,000
United Kingdom	383,600	450,700
United States	416,800	418,500
Yugoslavia	446,000	1,000,000

Vawleipumpi mithimi pawl
 

Battle Deaths	15,000,000
Battle Wounded	25,000,000
Civilian Deaths	45,000,000

Tuluk ram hi, Japan kuttang ah mithi an rak tam taktak ti a si. Japan nih heh tiah a thah bak in an rak thah hna. Raltuknak ruang lawng siloin, minung hrimhrim kha an rak thah ko hna. Iris Chang nih a tialmi The Rape of Nanking (1997) cauk hna rel ahcun, Japan nih Tuluk pawl an rak thahnawn ning hna cu, minung fa tuar khawh ding a si lo. Ngaihchia taktak a si. Tuluk zong hi nihin ni tiang a lungthin a dam kho lo. Hi ralpi pahnihnak kuakap i, Tuluk mipi thimi lawng hi, 50,000,000 an si men lai tiah an ti. 

----------------------------------------------------

Chinchiah

A cunglei Ralpi Pahnih mithimi kong hi tam deuh theih duh ahcun, a tanglei website ah rel khawh a si. 

https://www.nationalww2museum.org/students-teachers/student-resources/research-starters/research-starters-worldwide-deaths-world-wari ca