Semnak Lairam: Tisor Minthang Bik 12

Vawleicung ah tisor dawhdawh tampi an um. Hi tisor cheukhat cu vawleicung Kokek Thil Khuruahhar (Natural wonders of the world) ah aa telmi an si. Mi tambik nih theih le lenmi alarbikmi tisor ka van tar hna.

1. Niagara Falls (Canada & US Ramri)
Pe 167 (51 m) a sang. Minute1 ah tii million 6 cubic feet a tla. Tisor lian taktak a si nain, Victoria tisor nak in ti tlami a tlawm deuh. Canada le US ramkar ah a um caah vawleicungmi tambik nih zoh le lenmi tisor a si. September 2012 ah catialtu zong ka phan ve. Tiilawng kan i cit i tisor chuncha akeuhnak pawng tiang kan kal kho. Tih zong anung. Khuaruahhar tisor asi. Tisor umnak Baffalo khua ah, Laimi 200 fai an um.

niagra

2. Angel Falls, Vanezuela (Canaima National Park)
Hi tisor hi Gauja Tiva cungah a um asi. Cu tivapi cu Churun Tivapi ah a va fawn.
Vawleicung ah asang bikmi tisor asi. Tiros umnak hi rili in pe 4,209 a sannak ah a um. Tisor a sannak bik hi, pe 3, 212 a si. 1912 ah Venezuela ramthar kawltu Ernesto Sanchez La Cruz nih a rak hmuh hmasat nain, a kong a rak chim lo. American vanlawng mawng Jimmie Angel nih November 16, 1933 ah vanlawng cungin a rak hmuh. Cucaah amah min chuankhan in Angel Falls tiah an tinak a si. Cuticun hi tisor cu, 1937 ah vawleicung pumpi ah theihter hmasat a si. Amah Jimmie Angel a thih i, a ruak an khanghmi meidap hi, July 2, 1960 ah hi tisor cungah an rak theh. UNESCO World Heritage hmunhma pakhat a si.

angel

3. Victoria Falls (Zimbabwe and Zambia, Africa)
Vawleicung ah ti tambik a luangmi tisor a si. Fur caan ahcun minute 1 ah 19 million cubic feet aluang. Pe 108 meter a sang. 1.7 Km a kau. Tisor tlami khu hi meng 25 ahlatnak in hmuh khawh a si tawn ti a si.

4. Kaieteur Falls (Guyana, South America)
Pe 741 asang; pe 370 a kau. Hmun bite chungah ti tambik hmunkhatte ah a tlami tisor a si. Atuanbia phundang ngai a si. Hi tisor hi Guyana ram Patanoma miphun ramuk bawi "Kai" timi pa nih, an ram a rak dohtu miphun sual pawl kut in an rak luatnak hnga ding caah, Makonaima timi a liannganmi thlarau lungtonnak ding caah, vokkuanglawng fate in hika tisor ah a rak zuang i, amah pum lila rai a rak i thawi. An miphun holh hi, "Teur" ticu tisor (Falls) tinak asi. Cucaah "Kaieteur" tiah an holh in an ti.

5. Gocta Falls (Peru)
Peru ram miphun Chachapoya hna nih, hi tisor hi 2005 tiang an thuh. Vawleicungmi nih tisor a um an rak thei lo. 2005 ah Peru ramthar kawltu Stefan Ziemendorff le a hawi le nih hi tisor hi an hmuh i, an tah tikah pe 2,531 a sang. Tisor min ah Gocta Falls tiah an bung. Gocta cu hi tisor pawng ah, AD 800-1400 karah tiang minung an rak umnak khua asi. Chachapoya miphun hna nih, "hi tisor kong hi midang chimh ahcun, hi tisor chungah a ummi sam-sennu (blond nu) timi te nih chiar a serh hna lai tiah an zumh caah, an rak phuan ngam lonak asi" ti asi.

6. Yosmite Falls (Yosemite National Park, USA)
Pe 2,390 a sang. Yosemite timi Indian miphun min chuan in sakmi tisor asi. Yosemite timi sullam cu "Mi that pawl" ti asi. Hi Yosemite miphun hi hlan lioah mi thah lainawn an hman tawn caah an pawngkam miphun hna nih an tih tuk hna i, cuticun min an saknak hna asi.

7. Sutherland Falls (New Zealand)
Pe 1,904 asangmi a si. Lake Wakatipu tibual lam a kawlnak ah, Donald Sutherland timi pa nih a va hmuh caah amah min chuankhan in an auhmi asi. Tisor dawh ngaingai a si.

8. Iguazu Falls (Argentina and Brazil, South Africa)
Tisor aa thawknak hi Km 2.7 a kau. Tisor 275 a um. Pe 269 a sang. Iguazu timi cu, Guarani asiloah Tupi miphun holh asi i, asullam cu "aliannganmi tii" tinak asi. Tuanbia ah hitin an chim: "patian nih hi tisor pawng aummi ngaknu te hi thit a rak duh; ngaknu te nih a rak duh lo i, amah a duhmi atlangval pa he vawkkuanglawng fate (canoe) in hi tivapi ah an zam; pathian kha a thin a hung i, tiva kha a cik le tisor a ser i, cu aa duhmi ngaknu tlangval cu, a zungzal tisor si ding in dan a tat hna" tiah an ti.

9. Ouzoud Falls (Morocco, Africa)
Ni linhnak ramah a ummi tisor asi. Pe 330 (110 m) a sang. Africa ah min a thangmi tisor a si. Dawt thum in a um. Wadi-Abid timi tivapi cungah a um. Acung sannak bik in a tangbik tiang ahcun meter 600 asang. An miphun holh in, Ouzoud timi cu, "Fang rialnak" (act of grinding grain) ti asi. A sining aa tlak ngai. Hi tisor pawng ah hin, tii thazaang in eidin rialnak seh tampi aum. A umnak hi hmunhma nuam asi. Apawng ah nelrawn hringtete, thingkawp phunkip le El Abid Tivapi kuar minthang ngaingai a um.

morrocco

10. Kunchikal Falls (India)
India ram ah asangbikmi tisor asi. Vahari Tivapi cungah aum i, pe 1,493 (455 m) a sang. Movie thlaknak zong ah tampi a cuangmi asi. India ram ah tourist tambik an kalnak hmunhma pakhat asi.

11. Mount Roraima (Venezuela, Brazil le Guyana ramri)
Hihi tisor hna hi, a dawh ngaingaimi le a sang ngaingaimi an si. South America ram, Pararama tlangthluan peh ah aummi a si. Ram pathum ramri ah aum. Vanezuela ram ah area kau bik aum. Riri pe 9,219 a sangmi a si. A sannak bik hmun zawn cu Vanezuela ram ah a um. "Tepeui tlangcung rawn" an tinak hmun ah aum. Amah tlangpi hi a hram in, ding te tah ah pe 7,671 a sang. Ding tein a chennak zawn hi cu, pe 1,300 a sang. Acung rawnpi hi 31 Km square a kau. 1596 ah Sir. Walter Raleigh nih a kong a rak tial hmasat bik. Hi tlangchengpi ah hin, Harry Inniss Perkins le Everard F. im Tuurn timi pa khi an rak tum hmasat. Hi vawlei hi vawleicung vawlei ah a tar bik pawl asi i, kum 2 billion (2,000,000) a tarmi vawlei a si. "Sherlock Homes" tuanbia tialtu Mirang catial thiam Sir. Arthur Conan Doyle nih hi tlang chuankhan in, "The Lost World" timi tuanbia cauk a tial.

12. Thluak hniksaknak caah tuahmi tisor kong a si. Vawleicung tisor minthang ah aa tel lem lo. Hi tisor hi dawt 7 a um; a dawt cu an sang tuk lem lo. A san hi Pe 300 tluk a sang. A umnak ram i tisor minthang bik a si. Tiva in a chaklei ah tiva pahnih an i tong. Tiva pakhat i aa semnak ah tlang tibual dawh taktak a um. Tibual cu Km 22 asau, 10 Km tluk a kau. Cu tibual cu a umnak ram ah, tourist tambik nih zohmi tlang tibual a si. Hi tisor pawng ah hin, an ram cozah nih hydro electric power tambik an laknak hmun a si i, zehzung No.1, No.2, No.3 ti in a um. Hi tisor hi hi ram i ramkulh hmebik ah a ummi tisor a si. Hydro electric hi kum 50 tluk an tar cang. Ram pakhat nih hi ram cu a rak tuk i, Ralpi 2 nak a dih hnu ah, ral tuk ruangah an ram thilri a hrawh piakmi hna chamnak caah a rak ser piakmi hydro electric a si. Hi ram cu cozah chia taktak nih kum 50 tluk an uk. Hi tisor umnak ram hi, vawleicung sifak bik ram pakhat ah UNO nih an chiah.

Question (1) Hi tisor umnak ram min? (2) Tisor min? (3) A umnak ram kulh min? (4) Hi hydro electric serpiaktu ram hi zei ram dah a si? Ruat hmasat. Aphi na theih lo hnu lawngah atanglei ah aphi zoh ding.

water fall