I-70 lampi (Ref. mapsofworld.com)
I-70 Kong Ka Ruat Tawn
America highway pawl hi, an lam sining zoh in min tam ngaite an bunh hna. Ramkulh pakhat le khat kar a kalmi kam hna cu, "I" tiah a tawinak in an auh i, "Interstate" tinak asi. Cu lam lianlian cu state pakhat le khat pehtlaihtertu lampi an an si. USA ah Interstate lam hi tam ngaite a um i, cu lakah uar awk a um bikmi highway pakhat cu I-70 hi asi.
Hlanlio ah atu bantuk Interstate highway pipi hi an rak um lo. Highway fatete lawng an rak um. 1956 Interstate Highway Act an tuah hnu ceu in atu bantuk Highway lianlian hi ser hram an rak thawk.
1997 ah USA ka phanh cangka in ka thinlung a ka hlang cemmi cu an highway pipi hi an si. Ka lung zong a rak ka tuai tuk. US lam umtuning kong ka fian khawhnak hnga caah map ka herh ko tiah ka ti i, Mirang pa nih map tha ngai a ka thenh i, US ram lam map cu ka zoh lengmang.
1998 ah Greyhound Bus in Corpas Cristi, Texas ka va tlawng. I-75 in Cincinnati lei in kan zuang. Ka kirlei ah zei lam in ka kir zong ka thei ti lo. St. Louis ka va phan. Cuka ahcun I-70 cu ka va pal than. I-70 nih cun ka umnak Dayton khua a pal tikah ka khuaruah a har chin lengmang. Hi lam hi zei can remruam dah asi hnga ti ka ruat.
2000 Christmas le Kum Thar cu Washington DC ah Pa Ceu Hlun he kan rak hmang. Bus in kan rak kal. I-70 cu kan zul lengmang i, Washington DC tiang nichuahlei ah kan zulh hawi. Cuticun ka khuaruah har a zual. US ram kongkau zong motor ka mawngh lo tikah ka lung a rak fiang tuk lo.
Ka tlun tik ah I-70 cu tliang deuhdeuh in ka van zoh. Nichuahlei ah Baltimore in Nitlaklei ah Colorado tiang a kal kha map ah ka hmuh. Aize!! Hi tluk lawmmam lam sau cu. US nichuahlei in nitlaklei tiang a chuak put ko tiah ka ruat. Cun a tuanbia ka rel theu tawn i, I-70 kong hi ka ruat theu tawn.
| I-70 le I-15 tonnak (I-70 Nitlaklei donghnak a si) |
 |
| I-70 Nichuahlei aa thawknak, Park and Ride, Baltimore |
Baltimore khuakam te ah Park and Ride timi nuamhnak hmun a um. Cuka hmun cu Nichuajlei ah I-70 cu aa thawk (Hi aa thawknak in a hlatlonak hmunhma ah, Baltimore khua area ah Laimi Krihfabu hmasabik pakhat asimi Chin Baptist Mission Church nih biakinn 2.7 million man an cawk cang. Denver in Baltimore karlak kalmi Laimi dihlak nih CBMC biakinn cu fawi tein kan phanh khawh cang lai).
I-70 Nitlakei ah a donghnak cu I-15 ah a si. I-15 South cu Las Vegas lei ah a kal i, North lei cu Salt Lake City lei ah a kal. Cuka cun I-70 cu a dong. Cove Fort timi 1867 ah an rak tlakmi khua asi i, khualtlawngmi hna dinhnak le dornak ding caah sakhan phun an sakmi a si. Ira Hinkley an timi chungkhar nih an rak sakmi sakhan a si. Cozah nih museum ah an hman cang. Hi sakhan hi I-15 le
I-70 aa tonnak nichuah chaklei kapte ah a um. Cove Fort in nichuahlei ah minthangmi Spotted Wolf canyon a um.
 |
| Spotted Wolf Canyon (I-70) |
I-70 Kong Theihtlei
I-70 hi USA ram pumpi ah sau lei ah 5 nak asi. Amah nakin a sau deuhmi cu I-90; I-80; I-40 le I-10 an si. I-70 uar a umnak cu, a lam a ding ngaingai. Rt. 40 he an i zul i, a caan ahcun lam aa khat in an kal. Rt. 40 cu I-70 an sak hlan ah highway biapi bik a rak si i, a sau taktakmi lam asi. A palmi ramkulh pawl hi ramkulh minthang lawngte an si fawn. I-70 hi theihtlei asinak tampi a um i, a tanglei bantuk in tial khawh a si.
1. An thawk kum --- 1956
2. Lim kum ---- 1992 (Azapite an lim kum)
3. Asau ---- 2,153.13 meng
4. Nichuahlei Donghnak ---Park and Ride, Baltimore, Maryland
5. Nitlaklei Donghnak ---I-15 (near Cove Fort, Uta)
6. A palmi ramkulh hna ---Nitlaklei in...Utah, Colorado, Kansas, Missouri, Illinois, Indiana, Ohio
West Virginia, Pennsylvania le Maryland ramkulh (10) a tan
7. Highway Dang he tonnak--I-15 (Cove Fort); I-25 (Denver); I-35 (Kansas City); I-55 (East St. Louis); I-65 (Indianapolis); I-75 (Dayton); I-71 (Columbus); I-77 (Cambridge, Oh); I-79 (Washington, Pa); I-81 (Hagerstown); Washington D.C kam in Baltimore khua pawng ah Baltimore khua a
heltu I-695 he an i tong i, Leakin Park pawng teah a dong.
8. Khuapi a palmi ---------- USA ah khuapi minthang tam ngaite a pal hna. Cu lak ah a lianbik hna
cu, Denver, Kansas City, St. Louis, Indianapolis, Dayton, Columbus, Baltimore hna an si. I-70 nih a palmi khua lak ah Indianapolis cu lam tampi aa tonnak asi i, "Crossroad of America" tiah an timi khua asi. I-70 nih hin Washington DC kam ummi Fredrick te hna zong a pal hna.
 |
| US vanlawng tumnak tual a lian bik Denver Int. Airport |
Denver International Airport zong hi I-70 in a hlat lo. Hihi USA ah airport kau bik a si i a area hi square meng 54 asi. 2013 ah vawleicung ah khual tambik tlawnmi khua ah 15 nak asi i, khual 52,556,359 nih luhchuahnak ah an hman. Rili in pe 5431 a sannak hmun ah a ummi asi. A umnak a sang ngaingai.
 |
| I-70 Glenwood Canyon |
 |
| I-70 at Eisenhower Johnson Memorial Tunnel |
I-70 Cung Hmunhma Dawhdawh
I-70 nih hmunhma dawhdawh tampi a pal hna. Meng 2,153 chung ramkulh 10 chung a pal tik ah, fingtlang kip le nelrawn kip a hrawng. USA ah hmunhma dawh bik timi Colorado le Mountain zong a pal hna. Nichuahlei ah vancung he epchunmi West Virginia i Blue Ridge Mountain pehpar hna a pal hna.
Blue Ridge Mountain
I-70 nih fingtlang, horkuang, nelrawn le Canyon timi lungpang dawhdawh zong a pal hna. USA ah tlang sang bik le nitlaklei bik ummi Rocky Mountains pehpar zong a pal hna. US ramkulh lakah dawh ah min a thangmi Utah le Colorado State zong a pal i, nichuahlei ah ramkulh dawhdawh a simi Pennsylvania le West Virginia zong a pal hna. US tiva lian bik Mississippi le Ohio River zong a pal hna. Nichuahlei ah min a thang bikmi tlang Blue Ridge Mountains he aa pehtlaimi tlang hna karlak in a kal cah, fingtlang dawhdawh a tan pah hna.
Blue Ridge Mountains tlangthluan cu tlang dawh taktak asi. Cu tlangthluan karlak ah a luangmi Shanandoah River tiva le nelrawn cu aa dawh tuk ti a si. Cucaah West Virginia kuakap i, a ummi Blue Ridge Mountains le Shanandaoh River cu, hlaphuahtu nih "Country Road" ti in, hitin hla a phuah phah:-
" Almost heaven...West Virginia Blue Ridge Mountain Shanandaoh River...Love is older older than that tree..Younger than the mountain..Growing like the breeze...Country Road ...Take me home........."
Cuticun I-70 nih, USA hi nichuah in nitlak tiang dengmang a pal i, cu chung ah hmunhma dawh hna lak ah a lar bikmi cheukhat cu atanglei ah ka hmanthlak ka van tar.
Spotted World Canyon (San Rafael Swell), Glenwood Canyon, Eisenhower Johnson Memorial Tunnel, Rocky Mountain, Copper Mountain, Lewis and Clark Viaduct, Stan Musial Veteran Memorial Bridge (Mississippi River, St. Louis), Fort Henry Bridge (Ohio River), Wheeling, Wheeling tunnel, Park and Ride Maryland etc.
Copper Mountain timi tlang hi, hawhra tampi tlaknak hmun asi caah, minthang ngai a simi Copper Mountain Ski Resort umnak a si. Vur cit a huammi mi tampi nuamhnak le tangka tampi an hmuhnak hmun asi.
 |
| I-70 palmi Rocky Mountain |
I-70 nih hin tlang le nelrawn dawhdawh zong a pal hna. Rocky Tlang le Blue Ridge Mountains hna cu, USA ah minthang bik an si. Mississippi River le Ohio River hna zong minthang taktakmi an si hna. Glenwood Canyon hna cu vawleicung highway ah khuaruahhar pakhat khan asi ve mi asi. US cozah an thawnnak hi, hi I-70 an cawhnak ah hin tampi a lang. Zeicatiaha tlangtang an vihmi a tam pin ah, lungpang an cehmi a tam tuk. Lungpang an cehmi hna hi a niam tete an si lo. Pe 200-300 sang lungpang zong an um len.
Hi hmunhma hi vur tlak lio ah, Ski lei lentecelh duhmi hna caah hmunhma nuam taktak a si. Hotel tampi aum i, nuamhnak phunphun an tuahnak hmun a si.
 |
| Glenwood Canyon area |
I-70 nih hin tiva le hawrkuang tampi a zulh hna hi, hitin rul ngerh in aa ngerh thluahmah.
 |
| Lewis and Clark Viaduct, Kansas City |
Hmunhma cheukhat ahcun khualak a niam deuhnak ahcun hitin hlei in an cawimi lamcung in I-70 pi hi a kal.
 |
| Pennsylvania Tlang vih |
I-70 nih tlang tam nawn a pal caah hmun tam nawn ah tlang hitin an vih piak tawn. Tlang vihmi tang kal tik ah, USA ram engineering pawl fimnak, tluak thatnak le an thiamnak hi fiang tein mit in hmuh khawh a si. Upat lo awk an tha lo.
Laimi Caah I-70
Ruah setmat tikah, I-70 hi USA Laimi kan caah a sunglawi taktak. USA Laimi nih tambik ka
hrawnmi lam cu I-70 asi lai. Hi nakin hrawn dingmi lam a um ti lo. Zeicatiah USA Laimi a tam deuh cu, hi I-70 cung kuakap ah khua an sa hna.
America i Laimi umnak minthang deuh cu, I-70 cungah an um hna. Nitlaklei in thawk ahcun, Denver ah Laimi tampi an umnak khua dawh ah minthang a si. Kansas City ah Laimi a thawng in an um. Dawh ah minthang khua asi. Indianapolis cu "Crossroad of America" timi Laimi kan khualipi a si. Khua dawh le khua minthang pakhat a si.
Columbus ah Laimi a thawng in kan um. Columbus cu USA ah sipuazi a nunbiknak khua pakhat ah aa tel ve mi le Ohio State University umnak khua asi. Ohio cu USA ah the Mother of American President tiah auhmi ramkulh a si. Washington DC cu vawleicung khua roipui bik pakhat asi. Laimi mifimthiam tampi umnak le Lai miphun kip umnak khua asi. US Khualipi asi. Baltimore Area ah Laimi a thawng in khua kan sa.
Cub I-70 he aa hlatlonak a chak le thlang tete ah Laimi tampi an um rih. Nitlaklei ah Springfield (Mo), Fort Wayne, Chicago, Battle Creek, Grand Rapids, Milwaukee, Lansing, Cincinnati, Bowling Green, Buffalo, Philadelphia le Richmond hna an si.
 |
| Kansas City |
Laimi khualipi asimi Indianapolis cu chiatni thatni ah tlawnlo awk a tha lo. Washington DC zong tlanwlo awk a tha lo mi khua a si. Cucaah Kansas City-Indianapolis-Columbus-Washington DC-Baltimore cu artlang in ummi an si caah, hi khua a hlatmi Laimi hi an tam taktak. Hi khua hlat paoh ahcun I-70 cu pal lo awk a tha lo. Cucaah I-70 cu Laimi kan caah a sunglawi tukmi le man a ngei tukmi highway lampi asi. Mississippi River cu USA ah a lian bik le a sau bik asi i, vawleicung tiva lianbik pakhat asi. "Mississippi hi hla tampi an phuahmi tiva asi."
America tuanbia zoh tik zong ah, USA ram khua lianlian paoh cu hi I-70 he aa hlatlonak ah an um dih hna. Tahchunhnak ah, Salt Lake City, Denver, Kansas City, St. Louis, Chicago, Detroit, Dayton, Columbus, Louisville, Cincinnati, Toledo, Cleveland, Pittsburgh, Washington DC, Baltimore le a pin deuh ah Philadelphia le New York an si. USA ah minung tam deuh le sehzung tam deuh cu hi I-70 kuakap ah hin an um ti a si.
Fort Henry Bridge (Wheeling, Ohio le W. Virginia karlak)
Cun America ah GDP a sangbikmi ramkulh 15 thim tikah ramkulh 10 cu I-70 in a chaklei deuh lawngte ah an um. California, New York, Illinois, Pennsylvania, Ohio, New Jersey, Virginia, Michigan, Washington, Minnesota hna an si. A dang ramkulh (5) hna-Texas, Florida, Georgia, le North Carolina lawnglawng hi, I-70 in a thlanglei ah an um. Cucaah America ram business le rumnak pi hi, I-70 kuakap ah an um.
Cun USA i sianginn minthang tam deuh cu I-70 in a chaklei ah an um hna. Tahchunhnak ah, vawleicungah sianginn min thang bik hna Harvard University, Princeton University, Yale University, Chicago University, New York University, Michigan University, MIT te hna le USA i siangngakchia tambik umnak pakhat Ohio State University te hna hi I-70 chak lawngte ah an um.
 |
| Cross Road of America timi U.S Laimi khualipi |
 |
| The Most Intelligent City in the world (2013) |
 |
| I-70 Ohio River cung ummi Wheeling khua |
 |
| Shanandaoh Valley Blue Ridge Mountain, Lancaster, PA |
Zeicatiah I-70 kam hi USA ah minung an chahnak bik, sipuazi a chahnak bik, sehzung a tamnak bik, sianginn thatha a tamnak bik, khuapi lianlian a tamnak bik hmunhma asi caah asi. American ram khualipi Washington DC khuapi zong cu I-70 kamte ah a ummi a si. USA aa rawk lo ahcun, hi Washington DC ruang ah hin, I-70 cu caan donggh tiang a lar dingmi lampi asi.
 |
| I-70 Nichuahlei aa thawknak khua-Baltimore khua |
Biadonghnak
I-70 hi lam nuam taktak asi. Kansas City in Baltimore tiang cu ka phak cang. Kansas City in nitlaklei I-15 he aa tonnak, Utah State tiang in kal hi ka saduhthah pakhat asi. Zeicatiah I-70 hi lam ropui taktak asi caah, nichuah in nitlak tiang zeidah a lawh timi hrimhrim hi theih le hngalh ka duh caah asi. Nikhat khat cu ka tawl dih te theu lai tiah ruahchannak ka ngei. Careltu nang tah tawl na duh ve lo maw?
Chinchiah
1. www.google.com
2. www.bing.com
No comments:
Post a Comment