US cozah ni ke ralkap an thlah ngam fawn ti lo. Syria ram tapung le Iraq ram tapung bochan lawng in an cawlcangh tikah thil tlam a tling kho lo. Tapung nih le ISIS doh kho ding ngaingai in thazaang an ngei lo. An mah pakhat le khat an i kahnak le remlonak ruang ah an tha a der ngai. US nih tha a pek i an bawmhmi tapung pawl hi, Syria cozah le ISIS ral kap hnih in an tuk tikah thazaang an ngei kho lo. Cu karlak ah ISIS cu thazaang an rak la i fawite ah tei khawh ding in an um ti lo.
US cozah nih August 8 in ISIS cu bomb thlak hram a thawk. Pakhatnak bik ah FA-18 Super Hornets timi fighter jet pawl an hman. Laser in a chakmer khawhmi bom (laser guided-bomb) kiligram 225 ritmi pawl in an kah hmasat hna. November 30 tiang ah voi 819 renglo bom a thlak cang hna. US hawikawm ram pawl ram 10 nih voi 157 hrawng an thlak ve cang. Asinain ISIS hi tlawmte lawng an thazaang a zor. Chim awk tlak in an thazaang a zor tuk lo ti asi.
ISIS a voi (1) nak bik a kaptu vanlawng (Reuter/Ref. msnbc.com)
US nih ISIS bomb a thlak hnawhmi hna ruang ah tangka hi dollars 1 billion a dih cang. June 16 ah Iraq ram ah ngiathlaitu vanlawng an thlah ka ahcun nikhat ah $7.5 million lengmang a dih lai tiah an ruahdamh nain, atu ahcun nikhat ah million 10 lengmang a dih cang. October 1 a phak tikah, U.S cozah tangka $937 million a dih cang.
Syria ram chung ah a voikhatnak an kah zan ah, Tomahawk bomzuang (missile) 47 an kah i, pakhat ah a tlawmbik 1 million man a si. A sang deuhmi cu million khat leng man an si. US nih vanlawng an ngeihmi a thatha an hman. F-22 timi Raptor zong a voikhatnak bik raltuknak ah an hman hi tutan ISIS kahnak caah asi.
Cozah he aa pehtlai lomi nonprofit zung pakhat asimi Center for Strategic and Budgetary Assessments (CSBA) nih October thla chuakka te ah, an tuakning ahcun September 24 in October zarh khat kar tiang a dih cangmi hi, $780 million in $930 million kar asi cang tiah an ti.
US Navy nih tomahawk bomzuang in a kah lio
September 30 (Tuesday) ah US vanlawng nih Syria ram i ISIS pawl voi 11 bom a thlak hnawh hna i, ISIS motor, tank, sakhan le inn tam ngai an rak hrawh. October nikhat tiang ah hin, Iraq ram chung lawng ah, US nih voi 200 tluk bom a thlak cang hna i, US hawikawm Arab ram pawl nih voi 60 tluk an thlak ve hna. Naite ah Iran zong nih Iraq ram ah bom an thlak ve.
ISIS pawl bom a thlak hnawhmi ram hi ram 13 an si. USA, UK, France, Australia, Iraq, Syria, Saudi Arabia, Qatar, Iran, Jordan, Canada, Bahrain le Germany hna an si. Atu ah ram 62 tluk nih ISIS cu an kah hna i, an tei kho rih hna lo. An tuk deuhdeuh tangka dihmi a tam deuhdeuh lei asi peng.
CSBA nih an tuaknak ah, atu ning tein tangka nikhat ah million 10 lengmang a dih ahcun, vanlawng caah le vawlei caah le vawlei ralkap 2,000 tluk caah, thla khat ah million 200 in 300 karlak a dih lai ti a si.
F-22 zong hi ISIS kahnak ah a voikhatnak bik an hman
American University i U.S Foreign policy kong chimtu professor pakhat le tuan deuh lio i Office of Management and Budget ah upa pakhat a rak simi, Gordon Adams nih cun, "ISIS dohnak ah hin U.S nih hin thla khat ah dollars 1 billion leng lengmang a dih lai asiloah kum khat ah $15 in $20 billion a dih lai" tiah a ti. Pentagon Secretary Navy Rear Adm. John Kirby nih cun "nikhat ah million 7 in 10 kar a dih lai" i thla khat ah mill 210 in 300 kar a dih lai tiah a ti i, Adams nih a chimmi nakin a niam deuh ngaingai.
A tlawm bik ah, nikhat ah million 9 tluk dih hna sehlaw, thla khat ahcun million 270 tluk asi hnga. Kum khat ah a tlawmbik ah $3,240 million a dih lai. Cucaah ISIS ral dohnak hi a raoh deuhdeuh le US caah sunghnak tampi a chuak te lai. US hawikawm ram hna ca zong ah, tampi sunghbaunak a chuak ding asi. Atu zong hawikawm ram pawl nih tangka million tampi an dih ve cang.
Nihin ni zoh tikah, US le hawikawm ram nih, thla (5) chung bom an thlak cang hna nain, ISIS hi an zaang a dernak a lang tuk rih lo. Turkey ramri ummi Kurdish khuapi pakhat Konane khua zong cu nihin ni tiang ISIS kut in luatnak an pe kho lo. Zeitik ahdah an luatter khawh lai timi zong a fiang rih lo.
ISIS ral hi a rauh deuh paoh le US caah sunghnak a tam chin lengmang ding a si. Zei can dah ral an tuk lai? ISIS hi an hlo kho taktak hna lai maw? Hi pin ah zeizat remruam dah US tangka a dih rih lai timi cu zoh cio rih ding asi ko!!!!
UAE a pakhatnak bik nu raltukna vanlawng mawng Maj. Mariam cu ISIS kaptu ah aa tel ve.
Zohchunhmi Ca Hna
1. http://www.foxnews.com/politics/2014/11/30/us-outpaces-allies-in-airstrike-in-iraq-syria/
2. Cost of U.S Campaign Against ISIS Is Roughly 1 billion, http://www.nbcnews.com/storyline/isis-terror/cost-u-s-campaign-against-isis-roughly-1-billion-n215126
3. http://www.huffingtonpost.com/2014/09/30/isis-cost_n_5906762.html
No comments:
Post a Comment