Hmaizah Awk A Tlakmi Lai Nu Tuanbia

Fa a ngeimi nu paoh cu, hringtu nu an si dih. Thla (9) chung harsa taktak le rethei taktak in nau an pawi le ngeihmi ruangah, hringtu nu paohpaoh cu upat hmaizah tla an tlak an si.

Paul le bang nih cun nu hi nau an ngeih ruang ah a rak thangthat khun hna i, hitin a ti:- "Nu cu nau an ngeih ruang ah khamh an si lai" (1Tim 2:15) tiah a ti phah. A chapmi cu, "toidornak lungthin in, zumhnak, dawtnak le thiannak chungah an um ahcun, khamh an si lai" tiah atinak asi.

Nau a ngeimi nu vialte lak zong ah hin, va le fale caah a hleice tein uar awk a um khunmi le upat hmaizah awk a tlak khunmi hringtu nu hna an rak um ve. Phunthlung bia 31:10-31 ah, nupi tha a nunnak le ziaza kong vialte kan hmuh dih. Hi nupi tha hna hi, va le a upat mi le fale cawnpiak a thiam mi hringtu nu an rak si. Hi bantuk nu hna hi, upat tlak an si.

Lainu hi upat hmaizah awk a tlakmi hringtu nu tampi an um. Cu lak ah ka philh khawh lo mi nu tuanbia pakhat te a um. Cu nu tuanbia te cu, zohchunh tlak asi caah, ka van tial.

Voikhat cu tanghra ka phit kum ah Thau ah ka rak tlung. Kan khua ah evangelist pakhat aphan. Cu nih a rak kan cawnpiakmi cu, "Nupi le nih vaa le upat hmaizah pek a herhnak kong" a rak si. Cu ahcun, Kalaymyo kuakap ah a ummi hringtu nu pakhat kong a kan chimh. Cu tuanbia cu nihin ni tiang ka philh kho bal lo. Amin a kan chimh lo caah a min ka thei lo.

Tuanbia cu hitin asi:-

"Voikhat cu Kalaymyo khua pawngah nuva hna an um. Fapa 5 an ngeih hna. An pa cu holh-aa taktakmi le biachim kho lo mi asi. Asinain tlahtham a thiam, bengkhaw le seihnam tah tibantuk hi a thiam tuk. Cu bantuk cun tangka a kawl i a nupi le a fale a cawm hna. An pa cu tangka hmuh lawng a thiam i, a rel zia a thiam lo. A holh a aat caah fale cawnpiak kho asi fawn lo. Cun innchungkhar kongkau zeihmanh a tuaktan kho mi asi lo. Cucaah an pa nih bengkhaw tah in tangka heh tiah a kawl. An nu nih heh tiah a rak zuar i, cuticun an fale pa 5 cu an cawm hna."

"An pa cu zei tuaktan kho asi lo. A holh kho asi lo caah, an nu nih innchungkhar kong hi, a hme bik in a ngan bik tian, a zeizong kong tiang a hruai le a tawlrel dih hna. Asinain an nu a fim tuk caah, amah nih thil a ruah i a hman a timi zong, amah nih zeitik hmanh ah bia a khiak bal lo. Kan pa cu bantuk in kan herh le cutin tuah ding asi le kan tuah ah a tha ko hnga lo maw? ti in an pa tu kha bia a khiahter zungzal. Arti pumkhat chumhnak in, khualtlung mileng arthahnak in, innlo saknak, an fale thilri cawknak le sianginn kai kong tiang, zeizong te a zatein an inn chungkhar kong cu, an nu nih a tawlrel dih ko nain, an pa hnatlaknak in a phi a chuahter zungzal ."

"An fale cu an van cuza. An van tlairawl. Hawikawm tete an van ngei. Voikhat cu, an fapa upa cem nih zuu a thli tein adin.  Cucu a nu le pa nih an theih i an ngaih a chia tuk. A nu nih cun ka fapa hi ka chim kho ti lai lo ti  a theih. Cucaah eapa lawng nih a chimh khawh lai ti kha a theih. Cucaah zeitindah ka tuah lai tiah fakpiin  khua a ruat."

"Zarhpini nikhat cu, a nu nih ar thau taktakmi a cawk i a thah. Zanriah cu thaw taktak in a chumh. An pa milengkhan ah holh in dai zuar hmaichia in a thu ko. An nu nih cun arsa a can, chihlam he meh phun tling tein a tuah. Rawl a suah dih. "Ka fale ra cang u. Zanriah ei hna u sih" tiah a hei sawm hna. Voi dang bantuk tein an unau rual in cabuai cu an van kulh i, rawl ei ding cu timh cia tein a um dih cang."

"Asinain voi dang he aa lo lo. Zeicatiah innchungkhar lutlaitu hringtu an pa um ti lo. A nu nih,"Na pa cu va ko u" tiah a ti hna. A fale nih cun an va auh. An pa cu a ra duh ti lo. Pakhat hnu pakhat an kal. A hniang cem in, upa lei in an kal nain an pa cu a ra ti lo. Anu nih cun a thawh hna i, "Ziah voi dang ah hmunkhat teah rawl kan ei lengmang tung. Tu zan hi na pa a rat duh ti lo? Nan pa a rat lo ahcun kei zong ka ei kho ve lai lo?" tiah ati i, a thu ve ko."

"An rawl cu a dai ziahmah cang. An fale zong an rawl a tam ngai cang. Sihmanhseh hringtu nu bik nih rawl a purh lo tikah, a hohmanh nih an ei ngam ti lo. Cutucun an zapi tein dai zirziar te in an thu ko."

A nu nih cun, mitthli he hitin a fale cu bia a vun hal hna.

"Ziah voi dangah hmun khatte ah rawl kan ei lengmang tung. Ziah atu zanlei hi, nan pa nih kan sin ah rawlei a duh ti lo? Zeidah a ngaih a chiat i a thin a hun? Aho nih dah nan pa thinhunnak nan tuah? A tuahmi nan um ahcun, i phuang u law, nan pa ngaihthiam va hal u. Kan tuah hrimhrim ti lai lo tiah bia va kam u. Nan pa nan rat pi khawh hlan chung cu zanriah ka ei kho ve lo. Nan pa nan ratpi khawh lawng ah kei zong zanriah ka ei ve lai" ......tiah a van ti hna.

Cucang ka cun fa upa cem pa cu a um kho ti lo. "Ka nu keimah nih zu ka din caah asi" tiah a van i phuang. Anu nih, "Ka fapa, thil sual nganpi na pa hmai ah na tuah cang. Cucaahcun pei na pa hi zanriah kan sin a ei uh ti lo hi. A kan cawmkengtu na pa ngaih nan chiatter mi cu, Pathian a ngaih nan chiatter asi. Pathian thluachuah nan hmu lai lo. Cucaah va kal zawk law na pa kha, fakpi in ngaihthiam va hal. Cun ka ding ti lai lo tiah bia va kam. Cun van ratpi law kan zapite in rawl kan ei hna lai" tiah a ti.

A fapa cu a ngaih a chia tuk. Ka sual cang ti kha aa theih. A pa sin ah a vung kal i, "Ka pa, zu dinnak in na hmai ah sualnak nganpi ka tuah cang. Ka pa ka ngaithiam law, hi pin cu zeitik hmanh ah ka ding ti lai lo" tiah a pa cu bia a van kamh. Cucun a pa cu a lung a dam i, zanriah ei ah a rak zuang. Thlacamnak an ngeih hnu ah, sunghno an nu chuanrawl cu an rak dumti hna.

Cu thil an tonmi nih an chungkhar ah nunzia dawh le tluannak a chuahpi. An fale a hohmanh misual le zuding saei an um ti lo.

Kum tam nawn arauh hnu ah, an fapa cu college akai; B.A a chuak. Sianginn cachim rian a tuan. A nau le dang zong college an rak kai i an awng dih cang.

An fapa upabik nih a chimmi cu hitin asi:-

 "Innchungkhar kong kau vialte, a hme bik in a ngan bik tiang ka nu nih a tawlrel i, a ruahkhan dih. Zeithil paoh amah ruahnak le tuaktannak in kan nung. Kan cutzat tikah ka nu cu kan tih ti lo. Asinain ka nu nih ka pa atihzah tuk caah, kan tihmi taktak cu, ka nu si ti lo in ka pa tu asi. Zeipoah hi ka nu kutke le thluak in a kal ko nain, a phichuahtu le biakhiaktu taktak cu ka pa lengmang asi. Ka nu nih ka pa hi luu ah a chiahpeng. Cucaah kan tih taktakmi cu ka pa asi. Ka nu hi a rak fim tuk caah, ka pa hi a tihzah le a upat i, kan mah zong nih ka pa bia hi kaa khat hmanh kan el ngam lo. Ka nu hi rak hrutnga sehlaw, ka pa hna rak nihsawh in rak serhsat sehlaw, ka nu he ka pe he kan tih ti hnga lo i, kan nih chung cu zeihmanh kan si hnga lo. Atu mah tluk catang sang ah kan i chuah viarnak zong hi, ka nu a fim tuk caah le ka pa a upat tuk caah si ko ee" .......tiah tehte a rak khan.

Cu an nu cu a fim taktak. A fimnak hi chim awk thalo in a fim. An pa a tihzahmi le a upatmi cu aa dawh tukmi nunzia lawng si lo in, Pathian duhning nunzia asi. Amah nih a va a tihzah le upat caah a fale zong nih, an pa an upat le an tihzah. An nu nih an pa hi, "Mi holh aa, zeihmanh na si lo, holh hlah, nangmah i caih hlah, na theih lai lo"  tiphun rumro in rak ti sehlaw, an fale an tlairawl hnu ahcun an nu kha an tih ti hnga lo i, an pa zong an tih ti hnga lo. Cuticun an innchungkhar cu buaibainak in a khat hnga i, an lo ko hnga.

Innchungkhar ah, kan fale tha hna seh ti duh ahcun, a hrampi bik pakhat cu "Nupi le nih vaa le upat le vaa le tang ah toidawr hi a hrampi pakhat a rak si." Cu nunzia cu, biaknak kip, nunphung kip zoh tikah a biapi taktakmi thil a rak si. Cucu Pathian nih innchungkhar ah a kan serning a dotdot zong asi fawn. Nupi le nih vaa le a upatlomi le zei a rel mi chungkhar paoh ahcun, fale chimh an ngai bal lo. Fale an tha bal lo. Fale an i rawk tawn.

Cucaah kan fale tha hna seh, thluachuah hmu u sih law innchungkhar kan sining tluang seh ti duh ahcun, nupi le nih va le tihzah, upat pek le vaa le tang ah i dawr ding hi thil biapi bik a si (Efesa 5:22-24). Hi baibal cang ah, nupi le nih vaa le zeitluk in dah upat pek, tihzah le an tang ah i dawr a hauh timi a kan fianter.

Acunglei chungkhar tuanbia zoh tikah, an fale thluachuah an hmuh viarnak, an fel viarnak le catang ngei in an um viarnak a ruang bik cu, an nu nih an pa tang i aa dawrnak le a va a upat peng caah a rak si ko.

Hi ca a rel mi nu vialte nih, va le tang i doidawr a thatnak an theihngak hnga ding caah le va le upat an thiamnak hnga ding caah, saduhthahnak ka ngei.

Theihternak:
Hi tuanbia hi, Evangelist pakhat Thau i a tlungmi nih a rak kan cawnpiaknak ah a chimmi tuanbia asi. A khua, a minung le an chungkhar taktak hi keimah tonmi an si lo. An mah chung cu Falam peng leimi an si tiah a rak kan ti.