Cedar Point Amusement Park

   Cedar Point Amusement Park

Umnak: Sandasky, Oh USA (Lake Erie). Ohio le Canada ramri karlah ah  aum.

Akauh: 364 acre

Citmi Phunzat: 75

Dirh Kum: 1870

Ngeitu: Cedar Fair

On Caan: May-November thla thawkka; 10:00AM-10:00PM

Mileng: 3,000,000 (million 3 leng) leng an si. 

Luhman: Group tickets $32.00 (minung 15 cung; tung sanah lehmah 48 cung); $16.99 (lehmah 48 tang le kum 60 cung minung). Pumpak ticket $ 40 leng a si. Group ticket hi zarh khat a hlankan in cawk chung ah a tha. Aman aa thleng kho. 

Biahmaithi:

US hi nifatin in rian kan tuan peng. Nuamh caan le lenvah caan a um kho lo. Cucaah tukum  2010 cu kan Krifabu (Emmanuel Chin Baptist Church, Columbus, Ohio) ningpi in Cedar Point ah,hawikawmhnak ngeih pah in nuamh ve ding ah kan kal hna. American mipi dang cio zong zeidah an tuah? An ram zeitindah an i nuamhpi ning asi timi zoh pah ve zong kan duhmi a si. Thla 2 ngakchia tiang kan kalpi hna. Motor 11 in, minung 120 kuakap kan kal.

Chun nitlak kan i nuam. Zaan 11:00 renglo ah inn kan phan than. Kan i nuam taktak. Hi hmun hi Dayton khua i Normandy UMC Krifabu i mino pastor ka tuan lio ah kum fatin kan kalnak a si. Voi 3 tluk ka rak phan cang. Tutan hi voilinak a si. Ka phanh atam pah ko cang nain, ka vuai rih lo. Ka caah a thar in ka hmuh peng. Hi kong he theih a duhmi caah tiah ka van tial.

Cedar Point Timi Cu

Cedar Point timi cu, kan umnak Ohio Ramkulh chaklei hriang Lake Erie tibual cung i tikulhfonghlei pakhat cung ah a ummi a si. Soak City timi ticung lentecelhnak he aa pehmi a si. A chaklei tlawmpal hei kal ahcun Canada ram he tibual cung in ramri an si. Kan umnak khua Columbus in meng 125 kuakap a hlat. Laimi tamnak Indianapolis le Battle Creek in a laang in kal khawhnak hmun ah a um.

Tii Cit Ding Phunphun Aum

Cedar Point hi a hlun ngaingaimi Nuamhnak Dum (Amusement Park) asi. USA ramchung amusement park vialte lakah, hlunh ah pahnihnak a si. Tikulhfonghlei cung ah a um caah, a hmunhma le khua caan a nuam. Tlang le tii ah lentecelhnak phuntling in a um. Soak City (Ciinnak Khua) timi a um. Beach le Amusement Park karlak ah, a dang tein an tuahmi asi. Beach kam lentecelh ding, phun a tling. Ticket adang tein cawk a hau. Hi vialte celh dih ding ahcun, zan hnihthum riah a hau. Riahnak ding ah hotel thatha tampi a um. Ahlankan in booking tuah cia lo ahcun tin khawh ding a si lo.

Soak City le Cedar Point 

Hi Nuamhnak Dum hi vawleicung amusement park tha bik ah an chiahmi pakhat a si. USA ah amusement park thabik asi. Voi (13) pakhatnak a tlaih cang. 2010 kum sining in tuak tik ah vawleicung ah Roller Coasters tambik a umnak hmun a si (Southern California i a ummi Six Flags Magic Mountain he an i tluk). Roller Coasters 17 veve an um. Vawleicung nuamhnak dum vialte lak ah, Cedar Point lawnglawng hi, pe 200 nak in asang deuhmi Roller Coasters 4 a umnak hmun a si. Minung citmi phunphai 75 a um caah, citmi tambik a umnak hmun a si.

A tlin khunnak cu, ngakchia citmi he, upa citmi he, a fum he a rang he, tisor citmi he a phun tling cikcek Chungkhar dihlak cit khawhmi zong tampi a um. Ngakchia duhmi a tam tuk caah, kal zong an thei lo. Chungkhar caahcun thialkam a fawi lo. Ngakchia caahcun "vanram pahnihnak" a si ko. 

Cedar Point i roller coasters min thangbik hna hi, an rak on lio caan ah, vawleicung ah abikcem (record) a rak ngahmi an si hna. Min thangbik hna tlawmpal in van tial.

Top Thrill Dragster: Cedar Point i a sangbikmi le a rangbik mi asi. 2005 ah an on. Pe 420 a sang. Suimilam pakhat ah meng 120 in a tlimi a si. Vawleicung ah san le ran ah pakhatnak a rak si bal (Cu kum thiamthiam ah Kingda Ka timi Roller Coaster cu Six Flags Great Adventure nih an van tuah i, cu nih cun a tei. Kingda Ka hi pe 456 a sang; suimilam pakhat ah meng 128 in a tlimi a si). Top Thrill Dragster hi pahnihnak ah a tla.

Top Thriller

Millenium Force. Pe 310 a sang; 2000 ah an on; suimilam pakhat ah meng 93 in a tli. Vawleicung ah a sang cem le a rang cem arak si bal ve. Nihin nih vawleicung ah san le ran ah palinak ah a um. Millenium Force hi ka cit bal cang. A kua chung hna ah luh asi caah, a ran tuk ah thir in meicil an chuak pah i, tih a nung ngaingai.

Millennium Forces

Magnum XL 200: 1989 ah an rak on. Pe 205 a sang. Suimilam 1 ah meng 72 in atli. An on lio ah vawleicung ah a sangbik le a rangbik roller coaster a rak si.

Magnum XL 200

Mentis: 1996 ah an on. Vawleicung ah dirbu citmi ah a sangbikmi roller coaster a si rih. A ngerh in aa ngeihmi le aa zimi asi caah, cit a har ngaingai. Keimah zong ka rak i cit bal ve.

Wicked Twister: 2002 ah an on. Tung pahnih karlak ah atung in a tlimi a si. Tung pahnih hna cu pe 215 a sangmi an si. A karlak cu tlanglawng bantuk a si. Cu tung pahnih karlak ahcun roller coaster cu tung pakhat a par in a par karlak ah an tli. A cho hawih in aa kapmi roller coaster vialte ah vawleicung ah a sangbik le a rangbik a si rih. A ran tuk caah le aa ngerh tuk caah aa citmi an aikio ning cu tuksum a si.

 

Wicked Twister

Mean Steak: USA ah sangbikmi roller coaster 10 chung ah aa tel. An tuahka ah, thing roller coaster sangbik a rak si. Thing roller coaster ah asau bik zong a rak si bal. 

Min Thatnak Ahmuhmi

Hi bantuk asi caah Cedar Point hi, USA chung lawng siloin vawleicung pumpi ah min a thangmi numahnak dum pakhat a si. Vawleicung nuamhnak dum ah a kaubik, roller coaster sangbik le rang bik tambik umnak, cit ding tambik umnak hmun asi. Roller Coaster dawhbik an umnak hmun zong asi. Cucaah, Cedar Point cu duhnak in, "America's Roller Coaster" tiah min an sak phah. 

Cucaah Arlington, Taxas in an thlafatin chuahmi nuamhnak dum makazin, Amusement Today, nih cun Cedar Point cu "Vawleicung a Thabik Nuamhnak Dum" (The Best Amusement Park in the World) tiah a liamcia kum 13 chung, an thimmi dum a si.

Luphihnak

Cedar Point hi, kum cheu tluk lawng an onmi a si. Zohphu, hmuhphu, lenphu le nuamhphu taktakmi nuamhnak dum a si. Nikhat chung, dollar 32 dih in va nuamh dingmi cu, ui ding le ngaichih dingmi a um lai lo. A nuamh pin ah, a tuanbia chim ding a donglomi hmunhma pakhat a si. Cucaah careltu le na chungkhar caah, kal aphumi hmunhma a si caah, Kawlram in a rami Laimi caah, Cedar Point cu rak leng ve law tiah kan sawm.