Ka Pa Lungphun

Laitlang ah lungphun tampi ka hmuh tawn. Lungphun tam deuh cu a thimi hna nih, an nun lio ah sunparnak an hmuhmi, thil an ti khawhmi, sa an kahmi, rawl an ngeihmi, an chunhthahmi, sawm an tukmi, puai an tuahmi, fanu fapa an puaknak, fanu fapa hna catang le riantlaihmi kong tampi tial an si tawn.

1988 kum furpi lio ah ka pa a rak thi. Ka pa a thih tikah, khuami ngaknu tlangval nih Lungkak vaa ah lungpher dawh ngaite an van lak i, a lung kan rak tial. Alung tialtu ah Pu Chan Hngak (Germany um) asi.

Alung donh cu tial kan i tim. Tial ding ka thei ti lo. Zeicatiah a thih ni lawng kan theih i, a chuahni kan thei ti lo. A kum zong hman tein kan thei kho fawn lo. Kum 79 asi lai tiah amah thirual nih an tuak ning hawih in, K.79 in a kum cu kan tial. Cupin cu tial ding aum ti lo. Lungpher cu le aa dawh ngai. Amin tial i, "Cu ni thla ah a thi" tipi lawng van tial ding cu, a kawk-tlawng tuk fawn. Zeitin dah kan tial ne lai tiah ka ruat. A ruah awk ka thei lo.

Zeicatiah ka pa cu, a nun lio ah thil pipa  atuahmi zeihmanh a um lo. Khuabawi le tlang a tuan bal lo. Catang a ngei lo. Zen cu voi tampi a phomh i ram voi tampi a vai nain, sa a kap bal lo. Rawl zong chimtlak a ngei lo. Chungkhar pawcawm kho menmen asi. Fanu papa degree la le cozah riantuan kan um lo. Puai ropui ngai a tuah fawn lo. Sasawm a tu lo, bawite bawipi a bawi lo. Christmas le Kum Thar hmanh a tuah bal lo. Cucaah, atuanbia hrimhrim tial ding aum lo ti tluk a si.

Cucaah, a tial awk ka thei ti lo i, ka pa u fa Pu Mang Sui (Pu Khen Tur fapa) ka auh. "Ka pa lungphun ah zeitindah ca kan tial lai? Tial ding dah ka theih lo?" tiah ka hal. A rak ka timi cu, a cunglei ka tial cia mi bantuk te in aka ti.

Na pa hi, a nun lio ah zeipipa chimtlak ngai a tuahmi sinak zeihmanh a ngei lo. Atuanbia tial awk aum lo. A tuanbia tial awk a ummi le mi zaapi zaaran nih an ngei khawh lo mi cu, na nu a dawt tukmi, a fale an dawt tukmi hna hi, a nih caahcun chimtlak cem tuanbia a si ko. Na pa cu a nunzia aa dawh tuk. Dinfelnak a tanh, mitoi ah aa dawr, mi bawmh a huam, riantuan a huam; mi zawn a ruat. Caw a kanh tik zongah, midang caw an tlamtlin hlan lo le inn an phak hlan ahcun, tluntak a duh hna lo. A ding taktak mi asi" tiah a ti.

Cucaah na pa lungdonh ahcun hitin tial ah aa tlak bimi  asi. Na pa nih rorah an chiahta hna lo nain, nan caah rosung bik an chiah piakmi hna cu, "Nupi, fate an dawtnak hna asi ko" tiah a ti i, amah ruahnak in ka pa lung cu, hitin kan tial:-

                                        PU TIAL HNOK
                             

NUPI FATE CUNGAH LUNGPUT THIAM BU TE IN CU NI THLA AH A THI.

Ka pa lungphun cung catial cu, cu vial lawng a si. Ka pa lungphun cu, Thau khuahlun nichuahlei Thantlang kalnak lamkam ah a um. Khual tlawn ka umkal pah ah siseh, thlanmual kan kal caan ah siseh, ka pa lungphun te ahcun ka va thu tawn. A caan ah, thla ka camta tawn. A caan ah khua zaza ka ruat i, ka pa a nun lio caan i, lo kan kalnak, tiva kan kalnak, ramtang kan vahnak, lo kan vahnak, ka nu le pa tiin lo kan riahnak, lo kan duahnak, khau kan hawhnak, rap kan chiah tinak, tha-hau lak i a rak ka puaknak vialte ka mithlam ah an cuang than tawn.

Methaw deuh le sathaw deuh kan ngeih paoh ah, ka nu le keimah a thaw bik a kan pek hmasat tawn kha ka philh kho lo. Cun tlawmte a hlei kho deuh ding asi ahcun, "chuncaw caah hei chiah piak u" ati i ahlei in kheng tein an ka chiah piak tawn. Rawl kan ei caan paoh ah, ka nu le pa kam teah ka thu i, kan eiti tawn. Cu vialte cu kan thinlung ah an chuak thuahmah tawn. Kan upa cang ko nain, ka pa thlanlung ka phak fate, ka pa he kan umti ko rua ti tluk in, zeizong vialte nizan bantuk te khin ka ruah tawn.

Ka pa cu zu a ding. Tang 3 ka kai tiang zuu kan chum. Kan inn ah zuding an rak tawr. Zuri vuak hi voi tam tuk ka hmuh. Cucu har ka rak ti tuk. Ka pa cu, zuu a din le rit caan zongah ka nu a ngiar bal lo. Fale a kan ngiar bal lo. A fimhrin ahcun chim ding aum ti lo. Zeitluk zuu a rit zong ah, ka nu le fale hi kutpar in a kan tong lo. Biafak ka khat in a kan ti lo. A lung kan tlin lo nak ahcun, a mit sen lawng in a kan zoh. Cucu asi ko.

Cutluk cun, ka pa hi, nupi fate cungah a lungput a tha. Ka pa nih biachia holh chia a chim ka thei bal lo. A fale hi dawt kan i hlawh lo; hawi dang kan canh hna lonak a tam ko. Asinain, awhrang in a kan raak bal lo. A thin a hun caan ah a hraam in a hraam ruangmang tawn. Ka nu a raak le sik hi ka thei bal lo.

Lo an kal ah an kalti. Inn an tlun ah an tlungti. Zarh an hman ah an hmangti. Rawl an ei tikah, a thaw deuh paoh cu, ka pa nih, ka nu a pek; ka nu nih ka pa a pek ve. Zei an tuahnak paoh ah an i zuldawi peng. Cucaah Thau pastor Rev. Hrat Ling nih cun, "Pa Uk nu le pa cu Hrangngawn te nupa an lo" tiah biakinn chung ah a rak ti hna. Cuticun daw tein an chan chung khua an rak sa.

Ka pa a van thi. Ka nu nih a timi cu, "Hnokte a thi lai le, zeitluk in hme ka ngaih a chiat te lai ka ti le Biak Thawng Nu le pa (CJC Pastor) nih thla an ka camh le ka dai dup ko" tiah a rak ti. Ka pa a thih tikah, aa lungsak colh. Ngaichih awk thil zeihmanh an i ngeih lo i, dawtnak leiba cham ding an i ngeih veve lo. Siaherh awk um lo tein an i thihtian.

Ka pa a thih cu college kum 3 nak ka kai lio asi. A thih hnu ah, BD ka kai than. 1996 ah BD ka dih. 1997 in USA ka phan. USA ah MATS le D.MISS ka dih. Atu pastor ka tuan tiang hi, a caancaan ahcun "ka pa thlanlung" te kha ka ruat theu tawn. Ka nupi le fale cungah ka thin a hun caan le ka lung a tawi caan, nupi fate ka sik hna caan le ka nupi he kan i mawhchiat caan ah, "ka pa thlanlung" te kha ka mitthlam ah a cuang i, nunzia a ka cawnpiaktu, zuamcawhtu le fimchimtu asi than tawn.

Ka pa lungphun cung i, "nupi fate cungah lungput thiam bu tein tein a thi" timi biafang cu ka caah zuamcawhtu biafang asi. "Kei pastor ka si, ziah nupi fate cungah nun ziadawh te ka ngeih lai lo" timi nunzia a ka cawnpiak. Ka pa thlanlung bia hna cu, ka caah rosung tuk asi. Ka panih, inn le lo, sui le ngun, chaw le va, ka roh ta hmanh hlah sehlaw, nun ziadawh dawtnak rosung a ka chiahta mi cu, ro vialte lakah rosung bik asi ko.

Ka ruat than. "Ka pa thlanlung" cu lung asi caah, a rawk caan a phan ko lai. Cafang zong a rawng a loh caan ahcun a lo ko lai. Cu lungphun cu hmuh awk um lo in, aa rawk le a loh caan zong a um ko lai nain, "ka pa thlanlung" cungah aa tialmi DAWTNAK BIA hna cu zungzal an lo kho ti lai lo. Tii le mei, ruah, thli le rial le zei thil hmanh nih a hrawh khawh ding asi ti lo.

Zeicatiah "dawtnak cu a hmun zungzalmi thil pathum lakah, a lianngan bikmi thil asi caah asi" (1 Cor. 13:13).


Note: Hi ca te in dawtu hrigntu ka pa Pu Tial Hnok upat hmaizah ka pek.