CDC nih an chimnak ah, USA ram kum tlingmi upa 67 million (37%) hi thikai ngeimi an si. American minung 3 ah pakhat thikai an ngei an ti. 2010 chung lawng ah, thikaimi thlawpbulnak, rian an baumi nihlawh le sii man ah hin, USA cozah hin kum khat ah 93.5 billion an dih ti asi. Thikai cu cozah caah pamphurh zawtnak asi. Thikai ruangah kum chiar tein upa he ngakchia an thi.
Thikai tih a nun khunnak cu, thi a kaimi pumpak ca i tih a nun pinah, telefa sin ah thi in chonh khawh asi caah, tih a nun khunnak asi. Minung hi kum 45 hnu ahcun thikai ngeih a fawi chin lengmang. Cucaah kum 45 na phak ahcun thi i chek pah lengmang ah a tha.
Thikai hi a cheu cu an thikai an i theih khawh i, eidin, ihzau, riantuan le cawlcangh in i zohkhenh khawh le thlawpbul khawh ngai asi. A cheu cu an thikai hi an i thei bak lo. Zeitluk a san zong ah an i thei kho lo. Zeitihmanh in an um lo. Cu bantuk an thikainak kong aa thei kho lomi pawl ca ah hin, tih a nung taktak. Ningcang lo in eidin zong sum lo in ei ko ahcun ruah lo pi inj, tlukrilh le stroke timi thluak rawknak in thih khawh a si.
Voikhat cu minung pakhat sekhan ah ka zul. Nurse nu nih a thi a van tah i, 195/120 asi. Nurse nu nih a zum lo. "Thikai na ngei maw?" tiah ati. "Ka ngei lo" tiah a ti. "Tuzing zeital na eiding cang maw? Thikai zualtertu eidin?" tiah a hal. "Tii lawng ka din. Ka ei lo" tiah a leh. Nurse nu cu a lau ko. A van thah than i, 197/125 tluk asi than. Doctor a va chimh. Doctor nih a tah than tik ah, cu hrawng thiamthiam asi. Na thi a kai tiah an ti. Amah cu ka hal i "Zeiti hmanh in ka thikai hi ka thei lo. Zeiti hmanh in ka um lo" a ti fawn. Sibawi pa cu ka hal. Doctor nih atimi cu, "Hi bantuk thikai ko hi tih a nung. An i thei tung lo i a donghnak ah stroke in an thi lengmang" tiah a ti.
USA ah hin kum chiar in minung 795,000 tluk nih stroke an ngah i, 140,000 tluk lengmang an thi. USA ah minung a pathumnak tambik a thihtertu zawtnak asi. Hi stroke tam deuh cu thikai he aa pehmi an si.
Cucaah thikai hi minung nunnak tambik a latu damlonak pakhat asi caah, ralrin a herh. Thikai a zualtertu cem eidin cu "sodium" (a almi) dat aa telmi eidin an si. Cite aa telmi paohpaoh. Kawlram eidin in kan chim ahcun, "ngapih, ngachoh, nganpiazi le adang cite cawhmi eidin paohpaoh" an si. A thutheng le a thau paoh a huat fawn.
Cucaaah America ahcun atanglei eidin pawl hi tambik hrial an herh. Na umnak ram eidin le thil sining zoh in na hrial a herh lai. Thikai cu eidin in thlawp le zohkhenh thiam a herh.
1. Pickles (Zil)
Zin fatete in an sermi a si. Hihi calories a tlawmmi eidin a si nain sodium dat tam tuk aa tel. Lehmah panga tluk a saumi zilthur ah khin cite 570 mg aa tel. Minung pakhat nih nikhat ah cite hi 2300 mg cung ei ding asi lo. Pickles pakhat te ah nikhat a herhmi cite i cheu 1/3 aa tel cang ti asi.
Cite tam tuk aa telmi pickles
2. Durchung Khohsuai (Canned chicken noodle soup)
Durchung khohsuai hi fawizaang tein eidin khawhmi eidin asi caah mi tampi nih an eidin mi asi. Asinain hrai pakhat chung ah khin 880 mg cite aa tel caah tih a nung ngaingai.
Durchung khohsuai
3. Sauerkraut
Calorie a tlawm te. Hrai khat ah calories 13 tluk lawng aa tel nain cite 460 mg aa tel caah tih a nung ngai.
Sauerkraut
4. Fast Food French Fries
Nihin ni ah fast food tam deuh cu, "trans fat free oil" in an kio hna. An zapi te cun an si lem lo. Zeitluk tha in an tuah hmanh ah, french fries nih hin thau dat le cite dat tampi aa tel rih. Medium fries pakhat ah khin thau 19 g aa tel i cite 270 mg aa tel. Cite le thau aa telmi a tlawm paoh le a thaw lo deuh. French fries hi a thawt tuk caah mi tampi nih hrial an i harh cemmi eidin pakhat asi.
French fries
5. Bacon
Bacon tam deuh cu thau a si. Dar 3 te ah khin thau 4.5 gram aa tel i cite 270 gram aa tel. Cucaah turkey sa in an sermi bacon tu ei i voksa in an sermi cu hrial deuh ah a tha. Eidin thaw ngai asi caah hrial bel a har ngai.
Voksa in an sermi bacon
6. Whole Milk
Calcium tampi aa telmi eidin asi i a tha ngai nain, thau dat tampi aa tel ve. Minung nih ni fatinte herhmi nakin thau dat tam deuh aa tel. Hrai khat ah khin thau 8 gram aa tel i 5 gram cu saram thau a si. Saram thau pawl cu thau hang dang nakin tih a nung deuh i,cu thau pawl cu lungzawtnak a chuahtertu asi tiah an ruah. Cucaah 2% le 1% milk din hi a tha deuh.
Cawhnuk
7. Frozen Pot Pies
Single pot pies pakhat ah cite dat 1300-1400 mg aa tel pin ah, thau 35 g aa tel rih. Cucu nikhat i na herhmi cite le thau dihlak i 50% asi cang. Cun ser chawmmi thau dat zong aa tel chih i, saram thau zong aa tel chih. Nan coka in hlonh a herh.
Frozen Pot Pie
8. Donuts
Donuts hi a lar ngaimi le ei ngaimi eidin a si. Asinain minung ngandamnak caah a tha tuk lo. Donuts pakhat ah khin 200 calories aa tel i, thau 12 grams aa tel.
Donuts tlum
9. Ramen Noodles
College siangngakchia caah an hman cemmi le a lar ngaimi eidin asi. Chumh a fawi caah a fawinak in eimi rawl asi. Asinain ramen noodle bag khat ah khin thau 14 g aa tel i, cite dat 1580 mg aa tel.
Ramen khohsuai
10. Cini (Sugar)
A thlummi dat a tam deuhmi paoh nih minung a thauter deuh hna. Thaunak nih thikai a zualter. Thau tikah lung tha a dirter deuh i taksa chung thikal ning a fumter deuh caah, tih a nung taktak.
A thlummi eidin pawl
11. Thikai Zualtertu Eidin Dangdang
Thikai a zualtertu eidin tam tuk a tang rih. Hi ka tialmi hi a zualtertu bik pawl eidin an si. Zu, margarine, cawsa hring senmi le a dang thau pohpoh hi tih a nungmi an si. Thikai na ngeih cang hnu ahcun, voksa zong sum deuh a herh. Coffee le zeidang energy drink pawl zong hi thikai zualtertu lawngte an si dih.
Mi ngandam si na duh achun, Zu cu hrial hrimhrim. Zeibantuk zuu paoh nih thikai a zualter. Zu rammi hna nih beer le rum nih thikai an thumh an timi hi a dik lo mi asi. Caan sau caahcun a zualtertu lawngte an si.
Zohchunhmi Ca
1. http://www.healthcentral.com/high-blood-pressure/cf/slideshows/10-foods-to-avoid-with-high-blood-pressure
2.
No comments:
Post a Comment