Electronic Satan

Satan hi a fim tuk. A ralkap pawl Khuachia zong hi an fim tuk ve. Minung fimnak a thang i, kan thil sermi an sang chin lengmang. Kan nunning a sang chin lengmang. Kan riantuanning zong a sang chin lengmang. Kan chan hna hi, thil kan sermi hawih in min an sak hna.

Lung sermi thilri hman lio ah "lung chan" (stone age) an ti. Dar hman lio ah "dar chan" (Bronze age) an ti. Thir hman chan kha "thir chan" (iron age) tiah an rak ti. Jet vanlawng an van ser i mi tampi nih vanlawng in khual tlawn a si tikah, "jet age" tiah min an sak. Cun atom bom an van ser tikah, "atom chan" (atomic age) tiah an ti. Cun bomzuang (rocket) kah fimthiamnak a chuak i, cucu "rocket chan" tiah an ti than. Rocket chan ahcun vawlei cung thil hi aa thlenning a rang tuk cang. Kan chan aa thlenning a rang tuk cang i, cucu rocket chan cu a si.

Cunak cun sang deuh lei ah a van kalmi cu "computer an sermi asi." Cu computer nih kan vawlei hi a zeizong tein thlen dih a timh cang. Cucu "computer chan" an van ti. Cu computer chung i an hmanmi hna cu, "electronic thilri" lawngte an si i, electronic fimthiamnak in vawlei hi a khat. Cucaah atu kan kal cuahmahmi kan chan hi, "electronic chan" tiah ti asi.

Hi electronic chan ahcun, minung riantuanning le thil-tining hi a rang tuk cang. 1600 kuakap ah vawlei kil khat in kil khat i, cakuat duh tik ah kum khat bak a rak rau. Cu ram thiamthiam cu atu chan, ''electronic chan ahcun second 1/2 ah cakuat khawh asi cang." Cu bantuk in minung fimthiamnak hi, a rang i "mimhla le zikzau" tluk in a rang cang.

Hi bantuk chan ah hin, Satan zong hi a phunphun in a muisam aa thleng i, a riantuan ning aa thleng ve. A ralkap pawl-khuachia pawl hna zong hi, hlan ahcun, Runng Tlang, Vuichip Tlang, Ciriang le Thau Tlang tibantuk hna ah khua an rak sa. Lo thlawh chan ah khan cun, lopil kuakap le cerh tibantuk ah khua an rak sa. Nihin cu electronic chan asi cang caah, khuachia zong hi "electronic khuachia" ah an i chuah ve cang. Satan zong "Electronic Satan" ah aa chuah ve.

Cucaah Electronic a umlonak ram Laitlang le Mizoram ah khan tam an um ti lo. Electronic a tamnak Europe, North America, Australia, New Zealand, Japan, Thailand le South America ram rum deuh ah an i thial thluahmah cang. Cuka ram i, electronic thilri chungah an lut i, atu hi rian an tuan cuahmah.

Cucaah computer, cell phone le zeidang thilri ah "sualnak le minung hur duh cuainak" hmanthlak le movie in a khat cang. Hihi a ruang taktak cu Satan kha "Electronic Satan" ah aa chuah cang caah asi. Electronic Satan cu lo thlawhnak, saram zuatnak ram le sifak ram ah riantuantu tlawmte lawng a chiah hna i, electronic fimthiamnak a thanchonak hmun ah Minung fimthiamnak le technology chungah an lut dih cang.

Hi electronic chan ahcun, minung hi kan ran lawng si lo in, electronic thilri hna hi deng tuk in ngeih le tongh khawh an si. Minung nih computer, cell phone, Ipad, DS, camera le zeidang electronic thilri he kan i then kho ti lo. Hi hna hi kan nunnak ah aa tel chihmi chan ah kan phan. Hi hna lo in kan si kho ti lo. Cu "si kho ti lo ding in nunnak" cu Satan nih a chuahtermi asi.

Zeitindah a chuahter? Minung nih fim kan duh. Cu fim duhnak thinlung cu Eve le Adam a tluktertu hna sualnak kha a si. Sualnak hramthawknak cu fim duhnak asi (Gen. 3:4-7). Hawi canh canh kan duh; hawi hmuh hmuh kan duh; hawi theih theih ka duh; hawi nuamh in nuamh kan duh tik ahcun, "electronic thilri lo in asi kho ti lo." Kan fale chuakka tiang nih "electronic thilri" cu an tong cang. A chiahru zong an duh lo. A tha le sang chin lengmang an duh. Cu hakkauhnak cu Satan nih a van chuahter i, kan vawlei hi electronic thilri in a khat cang.

Alengphaw in zoh ahcun hihi an tha tukmi le minung nunnnak ah santlai tukmi an si nain, a chungmuru taktak ahcun, nunnak hrawktu an rak sinak a tam tuk cang. Hi electronic chan ahcun, minung fimnak a sang tuk i, thil aa thlenning a rang tuk cang. Rihma ngei ti lo bantuk in aa thleng.

Minung fimnak a thang; thil sermi aa thleng i cu thil nih chan tiluan zong a thlenter ve. Chan tiluan aa thlen tikah, minung nih tuakning, ruahning le pawm ning aa thleng. Cu thil nih politics ah thlennak a chuahpi. Uknak le hruainak ah thlennak a chuahpi. Upadi ah thlennak a chuahpi. Pathian le bible hmuhning ah thlennak a chuahpi. Cu nih cun vawlei cu, a lettalam ah a kalpi peng i, ningcang lo khuasaknak a tam chin lengmang.

Cucaah nihin ni ram fim hna ah hin, nu le sual zong zei an rel ti lo. Lakfa ngeih zong zei an rel ti lo. Sualnak hmanthlak le video chuah zong zei an rel ti lo. Taklawng tlawn zong zei an rel ti lo. Mi hmuhnak ah chiatha piah zong zei an rel ti lo. Chiatha-khat thitlak zong pawi an ti ti lo. Pathian serning in kallo in, ralkah in kal le nun zong pawi an ti ti lo. Cu bantuk nun cu khuazakip te ah an karh cuahmah. June 26, 2015 zong ah USA nih chiatha-khat thitumhnak zong a van pawm ve cang i, vawleicung khuaza ramkip ah "Electronic Satan" nih aram a kauh thluahmah cang ti awk asi ko cang.

Cucaah Cathiang nih hitin a kan cawnpiak:

"Fimhring tein um u; ralring tein um u; nan ral Khuachia cu seh awk kawl awk ah chiandaih bang in a vak cuahmah ko. Nan zumhnak ah fek tein um u law, amah cu rak doh zungzal u" (1 Pet. 5:8-9).