Siaherhmi Thil

Vawlei ah hin ruah ding tampi aum. Cu lak ah a biapi bik in ruah ding peng asimi thil (2) a um. Cu hna cu,  hi vawlei ah hin minung vawikhat lawng ka si lai timi le minung kan si than ti lai lo timi hi an si. Cu thil pahnih cu kan philh lo le cinken peng aherh.

Minung hi kan i thawhkehnak, thannak hmunhma, nunphung, sining, tuanbia, thluak le hmuh tonmi aa dan bantuk in kan siaherhmi zong aa dang cio hna. Zeibantuk siaherhnak kan ngeih hmanh ah, a biapi bik mi thil pakhat cu hihi asi.

"Voi khat lawng minung kan si lai i, minung kan si than ti lai lo. Cucaah minung kan si chung ah ngaichih awk um lo tein nun" hi a biapi cemmi asi.

Nai CBCUSA khawmpi ah Rev. Dr. Lakfakhlua  nih a chimmi bia nih ka lung a ka suk ngai. A chimmi cu Mizoram i mirum cem Pa Chunga fapa kong asi. Atuanbia cu hitin a chim:

"India i Bible sianginn ka kai lio ah, Pa Chung fapa cu akal thatlo ruang ah a dam lo i, sizung ah ka va zoh. Pa Chung fapa nih cun a ka thawh i, "Kei cu ka no lio caan ah nuam ka rak ceng. Duhduhmama in khua ka sa. Ningcang lo taktak in ka rak um. Ka duhduh in ka rak i nuam i, ka caan tha vialte le kan no lio caan ka thazaang um lio caan tha vialte kha, papalawng le man ngei lo ah ka hman dih hna. Atu ka ka damlo hnu le ka thih lai ahcun ka ngaichih tuk ee" tiah ati ati.

Minung nih hihi ruah ding a um. Thih lai ahcun "Rum zong a thahnem ti lo; dawh zong a thahnem ti lo; thawn zong a thahnem ti lo; cathiam le fimzong a thahnem ti lo. Lar zong a thahnem ti lo. Bawi sinak le ralbawi sinak zong a thahnem ti lo. Zeizong te kha thih tikah thihpi chih dih ding asi."

Cucaah a biapi cemmi thil cu, tu chun ni kan nun lio ni le caan teah Pathian thei bu tein aa lawm khomi si le vawleicung kan nunchung caan tawite ah thiltha tuah kan duhmi "siaherhmi thil" tete tuahta hi a biapi taktak. Cu siaherhmi thil zong cu kan tuah kho dih lai lo. Thih tiang zongah rian aa lim lai lo. Siaherh mi aa lim lai lo. Cucu minung phung asi. Abiapimi cu siaherhmi thil tete tuah khawh chung in tuah tu khi asi.

Minung hi a caan ahcun thil fate nih kan sia a kan herhter khawh. Aliamcia 2008 lio, Dayton kan um lio asi. Kroger ah eidin ka va caw lai ka ti i, cawsa an zuarnak ah ka va kal. Sa pakhat cu ka zoh i, a fate nain a man a fak taktak. Cucu a pante asi. Tungvang palh in lehmah 3 tluk pumnawn in a um i, chumh ahcun ka (2) tluk ei ceu khi asi. Vo fa nawn in, vou  (3/4) cung a kai ding asi lo. Zeisa dah asi hnga? Zeitluk in dah a thawt hnga? Asiloah a vaitamin dah a tha tuk hnga? tiah atu tiang ka ruat. Ka sia a herh ngaite.  Hi tluk siaherh lai hngalh ahcun ka rak cawk diam hnga ti ka ruat tawn. Cu sate hmanh cu ka lung ah a tap ngai tawn.

Ka nunak lamthluan ah ka siaherhmi thil tete ka tlolhmi a tam ngai cang. Ka unau le far le ca zong ah ka tlolh; khuaram ca zong ah ka tlolh; ka nupi le fale ca zongah ka tlolh; ka Krihfabu le innpa ca zongah ka tlolh; ka hawikawm le Bawipa ca zong ah ka tlolhmi cu a tam lengluang. Chim cawk asi hnga lo.

Cu chungah ka sia a herh ngaimi tete cu "Rev. Van Hre nih ka museum saknak caah Ks. 150,000 tluk in van ka bawm ve" tiah a rak ka ti. Siangngakchia kan si tikah tangka ka rak ngei lo. Zeitikdah ka bawmh khawh te lai? Zeitikdah ka kuat khawh te lai tiah ka ruah cuahmah lio ah a nunnak a liam diam ai. A pawi tuk ka ti.

2010 CBCUSA Civui, Washington DC lio ah, Kawlram Yangon in ka theih ngaimi pa a ra. Cu zong cu kan har ngai lio asi. Tangka fang ka ken lo. Check le credit card lawng ka ken. $20 te tal thenh ding ka ti. Midang ka cawi ngam ti hna lo. Asinain lam kawl i a donghnak ni tal ah, pek hrimhrim ding tiah ka ruat. Asinain kan i tong than ti lo. Aw... khatluk Yangon i aa theithiammi tiah ka ti i, ka lung a tha lo. Nihin ni tiang ka "sia a herh."

Khua ka um lio ah hawikawm tha Thai Hai ka ngei. Anu cu ka nu u fanu asi. Thai Hai a nu cu Dawt Sung asi. Anih cu an pa Malaysia ah a um. A fale ramdang ah an um. An har in ka ruah lo caah, siaherh awk zong ka rak thei lo. Voikhat cu a thi. A thih hnu ah an pa he an i then ka theih. Ka unu he kan i chawn i, "Dawtte nih Vung Vung hi kei cu a ka philh ko; laksawngte zong a ka kua lo tiah an uh len" tiah a ka ti. Ka lung a that lo ning cu chim awk a tha lo. Asinain a thi cang i zeitiawk a tha ti lo.

Siaherh awk an si ko nain kan siaherh lomi an rak tam tuk. Laksawng kuat ve ding asi ko nain ka kuat khawhlomi hna an tam tuk. Cu thil nih ka hawikawm, chungkhat, ka Krihfabu upate a rak simi tibantuk hna, an thih fate ka lung a ka nuamhter lo.

Voikhat cu Sangau khua in kan innpa nu nih telephone a ka chonh. "Kan har tuk le rak ka bawm ve" a ti. Nau kan ngeih ka asi. Kan har tuk ve. Ka sia a herh tuk hawi. Ka ruat lengmang i, ka ngeih lo zongah tiah $25 ka kuat. A tam lo. Asinain ka siaherhnak a dai.

Hi bantuk thil tete hi ka tonmi a tam tuk cang. Ka tial cawk lai lo. A cunglei ah ka siaherhmi 2 le thil fate ka ruangah ka "siaherhnak a daihmi" kong ka ruat. Thil fate in siaherhmi te hi tuah khawh asi ko ti kha ka fiang.

Cu hnu cun, "Hi thil cu ka sia a herh taktak kho men ko" tiah ka ruahmi "siaherhmi thil" cu a si khawh chung in siaherh lo tein tuah hi ka zuam. Ka tinhmi asi. Ka hmaithlakmi asi fawn. Asinain ka tlolh peng cuahmah. Cucu minung kan sinak ah a pawi tuk tiah ka ruahmi asi.

Ka ruat than. Pa Chung fapa bantuk in, "siaherhmi tam taktak ngeih bu in ka nunnak a liam ve te ko lai hi ta?" tiah khua ka ruat. Pa Chung fapa cungah zaangfahnak, zawnruahnak le lungthatlonak ka ngei. Amah bantuk in minung zeizat dah an nunnak a liam cang i, minung zeizat dah kan nunnak a liam ve than te lai?!!!