GREATER HAKHA KHUALIPI
Hlanlio chan ah khua an rak tlak lio ah, chan tiluan hawih in an rak tlakmi asi caah, khua tlatu hna khuaruahmi (vision) khi, tuchan mit in zoh ahcun a rak hme ngai. Hakha khua an rak tlak ning zong, tu chan mit le thil sining zoh ahcun, a rak hme tuk. Asinain an mah chan hawih ahcun an vision a hme ti awk a tha lo. Zeicatiah an mah le chan tiluan hawih in an rak hmuh khawh tawk in, a tha bik in an rak suaimi kha asi ve ko caah asi.
Khuapi tam deuhpi cu motor, tlanglawng, vanlawng, tilawng um hlan in an tlakmi hna an si. Cucaah hi thilri pawl hna rak um hlan in, tlakmi an si caah, an vision ah suai chih awk an tha lo. Cucaah "An hrut, an thei lo, an vision a bi tuk" ti awk an tha lo.
Minung kan karh i, vawleicung fimthiamnak a thangmi nih thil sining a thlen tikah thil aa thlen bantuk in a herhmi zong aa thleng ve. Hlan lio tlakmi khua hna kha, chan thar minung tam tik ahcun aa tlaklomi khua tam tuk a um cang. Cucaah hruaitu khuaruatmi hna nih cun khuathar hi an tlak lengmang tawn. Asiloah khua pakhat le khat an peh hna hi, "Metropolitan" timi Kawl nih, "Maha khua" timi khua lianlian kha an ser hna.
Tahchunhnak ah, Kawlram ahcun "Maha" timi khua cu Yangon lawng asi rih. Yangon khua cu Mirang chan 1885 in khualipi ah an rak hman. Motor a um rih lo caah an vision a rak hme taktak ve ko. U Ne Winn chan a phak tik ah, Yangon khua ah minung 3,000,000 kuakap an um tikah an i tlum ti lo. Motor nih le atam tikah asi kho ti lo. Cucaah Myo Okkala, Taung Okkala, Thingungyun, Thaketa, Mingaladon, Hmawbi ti in khuapi thar an tlak hna i, khua an rak kauh i, Yangon cu Maha Yangon ti a rak si.
1988 Ralkap cozah akai tikah, minung 4,000,000 tluk an phan than. An i tlum ti lo. Khua, minung, innlo, motor aa tet tuk cang. Cucaah ralkap cozah nih Hlaingthaya, Shwepyitha, Dagon Myothit, ti in khuapi thar lianlian an van tlak. Dagon Myothit le bang cu, khuapi 4 an then-North Dagon, South Dagon, East Dagon le Dagon Seihkan-ti in an then hna. Khua an lian tuk.
Cucaah Yangon khua zong Maha Yangon (Greater Yangon) timi ahcun khuapi le khualeng khua tampi an i tel chih. Nihin ni ah 5,000,000 tluk minung an um cang. A cheu cu Yangon taktak in meng 30 a hlami hna an si. Atanglei map zoh ah, Greater Yangon area cu a kau ngaingai cang. Atu lio ah minung 5 million hrawng an um i, 2040 ahcun 10 million ummi "Megacity" ah aa chuah lai ti asi.
Kawlram minung an karh caah, Yangon khua lawng zong asi kho ti lo. Cucaah Ralkap cozah kai hnu ah Mandalay zong Mandalay Myothit ti in Maymyo kalnak lamkam ah khua kaupi an tlak chap. Yangon khua aa tet tuk tikah Nay Pyi Daw ti in Kawlram khualipi zong an thial ve ko. India ah Delhi te hna zong New Delhi ti in khua an tlak chap i, Pakistan ram ah Karachi cu aa tet tuk caah Islammabad khualipi thar an tlak ve. Egypt ram Cairo khualipi cu minung le motor an i tet tuk cang caah $45 billion dih in khuathar tlak ding an timh cang.
Greater Yangon Area (Ref. www.google.com)
July, 2015 ah ruahlo pi in Hakha khualipi a minh ko tik le aa rawk ko tikah zeirtiawk a tha ti lo. Cucaah hi vanchiatnak kha vanthatnak tu ah mer i, Hahka khua hi a thar in ser a herh. Hi khuathar sernak ah Laimi pumpak le chungkhar pakhat cio tuanvo kan ngei. Abik in Pu Hung Ngai cozah nih lam a kan hruai i, Lairam cozah a chuakmi paoh nih tuanvo an lak a herh.
Hakha cu Lairam hmun laili bak ah a um. Lairam Highway-4 aa tonnak khua asi caah hmunhma a rem taktakmi khua asi i, Lairam caah cun "cawkzawrhnak le tangka khualipi" (commercial le financial city) a si. Cubantuk hmun asi caah hmailei ahcun, Kawlram ah tangka tambik aa chawhnak ding khualipi pakha asi ding asi.
Atu i Hakha khualipi thar ser tik ahcun "Plan of Greater Hakha (Hakha Myo-piah Simanking) ngeih a herh. Cucu "Greater Hakha asiloah Hakha Metro" ti zong in kan auh khawh. Greater Hakha ser tikah tinhmi thil abiapimi (6) umter a herh:
1. Khua kha a fehnak hmun ah tlak ding
2. Lamsul (infrastructure) tha te te in tuah ding
3. Sining (system) ngei te le sullam ngei tein khua ser ding
4. Khua chung ummi hna kha siarem tein le lawng tein umnak ter ding
5. Hmunkip ah meihmittu motor luhchuah khawhnak in ser ding
6. Khua uktu Hakha khua cozah a dang tein ser le khua kil ding
Greater Hakha Khualipi cu system ngei tein kan ser lai ti tikah, hitin ruah a hau. Khua lai tuk ah ralkap sakhan chiah lo ding; sizung le university te hna khuahriang deuh ah chiah ding; thlanmual te hna khua he naih tuk ah chiah lo ding; innhmun ningcang lo in samh lo ding le mah duh carei in inn sak lo ding ti hi asi. Khualai ah kungtaih, town hall le park te hna chiah ding. Khua chung tilu hrawr tha tein tuah i, kokek tiva, cerh le thingkung zuah le kilven ding kha chim duhmi asi.
Cu Greater Hakha ahcun cu hitin ser ding asi:
1. Nitlaklei ah Thantlanglam lei ah Timit-Thitha tiang aa tel lai;
2. Falam lamlei ah Chuncung-Ramthlao tiang aa tel lai;
3. Matupilam lei ah Lawklung-Sakta tinag aa tel lai;
4. Chaklei kap ah Hniarlawn-Nabual tiang aa tel lai;
Cu area vialte kawmh in lamsul a phunphun ser ding asi. USA ah khua an tuah tik ah khua a dawhter bikmi cu "Beltway" timi "Khuaveltu Lampi" hi asi. Kawl nih Myo-pat-lanmah-gyi timi hi an si. Kawlram ah USA bantuk in Myo-pat-lam pakhat hmanh a um lo. Yangon, Mandalay le Nay Pyi Daw zong khi, Beltway tling a ngaingai an ngei lo. Laitlang cu a rawnh lo caah USA tluk tha cun, lam tha kan tuah kho lem lai lo nain, Lairam fingtlang sining he aa tlak ning tein tuah khawh asi ve ko lai.
Greater Hakha ahcun "Khuaveltu Lampi" (Beltway) pakhat cu hitin kan tuah khawh.
1. Chin-Oo-Sii in Hniarlawn in-Hniarlaawn ralchan tlang vel i, Chungcung khua tiang peh ding;
2. Chuncung in nitlakthlanglei ah vel i atu Vanlawngtual an zohnak Ritkuangtlang, Thantlang lamhlun le lamthar aa thennak ah chuaher ding.
3. Ritkuangtlang in duhsah tein zuanter i, Taungzalat Golf Course cung deuh vak in, Chin-Oo-Sii ah chuahter i, "Artipum pungsang" khuaveltu lampi ser khawh asi.
4. Khuaveltu lampi cu, Hakha-Falam Lampi le Hakha-Thantlang Lampi nih a laiva in a peh lai.
5. Khuaveltu lampi karlak ah lam tampi tanphei in kalter i innhmun thatha ser ding.
6. Cu khuaveltu lampi laiva ummi Chin-Oo-Sii in Falam-Thantlang lampial tiang hi khualaili (downtown) ah a tla lai. Cuka khualaili umnak lampi ahcun a kenkip in cho zaute in khualak lam an rak lut cio lai. Acheu Hniarlawn-Nabual leiah, a cheu Nawi-Timit kuarlei ah an kal lai.
7. Thantlang-Falam karlak vialte tlangpar cungah hin, cozah zung lianlian, sizung, colleges le university lianlian sak ah a tha ding asi. Hi hmun hi hmunhma fek tuk an si pinah hmunhma dawhnak le remnak zong an si. Hi hmun laicer ah "Hlawhtling Thlacamnak Tlang" zong cu a um i, Hakha khua laicer bak ah khua a dawhtertu taktak dingmi hmunhma ah aa chuah ding asi.
8. Chin-Oo-Sii in Hakha-Matupi-Gangaw Lampi hi pialter i, hmun a remnak in Gangaw lam a dang te in va pialter ding (Pyidawtha, Dawrthar, Khuachung, Sizung sang vialte cu kan chuahtak ding)
Khuaveltu Lam nih cun hi tlangthluan hi a hell lai
Hi Greater Hakha ahcun lam tampi kan tuah lai i, a tlawmbik ah minung 3,000,000 kan i tlum lai. Khi tik ahcun Falam lamlei ah Chuncung-Ramthlo-Tal-Lungpi-Falam aa peh dih kho lai. Falam khi Greater Hakha i sang Myo pakhat ah a tla kho lai. Khi tik ahcun Hakha-Timit-Thita aa peh ngacha lai. Nichuahleiah Lawklung-Surkhua tiang aa peh ngacha lai. Khi tikah cun Chin-Oo-Sii in Chuncung-Ramthlo-Timit-Lawklung-Surkhua tiang town bus a um kho te lai. Cucu asi kho hnga maw? Si kho tuk.
Tahchunhnak ah, 1997 ah Dayton ka phan. Culio ah Dayton-Cincinnati cu meng 55 a hla i, inn aa peh deng rih lo. USA ka um chungah, khuakar ah innlo tharthar an van sak hna i, atu cu khua pakhat bantuk ah a tla cang. Cu lawng hmanh silo in fingtlang san deuhnak Kentucky State tiang khua a va peh dih. Nikhat khat ahcun "Greater Cincinnati-Dayton Area" tiah "Metropolitan khua pakhat ah" a tla lai ti a si ko.
A tanglei ah hmanthlak zoh ahcun Cincinnati-Dayton cu aa tlai ngacha ko cang. Nikhatkhat ah Hakha-Falam zong aa peh kho te ko lai. Zeicatiah Falam le Hakha khi a hriannak in tah ahcun meng 33 tluk lawng an i hlat. Akarlak ah Chuncung-Ramtho-Tlangzar-Tal-Lungpi an um hna. Falam khua zong khi hmunhma a rem lo caah, Lungpi lei ah an i thawn deuhdeuh cang i, Hakha he aa naih chin lengmang. Duh sah tein aa peh lai i, Falam khi Greater Hakha Khualipi i sang pakhat ah aa chuah kho te lai. Surbungtlang airport an tuah khawh le bang ahcun, town bus le taxi tampi a um lai i, nuam tein kan umkal kho lai.
Greater Hakha area ah, kum khat ah minung 10,000 in kan karh caan a phan ve te lai. Hi hnu kum 300 ahcun minung 3,000,000 million kan um te kho men. Cucaah Greater Hakha Town Plan suai tikah, hlan lio chan bantuk in vision hme tuk in suai ding asi ti lo. Hi hnu a tlawm bik kum 300 tiang ca in timhlamhnak ngeih a hau. cu million 3 ca tiang in tuak chung ding asi. Zeicatiah kan vawlei a nguhmi khua asiloah minung 3,000,000 lawng tein umnak ding khua plan ser chung a hau. Cucu a hla tukmi alo nain a hla tuk lo.
Tahchunhnak ah, Rev. Carson te nupa rat cu nizan tihni bantuk te asi ko nain kum 100 renglo asi manh ko. Carson te chan ah minung 1000 kuakap lawng ummi asinain kum 100 chungah a let 30 tluk a karh. Hipin kan karh ning a rang deuhdeuh lai. Hi lio ah, Hakha cu minung Luklak ah kum 300 cu asi ko lai i, Hakha zong minung million 3 tiang an phan kho ko. A tlawm bik ah cu tiang ca tal cu ruat chung in Greater Hakha hi ser chung ding hi,vision ngeih a herh.
Hakha hi Laitlang ah hmunhma a rem cemmi khua asi. Cu tluk in minung hei tam te tik zong ah, innhmun kan i za rih lai. Timit kan kham lai i, Timit Tidil le Lai Tidil hna in khua chung tii a za in kan hmuh khawh rih lai. Khi tik ahcun Kalay-Hakha tlanglawng lam a um te lai. Laitlang ah minung tam paoh ahcun tlanglawng tawimi lam a um kho tuk ding asi. Hakha hrawngah vanlawngtual hmemi zong an um te ko lai.
Hakha khualipi pawng Nawi le Timit-Thitha hrawn hna hi, California Ramkulh ummi Hollywood tluk in aa dawhmi an si i, hi hmun ah Chinram Hollywood zong aum kho ve te ko lai. Movie thatha zong Lai ngaknu tlanval nih an chuah ve te lai.
Hakha cu a khuacan le vawlei hi pangpar phunkip he aa tlak. America le Europe ram pangpar kip cin khawhnak ding hmun a si. Minung tam tik ahcun pangpar in cawmnak a tling kho te dingmi khua a si. Nawi hrawn hrawng ah, Maymyo khua Gandawgyi i Botanical Garden bantuk in, Tibual le dum dawh taktak kan ser khawh. Hi a pawngah hotel thatha kan ser khawh hna. Hakha khuachung ah Cable Car kan tuah lai i, Runtlang in Hlawhtling Thlacamnak Tlang tiang kan tuah lai. Ramchung le ramleng tourist tampi an ra lai i, Hakha ah ramdang tangka tampi tourist in a lut lai.
Nawi ah dum dawh le tidil dawh kan tuah khawh (Ref. dingtitkeng.blogspot.com)
Atu aa rawkmi Hakha khuahlun sang, Pyidawtha le Dawrthar le chuahtakmi hmun paoh hi, National Park ah kan chiah lai i, thingram kan hnawnter lai. Ramsa phunkip le va umnak ah kan ser lai i, eco-tourism kan thanchoter lai i, cu nih cun Hakha ah tangka tampi a luhter rih lai. Hi hmun ah Greater Hakha Zoo timi hna kan tuah khawh i, saram dum lianpi tuah khawh asi te lai.
Cun Zinghmuh Tlang le Lai Tidil hrawng hi, Hakha ca tilaknak le Hlawka Uh-zin bantuk in Saram Hual ah kan ser lai i, Saram le thinkung hlathlai duhmi lennak hmun nuam ah kan ser lai. USA le ramdang in sakhi le ngengpi aphunphun tampi kan lak lai i, kan chiah ve hna lai i, Kawlram Saramdum tha bik ah kan ser khawh lai. Cuticun nelrawn ngei hmanh hlah u sih law, kan fingtlang, tupi, thingram le hrawrkuang hna hi i, "Tourist tlawnmi minthang hmunhma" ah kan ser hna lai i, cuticun Greater Hakha cu ramkip tlawnmi tourist khualipi ah kan ser khawh lai.
Tourist len dingmi mi tlang dawh (Ref. www.wikepedia.com)
Hlawka Uh-zin bantuk in Lai Tidil pawng hi Ramhual ah kan ser ve lai
Hollywood Hmanh nih a tluklomi Lairam dawhnak
Kan khualipi a rawk lio ah, ngaihchiat le lungdong lawng tein um lo ding a si. Hakha khua hi zeitluk dawh, zeitluk tha le zeitluk nuam in dah kan ser lai timi vision ngan deuh tu atu tein ngeih ding kan si. Atu kan vision ah um kho sehlaw tiah saduh ka thah bikmi cu, Greater Hakha khualipi ser hi asi.
Hi bantuk sernak ding caahcun Lairam ah hmunhma dang a um lo. Hakha lawnglawng hi a remmi hmun asi. Hakha cu Aizawl, Lunglei le Saiha nakin a let tam tuk in hmunhma a kau i a rem. Tiddim, Falam, Thantlang, Matupi tibantuk zong ah minung 100,000 cung tlumnak ding hmun an um lo. Tii zong an har tuk. Hmunhma an chiakha tuk. Hi khua pawl hna hi, minung 100,000 ca leng in tuak ahcun, Hakha nak in hmunhma an rem lo deuh ving. Atu ka chimmi Greater Hakha area ahcun a tlawmbik ah minung 3,000,000 kan i tlum lai. Innhmun le lamsul an rem tuk fawn. Fingtlang an i dawh tuk fawn i, vawleicung tlangcung khua minthang ah aa chuak kho lai.
Hmailei i Greater Hakha kan ser khawh tik ahcun, Timit tiva a hnalei kan dil lai i, dintii a za in kan ngei fawn lai. Tii ah phan ding aum lo. Kan miphun kan rum, kan thawn tik ahcun, Timit le Boinu Tivapi tibantuk hna kham lai. Tibual lian le saupi kan ser khawh lai. Cu tibual in hydro electric kan lak lai i, tu chun ni i kan uar ngaimi Maha-Dat-Aaline hi, alutaw kan mer lai. Kawlrawn in Lairam ah electric zuar ti lo in, Lairam in Sagaing le Margwe Division, Rakhine Ramkulh ah siseh, Mizoram le Manipur tiang in electirct kan zawrh hna lai i Lairam ah tangka tampi a lut lai.
Pe 602 sangmi hibantuk Shasta Dam hi Boinu ah kan dil khawh ve (USA)
Boinu Tiva kan khammi ah tibual nganpi a um kho lai i, Hakha-Thantlang pengah boat in nuam taktak in khual kan tlawng kho lai. Mizoram i Kaladan Project ah Hakha kan peh lai i, Rakhine ram in India, Bangladesh le adang ramdang he tampi kan i caw-zawrh kho lai. Cuticun Greater Hakha ahcun International Trade Show tiang hmanh kan tuah khawh ve te lai.
Greater Hakha ser ding cu asi kho maw? Kawlram cozah Demoracy system in kan kal i, zalawng tein thanchonak le sipuazi rian kan tuan khawh ahcun asi kho tukmi asi. Kawlram cozah nih a kan senh le senh lo le a kan kham le kham lo lawng a biapi. Cozah nih a kan kham lo paoh ahcun, Vision ngeih a biapi. USA zong ah fingtlang thuk taktak an kham i, tibual lianlian dam lianlian an dil i khua tampi an peh ve ko. Hydro eletric tam tuk an lak ve ko. Fingtlang le hawrkuang sannak zongah "Beltway" (Myopat line) lianlian an tuah ko. Kan ram zongah cozah a that paoh ahcun kan tuah khawh ve hrimhrim. Cozah nih sipuazi zalawnnak pek le private riantuannak thapek lawng aherhmi asi.
Fintlang, horkunag, nelrawn le tupi lakah Nay Pyi Daw zong an ser ve ko
2005 ah Nay Pyi Daw zong zeihmanh a umlomi rua le thing lawng a um komi ramlak in vawleicung khua dawh pakhat ah $5 billions (5,000,000,000) dih in an rak sak ve ko. Nihin ni ahcun billion tam tuk can dih cang lai. Cozah chimnak ah minung 1,000,000 an um i, a area kili meng in 2,700 asi tiah an ti i, Singapore nakin alet 10 a ngan deuh. Kawlram cozah zong nih cu tluk a lianmi le kaumi Nay Pyi Daw an tlak khawh ve ko ahcun, Greater Hakha zong cu kan ser khawh ve awk asi ko.
Cucaah Hakha khua aa rawk tikah thinphan ding le lungrawk ding aum lo. Hi Greater Hakha vision tu hi, Pu Hung Ngai cozah thinlung zong ah chuahter ding tu a biapi. Chin State Government thilung hrimhrim ah chuahter ding asi. Chin State Government nih atu lio hrimhrim in cu vision an ngeih khawh ahcun, nihin ni Chin State Government hi Laimi kan tuanbia a dongh hlan lo le vawlei tuanbia a dongh hlan lo, kan philh ti hna lai lo.
Golf Course lei viale khi Greater Hakha ah aa tel dih lai
Falam lam in Hniarlawn ralchan tlang tiang aa tel dih lai
Lamthar aa comi zawn in Hniarlawn lei tu ah Beltway cu a kal lai
Kawlram mi nih kan duh zong duh lo zongah, Nay Pyi Daw a tlak ruang ah Ser. Gen. Than Shwe cu kan philh kho ti lai lo. Kawlram tuanbia an chim fate chim peng asi ve lai. Pu Hung Ngai cozah zong an tuanbia donghlo an duh ve ahcun Greater Hakha Town Plan tu hi a rannak in ser ding asi.
Acunglei ka tialmi Greater Hakha kong hi, "Asi kho bal lai lo" atimi an um men ko lai. An ti awk asi ko. Hlan lio ah Tilawng cu tii ah aa vuan kho lai ti cu ahohmanh nih an rak zumh lo bang, vanglawng zong va bang van ah a zuang lai ti cu an rak zum kho lo. Vanlawng hi raltuknak ah a tha lai timi hi US ram hruaitu hna nih kum tam nawn cu an rak pawm kho lo. Vawlei a pum i a mer ti cu naite tiang ah a zum kho lomi an tampi rih. Rocket in Thlapa cung kai ding cu asi kho ding in an rak ruat lo. Movie lawng ah a um ding in an rak ruah nain thlapa cu kai khawh asi ko cang.
2005 i Nay Pyi Daw tlak an timhka te ah, ramdang cozah nih Ralkap cozah cu an si a fak tuk, tangka an sawksam ti in heh tiah an rak sawisel hna i "Hi ramdang lakah khualipi an ser kho ngaingai te hnga maw? an timi cu, nihin ni ah vawleicung ah a than a rang bikmi khua pakhat ah aa chuah ko. Nihin ni ah Cairo cu $45 billion dih in khualipi thar kan tlak lai ti asi. Tuluk nih Thlapa kan kai ve lai ti asi. America nih MARS kainak ding lam an kawl cuahmah. Atu ahcun vawleicung lawngah tourist khualtlawng tilo in vancung ah tourist kan thlah cang lai i, MARS vawlei hi kan lamh lai an ti lio ahcun, "Greater Hakha Sernak" cu Laimi caah a si kho ve ko hnga lo maw timi ruat bu in!!
------------------------------------
No comments:
Post a Comment