Hakha cu Lairam kan khualipi asi. Laimi kan caah kan Jerusalem asi. Hakha a rawh cu kan ram a rawh bantuk asi i, kan miphun caah sunghnak nganpi asi. 1982-1984 Hakha ka um lio tein Hakha khua vawlei aa thawnning le aminh ning cu ka hmuh lengmang. Cu lio caan tein ka lungre a rak thei. Sihmanhsehlaw kan tuah khawhmi le chimrel khawhmi a um lo. Hakha leimin kong ah cozah nih zeital an ruat hnga lo maw ti lawng khi ka rak ruat tawn.
1997 US ka kal lai te zong ah, Sizung sang vawleimin mi pawl cu ka va zohta. Ka tlun inn tleicia Pu Lai To te inn in, ralchan lei, No.1 High School Certual thlanglei ummi inn pawl an dum a kakmi le a minmi cu ka hei hmuh thluahmah ko. Ka tlun-inn in Chin-Oo-Sii lei a kakmi ka zulh. Chin-Oo-Sii phak lai tiva tiang a kak thluahmah ko. Cu hmun cu inn hmun an samh. "Hi hmun hi cozah nih zeicadah innhmun an samh hnga?" timi ka ruat. Kan cozah hi "ruahnak" (vision) an ngei lo taktak timi cu hmuh khawh asi.
1997 ah USA ka phan.Hakha vawlei kakmi kong cu ka ruat peng i, Zion Par Makazin Vol.2 i, Hakha Leimin kong ka tialnak zong asi. Cu lawng cu asi lo. 2012 CBCUSA BT Meeting, Dallas ah $2,000 tal chuah ko u law, Hakha Leimin hi Survey tuah a hau ko. Culoahcun Hakha khua ah, innlo, lamsul, khua rawhnak le minung nunnak tiang in liam khawh asi. Hakha khua leimin hi hlathlai deuh ahau tiah ka rak ti. Upate an hna a tla i, an rak dirkamh caah, $2,000 cu an rak chuah. Kai lawm ngaingai.
Rian tampi kan tuan kho lo.Kan tuan manh fawn lo. Kei ramdang ka um tikah a harnak khun asi. Ka duhning in thil a kal kho lo. Asinain Muko Makazine, June, 2013 ah Hakha Leimin Research Tuahnak timi tlangpi tar in capar ka rak tial. Kan saduhtha, tinhmi le survey tuahnak ding hmun (9) kan rak thim i, cuka zawn cu biapi bik ah kan rak zohmi asi.
Pu Joel Ling sinah capar ka kuat. Ka kuat hnu thla khat ah, "Ka capar na hmu maw? Thawng na ka thanh lo le?" tiah ka hei ti. Aka lehmi cu, "Ka hmuh. Ka caan aa tet tuk le kan let manh lo. Atu June thla ah kan chuah lai. Na ca ka hmuh hnu le atu kan chuah hlan kar ah dah kaw, inn 11 hrawng a rak min an ti cu" tiah a ka ti i, ka lau taktak.
BT Meeting (2012)lio ah Hakha Sizung caah CBCUSA nih chapel sak ding an rak timh lio asi. Biatung ka dirh lio ah ka rak chimmi cu, "$2,000 tal cu kan chuah piak ko u. Hakha leimin survey tuah hi a biapi tuk. Atu chapel nan saknak ding hmun Sizung sang hi tih a nung tuk. Kan chapel hmun hna hi tha tein zoh u law thim u. Amin khomi asi. Nan tha chia hlah u. Zeitik dah aminh lai timi biahalnak lawng ruah ding asi?" tiah ka rak ti.
July 30, 2015 ah Lemin survey tuahtu committee kan upa Pu Chan Hrem nih a ka chonh i, "Sizung chapel zong kha a kak i a min ding in a um ve ko" tiah ati tik ahcun, ka lung atha lo. BT i ka rak chimmi cu a tling taktak. Chapel lawng silo in ruak chiahnak zong a kak ve ati rih. A rau lai lo. Hakha sizung zong a kak lai i a min than lai.
Pu Cung Hu a kan tlawn lio (2014) ah, "Lairam cozah nih, hi a min zau dingmi hmun ah, khi tluk sizung tha an sakmi cu a pawi tuk. Vision an ngei lo tuk" tiah ka rak ti. Pu Cung Hu nih a chimmi cu, "Tibual zong an chilh dih i, inn sak ding an ti. Sizung kha a thlanglei cu a min viar dengmang cang" tiah a ka ti. Kan cozah hi, zei khuadah an rak ruah hnga timi ka ruat. "Khuaivah tha bawngh in an tha an bawngh i, caan sau hman lo dingmi sizungpi an sakmi cu, ka khuaruah a har taktak."
Khuaruahhar asimi cu, vawlei a kak kho tiah ka ruahnak hmun (9) hi a lang in ka thim i, Leimin survey tuah ding ah kan i selmi (target) mi asi. Cu kan i selmi hmun (9) lakah, tutan leimin ah hin, hmun (8) aa tel. Khuaruahhar pakhat asi rihmi cu, amin bak ding in ka ruahmi Keisih Sang hi tutan ah aa tel lo. Lunglawmh awk ngai asi. Asinain Keisih Sang cu a luat hlei lai lo. Ruah dingmi cu, "Zeitikdah a ,minh lai?" ti lawng asi.
Hakha khuami hna nih rak rel i, khua an ruahnak hnga ding caah ti in, vawleimin kong capar cu Pu Joel Ling sinah ka kuat. Pu Joel Ling nih ka tialmi capar cu hitin atamhmawih (comment):
"Tutan capar lak ah, lungrethei ngai le relphu ngai.....fim a kan chimtu le ralrin a kan petu capar asi caah kan i lawm" tiah Editor hmurka ah a rak tial (Muko Makazin, June, 2013)
Cu Muko ka capar cu atanglei ah zohchun ding ah ka van tar than. Chuahpiaktu Pu Joel Ling le Muko Makazin tuanvo ngeitu cungah lunglawmhnak ka ngei.
No comments:
Post a Comment