Hakha ka um lio zongah, Hniarlawn hi solfa an thiam ngai tiah ka rak theih tawn. MIT ka kai lio ah solfa a kan chimtu le hla a rak kan hruaitu cu Hniarlawn khuami, Rev. James Tin Kung a rak si. Thau khua ah a rak um balmi, San San nu le pa timi zong, kan khua an rak phan i, solfa an rak thiam ngaingai. Adang min ka theihlomi tampi an um rih i, ka theihmi ahcun Rev. Lal Cung Awi te hna solfa thiam ngaingaimi an si.
1982-84 tiang Hakha ah ka rak um. Lung Biakinn hi voi tamcem ka pumhnak asi. Cu lio ah hlaremhmi lak ah, Hniarlawn khuami hi, solfa lei ah chimrelmi an rak si. Zeiruang ah dah Hniarlawn khua hrawnghran hi, hitin solfa thiammi an tam hnga timi ka rak ruat tawn. A ruang ka thei lem lo, Hakha akhua he aa naih caah, Siangbawi te le hlanlio Krihfa hmasa hna sin in an thiammi asi theu lai tiah ka rak ruat.
 |
| Rev. Lal Cung Awi le Pa Ceu Hlun (Ref. robawm.com) |
Cu ka rak ruah tawnmi aphi cu Hmantaw ka kal lio ah ka rak theih. Cucu 1995 kum, MIT i BD (II) ka awn kum ah asi.
1995 Thalcaan lio ah, hawikawm tlawn ruah ah, Hmantaw khua ka va phan. Hmantaw khua upa tampi an rak ka leng. Cu lio ah tarpa pakhat a um ve. Amin ka thei ti lo. Amah cu kum 68 kuakap asi lai.
Cu tarpa nih cun, "Ka fa, khawika khua dah na si?" tiah a ka hal. "Thau khuami ka si" tiah ka leh.
Cu cangka in tuanbia saupi a ka chimh colh. Atuabia a chimmi cu, hitin asi.
"Ka fa, mah cu Thau khuami hme maw na si?"
"Kan tlairawl lio ah hin, solfa thiam kan rak duh tuk. Cawnnak ding khua kan tuaktan kan rak thei lo. Solfa thiammi an rak har tuk. Thau khua ah solfa thiammi an um an ti caah, Thau khua i solfa cawn ah Hniarlawn le Nabual in minung tam ngaite kan rak kal. Riahcaw kan rak i rawnh i, a thla thla in Thau ah kan rak caam. Chun ah lo kan thlawhpi hna. Zaan ah meifar van bu in hla rak cawng tawn" tiah ngaihchia ngai in a ka chimh.
Pathian an rak duh ruang ah, riahcaw ronh bu le lo thlawh piak bu in, Hniarlawn khua in Thau i solfa cawn ah an rak rak kalmi cu, ka khuaruah a har taktak. Uar zong an um tuk. An duhnak, an huamnak le an i pumpeknak hi, upat hmaizah tlak taktak an si ka ti.
Tu chan mino tampi cu, meng 1/2 hmanh solfa cawn kal kan huam ti lo va si kaw, an nih cu Hniarlawn in Thau tiang cu meng 60 tluk a hla i, cu tluk a hlami ah solfa cawn ah an rak kal. An innlo, an rian, an sining vialte an rak kaltak. Uar an um taktak. Hla phuahtu nih "Kan pupa zumhnak a nungmi" tiah atimi hi, an zumhnak hi arak nung taktak ko. Atu chan zumhnak style in cun, "An piangthar lo le hell an kal lai" kan ti men ko hna lai. Asinain, hihi chim ka duh. "An nih cun zumhnak nung an ngeimi an si i, Abraham zumhnak bantuk in an zumhnak kha an nunnak in alanghtermi an si" tiah chim ka duh. An nih sin ahcun, zeitluk in dah ka pek khawh lo timi kha, keimah le keimah zong ka hmuchuak ve.
Hlanlio Laimi kan pupa zumtu hna zumhnak, pumpeknak, huamnak, biaktaknak le harnak tuarnak hna ka ruah ah, ka upat taktak. Cu tarpa cu a nung ti hnga maw ka thei lo. Ka mitthlam ah a cuang theu tawn. A caan caan ahcun a tuanbia a ka chimhmi te ka ruat theu tawn. Ka philh sual lai ti ka phan caah le cu ka hngalh ti lomi tarpa te tuanbia a loh sualnak hnga lo ding caah, hi ca hi ka tialnak zong asi.
Cu tarpa te le a hawi le aho dah an si hnga ti zong ka thei kho ti lo. Mi nih cun upatnak le hmaizahnak an pe lem hna lai lo nain, kha amin ka theih tilomi tarpa te le a hawi le kha, upat hmaizahnak ka pek hna. Ka upat. Ka thangthat hna. Laimi caah zohchunhtlak zumtu tha an si ka ti. Minung nih cun an tuanbia kan philh ko hna lai nain, Pa PATHIAN nih cun a philh hna lai lo timi fiang tein ka theih caah, cucu ka lawmhnak asi.
Hniarlawn le Nabual hrawng hi, zei cadah hi tluk in solfa an thiam hnga timi ka rak ruah tawnmi te kha, aphi pakhat cu an pupa hna mah tluk in an rak huam caah asi timi kha ka hmuh. USA ka phak hnu ah, "Hniarlawn Hlaremh" hlaphel ka ngaih balmi a um. Atlangpi ka thei ti lo. Cu hlaremh hna cu ka van ruat than i, kha tarpa te le a hawi le pawl tuhmi "thlaici" an si timi ka hmuh. Thlaici atuhtu rak um lo ahcun, Hniarlawn hi mahtluk in hla an thiam lem hnga lo.
Nihin ni Hakha le Thantlang Peng khuate sining zoh tikah, Hniarlawn nakin solfa thiammi khua an tlawm men lai tiah ka ruat. Cutluk in solfa thiammi an tam. Thlaiti atuhtu kha Hniarlawn Patar pa te le a hawi le kha "minthatnak" (Credit) pek phu taktak an si. Kha hna thlaici tuhmi te kha alo ti lai lo. Hniarlawn cu solfa an thisen le an thihri ah a lut cang. An tlik le ruh tiang in a lut cang. Cucaah techin fapar chan tiang, chan tampi solfa an thiam cang lai tiah zumhnak ka ngei.
Kan khua (Thau Khua) kong zong ka ruat than. Kai theih tik ahcun, solfa thiammi chim ding tlak cu Pu Heng Mang le Pu Van Ling an si. Pu Chan Hngak te hna zong mino deuh ahcun a thiammi an si. Kan pa le hna cu an rak thiam dih ngawt nain min thang taktak cu ka theihphakmi an um lo.
Cu Hniarlawn tarpa te nih a ka chimhmi tuanbia ka ruat i, kan khua kong ah ka lung a fiang lo mi ka hei ruat than.
Zeicadah Hniarlawn le Nabual tiang nih Thau khua ah solfa an rak cawn hnga? Ahodah chimtu asi hnga? Cu solfa chimtu saya cu khawika in dah arat hnga? Zei bantuk minung dah asi hnga? Khawika ka in dah a va thiam ve hnga? Hakha le Thantlang hmanh ah solfa chimtu an um lo lio caan ah, zeicadah Thau khua khuate, India ramri khua ah solfa chim kho saya aum hnga?" timi vialte ka ruat. Aphi ka thei kho lo.
Thau ka tlun hnu ah, khua kan Krihfa upa ka va hal hna. An ka chimhmi cu hitin asi. Ka hngak chiat deuh caah ka rak theih manh lo mi tuanbia kha an ka chimh i, cu ceu cun ka lung a van fiang ve. Upate nih an ka chimhmi cu, hitin asi.
"Thau khua ah hin, India ram lei in cawkmi Press seh kan rak ngei. Cucu Hakha le Thantlang hmanh nih an rak ngeih khawh ri lo mi asi. Cun Rev. Lengkham hi Mizoram in a ra i, Thau ah pastor a tuan. Amah hi solfa thiammi asi. Amah nih Thaumi hi solfa a kan chimh. Cucaah khua dangdang hna zong, Thau ah solfa cawn ah an rak ratnak asi. Cu Hniarlawn le Nabual hrawnghrang zong cu, solfa cawn ah, Thau i an ratnak cu asi" tiah an ti.
Kai theih tik ahcun, kan mah khua ahcun solfa thiam tiah chim dingmi cu Pu Van Ling lawng asi. Asinain Hniarlawn khua tu ahcun solfa leiah saya a tuan kho dingmi solfa thiam an rak tam tuk. Nihin ni tiang zong, Solfa lei ahcun Hniarlawn cu min ngeimi khua pakhat an si.
Cu tarpa nih a ka chimhmi a tuanbia te ka ruat i, lunglawmhnak in ka khat. Keimah chan ahcun Thaumi cu solfa thiam kan um ti lo nain, Hniarlawn le Nabual hrawnghrang tiang Solfa thlaici a karhtertu khua pakhat kan rak si ve ko timi ka hmuh tikah, kai lawmh lawng si lo in kai lunghmuih. Krihfami kan rian cu, midang thiltha hrawmh ve le midang thluachuah hmuhtertu si ding asi bantuk in, kan khua Krihfa hmasa hna zong ka upat hna.
"Mi pakhat thawng sa pakhat thawng" an ti bang, Thau khua ah solfa thiam ngaingaimi Rev. Lengkham aum ruangah Hniarlawn le Nabual tiang nih solfa an thiam. Cu hna zong nih, an thiammi solfa thiamnak thluachuah cu Hakha peng ah an karhter chin ve.
Cucu pei Jesuh nih, "Vancung pennak cu antamci mu he aa lo" tiah atimi cu asi cu. Antam ci cu a fate ko. Asinain an van tuh i a keuh tikah, antam kung lianpi ah aa chuah i, va nih an tlanh i a theipar kha an ei khaawh i, va tampi caah lawmhnak le khimnak arak si. Cu ve bantuk in, Thau khua i solfa thiammi pakhat hnih ruangah, Hniarlawn le Nabual tiang solfa thiammi an karhnak kong ka theih tikah, Rev. Lengkham cung zongah kai lawm. Thaumi ka sinak zong in, kai lawm fawn.
Vancung pennak karhternak caah, mi kip hi kawh auh le tuanvo pek kan si. Kha Hniarlawn tarpa te le a hawi le zong kha solfa in vancung pennak a kahtertu an rak si ve ko timi ka ruat i, kai lawm. Ka upat hna i, ka thangthat hna.
USA ka phak hnu zongah, kha Hniarlawn tarpa te kha ka ruat theu tawn. Hniarlawn khuami he kan i ton fate a kong ka chim theu tawn. Ka philh kho lo.
Kha tarpa te kha, hi vawleicung a nunnak zong a liam cang men ko lai. An tuanbia, an i pumpeknak, Krihfabu le Bawipa ca an rak i peknak kha, mi nih an philh cang men ko lai. A theih zong an theih piak lo men ko hna lai.
Asinain, amah le ahawi le nih an tuhtami solfa thlaici cu Hniarlawn-Nabual hrawng le Hakha pawng hrawnghrang ah a dong ti lai lo!!
------------------------------
Chinchiah
Hi capar in, Hniarlawn Tarpa te le a hawile le Rev. Lengkham upat hmaizahnak ka pek hna. Pathian nih vanram ah suiluchin a pek ko hna lai timi ruat bu tein hi ca hi ka tial.
No comments:
Post a Comment