Semnak Lairam: Lairam Ah Zohchunhtlak Mt. Carmel School International

Kawlram zong hi democracy ram muisam te a van len pah ve nak cu private sianginn tete hna an van ummi asi. Democracy ram ahcun cozah sianginn nakin private sianginn hi an tha deuh i, mirum, milian le bawi fa deuh lawngte hna nih kai khawhmi an si. Cu hlan cu Kawlram cu socialist le ralkap uknak in caan sau tuk kan kal caah, zeipoh cozah ah kan rak i hngat. Nihin ni ahcun private riantuannak tete zong theipar an chuak ziahmah cang.

Cu lakah theipar pakhat cu Mt. Carmel School International (MCSI) hi Hakha ummi hi asi. A dirhtu cu Rev. Biak Kung (Tlangpi) asi. June 1, 2016 in sianginn an on cang. Hakha ah siangngakchia 180 an ngei. Saya/sayama 11 an um. Tangcheu in tangriat tiang cawnnak private sianginn asi. Kumvui ahcun tam deuh luh an i timh caah a thangcho chin lengmang lai tiah ruah asi. Hi sianginn hi, Laitlang ahcun private sianginn ca bakbak in sak hmasatmi le thawk hmasatmi asi theu lai tiah ka ruah. A dang cu an um hmanh ah, innhlan chawm in tuahmi an si men lai.

Mt. Carmel School International hi a thawktu zong pastor asi caah, Krihfa zumhnak kha hrampi ah chia in dirhmi sianginn asi. Cucaah pumhnak le thlacamnak zong ngeih pah asi. Jesuh kha biapi ah a chiami (Christ-Centered School) asi tiah adirhtu Rev. Biak Kung nih a chim. Laimi nih hi bantuk in, Krihfa zumhnak kha hrampi ah a chiami private sianginn thatha hi kan herh ngaingai lio ah, Mt. Carmel School International a dirmi cu, thawngtha taktak asi.

MCSI sianginn hi vawlei fimthiamnak le thlarau thazaang laknak ding sianginn pakhat asi i, Lairam ah a um bal rihlomi thil pakhat zong asi. Krihfa zumhnak aa tlaihmi chungkhar an fanu fapa caah bochan dingmi sianginn pakhat asi theu lai tiah ruahchannak a um. Fimnak hramrawknak cu Pathian asi caah, hi sianginn in hruaitu thatha tampi an chuak te theu lai tiah ruahchannak a um.

MCSI hi Hakha khuakam deuh ah a ummi asi caah, ferry bus pahnih an suai i, cuticun siangngakchia hi thiar an si. Cucu chun mang a taktak ah a cang ti lo awk atha lo. Zeicatiah 2014 i Rev. Biak Kung USA a rat lio ah, sianginn dirh aa timhnak kong a rak chim lengmang. Culio ah a saduhthah cu a lian ngaingai. Ritkuang Tlang ah vawlei kaupi an ka pek a rak ti. Cu hmun cu khua he aa hlat ngai. Cucaah umkalnak zeitindah kan tuah lai timi kan rak i caih tawn.

Culio ah saduh kan rak thahmi cu, sianginn hmun hi khuachung in a lam a hlat lai caah, "private bus" 2-3 in abawm in kan suai hna lai; share kan chiah cio lai. Lairam ah bus a um rih lo caah, bus service zong chun ah kan kemh pah lai i, cuticun Lairam thanchonak rian kan tuan chih pah lai tiah kan rak ti. Atu siangngakchia thiarnak ferry bus (2) hna an ngeih tikah lunglawmhnak taktak asi. A saduhthahmi titsa ah Pathian nih a canter.

Mt. Carmel School International hi sianginn dawhtete 4/5 an ngei. Cabuai le todan thatha an ngei i, chanthar sianginn tling ngaingai pakhat asi. Hmailei ah sianginn hi amah tein aa zohkhenh khomi sianginn siseh timi zong saduhthah asi caah, caw zong 25 a zuat chih. Hi pin zong ah, satil karhter ding hi Rev. Biak Kung saduhthah asi. Hi bantuk in teiman a thluknak cungah lunglawmhnak tampi a cungah ka ngei.

USA a rat lio ah, sianginn dirh pah in Lairam ah zeidah pawcawmnak kan karhter chih lai timi zong tampi kan i caih. Lairam hi zuatkhalh in cawmnak a remnak hmunhma asi caah, ram kan cin lai kan ti. USA in satil ca a tha taktakmi ram phun (5/6)-Giant Bermuda Grass le Timothy Grass-timi banrtuk hi, Hakha ah kan cin lai i, satil zuat ningcang kan thlen lai tiah saduh kan that.

USA i satil ca cinmi ram thatha hi, Lairam ah kan luh pi ve lai i kan cin ve lai. Satil duh paoh in thlah ti lo in area bitete ah satil zuat hram kan thawk lai. USA bantuk in Lairam ah tuah ve a herh. Satil kha duh paoh in vahter ti lo in, kulhmi dumchung um kha satil kan cawnpiak hna lai. Cu dum ah ramci thatha kan cin lai. Cuti kan tuah khawh ahcun, Lairam ah satil zuat in pawcawm a fawi tuk lai ti kha kan ruahmi asi.

Satil caah a tha taktakmi Timothy Grass

Hakha ah cin dingmi Bermuda ramkung

Ei cawk lo ding tluk in a thami Bermuda Grass

Cu ramci cu Lairam i kan kuat khawh i, kan karhter khawh ahcun, Lairam ah satil tampi zuat khawh asi lai i, minung nih satil zuat in pawcawmnak hmuh khawh asi te lai tiah ruahchannak kan ngei. Cu saduhthah a tlamtlin khawhnak hnga ding caah, atu hi keimah zong ramci ka khomh lio asi ve. Lairam ah zeidah a lawh hnga tiah 2017 ahcun cin ding in saduhthah asi.

Rev. Biak Kung hi khuaram caah saduhthahnak nganpi a ngeimi asi. Laimi thanchonak hi tuah a duh taktakmi pa asi. Laimi hi education lo cun kan thangcho kho lai lo ti a hmuh caah, Kawlrawn Khampat khua zongah Highway Private School (HPS) ti in sianginn a dirh than i minung 70 an um. Kumvui hi cu a lut dingmi an tam ngai lai tiah ruah asi.

Hi sianginn nih in, Khampat Area le Kale-Kabaw Valley i Laimi caah thanchonak tampi a chuahpi te lai tiah ruahchannak nganpi a um. Kale-Kabaw Valley hi fimcawnnak a niam ngaingai nak hmun asi i, atu bantuk in Highway Private School hna a ummi hi kan Lai miphun caah thiltha tuk asi.

MCSI le HPS nih aa tinhmi cheu khat cu:-

1). Laimi cathiam sang tampi an chuah khawhnak hnga
2). Christ-Centered School asi bantuk in a chuakmi siangngakchia nih Jesuh an theih
khawhnak hnga
3). Hruaitu thatha an chuah khawhnak ding
4). Laimi nih fimnak in ram ser ding
5). Laimi nih fimnak in-ramchung le ramleng ah-pawcawmnak ding
6). Miphun dang hna he a ruang in fimnak ngeih khawhnak ding

Hi bantuk in tinhmi tha taktak a ngeih caah, MCSI le HPS hi zohchunhtlak sianginn taktak ansi. Hi sianginn pahnih a thanchonak ding caah, Mirang cacawn kha abiapi tuk in an chiah. Mirang ca thiam ahcun Kawlca thiam tuk lo zongah Kawlram ah rian thatha tlaih khawh asi cang caah, Mirang ca kha tha an pek. Laica zong an cawn chih caah, Laiholh le Laica zong a thanchotertu ding sianginn an si.

Sianginn nih atu lio ah a herh bikmi thil pakhat cu "English chim kho tu volunteer" an si. An herh taktak. Mirang le Laica a thiammi hna nih thla khathnih te ca va chimh zong hi an caah a thahnem tuk ding asi. Cucaah USA, Europe ram le Australia ram ummi Mirang holh le ca a thiammi Laimi volunteer tampi an herh ko. Abik in CBCUSA Mino chung le CYO chung in mino cathiam hna nih kum fatin thal caan ah volunteer rian va tuan kho hna sehlaw a tha tuk ko hnga.

Kawlram ah caan tawite va tlun pah in, MCSI le HPS ah, volunteer riantuan a duhmi nan um ahcun, a tanglei email le phone number ah, a hlankan in Rev. Biak Kung pehtlaih khawh asi. Viber zong in chonh khawh asi. Amah he hin kan i pehtlai peng i, keimah sin zong volunteer tuah duhmi nih cun thawngthanh khawh asi.

Min: Rev. David Biak Kung
Email. Davidbiakkung@gmail.com
Tel: 959773787713

Atanglei hmanthlak hna hi Mt. Carmel School International asi.