Krihfabu Mibu Khualtlawnnak le Tihnungmi Motor Accident

USA Krihfabu hi a bu in khualtlawngmi kan tam ngai. A bu in khual a tlawng i accident a tong i chikkhat te ah, mi tam nawn a thimi Krihfabu hi an tlawm ti lo. Cucaah USA Laimi Krihfabu zong a bu in khual tlawn tikah a hlei in ralrin ding tampi kan ngei ve.

Marh 29 (Nithumni) ah, "Texas ramkulh i First Baptist Church, New Braunfels khua in hrimhthannak (retreat) a kalmi tar pawl cu, US-83 cungah thlanglei hawih in an kal lio ah, a chaklei hawih in a rak kaimi Dodge pick up truck nih a pah sual hna i, minung aa citmi 14 chungah 13 an thi. Pickup truck mawngtu zong fak ngai in hma a pu i, San Antonio sizung vanlawng in an zuanpi" tiah Texas palik nih an ti.

Dodge Pickup truck (2007) mawngtu cu kum 20 a simi Jack Dillon Young, Leakey khua, Texas State a si. Accident an tonnak hmun cu, Concan khua pawng, Garner State Park pawng ah a si. A thimi hna hi kum 61-87 karlak tar pawl an si. An i sukning a fah ngai caah, biakinn van i a citmi hna lakah, Rose Mary Harris (64) lawng a nung. Adang an zate in an thi dih.

Church motor hi thlanglei hawih in an kal lio a si.Dodge pick up truck hi chaklei hawih in an kal hawih in a kal lio a si. "Zei ruang ah dah pick up truck hi lam a pial i, churh mtor VAN hi a va suk hna" ti hi, Palik nih an an hlat lio a si.

Pick up truck hnulei in a rak rami pakhat pa chimnak ah, "Truck mawngtu pa hi, lam a kawi lengmang. A pial hrulhhralh lengmang i, cucaah 911 kan auh. Minung a pah hna lai asilole a mah le mah accident a tong lai tiah kan ruah bak" tiah an ti. Sizung um lio a si caah, fiang tein a kong an chim kho rih lo. Ahnu thawng a chuakmi ahcun "Texting" a tuah caah lam a pialmi a si an ti. Text kuat caan cu a tam in a tam tuk. Motor mawngh lio text kuat ruang le daithlangmi driver ruang i minung 13 nunnak liam cu a va pawi hringhran dah.

US cu ritnak sii tawngthammi le zuri an tam tuk. Umkal pah tah "text" kuami le telephone chawnmi an tam tuk. Hihi "tukforh" pakhat a si cang. Cucaah, kum khat ah zurimi ruangah, motor accident in minung tampi an thi lengmang.

USA i accident umtuning a tanglei an tialmi zoh tikah, tuksum le tihnung a si:-

USA ah hin 2014 ah motor accident voi 29,989 a um i minung 32,675 an thi. Nikhat ah 90 tluk an thi tinak asi. Hi vialte accident lak i, thumchuah-khat cu "zuri" ruangah a si. Zurit bu in motor mawngh ruanah minung 9,967 an thi i, accident thimi dihlak i 31% an si.

NSC (National Safety Council) tuaknak ah 2015 ah motor accident in minung 38,300 an thi i, 4,400,000 an i khawngdeng. 1899-2013 tiangah USA ah motor accident in minung 9,613,732 an thi cang.

Thihnak a tongmi chungkhar le hruaitu cu an ngaih a chia taktak. Mitthli he thlacam in caan an hmang hna. Texas Governor le ram hruaitu hna zong le nih ngaihchiatnak le hnemhnak bia an chim. Thihnak nih "Hmunhma le caan a thim lo" an ti bang, nuam chialmal tein a kalmi hna zong lampi ah an nunnak a liam.

Church pakhat i bochanmi member thatha minung 13 chikkhatte thih cu ngaih a chia taktak. Krihfabu caah ngaihchiatnak lawng siloin thazaang zornak taktak a si. Krihfabu fatuai cu aa pummi 20-50 kar a simi an tam tuk i, church fami i minung 13 van bau ding cu a fawi lo. Ngaihchia taktak a si.

Ziah atu bantuk in Pathian a duh i a kawlmi hna hi, mah bantuk accident ngelcel in an thih hnga? Pick up truck mawngtu pa zong zeidang va suk lo in ziah an mah tar motor ngelcel hi a va suk hnga? Lam diltlang le thingkung tuktak umnak zawn ah pial lo in zeicadah hi tar pawl khualtlawng mi zawn ngelcel ah a va pial hnga? Hi tar pawl hi ti thih ding hi Pathian remruat maw a si hnga?" timi vialte ruah tik ah, a phi um lo mi biahalnak tam tuk lungthin ah a chuak.

Church van le truck an i pahnak (March 29)

Facebook

• Twitter
• Embed

USA ah hin, Krihfabu mibu khualtlawngmi a bu in accident tonnak le thih hi a tlawm ti lo. Church member pakhat chung in minung 4-5 thih cu a tam ngai. March 30,  2015 ah Florida ah churh van pakhat cu stop sign a hei pah i, cu hnu ah lamkam tii a ummi hawr ah a tla i, minung 8 an rak thi. An motor vialte cu a man dih ti tluk a si. Mi 10 hma an rak pu. Ngaihchiatnak nganpi an Krihfabu le chungkhar nih an rak tuar.

Ref. QuestCing

July 27, 2013 ah Indianapolis in Colobial Hills Baptist Church mino pawl zong, Michigan i camp an kalnak in an tlun pah ah I-465 ah an bus aa let. Driver nih cun "Break a rawk i, kan bus ka dir ter kho ti lo" tiah a ti. Youth Pastor Chad Phelps le a nupi Courtney Phelps le mino zohkhenhtu nu-upa Tonya Weindorf an thi. Courtney cu nau a ngeihnak ding ah thla khat lawng aa duh ti a si. Youth pastor le a nupi nih an fapate an roh ah. Bus cu minung 37 a phurmi a si, minung 12 renglo hma an rak pu.

Hi accident hi biakinn phak lai taktak te ah a si. Mino hna cu an nu le pa nih biakinn in an rak don hna. An phanh lai an i ngaih tuk. Cu lio ah, telephone in an rak theihmi thawng cu, "Kan accident i, Pastor le a nupi, nu hna zohkhenh tu Chaperon an thi" ti a si i, a dongtu pawl cu ngaihchia taktak in an rak um hna.

Indianapolis Bus accident

A cunglei accident tongmi hna sining zoh tik ah, ngaihchiatnak lakah lunglawmh awk a si mi cu, "Thil tha an tuah lio cuahmah ah an thihmi hi a si." Sualnak tuah bu thih cu a nungmi caah zoh a chia tuk. A nuam lo tuk. An nih a thimi cu "Pathian ram le thlarau ram caah riantuan lio ah an thihmi a si i, thih sunglawi a si." Zeicatiah Pathian rian tuan lio cuahmah ah, retreat kal lio cuahmah, gospel team kal lio cuahmah ah nunnak an liam hna.

Laimi zong hi tlawmngaih nun a ngeimi kan si. Thihloh zawtfah ton tik le nupi thit vangeih um tikah aa hrawng aa hrawng duhmi kan si. Krihfabu pakhat le khat tlawnkainak kan huam. Chiatnak-thatnak hrawmpi ah a bubu in khual kan tlawng ve tawn hna. Nau zoh le innluh hmanh ah, lamhlat pipi ah abu in khual kan tlawng tawn. Hi kan nunphung hi a thami thil an si.

Khatlei ah mibu in khual kan tlawn tik ah, "Risk" a tam ngai ve. Zeicatiah USA cu tuan cawk, ei cawp in a nungmi kan si. Chungkhar ah pa bik maw, nu bik maw aa khawn sual asiloah a thih sual ahcun nunnak a har cang. Krihfabu ah a bu in thih sual ahcun, Krihfabu ca tiang in sunghnak le harnak a chuak cang.

Cucaah a bu in khual tlawn tikah i ralrin taktak a hau. Midang nih a kan suk le pah sual ahcun, zeiti awk a tha lo. Ralrin khawhmi an si tuk theng lo. Kan mah a bu in khual tlawngmi cu kan i ralrin taktak a hau.

A bu in khual tlawn tikah ralrin khun dingmi cu:-

1. Driver ah kum no tuk le experience ngei lo mi hman lo ding
2. Lam Map & lam umtuning (system) a theilomi nih motor mawngh lo ding
3. Driver cu mitkuh cim tein ih ding
4. Driver pawng thumi nih drive a ngu maw ngu lo timi ven peng ding
5. Driver thluak buai lak in bia ruah lo ding
6. Khual tlawn hlan ah motor "break, tire pressure le oil" tha tein chek ding
7. Driver nih a zulh dingmi lam khi i a buaktlak in "FIAN" chung ding
8. Caan hmante phak nakin himbawmte phak kha biapi deuh ah chiah ding
9. Driver nih mitkuh le kuh lo, thabat le bat lo i theih ding
10. Lam upadi a bik in, "speed" ralrin ding
11. Hmaitonh in a rami motor tha tein a kal maw kal lo timi ngiat ding
12. Truck he naih tuk in asiloah truck karlak ah zeitik hmanh kal lo ding
13. Driver nih kut (1) lawng in motor mawngh lo ding. A rih caah control a har.
14. Driver le a pawng thumi nih khuacaan le lamsul tha tein ngiat peng ding
15. Driver nih midang he "ran" i zuam lo ding le artlang in tlik lo ding

Hi hna hi ralrin khawh ahcun, himnak lam tampi a um. Mibu in khualtlawn tikah a hlei in ralrin a herh. Zeicatiah minung pakhat lawng accident ton le mibu accident ton cu aa lo lo. Mi pakhat thih le mibu thih aa lo lo. Chungkhar ca le Krihfabu ca a fahnak zong aa lo lo. Mibu in thihnak ton ahcun, chikkhatte ah chungkhar tampi caah le Krihfabu caah sunghnak nganpi a chuak kho.

Cucaah Laimi zong Krihfabu a bu in khual kan tlawn tikah motor accident hi tih a nun tuk caah, driver hna nih a hleice tein ralrin taktak a herh. Vawleicung ahcun "Thla kan cam cang, Pathian bochan bu tein khual kan tlawng. Pathian nih a kan zohkhenh ko lai" ti menmen lawng a za lo i, driver nih lungfim te le ralring tein mipi umkalpi cu a biapi tak.