Palm phuahtu David zong hi, Pathian umpimi le tluachuahmi pa a si ko nain, a nunnak ah harnak le lungretheihnak tam taktak a tuar ve. Voi tampi cu bawmtu a kawl tik ah a hmu hna lo. Fing le tlang a cuanh tik zongah bawmhnak hi khawika in dah a rat lai timi khi a hmu kho lo. A ruahchannak a dong. Aa ruahchanmi minung sin in bawmhnak hmuh ding zong aa ruahchan ngam lo. Cucaah hitin a ti:
Tlang khi ka hei cuan hna i, khawika in dah bawmhnak a hmuh lai ka ti. Bawmhnak ka hmuh dingmi cu Bawipa sin in a ra lai, van le vawlei sertu a simi sin cun (Ps 121:1)A caan ahcun bawmhnak hi minung hawi hmang in a ra. A caan ahcun minung hawi nih bawmh khawhnak a si ti lo ahcun, bawmhnak hi direct bak in Bawipa sin in a ra. Amah Bawipa hrimhrim nih hin a kan bawmh i a kan ven ko ti hi, zumhlo awk a tha lo. Ruah lo awk a tha lo. Hihi minung tampi nih kan ton cio men ko lai. Abik in kokek rawhralnak ton tik le khawndennak phunphun ton tikah hin, Pathian thlarau nih a kan umpi i a kan ven ko ti hi mi tampi kan tonmi a si.
Voikhat cu Columbus kan pem hnu 2009 thal lio ah a si. July hrawng ah. Columbus cu Laimi kan rak tlawm tuk. Kan mah chung he 50 kan tling rih lo. Sipuazi tlak lio a si. Rian a har. Rian sawk tikah a sawkmi kan tam tuk i, rian hmuh a rak har tuk. Laimi tam deuh cu Mirang hoh le ca kan thiam lo. Rian hmuh a har taktak. Cu lio ah Columbus ah Lai Krihfabu dirh ding hi, Pathian sin thla kan cammi le vision kan ngeihmi a si.
Kei zong cu work permit ka ngeih lo caah Columbus ah rian ka hmu kho lo. Dayton ah inn thianhnak (house keeping) rian kan cawkmi ka va tuan. Columbus in meng 64 a hla. Cu ka ahcun Nikhatni in Ningani tiang ka ruan. Zanlei 4:00 Pm in zinglei 2:00 Am tiang ka tuan tawn. Columbus ah sekhan, sianginn, sehzung le zeidang herh tete ka tuah hnu ah zanlei 3 hrawng ah rian ka thawh tawn.
Ni nih a lin. Nika nih a ka cerh. Mit a ku tuk tawn. I-70 cu Baltimore-Washington DC-Columbus-Indianapolis-Kansas City-Denver a pehmi lampi a si caah truck le motor tam taktak nih zulhmi lampi pakhat a si. Nikhat rian ka thawh. Motor phunphun cu tlai thlur in kan kal hna.
A caan cu zanlei 4 hrawng a si. Lam motor aa tet ngai cang. Columbus in meng 40 kuakap a hlatnak ka phan. Lam cu I-70 cung a si. Nitlaklei hawih in ka kal. Suimilam pakhat ah meng 65-75 kuakap in ka kal. A lam a kau i a ding fawn. Zeitik caan ah dah ka hngilh hnga timi ka thei lo. Motor cu hngilh bu in ka rak mawngh. Zei can dah ka hngilh i meng zeizat dah hngilh bu in ka mawngh timi cu ka thei lo.
Ka theihlo kar ah ka motor cu cakehlei lam leng ah a van chuak. Ka van i hlau i ka theih tik cu, I-70 nichuahlei hawih kalmi le nitlaklei hawih in a kalmi lamkar ah ka van tla. Ka van lau taktak nain ka tlai cang. Motor cu cunglei ah kuaih caan a um ti lo. Lungfim tein a niamnak ah rang taktak in ka va tla. "Bawipa ka khamh ko" timi lawng ka thinlung in thla ka cam manh.
Kas motor cu lamkar ahcun a tli thluahmah. A rang tuk. Ka lung ah ka duak tiah a chuakmi cu, "Ka thih lo hmanh ah fak taktak in ka khawng kho" timi a si. Zeibantuk asi hmanh ah ka cawl khawh chung ka cawl lai. Ka sining paoh in si te ko seh tiah bia ka khiak.
Culio ah ka thinlung ah ka siaherhmi thil pahnih te lawng a chuak. Cucu "Ka nupi le fale zeitin dah an si lai? Kan Krihfabu ECBC hi zeitindah an si lai?"timi a si. Ka motor cu a kenkip ah a chawiper.
Cuticun I-70 Nichuahlei le Nitlaklei kalmi lam karlak zulh in ram an riammi cungah a kuarmi hrawn in ka tli thluahmah. A kuarmi cu a thuk ngai i ka motor cu a va lo diam ko. A thuhnak cem ah ka va tla. Cun ka motor cu ralchan lei ah kai aa tim. I-70 Nichuahlei hawih in truck le motor cu tlaithlur in a ra mi ka hei hmuh hna. An mah he va su ding ka si caah, motor cu ka kuaih than. A kuarhnak ah ka tla than.
Cuticun ka zulhmi I-70 Nitlaklei kalmi lam cung ah ka kai than. Lam cu lanes 3 ummi a si i, lane 3 nak ka va lonh dengmang. Lamkam an khammi thir thluan ah aa su ding ka si than. Cucaah kehlei ah ka kuaih than i, ka tlak cianak lam pahnih kar kuar ahcun ka tla than. Ka motor cu a dir kho ti lo. A tli thluahmah peng ko. Heh tiah a ka hlawh. Heh tiah aa thing. Break cu ka lamh zong ah pakhat hmanh a nung ti lo. Aa rawk dih cang. Cuticun a kuarhnak ah cu keh lei ka kai zawn, vorh lei ka kai zawn in, lamkar ah ka motor cu a tli peng peng ko.
Cuticun Highway cung ah a ummi hlei an donghmi ka va phan deng. Hleitang mirangvawlei tunglianlian ah a va su ding ka si cang. Cu lio ahcun, cavorhlei ah ka kuaih than i, ka motor cu I-70 Nitlaklei lam cungah a kai than. Lane 3 ning cun ka lonh hawi. Thir an khammi ah ka su deng cang. Thih le thih, nun le nun ti in, kehlei ah ka van kuaih than. Motor a speed kha a rak tum cang i, highway kam i an rinmi a engmi le thir an khammi karlak teah ding tein ka va dir.
Cuti lamtang i voi (2) ka tlak tiang ah pakhat hmanh ka khawng lo. Vorhlei kam thir an khammi phanh lai teumao ah voi (2) ka khirh kho than. Highway zulmi kha zatzat motor lakah ningcanglo in lampi lane 3 ummi voi hnih tiangtiang ka tan lio ah, ka hnulei in motor pakhat he hmanh kan i pah lo. Ka dir tik zongah motor lam dawnkhan lo tein lamleng ah ding tei ka dir kho.
Emergency mei ka piah i, ka dir ko. Zeihlan ah, "Bawipa na ka ven caah ka lawm tuk" tiah thla ka cam hmasat. Motor chungah ka lung ka fim i, ka thu. Ka taksa vialte ka zoh dih i, pakhatte hmanh a keu zong a keu lo. Keimah ningte ka si ko.
Tlangval pahnih an ra i, "Na khawng maw? Heh tiah na ziit kan in hmuh le zeidah kan in bwmh khawhmi um?" an rak ti. "Ka lawm. Ka khawng lo. Ka tluang ko" tiah ka leh hna i an kal.
Motor cu ka start. Tlaih awk khi a tha ti lo. Break zong a rawk dih. Steering zong a cung-tang aa mer viar. Ka van mawngh i, suimilam pakkhat ah meng 90 leng kal khomi kha meng 25 cung a kal kho ti lo. Rian nih kal lo awk a tha lo i, ka kal thiamthiam.
Emergency Mei ka piah i duhsah tein ka kal. Ka rian hmun ka phan. Rian ka tuan dih in ka rak kir. Ka nupi le fale cu a lang in ka chimh hna ahcun an ngaih a chia lai ka ti. Ka chim hna lo. Rian ka lim in ka rak tlung. Zinglei 5:00Am ah inn ka phan kho. Inn ka phanh hnu lawngah "Ka accident le ka motor tampi aa rawk. Keimah cu Pathian nih a ka ven caah ka him ko" tiah kan nu cu ka chimh.
Khua ka ruat than. Ka accident mi cu tih a nung tuk. Thin a phang tuk. Harnak ton cu a si ko nain, Pathian dawtnak le runvennak Psalm nih a rak tialmi a ka theihter than. Khua ka ruat. Motor kha minutes zeizat dah hngilh bu in ka rak mawngh hnga? Zei can dah hngilh bu in ka rak mawngh hnga? Kha chung vialte midang he pah lo bak in zeitindah ka rak um khawh? Ziah lamchiat deuhnak ah tlak lo in lam that deuhnak ah ka tlak hnga?" timi ka ruat i, Bawipa nih a ka ven hrimhrim ko ti ka ti.
Cu ahcun ka lung a chuakmi baibal cang cu Siangpahrang David nih a rak chimmi a si:
"Israel hupphengtu cu a 'ngu' bal lo i aa 'hngilh' bal lo. Bawipa nih an ven ko lai, nangmah huhphenh awk ah na pawng in an um hnawh ko" (Psalm 121:4,5)Accident ka tonmi nih ka thin a ka phanter. A ka lauter. Harnak a ka pek. Motor remhnak ah $2,300 renglo a dih. Rian le tangka har chinchap ah, umkalnak ah harsatnak le sunghnak nganpi ka tong. Asinain Pathian bia a ka fiantermi nih thlarau in thazaang a ka pek. Sunghbaunak ka tong nain lawmhnak in ka khat. Pathian dawtnak le thluachuahnak a thar in a ka theihter.
Aw......Bawipa hi "a ngu ballomi le aa hngilh ballomi Pathian a si i, "Ka ngut lio le hngilh lio ah vengtu Bawipa a si hrimhrim ko" timi ka fiang.
Kei cu i ngu in i hngilh hmanh ning law, ka biakmi Pathian, Israel hupphengtu cu 'a ngu bal lo mi le aa 'hngilh bal lo mi' Pathian a si. Ka ngut lio le ngilh lio zongah keimah huhphenh awk ah ka pawngte ah a um ko timi kha, accident ka tonnak nih a ka fianter i, lunglawmhnak in ka khat. A ka vengtu Pathian ka thangthat.
---------------------------------------------------------------------------------
No comments:
Post a Comment