Kum Hlun A Liam
1.
Ngai hmanh Kum Hlun a liam lio khi…….A lan ko
lai thlaih khawh lo in
Kan nunnak ni rel cawk lo hi………...........Kum nih
a liampi cang
Cho
Na thil timi vialte zong hi………..Kum nih a liampi dih
Bawipa kan tuah sualmi vialte…Nang nih kan ngaithiam ko
2. Tipi lian nih phaikung a fenh……..A thlanglei ah
kalpi ding in
Kan nunnak ni rel cawk lo zong….Kum nih
a liampi cang [cho]
3. Tupi thinghnah a til dih i……………….A hnahno te a
corh than bang
Bawipa
kan sual palhnak vialte……..Nang nih kan ngaithiam ko [cho]
-------------------------------------------------------
Hi hla hi hla tawite a si nain, kum hlun thlahnak ah aa tlak tukmi hla a si caah, Thau i ka um liuo ah siseh, USA i pastor ka tuan hnu zong ah siseh, Kum Hlun a dih i Kum Thar a chuah zanpaoh ah ka sakpi tawn hna. Hi hla nih hin, ka nunnak ah tam tuk fim a kan chimh i, thazaang a ka pek.
Cathiang nih a kan cawnpiakmi cu, "Kan chan hi zeitluk in dah a tawi ti kan hngalhter law, cuticun kan fim deuh hnga" tiah a ti. Hihi minung a simi paoh nih ruah le tuak peng ahcun, Pathian theih lo khawh a si lo. Uanthlaknak ngeih khawh a si lo. Mi cung cuan duhnak ngeih khawh a si lo. Minung nih hin, kan chan a tawinak hna hi kan rak ruat lo i, puamhngal tuk hna in, khua kan rak sa tawn. Kan nunnak hi pakhat te lawng a si hna kan ruat lo i, Pathian duh lo ning in khua kan sa sual tawn.
Kan dam lio le thawn lio le no lio ahcun, zaw kho lo le fak kho lo in ruah sual a fawite. Thi kho lo in ruah sual a fawite. Asinain zei bantuk minung paoh zong hi, "Pathian nih caan khiah piak ciami kan si" (Phungchimtu 3:1 ff) ah kan hmuh. Pathian khiahmi caan" a tlin cun, zeibantuk minung hmanh an luat kho lo. An nunnak an liam i, kan nih zong a liam te ding kan si hna. Cucu kan theih cu a herh i, cucu theih khawh zong cu fim pakhat a si.
"Thihnak kan timi hi zeidah a lawh?" tiahcun tivapi a luangmi bantuk in a luang. Cu tivapi ahcun sining aa lo lomi, thingkung, ramkung, thinghnah phunphun, lunglian le lunghme kha, an mah le hmunhma caan a phak ahcun an i paih cio bantuk khin, thihnak tivapi ahcun kan mah le hmunhma le caan cio ah kan i paih i, cu thihnak tivapi cu a ho hmanh nih kan hrial kho lo. Cuticun tivapi nih thinghnah a liampi bantuk in, thihnak tivapi nih hin kan nunnak hna hi, a liampi tawn.
Cuticun hi vawlei ah kan tuahmi thil vialte hna hi, kum le caan nih a liampi zungzal hna hi, kan tuahmi thil zong kan kaltak i, kan ngeihmi innlo le thilri le chawva le catang zong kaltak viar a si i, a hmunmi an um lo. Cucaah minung nih kan sermi le tuahmi vialte hna hi, "Caantawi Pennak" an si caah, an hmun lo in a donghnak ahcun rawhralnak nih a tei zungzal hna. Mandalay le Inwa hrawnghrang i, hlanlio siangpahrang inn lianlian aa rawkmi van hmuh le USA ah inn thatha an chuahtak hna i, a ngeitu hmanh hngalhlomi tampi an um i, cucu inn rawp pipi van hmuh bak ah, vawileicung hi "Caantawi Pennak a sinak a fiang tuk hringhran." Cun caantawi pennak ah uanthlar tuk dingmi thil zeihmanh a um taktak lo.
Hi hla te nih hin, Kum Hlun zan ah minung nunnak hi, tivapi nih thinghnah a fenhmi he a tah chunh i a tha tuk. Thinghnah nih aa hngalhlo karte ah tiva a sumlei ah a luan bantuk in, kan nunnak hna hi kum zeitluk sau kan nun zongah, tivapi tii nih thinghnah a fenh bantuk in an rak liam ziahmah timi kha a langhter i, hla tha le hla sunglawi taktak a si.
Hi hla hi, "Caan rel thiamnak hla" pakhat a si caah, Kum Hlun thlahnak ah aa dawh taktakmi hla a si. A sak zong a nuam i, sullam zong a tha. Pathian sin ah kan sualnak vialte hi, kalpi le ngaihthiam hal zungzal hi, kan herhnak zong a langhter. Zeicatiah kan tlaih khawhlomi kan caan hna nih, kan nunnak hna le kan tuahsermi vialte hna hi, an liampi thliahmah ko hna i, zeitik paoh ah nunnak a dong khomi kan si caah a si.
No comments:
Post a Comment