Thih Hlanlo Voi (3) le Kum 495 Thawngthlakmi Pa

Vawleicung sual vialte lakah sual lian bik pakhat cu, "Nu tlaihhrem" hi a si. Hlan lio chan in tu chan tiang zong sualnak fak taktak ah chiahmi a si. Tlaihhrem ruangah minung lehrul i chamnak le i thahnawnnak tiang hi vawlei tuanbia ah a rak chuak tawn.

Bible tuanbia zoh tik ah, Genesis 34 nak ah Jacob le Leah nih an hrinmi fanu dawh taktak Dinnah an tlaihremnak kong kan hmuh. A tlaihremtu cu Shekhem, Hamor fapa, a si. Dinnah an tlaihhrem ruang ah a ta le nih "Shekhem khuami pa vialte an thah dih hna" timi kan hmuh. Cu tluk cun tlaihrem hi chungkhar nih tuar khawhlomi thil pakhat a rak si ti kha Bible tuanbia zong ah kan hmuh.

USA hi tlaihhrem a tam taktak. 2016 i Uniform Crime Report (UCR) nih an chuahmi ah "2015 ah hin, USA ram pumpi ah minung 90,185 an tlaihhremmi hna cu palik ah report an tuah" tiah an ti. Report lo mi theih khawh a si lo. 2016 i National Crime Vitimization Survey (NCVS) tuaknak ah, 2015 ah hin, tlaihhrem le sualpi timhnak hi, voi 431,840 a chuak" tiah an ti.

USA ah hin, tlaihhrem a tam tuk caah, tlaihhrem lei upadi hi an rengh taktak. Dantat zong a fak ngaingai. Nihin ni ahcun mi tlaihhrem hmangmi poah cu "Online in an address le min zong kawl khawh dih a si cang. An kalnak paoh ah, inn an hlan tik zongah, "Kei cu mi tlaihhrem hmang ka si" timi min kha innhlanmi hna zungah pek a hau. Inn cawk tik zongah ah pek a hau. Cuticun yatkuat ah carek in "Nan inn pawng ah, a nih cu bantuk mi tlaihhrem hmangmi a van i thial khah" tiah ca a kan pek tawn.

Tlaihhrem ciocio zongah, ngakchia kum tlinglomi tlaihhrem hi tuartu le an chungkhar caah a fah khun tuk caah, dantat ning zong a fak khun tuk. A cheu cu thih dantatnak tiang an pek hna. A cheu cu thihhlan lo thawng thlak a si. Cu tluk in dantat hi a fak ko nain, minung cheukhat cu hurnak hi an i sum khawh lo caah, upadi buar zong an tih hlei lo. Sualnak hi sum a rak har tuk caah, kan luat lai lo ti zong an thei ko nain tihnung taktakmi sualnak hi an tuah theu tawn.

Naite ah Pensocola khua, Florida ah mipa pakhat Hoyt McConnell III (K.22) cu, minung tlaihhrem ruangah biacaihtu bawi nih fak taktak in dan a tat tiah 11 Alive timi nih report an tuah. Dan an tatnak a ruang cu "Cu pa nih a zohkhenhmi ngakchia pa kum (3) kha voi tampi a tlaihhremmi ruang le a tlaihhremnak kong kha video in a thlak caah a si" tiah an ti.

Hoyt McConnell III 

Ngakchia pa a tlaihhrem ruangah ngakchia tlaihhrem (child sexual related charges) timi sualpuhnak 36, capital sexual battery (kum 12 tang ngakchia sualpi) timi le le cu sualnak he aa pehtlaihmi thilri i chiah" timi sualphawtnak (paohmah) tampi an pek ('capital sexual battery' timi sullam cu kum 12 tang ngakchia ihpi kha a si i, USA phunglam ah thih dantatnak pek khawh a si). Tazacuaitu le biacaihtu hi Judicial Circuit Court i biacaiahtu Judge John Miller a si i, dan a tatmi cu, "Thih hlanlo thawng voithum thlak ding hnu ah, kum 495 thawng thlak chap ding ti a  si."

Escambia khua mingiatu (detectives) nih an chimmi cu, "McConell nih ngakchia pa hi thla hnih chung a tlaihhrem i, a tlaihhrem lio hi a telephone in video le hmanthlak a thlak. Cu pangakchia le an pa cuti an umtimi cu hmanthlak le video cu an nu nih, January 2016 ah. Cu kong cu bia an hal tikah McConnell nih ], ka tlaihhrem ko tiah chikkhatte ah a ti colh" tiah an ti.

Amah lawng siloin a dang pa pahnih, Danny Ray Murphy le Jonah Authement zong an tlaih hna i, thawng an thlak ve hna. McConnell nih hin, ngakchia dang sual lio hmanthlak le video zong tampi aa chiah i, ngakchia dang cu ka tlaihhrem hna lo. Mah pangakchia pa te lawng hi, ka tlaihhremmi a si tiah a ti ti a si.

Sual ngaihthiamnak an nawl hna i an ngaihthiam lo a si ahcun, McConnell hi a thihhlan lo, thawng ah a tla cang lai. Cu hmanh ahcun, thih hlan lio thawng voi (2) a tang rih lai i, cupin ah kum 495 thawng tlak ding sualpuhnak cu aa lim ding a si ti lo. A pumsa lawng thawng tlak si lo in, a thlarau tiang in thawng an thlak lai ti tluk a si cang.

"McConnell sualpalhnak hi thil pakhat khat ruangah an thumh piak te hnga dek maw?" timi cu a ho hmanh nih theih khawh a si ti lo. A sualnak hi vawlei biacaihtu bawi nih a ngaihthiam lo ahcun, a sual man cu a in ko cang lai. Zeicatiah "Sualnak man cu thihnak a si" (Rome 6:23) a si caah a si.

Biacaihtu bawi nih a ngaihthiam lo ahcun, a titsa caah khamhnak lam a um ti lo. "A tuh bantuk in a zun ko cang lai" nain, a thlarau caahcun khamhnak a co kho ve rih. Zeicatiah "Sualnak man cu thihnak a si nain, Jesuh Krih he pehtlaihnak thawng in Pathian nih a kan pekmi laksawng cu zungzal nunnak a si" (Rome 6:23) a si caah le "Kan sualnak cu senduk hmanh in sen sehlaw, Pathian nih cun a fapa Jesuh thisen thawng in hawhra bantuk in a ranter khawh than" caah a si.

McConnell hi, thawng ah kum zeihmanh tla sehlaw, Jesuh a zumh ahcun Krih dawtnak he cun aa then kho hlei lo. Zeitluk thirhling sang le tlakrawh vampang chah in aa kulhmi thawnginn chung hmanh ah um ko sehlaw, a zumh ahcun Krih dawtnak he aa then kho hlei lo. Asinain hi pa hi, Krih dawtnak a thei lai i, sualnak ngaihthiam a si ko lai timi cu a hohmanh nih chim khawh a si lo.

Cucaah thawnginn chung zong i sual ngaihchih hlei lo le Jesuh Krih dawtnak zong theihhlei lo ahcun, hi pa nih titsa he thlarau he sualnak man cu cawi dawh ngai a si ko cang. Cucu careltu nang nih teh zeitindek na ruah ve hnga?