Semnak Lairam: Cornerstone Church le John Hagee Ministeries

Pathian dawtnak le velngeihnak thawng in, August, 1997 ah USA ka rak phan. USA ka phanh khawhnak ding caah, a rak ka bawmtu le tanpitu Rev. Dr. C. Duh Kam le innchungnu cu, Corpus Christi khua ah an rak um. Cucu Mexico Rilikuai kam ah a ummi USA ram a donghnak khuapi pakhat a si.

1998 Christmas an sin hmang ding in ka rak kal.

Dayton in December 22 ah ka thawh. December 24 ah an sin phanh ding a si. Snow a tlak tuk caah ka rak phan kho lo i, Dallas ah Christmas ka rak hmang. Rev. Dr. Chum Awi te sin ah ka rak i thum. An rak ka dawt i, an ka zohkhenhnak cungah ka lawm ngaingai. Cu lio ah Rev. Zam Mang te inn ah Christmas kan rak tuah i, Laimi dihlak hi 28 hrawng kan si rua ka ti. Cu tluk cun kan rak tlawm. Kan rak i nuam taktak.

December 26 ah Dallas in ka thaawh i, Corpus Christi lei ahcun ka kal Mi an tam tuk. Bus ah kan i tlum lo. Tlai tuk hnu lawng ah ka thawh kho i, San Antonio ah bus station ah zan khuadei ka rak riak. Map ka ken i, map cun ka fiang ko nain, khawika ka um zong ka thei lo. San Antonio hi zei bantuk khua dah a si? Mirang maw an tam? Minak maw? Spanish dah timi zong ka rak thei lo. Cu ticun Bus station ah thut bu in zan khua ka rak dei.

Cu lio cu cell phone zong kan ngei lo. Facebook, Instagram, Viber, messenger ee ti phun pakhat hmanh a um rih lo. Laimi hrimhrim hi cell phone Nokia chiahru tete lawng an rak ngei kho. Motor hmanh hi $2000-4000 man ti tluk a rak si.

A hnu kum 20 a van raoh tik, San Antonio Chin Baptist church nih Leadership Training ah an ka sawm i, June 7, 2019 ah San Antonio bus station cu ka an phan than. An Krihfabu pastor le hruaitu upate dihlak le member cungah ka lawm. Member 120 tluk an si.

A liamcia kum 20 lio i ka rak zulhmi Greyhound Bus lampi kha ka van zual. San Antonio ka van phak cu, ka lung aa lawm taktak. Liamcia kum 20 lio kha ka van ruat than. Bus Station ah zan khuadei ka rak to i, ka rak thutmi kha ka philh kho lo. A tu ah Laimi Krihfa member 120 an van ummi le dang Krihfabu zong an van ummi ka hmuh tik ah, ka khuaruah a har. Pathian nih Laimi a kan dawtnak le velngeihnak le thluachuah ka ruah ah, Jehovah Jireh Pathian a sinak ka fiang chin lengmang. A liamcia kum 20 i Bus station ka um lio ahcun San Antonio ah Laimi cu pakhat zong an rak um lo.

Pastor Buan Thawng Lian nih Bus station ah a rak ka don. An inn kan phan. Chuncaw khim taktak in ka ei. Zan ah cawnpiaknak kan ngei. Minung 28 an kai kho. Krihfabu fate an si nain, an i biatak. An huam. An thatho. Zan 10:30 tiang cawnnaka kan ngei.

A thaizing ah San Antonio downtown ummi Water Park ah kan leng. Downtown vialte boat in kan hel, Minung tan tam. Thingram aa dawh tuk ning chim awk thalo a si. Dawr a tam tuk. Minung an i dawh tuk fawn. Innlo a tha. Eidin a tam. Pangpar a tam. Khualai ah "ramtang" bantuk in an sermi van hmuh ahcun, "Thetse ramcar ah a ummi Paradise Dum" bantuk a si. Cun Tower of America timi khuacuanhnak ah kan kai. Chuncaw kan ei pah. Tower cu aa mer khomi a si caah, kan i mer pah. Voi (3) aa mer ah kan ei khawh ve i, tang ah kan tlung than. An downtown a tha. Aa dawh tuk i a nuam taktak (hi kong hi hnu ah tam deuh ka rial te lai).

Thaizing cu khawika dah kan i pumh lai tiah kan i caih. Zan ah internet ka zoh i, San Antonio ummi Krihfabu lak ah a lian cem cu Cornerstone Church a si timi ka hmuh. Cu tikah lawmhnak in ka khat. Zeicatiah hi church hi, MIT ka kai lio ah free in makazine a rak ka kua tawnmi church an si caah a si.

Hi church hi, Rev. Dr. John Hagee nih a hruaimi church a si. Member 17,000 an si. 1991-1996 MIT ka kai lio ah, Kawlram cu cauk rel ding a rak tlawm tuk. Cauk thar kan hmu kho lo. Cucaah free in kuat khawhmi makazine John Hagee Ministries cauk te ka rak cah tawn.

Pastor Buan Thawngh Lian he kan va pum kho. An parking van phanh cu, Mall lian taktak bantuk in a kau. Motor a tam taktak. Inn zong a lianlian an rak um. Mino pawl cu camp an tuah lio a si. An rak i tuar cur ko. A chung ah kan van lut. An midon ning a tha taktak. A voikhatnak lengmi cu "visor tangbenh" a kan pek. Innka Number 12 tiang a um i, Number 6 nak ah nan lut lai ti a si. "Tu chun cu nau chuak thlacam a um lai" tiah lunghmuih taktak in a kan chimh.

Midongtu an tha tuk. Innleng in a kan don, "Khawika in dah nan rat?" tiah a kan hal. Cun Inn ka hram in a kan don than. Thlacam lio cu luh an duh lo. Thla an cam dih in, a chung ah kan lut. A chung midongtu le thutnak chimtu an um than. A voikhatnak lengmi cu hmai deuh ah kan thu. Music cu a mak taktak. P&W cu a tha tuk. Soud system a tha tuk. A tur bak in a tur. Hlasak a nuam taktak. Hlasatu cu "Country musician" deuh lawngte an si.

An serivice hi, mino duh ci le upa duh ci an kemh. Rev. Dr. John Hagee cu Colorado ah a kal caah kan hmu lo. A fapa Matt Hagee nih a kan hruai. Pumh lio ah chairman a um lo. Pator nih chairman aa tuan pah. Nauchuak thlacam siseh, zapi thlacam siseh, thawngthanh siseh, sermon si seh a kemh dih. Pastor dang le deacon cu pakhat hmanh caan an hmang lo. Rev. Matt Hagee bawmtu lawngte an si. Pastor pakhat nih a hram thawk in a dongh tiang a kan hruai dih. Laimi church he cun aa dang taktak.

Nau chuak thlacamnak a um. Ngakchia no tein kum 3 tiang an i tel. Nau pakhat kha pastor le Krihfa-upa pakhat cio nih cawi awk tha cu an cawi hna i, an dirpi hna. Pastor nih thla a cam piak hna. Thlacam lio ah, zapi tein kan thut bu in kan kut kan thlir cio. A sunglawi tuk. A dawh tukmi le a tha tukmi a si ka ti. Cawn tlak thil a si.

Thawhlawm kholh a za. Pastor nih "Cheuhra cheukhat aa kenmi nan kut van thlir u" tiah a ti. Cu hna cu hmai ah an chuak i, an cheuhra cheukhat bawm chungah an va thlak hna. Cucu Bible ning tein an rak tuahmi a si. A dang thawhlawm sawhsawh cu a kan kholh. Hi lio ahcun "muko music" lawng a um. Cucu "traditional" tiah an timi a si.

Cun San Antonio khua caah thlacamnak le Krihfabu thlacamnak kha pastor nih a hruai hna. Cun thawngtha bia a chim. A thawngcha chimmi cu Genesis chung a si. Jacob kong a si. A tha kho taktak. Thawngtha bia a chim dih in, hlasak a um ti lo. "Thluachuah peknak" a chim i, cucu kan donghnak a si. Biakinn thutnak cu dot hnih bantuk a si.

Aa pummi cu kan tam tuk nain, cheu nga cheu khat cu a lawng ve. Minung 2,000 fai a pummi kan si lai dah tiah ka ruah.

Pumh dih in "mileng he a hleice tonnak aum." Kan mah zong hman kan va thla ti ve. Coffee, lakphak, cookies le changreu tampi an chiah i, kan va hrawm ti hna. Upa cheukhat le pastor cheukhat be bia kan i ruah. Mipa pakhat cu 1987 in hi ka Krihfabu ah ka pum i, a liamcia kum 5 in meber ah ka lut. 1965 ah Bangladesh ah ka pa hi Embassy riantuanmi a si le kum hnih kan rak um a ti. Mi tha te a si. Chonh biak a nuam taktak. An mithmai a panh tuk hna. Milung an lawmhter tuk hringhran.

Kan chuah pah ah Pastor pahnih he kan i tong. An pangpar dum ah bia sau ngai kan i ruah. Cu ka ahcun thingkung phun hnih thum an cin. Cu ahcun Olive Thingkung (3) an cin. Israel nih laksawng a kan thenhmi an si. Tinbaw in kan phurh hna. A lai kung cu a lian tuk le dum ah luhpi khawh a si lo. Khur kan cawh i, Crane in kan cawi i, a langpar in van thlak i, cu ceu cun kan cin khawh a si" tiah an ti.

John Hagee church hi Israel a tanh taktakmi an si. Iran a hua taktakmi an si. Israel he an i daw. An biakinn zong hi hlanlio Jerusalem Temple phun in an sak. Jerusalem hi Israel khuapi ding bak a si tiahg a dirpitu zong an si ve. Conservative an si. An biakinn chung zongah Israel Flag le USA Flag an tarti hna. Olive Thingkung kung 3 zong cu Israel nih an thenh ve hna. Pastor pahnih cu, "Kei zong Israel ram ah thinkung pahnih ka cin ve" tiah ka ti hna i, an i lawm taktak. Ka nu le pa upatnak caah Israel ah thingkung pahnih ka cin ve nak kong zong ka chimh ve hna.

Hi Krihfabu hi ram le miphun a tanh bakmi an si. Politics hi fiang tein an chim ko. Republican deuh a dirkamhmi bu an si. Hlan ahcun, "chiatha khat" umnak a pawmlomi an si nain, a tu ahcun kan doh lo tiah an ti.

Dum kan um lio ah, Olive thinkung kong a kan chimh pah ah, kan churh (ECBC) kong zong kan hei chimh ve hna. Olive Thingkung cin kan timh ve tiah ka hei ti. Pastor tampi an um. Pakkhat cu rian a tuannak a sau ngai cang nain, Krihfabu hruaitu lutlai taktak cu Rev. John Hagee le a fapa Matt Hagee an si. Matt Hagee cu minote a si. Capo saih a thiam. A thawngtha cu Bible chung bak ah aa khumh i ngaih a nuam ngaingai.

Kan dih hnu ah parking in hman ka thlak pah hna. Ka hmanthlak zong a tanglei ka van tar chung hna. MIT ka kai lio tein an kong ka rak rel lengmangmi le cauk zong ka rak cah tawnmi church ah, a voikhatnak ka pumh khawh caah ka lawm. Hi hmun a ka phaktertu Pathian ka thangthat i ka lawmh.

Thau khua in, MIT in, a tu chun Cornerstone Church ka pumhnak tiang ka tuanbia le sining ka ruah ah, ka lawm tuk. Jehovah Jireh Pathian nih lam a ka hruai timi fiang tuk in ka theih. Lawmhnak chim zia ka thiam lo.

"Bawipa, a umnak hmanh ka rak theihlomi, phanh ka duh ngaimi church ah na ka pumhter caah ka lawm. Ka lawm tuk" tiah thla ka cam bu in, innlei ah kan tlung than.