2020 Ah Jesuh Kan Ruahchannak

Nai Christmas ah "Christmas timi hi a sullam zeidah a si?" timi hawih in sermon ka chim. Phun tampi in a sullam kan chim khawh ko nain, ka chimmi cu "Jesuh cu kan ruahchannak a si" (Jesus, our hope) timi a si (1 Tim 1:1).

Jesuh hi ruahchannak a ngeilomi caah kan ruahchannak tha bik a rak si ko. Bible zoh tik ah, miding le biaknak lei hruaitu hna nih, hlawtmi "misual" vialte caah Jesuh hi an ruahchannak a rak si. Cu mi hna cu ho te dah an si?

(1) Hlawhhlang nu
(2) Ngunkhuai khawl
(3) Tangdangpawm (va cung pa duh tbk)
(4) Zuding saei
(5) Mithat lainawng
(6) Mizaw phunphun (misual ah ruahmi an si)
(7) Awkhlawh
(8) Ngatlai (rian nauta tuanmi)
(9) Nuhmei le pahmei
(10) Sifak santlai lo
(11) Thawngtla
(12) Tluninn ngeilomi khual
(13) Rawltam ti halmi
(14) Rethei mi le khing ritmi
(15) Khuavang tuahmi
(16) Ngaktah buangro (Mary le Martha bantuk)

Hi Jesuh he naihniam ummi pawl vialte hi, Judah mipi deuh nih cun hlawtmi an si. Hnawnmi an si.

Sihmanhsehlaw, hi hna pawl nih vawlei lei ahcun ruahchannak an rak ngei bak lo nain, Jesuh cawnpiaknak an theih hnu ahcun, taksa-thinlung-thlarau damnak an rak ngei i, ruahchannak nganpi an rak ngei. Vancung ah an ruahchannak a rak ngan tuk tik ah, vawlei an nunnak ah an hna a rak ngam ko.

USA ah kum 22 khua ka sa cang. Tu chun December 31, 2019 tiang ah, "Meithal in a thimi cazin" ka zoh i, zanlei sang ah an tialmi cu, "1970 hnu ah 2019 hi meithal kah in minung tam bik an thih kum a si" ti a si. An zapite a thimi hi, 39,289 an si. Hi chung ah 15,197 cu minung thahnak in an thi; 24,090 cu mahthahnak in an thi" ti a si. Hma a pu i a thi lo mi hi, 29,460 an si ti a si. Hihi email le viber ah ka tial hnu ah, biakinn ah 2020 Kum Thar donnak ah, 7:00 Pm in kan um.

January 1, 2020 zinglei 12:45 Am ah inn kan phan. Kan nupa farual in, nuam tein caan kan hmang. Inn ka phak hnu 1:30 Am ah Gun Violence Archive 2020 cazin ka van zoh. January 1 cu suimilam pahnih hmanh a tling rih lo. Cu chung ah, USA ah minung 66 an mah tein an rak i that manh cang.

"Minung an tam tuk caah, an si awk a si ve ko" ti khi ruah sual a fawite. Asinain cucu a si theng lo. "Minung tam pat in, aa thatmi an tam awk a si" timi khi a si lem lo. Voi tam deuh cu, "lungthin damlonak ruang le, thinhun le ingpuan ruang le ritnak sii le zurit ruang ah aa thatmi deuh hi an rak si hna."

Phun dang in chim ahcun, an nunnak ah ruahchannak an ngeih lo caah, an nunnak kha an tuar kho ti lo. An awlok a chawng. An si a vang. An nunnak ah an thilrit an phur kho ti lo. An khing a rih tuk tik ahcun, a donghnak i an khingrihnak le an thilrit thumhnak cu, meithal i lak i kah kha a si ko cang.

Hriamnam vialte lak mahthahnak tuah a fawi bik mi cu, "meithal" hi a si. Minung nih hmeh hi a fawi tuk. Midang thahnak zong ah an hman cem i, mahthahnak ca zong ah an hman bikmi cu meithal a si. A ruang cu a mual a fak i, thih a fawi. Hmeh a fawi tuk fawn. Cucaah voi tampi cu, mah vennak le midang kahnak an cawk mi meithal hi, mahthahnak ah an tla theu tawn. Cucaah meithal hi ngeihnak in ngeihlo hi a tha deuh.

2020 cu suimilam 2 hmanh kan kal hlan ah, minung 66 cu an rak i that manh cang. Mah hna hi, lungdongh tuk ruang ah a cang deuhmi an si hrimhrim ko lai tiah ka ruat. Naite ah, Oklahoma ah kan mah Tiddim pa zong nih a fale a thah hna hnu ah, a mah zong aa that ve ko. A nunnak ah, lungretheih damlonak fak tuk in a ngeih tik ah, a nunnak kha fawi tein a lak ko. Midang nunnak zong a lak chih ko. Laimi zong hi, USA kan umnak ram hi fiang tein kan theihthiam a herh. Hi ram ah kan lung a dongh lo ding zong a herh. Tangka le chawva le rian zong hi, i ukter lo in, Jesuh le Pathian tu hi biapi ah chiah in, lungthin zaangdam te le khingrit lo tein nun khawh tu hi, a herh deuhmi a si.

Ka lawi hnu ah ka ruat. Suimilam pakhat fai ah aa thatmi minung 66 hna nih hin, Jesuh hi rak zum ve hna sehlaw, an nunnak ah ruahchannak an ngei hmanh maw? Mah thahnak zong in an luat hmanh maw timi ka ruat.

Zei si hmanh ah, vawleicung chawva, innlo, motor, catang le fimnak hna hi a hmun ding an si lo. Cu a hmunlo mi thil cu tlaihchan tuk ding an si lo. Cucaah 2020 ahcun Jesuh hi kan ruahchannak siter cio ko hna u sih. Cucu na ngeih hnu ahcun, zeidang zong hi chap chih na si ve ko lai. Ka si ve ko lai.

2020 Laimi kan caah Jesuh kan ruahchannak (Jesus, our hope) si hram ko seh!