JC Penney Store le Khrihfa Zumhnak

JC Penney store tuanbia hi phundang ngai a si. A rak tuah hmsattu pa tuanbia zoh tik zong ah ngaihchia lungleng a si. Hi store tuanbia le Pathian hi aa then kho lo. Khrihfa zumhnak le sipuazi kong zong hi, JC Penney tuanbia ah hin a lang khun. US ah mirum tampi an um. Company lianlian tampi um nain, JC Penney company tluk in, Pathian bia he aa thawkmi company a um rih lo.

JC Penney hi "Jim" tiah an rak ti. Jim nih hin, a pa sin ah "zumhnak le sipuazi" kong hi a rak cawn hmasat. A pa cu Primitive Baptist Church, Hamilton, Missouri ah pastor a rak si i, chungkhar pawcawmnak hmanh ah har ngai in a rak nungmi an si. A pa nih hin, a fapate cu kum 8 a si ah, "Nangmah tein thilri rian na tuan lai; tangka na kawl lai i thilri na cawk lai" tiah a rak ti.

"Nunnak timi hi a harmi a si. Teinak timi cu rianhrang tuannak le can saupi tuannak lawng in hmuh khawh a si. Golden Rules timi na zulh paohpaoh ahcun, thil sining kha an tha te ko lai. Cucu zeidah a si tiah, "midang kha tha te le ding tein pehtlaih le upatnak tein nun hi a si ko" tiah a pa nih a rak ti.

A pa cu pastor a sinakin Sunday school tuahpi ding kha a rak nawr hna i, an rak duh lo caah a rian an rak ban. Cucaah Jim cu Khrihfabu cungah lung nuamh lo nak a rak ngei. Cucaah a zumhnak cu, a mah pumpak ca bantuk lawng in a rak um. Chim duhmi cu, Krihfabu cawlcanghnak ah aa tel lo.

A tleirawl lio ah, an khua pawng hrawng ummi leikuang ah watermelons a cing. Vok rawl a pe. High School a dih tikah, a pa cu TB in a zaw i a thi dengmang cang. A pa nih a hawile kha a fapate cu rian fekfuan deuh pek ding in a nawl hna. Cucaah J.M. Hale timi Hamilton khua I thilri car pawl a zuarmi pa nih rian a pek. Cazi rian a rak tuan i, thla khat ah $2.27 a hlahlawh a si. Cu ti cun rian har taktak kha zumh tlak tein a rak tuan. Cucaah kum hnih chung ah a let 12 in a thlahlawh an rak karhter ve.

Thla khat i $2.27 hmuh in riantuan cu a fawi ding a si lo (U.S dollar man tuak tik ah 1900 hrawng ah $1 hi 2020 ahcun $30.52 tluk a si. Chim duhmi cu, JC Penney a thlahlawh kha tu chun tangka in tuak tikah $69.28 tluk a si). A tlawm taktak ko. Minung si dingmi hna hi, thil fate in an rak I thawk ko timi hi, JC Penney tuanbia zoh ah a lang ko. USA ka phakka ah $5.30 in rian ka rak tuan. Bus in suimilam pakhat ka kal hnu ah, cu rian cu ka va tuan. Cu hmanh cu a tlawm ngai i a rak har. JC Penney cu a si lo. Thla khat ah $2.27 a hmuh.

Fel tuk in a tuan caah kum hnih a tlin tik ahcun a thlahlawh kha a let 12 an karh i, $27.24 a hmuh (2020 tangka cun $831.36 tinak a si). Cazi a tuan lio ah, sipuazi tuah ning cang a hlathlai i, thil zuar ningcang tampi a van theih. A pa zong cu TB in a thi. Amah zong cu TB in fak taktak in a zaw i, a lum deuhnak Colorado ah a rak i thial. Cuka ahcun Butcher shop a rak cawk. 

1898 ah, James Cash Penney cu US nitlaklei ummi Golden Rule stores ah rian a rak tuan. 1902 ah dawr ngeitu Guy Johnson le Thomas Callahan nih an zoh lengmang ah, a riantuan ziaza le zuamnak an hmuh tikah, store dang kan on lai i, a miakmi chung in cheuthum cheukhat pek ding tiah an rak ti. Cu ticun  JC Penney nih cun $2,000 a hram a chuah i, Kemmerer, Wyoming ah dawr thar a va on. Cu hnu ah dawr pahnih an on chap. 1907 ah a bawm in an tuahmi company cu an hrawh i, JC Penney nih a dawr thum ning in a cawk dih. 

JC Penney dawr hmasat bik (1902)

JC Penney cu khulrang ngai in a thangcho i, 1912 ahcun dawr 34 a ngeih. 1913 ah Salt Lake City khualai i Keams Building ah an headquarter cu a thial. Company cu minthar a bunh in, JC Penney Company tiah a ti.  1920 hnu in ram pumpi ah a dawr cu a karhter i, dawr 120 a ngeih. 1924 ahcun kum khat ah $1 million a van hmuh khawh. 1929 ahcun ram pumpi ah dawr 1400 a ngei. Sipuazi dangdang zong a van tuah. Ralph W. Gwinn he bawm in, Florida ah acre 120,000 kha Clay County ah an cawk i innlo lei sipuazi zong an tuah pah. A cheu vawlei cu JC Penney Farms tiah min a si.  

1929 ah ruahlo tuk in, the Great Depression timi a chuak. Stock Market vialte aa rawk dih i JC Penney zong a riantuanmi vialte aa din dih. Cu tluk a rummi cu, a sipuazi a tum thluahmah. A rumnak zong a tla thluahmah. A hnu ahcun store riantuanmi kha lahkhah pek awk a ngei ti hna lo i, a life insurance policy tangka tiang aa cawi hna. Cucaah a ngandamnak tiang in a rawk cang. A taksa a zaw. A dam kho ti lo. Fahtheihlonak sii an pek tik zongah a dam kho ti lo. A zual tuk. A lungretheihnak ruangah a dam hrimhrim a dam kho ti lo. Ka thi rua lai tiah aa ruat cang. 

JC Penney cu a pa pastor a si bantuk in, a nulepa nih Khrihfa zumhnak kha hrampi chia in sipuazi tuah ding hi an cawnpiak. Cu tining tein a nunnak le sipuahi hi Khrihfa zumhnak ah hrampi chia in a tuah. Asinain a can phak cun a zumhnak hniksak a si ve. Sipuazi fak taktak in a van tla. Cu lio ah harnak le lungretheihnak a phunphun a van tong. Cu lio hi tin a kong a chim:

"Keimah cu ka hri a par ah ka um cang" tiah a hnu ah a chim. "Ka siapuazi cu a tlu dih; ka hawile he hmanh kan i pehtlai kho ti lo; ka nupi le fale hmanh kha missing bantuk in an cang cang. Cu vialte cu keimah palh a si ko" tiah a ti. A hnu ahcun mahthahnak tiang tuah aa tim. 

A hawipa nih ruahnak a pek bantuk in, Battle Creek Sanitarium ah a va thlawp. Vokhat cu zan ah a it kho ti lo. Ka thi lai tiah a ruat ko cang. Zan hmanh dei ding in aa ruat ti lo. A thi ding in aa ruat cang. A celh lo i a tho. A ihkhun in a tho.

Cu zantim ahcun, music le hlasak thawng a theih. Cu hla cu  Civilla Durfee Martin phuahmi "God will take care of you" timi a si. Cu hla a satu hna cu, arkhuang ah aa pummi sizung riantuan pawl an si. Caan tlaitu nih Matt 11:28-30 a a rel lio a theih: "Rethei le thilritmi vialte hna ka sin ah ra tuah u, dinhnak kan pek hna lai. Ka seihnam kha i bei u, kei cu nunnem le mitoidor ka si caah ka nawl hi i cawn ve u; cun dinhnak kha nan hmuh lai. Ka seihnam cu a bei a nuam i ka thil cu a zang" timi Bible a van relmi kha a theih. 

Cu cangka cun, "Hrinthanmi Khrifa ah aa cang." A zawtnak cu a dam dih. Aa lawm tuk i a hlawh bak in aa hlawk. Hrinthanak a thar in a pemh. Amah nih a chimmi cu, "Ka thinlung chungah zeitik hmanh ah ka theih (feel) ballomi ka van theih. Ka thinlung hi lunglawmhnak in a khat. Nunnak thar ah ka van nung" tiah a ti.

Thiang Thlarau riantuannak hi khuaruahhar a si. Minung hi, biafang pakhat le hla fung khat nih thlen khawh a si. JC Penny zong hla fung khat le Bible cang khat in aa thleng ve ko. 

Hi lio ah hin, a upa ngai cang nain, tipil zong a rak ing rih lo. 

Sipuazi cu a tla tuk ko nain, a hrinthan hnu ahcun a ngaihchiat le lungrawk a dam. Company cu nifatin te a mah bak nih a van zohkhenh. Thil sining a van tha ziahmah. A company zong cu a kai than. Company dawr zong cu an van dirh than. A hnu a upat tuk hnu ah, tipil zong a ing. Cun Khrihfa riantuannak tam tuk a rak bawmh hna. 

1940 ah JC Penney cu Des Moines, Iowa a va tlawn lio ah, tlangval no te Sam Walton timi pa kha manager lei training a va pek pah. "Paper tlawmte le ribbon tlawm deuh hman in, thil tom ning" a va cawn piak. Mirum hi cu zeitindah kan safe lai timi hi an ruat thiam tuk (Hi Sam Walton hi a hnu ah Wal-mart ngeitu a si). Nihin ni ah, Walmart Store hi USA ah dawr 4,756 a um I, vawlei pumpi ah 11,501 a um. Walmart ngeitu pa zong hi, JC Penney sin in sipuazi fimnak a cawngmi a si. 

JC Penney cu 1946 tiang board i chairman a si. Cu hnu ah honorary chairman hi 1971 a thih tiang a tuan. Amah hi September 15, 1875 ah a chuakmi a si. Kum tling tein a nung. A thih tiang bak hi, a office ah a kai kho rih. JC Penney nih nih nawlbia a chuah i, cucu Blue Laws tiah ti a si. A dawr riantuantu pawl hi an i pumh khawhnak ding caah, Zarhpini paoh cu an khar. JC Penney hi Pathian a rak thei taktak ko timi cu Zarhpini i dawr a rak kharmi nih a langhter ko. Zeicatiah Khrihfami kan caahcun Zarhpini cu kan Sabbath Ni a si. Sabbath Ni ulhamh hi Pathian nih a kan fialmi nawlbia a si. Nihin ni ahcun an khar theng ti lem lo. 

Vawlei tunbia le thil sining hi aa thleng lengmang ve. Nihin ni ahcun company thar tampi an van chuak. Amazon te hna le Ebay le a dangdang an van chuak hna. Online Store tam tuk an chuah tik ah, JC Penney le dawr dangdang zong tampi an tumchuk ve. A tu lio a chuakmi zawtnak ruangah, JC Penney Store pi zong Bankruptcy an file ve cang. Tu kum ah hin dawr 154 kan khar chap lai ti a si. Zarh 10-16 chungah a fiang lai ti a si. 

JC Penney hi Dallas, Texas ah headquarter ummi a si. May 15 ah Bankruptcy an file lio ah dawr 860 lawng a tang cang. Covid-19 ruangah dawr an khar viar i, June 4 ahcun dawr 500 an on than cang. 

JC Penny hi 1929-1930 ah Great Depression a rak chuah lio ah, a dawr tam tuk a rak i rawk bantukin a hnu kum 90 a raoh 2020 ah Covid-19 ruangah Sipuazi Recession a ra chuak than. A tu dawr 154 an khar lai ti a van si tik ah, hei nung rih sehlaw zei tluk in dek a lung a va rawk chinchin hnga. 

Asinain harnak le sunghbaunak ton ciocio zong ah, Pathian theih hlan le theih hnu ahcun thinlung aa lo lo. 1929 ahcun a sungh lio ah a lung a rak rawk tuk i thih a rak i tim. Sihmanhsehlaw, tu chun ah hin nung rih sehlaw a chim bak dingmi a fiangmi cu, "Nan thinphang hlah u. God will take care of You" timi hi a si hrimhrim ko lai!

————-———-