Ohio State Ah Rianngeilomi An Karh

Covid-19 nih hin, vawleicung pumpi ah rian thlaunak le company rawhnak tampi a chuahpi. Vawleicung ah sipuazi a thawngbik ram-USA le Tuluk-zong a hrawh taktak ve hna. Cu ve bantuk in USA ah GDP san ah pasarihnak a simi Ohio State zong an sipuazi tam taktak a hrawh ve. USA ah kum 23 ka um chungah, tu kum tluk i rianngeilomi (unemployment) an karh hi a um rih lo. Cozah vanchiat zong a si. Mipi kan vanchiat zong a si.

Tu chun Nilini ah Ohio cozah nih report an pekmi ah, zarh 11 chungah minung 1,200,000 nih rianngeilomi bawmhnak an sawk  cang tiah an ti. May thla 30 a donghnak zarh chungte ah khan, minung 34,500 nih rianngeilomi bawmhnak an sawk tiah Ohio Department of Job and Family Services nih an ti.

Nilini i cozah nih an van thanhmi he cun, Ohio ramkulh chung i rianngeilomi dihlak hi, 1,292,413 an si cang tiah an ti. Cucu van tuak tik ah, Covornavirus lio i bawmhnak sawkmi hi, a liamcia kum thum chung ah rianngeilomi bawmhnak a rak sawkmi vialte nakin an tam deuh ti a si. Ohio cozah nih an timi cu, nihin ni tiang ah hin rianngeilomi bawmhnak a sawkmi 668,000 sin ah hin, $3.5 billion hi kan kuat cang tiah an ti. Kuat rih lo mi tam tuk an um rih tinak a si.

Ohio lawng siloin USA ram pumpi ah rianngeilomi an tam ngaingai ko. USA ram pumpi ah, kan hnu zarh chung lawngah minung 1.9 million nih rianngeilomi bawmhnak an sawk ti a si. Cu zarh chung lila ahcun mahtein rianngeimi "Self-employed" timi minung 623,000 nih rianngeilomi bawmhnak an sawk ve ti a si.

April thla chung lawngah minung 20 million nih rianngeilomi bawmhnak an sawk ti a si. May thla chung lawng ah, minung 7.25 million nih an sawk than. Cucaah April thla chungah rianngeilomi 14.7% an si i, May thla dih tiang van tuak tikah 20% an phan te kho men ti a si.

Nihin Nilini cazin zoh tik ah, minung 44 million nih Marh thla canceu in rianngeilomi bawmhnak an sawk cang ti a si. A cheu cu rian a hmu cangmi zong an um ve hna ti a si. Hi rianngeilomi chungah minung million 30 tluk nih bawmhnak an hmuh cang. Rianngeilomi bawmhnak sawktu hi, duhsah tein an zor deuh ziahmah cang ti a si i, cucu thawngtha a si.

Ohio khualipi Columbus

Rian hi an on ciahmah cang nain, a thar in rianngeimi nakin rianngeilomi bawmhnak sawkmi an tam deuh peng rih. Hi tining tein December tiang kan kal ahcun, USA mipi tam deuh cu harnak fak ngai an tawng kho te men.  Zeicatiah inn man a sang; nunning a sang i, rian lo ngaingai in sau nun awk a tha lo. Kawlram ahcun tuktak cinthlak le zuatkhalh in nun khawh a si. Abikin USA minung hi, ei cawp kawl cawp an rak tam tuk ve. Bank ah tangka a khawnglomi an rak tam tuk. An tuan cawp i, an ei cawp ve. Cucu Mirang nih "Paycheck to paycheck nungmi" tiah an ti hna. Cucu an rak tam tuk ve. A rum lawlaw an rum tuk i, hi hna pawl hi caan tlawmpal ahcun a har ngaingai ding an si hna.

Hi tin a si caah, kan nih Laimi zong hi ralring tein tangka kan hman a herh. A herh taktakmi lawngah tangka hi hloh ding kan si. Innchungkhar cio ah kan I ralrin a herh. Tahchunhnak ah, innchung tamhnak te hna, tuah a herh tuk rihlomi innleng donhnak te hna, dumhruang kulhnak te hna le zeidang inn mulhtlorhnak timi "home improvement" sawhsawh hna ah hin, tangka hman ding kan si lo. Ni fatin kan bills a zornak ding zong hi ruah a herh. Tii, mei, gas kan hman tik zongah ralring tei in hman a herh. Cun "zudin, saei, gambling le a silonakah tangka hloh" hrimhrim cu ka kan hrial a herh. Cu lo ahcun USA ah hin, inn chuh le innhlanmi in chuah zong hi a tlawmte lo.

Cucaah a tu lio USA thlihran hi tha tein zoh le ralring tein nun a herh lio caan a si. Zeicatiah rianngeilomi bawmhnak te hna hi, rihma ngeimi a si. A kan bawmh zungzal lai timi ruahchan ding a si lo. Ruahchan ding zong a um lo. A dih cun a dih ko lai. Cucaah kut chung ah a ummi te hi, sullam ngei tein le man ngei tein hman thiam kan herh khun lio caan a si.

--------------------------------------
Zohchihmi Ca

1. Millions of additional job losses in May could push U.S. unemployment rate up to 20%
 https://www.marketwatch.com/story/millions-of-additional-job-losses-in-may-could-push-us-unemployment-rate-up-to-20-2020-06-04

2. Nearly 2 million Americans filed unemployment claims last week
https://www.cbsnews.com/news/unemployment-claims-jobless-report-2-million-file


3. More than 1.2 million Ohioans have filed unemployment claims in last 11 weeks
https://www.10tv.com/article/more-12-million-ohioans-have-filed-unemployment-claims-last-11-week