Amazon Ruangah Central Ohio Hi A Thangcho Cuahmah

Amazon hi a tu lio ah USA ah a than a rang bikmi company pakhat a si. Amazon nih USA ram thil sining le sipuazi umtuning a zoh lengmang ah hin, Central Ohio hi biapi taktak in a hmuh caah, computer lei riantuannak "Data center" hi tam ngaingai a sak cang i, Central Ohio ah duhsah tein hram a khuar chin lengmang. Data center hmun thum ah tuah an timh. 

Hmun khatnak cu New Albany sang ah a si. Amazon Web Services nih hin New Albany ah inn a (4) nak sak than ding in le rang tuk in an tangka lutmi kha tuaktannak ding caah a si. Amazon.com Inc nih hin, New Albany ah acre 104 hi million 400 in a cawk cang. Hi New Albany ah hin 2015 in an lut cang i, a tu an sak dingmi inn he cun, inn an sakmi dihlak hi $1.5 billion man a si cang lai. 

Hmun hnihnak cu, Hilliard sang ah a si. Cun kan umnak pawng, Hilliard sang zong ah hin "data center" timi computer lei rian tuannak inn thumnak kan hnu zarh in sak an thawk cang. Hi ka ah hin 2015 in inn sak an thawk ve. 2017 ah inn hnihnak an sak. Cu inn lianlian inn hnih ah hin, minung 37 lawng rian an tuan nain, an zapite hmuhmi tangka hi 8.1 million a si tiah Hilliard City cozah cazin ah an tial. 

Cun Dublin zong ah Data center pathumnak sak an timh. 2021 in an thawk lai. Cu ka ahcun five-campus center le security inn pakhat an sak lai. A ngan taktak ding a si. Cu ka ahcun minung 100 rian an tuan te lai. Data center riantuan hna hi cu, computer le zeidang technology lei mithiam sang lawng te an si caah, minung tam rian an tuan lo. 

New Albany data center thar cu Harrison Rd i nichuahchaklei le Innovation Campus Way aa tonnak ah a um i, a liamcia kum 4 lio ah an rak cawkmi acre 68 a kaumi 2550 Beech Rd ah a ummi vawlei in meng khat lawng a hla.  Hi hmun hi, Columbus le Newark khua karlak ah a ummi a si, hmunhma nuam taktak a si. Central Ohio sipuazi hi hi ka hmun ah hin aa bu te lai tiah ruahmi a si.

New Albany sak cuahmahmi Amazon Data Center Pathumnak

New Albany City Council nih nihin ah kum 15 chung innlo le vawlei tax 100% thumh ding in hnatlaknak an tuah. Amazon nih bia a kamhmi hna cu, minung 35 rian kan pek hna lai I, an lahkhah a zapite hi $2.45 million a si lai ti a si. Computer thiammi lawngte riantuan ding a si. 

Amazon nih an hnatlak ve mi cu, innlo tax pe lo in, 2022 in cun fees caah $250,000 kan pek lai i, 2024 ahcun $500,000 kan pek lai tiah bia an i kam. Cucu rianngeitu nih riantuanmi thlahlawh pekmi a zapite $25 million tluk nih an thlahlawh chung in an tun dingmi income tax he aa tluk ti a si. Sianginn pahnih nih cun kum khat ah $125,000 veve an co lai ti a si. 

New Albany ah hin, 2015 in killi pe 150,000 a kaumi data center pakhat an sak i minung 25 rian an tuan. Beech Rd ah naite ah inn hnihnak an sak cang. Inn thumnak hi sak ding in nawl an pek cang hna. Inn khat ah $300 million lengmang dih in sakmi inn an si. 

New Albany sang i Business Park hi private company tam ngai an luhnak hmun a si. Private company a lut cangmi nih sipuazi $3.7 billion man hram an bunhnak (investment) hmun a si. Cu hna lak ahcun AEP Ohio, Nationwide le Discover Financial zong an i tel. Cu ka Business Park nih hin, New Albany city nih a hmuh tangka vialte i 80% hi an chuahter ti a si. 

Amazon nih hin Ethna, West Jefferson le Groveport zong ah warehouse lianlian an sak hna. Ethna khua le bang ahcun minung 2,500 riantuannak hmun  asi. Central Ohio hi, Amazon thawng in tampi sipuazi ah thanchonak a hmu cang.

Etna sang ah a ummi Amazon Fulfillment Center

Hi New Albany area ah hin, Google Data Center le Facebook Data center zong an um. Atu bantuk in Amazon nih Central Ohio ah business a kauh thluahmah caah, Central Area cu technology rian lei ah thangcho taktak. Cucaah nihin ni ah Central Ohio cu "Silicon Valley" bantuk a si ti zong ah an ti tawn. Business dangdang zong an um hna. Central Ohio a thatnak pakhat cu, Warehouse le meikhu a chuakmi sehzung phun hi a tlawm. Cun bank, insurance, university le college, sizunglei, call center, hotel le high tech company tam ngai a um i, "millennials" timi chanthar mino cathiam tampi an pemnak hmun a si. 

Central Ohio ah hin, Laimi zong tam ngaite khua kan sak cang caah, hi bantuk in Amazon ruangah Central Ohio a thancho tik ah kan i lawm ngai ve. Pathian thluachuah ah kan ruah. Hmailei ahcun kan fale zong minung tampi hi bantuk data center ah rian thatha an tlai te ko lai timi zong kan ruahchan ko. Mino zong nih sianginn kai le cacawn thapek i, zaangdam deuh tein tangka tam deuh hmuh khawhnak rian hi, hmuh zuam cio zong hi a herh taktak.