Eve A Chuak Cang: Minung Ser Khawh Asi Lai Maw?

Biahmaithi: Christmas thaizing (Dec 26, 2002) ah, Raelian Bishop nu Brigitte Boisselier (chemist) nih, “A pakhatnak bik fonhtonh fa-nute (clone baby girl) cu, anu paw an hlai i achuak cang” tiah Florida ah mifimthiam tampi hmai ah, athanh. Cu thawng nih, vawlei pumpi ahninh. Cu fa nute cu, “Eve” tiah min an sak. “Eve” achuak timi thawng nih, mifimmi hna kar ah, bia alnak tampi achuahter. Hmailei ah, zeidah achuahpi rih te lai?


                Brigitte Boisselier le Rael

Bible Minung Siamnak

Zeidang kong kan tial hlan ah, Baibal minung serning, zoh hmasat usih. Baibal ah, “Pathian nih, tlak in, mi pa a ser” (Genesis 2:7, 8) ti kan hmuh. Genesis 1 ahcun, ‘Nu’ le ‘pa’ hmunkhat ah ser in alang (Gen. 1:26, 27). Gen 1 le 2 tlawmte aa dang. Genesis 2 ning in kan chim ahcun, “Pathian nih Adam cu tlak in a ser.” Eve cu, “Adam hnakruh in a ser chin” (Gen 2:18-21). Genesis nih, Pathian nih minung a siam hna ti lawng akan chimh. 

“Zeitindah a siam hna?” ti a chim lo. Nu le pa ci in maw asiam maw? Asiloah pa ci lawng in maw siam maw kan thei lo. "Abia in a siam" ti cu theology leicun kan ti. Genesis 2 ahcun, “Eve cu zei ci hmanh um lo in, ‘hnakruh’ in a siam. Pathian nih, Adam zong zei ci hmanh um lo in, arak siam. Cu ve bantuk in, Eve zong, nu le pa cin tello in, asiam ve thiamthiam. Adam le Eve hi, ci um lo in, siammi an si. Hi vial hi, Baibal minung sernak tuanbia kan theih khawhmi cu an si.

Mifim Hna Ruahning

Science nih, computa achuahter hnu in, minung fimthiamnak, rang tuk in athang. Ni fatin in thilthar achuak. Minung fimthiamnak hi, ri khiahpiak awk atha ti lo. Cucaah America nih van khi kan ri a si (sky is the limit) an tinak asi. Fimnak akarh deuh, Pathian zumlo mi an tam chin. Baibal zong hmun tampi ah an zuamcawh ve. 

Mifim hna caah, thil theih hmasat le ser hmasat hi, an izuam tawn. Atu cu tuah awk an hngal ti rua lo. “Nu le pa ci, tonter lo in, minung kan ser lai” tiah, company tam nawn an izuam. Doctor le scientist tampi an itel. Dollar million tampi an dih. “Minung hi, nu le pa ci lawng in achuak kho” ti in, ruah a sinain, “Ci pakhat le cell pakhat in, minung achuak kho lai” tiah, mifim nih, an zumh. Genesis zong ah, Pathian nih, ci lo in minung arak siam. Mifim mi nih, nu le pa ci lo in, minung an siam khawh ve ahcun, Pathian an phan deng ko hnga lo maw? Cu fonhtonh chawm in, fa sernak cu Mirang nih, “cloning” an ti.

Fonhtonh Minung Siamning (Cloning)

Lai biafang kan ngeihmi a tlawm pah caah, “science” kong tial ahar ngai. Cucaah, “cloning” le “cell” timi fianter ta ka duh. “Cloning” ti hi, Greek holh “Klon” in ara chin mi a si. A sullam cu, afawinak in, thil aa khatlo mi fonhtonh I, thil thar “ser” ti le “aa khatlomi thil pahnih tonter in, kokek thil pakhat chuahter” ti khan a si. Cu achuak mi thil cu, “fonhtonhmi thil pakhat sining he an sining (DNA) a khat lai” ti a si. 

Tahchunhnak ah, “Vulkung ah apple kan peh i, apple taktak achuak than. Meitei kung ah, sasuma kan peh I, sasuma achuak than. Cucu “fonhtonh (cloning) in thil ser” ti a si ko. Cun, “cell” timi cu, minung kan zeizongte hi, “cell” an si dih. Minung taksa hi, “cell” billion tampi in aa sermi a si. Minung le saram poh hi, nu le pa ci lawng in chuah khawh a si rua tiah kan ruah. Asinain, scientist tampi nih, “nunnak hi ci pakhat le cell in ser khawh a si ko lai” an ti. Minung acingmi caah, a nupi ci le a va “cell” in minung achuak kho lai i, pumsa tlinglo mi le fa ngei kholomi caah, bawmtu a si lai tiah an ruah. Atu le bang ahcun "stem cell" in "minung ci aa ser kho lai i, cell lawng in minung hrin khawh asi men lai" tiah an ruah cang. Thingkung, anhringso, saram hna ahcun, fonhton in ser chawmmi thil tampi a um cang. Ci lo in an ser hna. Cucu cell riantuaning a si.


A ka in fa a hringmi, a ci a mit cangmi Utlak Australia scientist nih a thar in an sermi

Hlan lio ah, mah bantuk ruahnak a rak um kho lo. Minung fimnak athang chin lengmang i, 1952 ah, Scientist pawl nih, utlak ti pakhat muru (nucleus) cu an chuah. Cun utlak cell (thisa) pakhat an rawn. Cu an rawnmi cu, utlak fa ah a chuak kho an ti. Asining ahcun, utlak cu, anu tii le apa baw aa tawn hnu ah, buluk akeuh. Atu an keuhter ning cu, hitin a si. Utlak nu (A) a tii an lak. Cu ati muru (nucleus) te kha, ceunak pakhat in an hrawh. A ti cu amuru (amet)a um ti lo. Alawngmi ti ah aa chuah. Cun utlak dang B (anu zong apa zong asi kho) vun cell (skin cell) an lak I, utlak A tii alawngmi chung ah an rawn than. Cuticun utlak fa (buluk) an keuh ter. 1957 ah, scientists pawl nih, utlak ti lawntermi chung in, utlak pa avun cell in utlak an keuhter khawh.

Cloning in ser hmasat cemmi Dolly tuu le a hrin hmasatmi fa Bonnie

1997 ah, Dolly timi tufa te cu, tupa ci tel lo in, tupa cell in an ser khawh. 1998 ah, zu fa tampi cu, zupa pakhat cell in an hrinter than. Cun cawfa pariat cu, cawpa pakhat cell in an hrinter khawh. 2000 ah, vok le meheh zong, apa cell in an serchuah hna. 2001 ah, Advanced Cell Technology of Worcester (Massachusetts) nih “minung ah acang kho mi, fano aa thawknak (human embryo) paruk cu, research tuahnak caah, kan ser khawh” tiah an ti (Hi human embryo hi, nu fathei le minung cell sawhsawh tonter in siammi an si). 

Dolly tufa cloning in an serning pungsan asi

2001 January 8 ah, “Noah” ti min an sakmi, fung fa te cu, “a pa ci tello” in an serchuah. Pumtlingte in a chuak nain, caan sau nunglo in athi. 2002 ah, saveh le chizawh fa tete cu, pa cell in an ser khawh than. Dec. 26, 2002 ah, Clonaid company nih, “fonhtonh minung kan siam cang” (first cloned baby), “Eve achuak cang” tiah an thanh.  “Eve” chuahnak nih, vawleipi ahninh. Buaibainak tampi achuah pi. Politicians in, Pope tiang nih bia heh tiah an chim. Apawmhlawmmi le adohmi tampi an um. Cu thawng athanhtu cu, “Raelians” (Raelism) timi biaknak bu an si.

Raelian Biaknak (Raelism)

Hi biakank bu hi, a thei rihlomi zong tampi kan um kho men. Mi phundang ngai an si. Minung siam aa zuammi company pakhat, “Clonaid” dirhtu an si. An mah nih, Dec 26, 2002 ah, “Eve a chuak cang. USA anu khua ah arak tlung cang lai” tiah Floridah ah an thanh. Eve a nu cu, American a si I, apa cu acingmi a si an ti. Fa ngeitu nu amin, akhua le asining an chim lo. An fanu te cu, pawng 7 arit i, a ngan adam ko, hlai in kan ngeihter” tiah, company lutlai nu Brigitte Boisselier nih a chim. 

Cu fanu te cu, pa ci tello in, anu thisen bak in achuakmi a si an ti. Zeitindah nau kan siam ning asi ti cu, an chim lo. “Anu he thisen khat bak an si le si lo DNA hniksak ding caah, ABC science kong tialtu Michael Guillen he, biaruahnak kan ngei lai” ati rih. A pahnihnak fonhtonh fa (cloned baby) cu, Chaklei Europe ah, January zarh khatnak ah, nu le nu aum mi (lesbian) hna sin in achuak lai” a ti. Zarhteni, January zarhkhatnak ah, Raelian bu chimnak nawl ngeitu pa nih, “Netherlands ah nu le nu aum mi nuva hna nih, fonhtonh fa pate (cloned baby boy) an ngeih cang” tiah athanh than. DNA hniksaknak, an tuah le tuahlo a chim lo. (Italian fahrintertu sibawi Severino Antinori nih, December thla ah, 2003 January ah, fonhtonh fapa (cloned baby boy) cu, Italy ah ahcuak lai a ti ve). Hi bu hnih hi an idang.

Eve naute thawng nih vawlei pumpi atlirh. Biangaih ruah ah, doctor, scientist, biaknak hruaitu, politician le thadinca tialtu tampi an ra. Micheu nih an zumh; acheu nih an zum lo. Zeicatiah, “nau hmanthlak, video le zeidang zumhtlak thil pakhat hmanh an chim chih lo caah a si.” Cu fanu te cu, a nu thisen lila in achuak mi fa tatak a si le si lo hngalhnak caah, DNA test kan tuah lai an ti. Mi tampi, fonhtonh fanu te rat lai cu, an bawh cio. Nihin I tiang cu, biafiang alang rih lo. ABC catialtu zong nih a bawh rih ko ti a si.


          Auvergne Meitlang (France)

Clonaid company adirhtu pa hi, French Journalist Claudi Vorilhon (56) a si. “Rael” ti zong ah a au. Amah nih, “Raelians” (Raelism) biaknak a dirh. Prophet ah aa chia. Journalist poh cu, “Athianghlimmi Rael” tiah an auhter hna. An tuanbia thawknak cu Vorilhon (Rael) nih, hitin a chim: “French ram Paris khuapawng, 1973 December 13 ni a si. Ka zung lonh tiang motor ka mawngh i, Auvergne meitlang pawng ah ka dir. Culio ah, meisen aceumi van lawng (space ship) ara. Innkhar an van awn i, van mikhual, sam nak tete an rak chuak. An lawng chung ah an ka luhpi i, nu tete nih, an ka lam piak. Cu minung cu, Elohim an si. Vawlei minung an rak serning te hna,  an ka hmuhsak. French holh zong an thiam ngai i, “Raelian biaknak” zeitindah na thawk ning a si lai?” ti an ka hmuhsak. 

Cun “van mikhual puanrang aih (Herald) pawl nih, an chimmi cu, vawlei thilnung vialte hi, fonhtonh chawm (cloning) in, aliamcia kum 25,000 lio ah, kan ser” an ti. Hi asiamtu pawl hi, vancung mit hmuhlonak ah an um. Science le technology athiam taktakmi an si. An mah nih, minung hi, dahkhuaikhan ah akan siam. Van mi cu, kan nih Raelians pawl hi, science le philosophy adirpitu kan si ka ti hna” ati.


August ni 21 hi "Angki lo um ni" an ti i, an taklawng in an um hna

Vancungmi bia bantuk in, Raelism (Raelian biaknak) cu, Dec 13, 1973, Paris khua ah adirh. Member 55,000 kuakap an ngei. Mifimthiam tampi an itel. An dirpibikmi cu, “science le biaknak” a si. “Science” hi Pathian laksawng ah an ruah i, “Science is love” (science cu dawtnak a si) a ti ve. Rael nih,  “Hlanlio biaknak nih minung lamping ah ahruai caah, mi an tlau. Cu biaknak nih science fimthiamnak a fumter. Science cu zeihmanh nih a akham kho lai lo” a ti. Raelism biaknak nih, Judah le Krifa biaknak billion 2 dengmang zong a zuamcawh ngaingai. Judah le Krifa biaknak cu, “zumhawk tlak lo tuk” (unscientific) a si a ti ve. Raelian biaknak adirh hnu ah, van khualtlawng (space travelers) he, Auvergne meitlang pawng ah, voiruk kan itong” ati. Hi tuanbia vialte a dik taktak maw ti cu, amah dah ti lo nih cun, ahohmanh nih theih a si lo.

Rael chimmi le Baibal minung sernak tuanbia cu, akalh ngai. Aa lawhnak aum ve mi cu, Pathian nih, “minung kan ser hna lai; kanmah mui an keng lai I, kanmah he kan I lo lai” (Gen 1:26) timi zawn hi a si. Zeicatiah, “kan,” “kanmah mui,” “ kanmah he..” biafang hna nih, minung ser lio ah, Pathian sin ah, midang um ve hna sehlaw a dawh. Rael hi baibal zong athiam ngai. 1973 ah, van mi nih bia an ka chimh tiang, Judah le Krifa biaknak nih, Bible acang khatnak bik an rak theih palh. Hebrew biafang ‘Elohim’ (God) ti hi, atak ahcun, ‘mi tam ca’ (plural) a si. Asullam cu, “vancung in a rak ra mi hna” tinak a si. 

Cucaah, ka tonmi van mikhual (space alien) zong hi, “Elohim” pawl an si a ti (Gen. 1:26 zoh chih). Rabbi David, Israel Yeshiva University saya, nih, “-im” nih ‘mi tamca” (plural) achim duh ko nain, “Elohim biafang nih, mi pakhat a sawh duh” tawn a ti ve. Raelians bu bantuk in, scientist tampi nih, zeizongvialte (universe) ah hin, minung dang zong an um ko lai ti an zumh taktak. Palangkhengzuangmi (UFO) laawng zong, America ah, an lak taktak ti asi. Ram tampi ah, UFO cu an hmuh hna.  Khawika an um ti an thei rih lo. Cucaah, scientist nih, “Zeizongvialte (universe) kong hi, zeite kan thei rih lo” an ti.

Raelians pawl nih, 2035 ah, “van mi (space alien) an ra than lai tiah an zumh.  An umnak cu, “UFO Land” (Unknown Flying Object) tiah min an sak. Canada ram Vermont ramri pawng ah a si. Raelian pawl nih, 1997 ah, minung sernak Clonaid company an dirh. Dahkhuainak (lab) caah, tangka tampi an kawl., West Virginia nuva hna, an fapa thla 10 a si mi, alung an hlainak ah athi I, an ngaihchiat ruang ah, Raelian bu cu, tangka thawng tampi an hlut hna. “Minung siamnak dahkhuaikhan tuah lo in, Raelian zumhnak akarhnak ding ca lawng an ruat” an ti. Ahnu ah, an iphuak. 

Raelian bu hi, nungak no mi dawh tampi an itel. Vancung mi dongtu ding ca an si. 1991 ah, French ah, khawmpi an tuah i, nu he pa he, “taklawng” (nude) in an um caah, acheu nih cun, “cult” (kalsual) an ti hna. 1997 zong ah, “Heaven’s Gate kalsual (cult) zong, vancung lawng in kan zuang lai” tiah an ti i, minung 39 an rak ithat. Raelian zong cutin an um sual lai maw ti aruatmi an um. Raelian kong catialtu pakhat nih, “Rael cu, minuam a si. Nuamceng (playboy), lentecelh thiam le mi capo a si” a ti. Kalsual khan ah a chiah hna. Rael tinhmi cu, “Fonhtonh (cloning) in, minung nih zungzal nunnak co ding” ti a si. “Pathian nih, minung nih kan zumh ning hi, hrawh a timh. Vanlawng in inn sukden nak (9.11 USA) zong, Pathian riantuannak a si” a ti. Aa tinhmi cu, dollar million 10 kawl; van mi an tum tik ah, don ding ti a si. Israel in don ding tiah aa tim nain, Israel cozah nih, tha an pe lo ti a si.

Raelians pawl hi, an dik pek diklo pek ah, vawlei pumpi, abik in, America le Europe an hninh. “Fonhtonh minung sernak” (cloning) he aa lomi, “stem cell research” (fa no chuahternak) zong nih, American cozah chung ah, Clinton chan in, Bush chan tiang, buainak a chuahpi. “Eve achuak cang” timi thawng nih, vawlei pumpi biaknak hruaitu, scientists, politicians, doctors le mipi tampi abuaiter hna. USA nih, “fonhtonh minung siam” (cloning) akham nain, ram cheukhat nih, an onh. Vatican in Pope, Muslim hruaitu le Jewish Raabi pawl nih, “Minung fonhtonh siam hi, athianglo, tuksapur le ningcanglo thil umter a si” tiah an ti i fakpi in an doh. Politician cheukhat nih, “Vawlei pumpuluk ah, fonhtonh minung siamnak (cloning) hi, USA hruainak in, UNO nih, kham ding a si” an ti. 

“Eve” chuahnak nih, vawleipi abuai hringhran. Fimnak cu atha nain, nihin ni vawleicung buainak tampi cu, fimthiamnak nih ahcuahpi ve. Phungchimtu nih, “Fimnak atam deuh poh ah, lungretheihnak atam deuh” (1:18) ati mi a dik taktak. A caan ahcun, minung fimnak zong hi, buainak a rak si. Eve chuahnak zong nih, buainak tampi a chuahpi cang. Hmailei ah zeithil dah achuahpi rih te lai?


Fungpa ci tel lo in le cell fonhtonh in an hrinter Noah Fungfa

Biatlangkawm

              “Raelians nih minung fonhtonh in an siam taktak maw?” ti cu aho hmanh nih, fiangte in an thei rih lo. An mah lawng nih an theih rih. Zeicatiah, nau hmanthla, video, anu min, apa min, an khuaram zeizongte an chim rih lo caah a si. Asinain, mifim tampi nih, saram zong tampi an siam cang ko caah, minung zong an siam khawh ko lai tiah an ruah. Company pathumli cu, minung ser ding an izuam cuahmah ko. 

Thinphan awk ngai a si mi cu, “An siammi saram hna hi, ahringtu anu taktak bantuk an si ko nain, an chan a tawi deuh” ti a si. “Noah Fung-fa” le “Dolly tuu” zong tuan ah an thi. 1978 ah, Louise Brown timi, thlalang chung naute, zong tuan ah, athih caah, thlalang chung fa siam an ban thai. Fonhtonh minung ser (cloning) zong, adong te ko lai tiah, mi tampi nih an ruah.

“Eve Achuak Cang” timi kong ka tial tik ah, acheukhat caah, ruahsualnak aum kho men. Ka tinh mi cu, “Laimi nih, vawlei ah, thil thar achuak cuahmah mi, kau deuh in zohthiam usih law, zeibantuk dirhmun ah dah kan nih kan um ve?” timi, kan chungril hi, bih usih ti ka duh. Lairam zong ah, “cult dengmang” zumhnak an um ve. Biatak theih lo ahcun, buainak tampi achuak ve khah. Theih fianlo ahcun, thilthar aum tik ah, zumhnak apur; launak le rawhralnak achuak tawn.  Cucaah, “Eve Achuak Cang” timi kong hi, Lairam mipi zong nih, theih le ruah ve ding ah, ka duhnak a si. “Adik diklo, achia atha cu, careltu nih ruah le thim zia thiam ko u” tiah, saduhthahnak he!

Zohchunmi Cabia:

1. Jerry Adler, “Spaced out,” Newsweek, January 13, 2003.

2. William Norman Grigg, “The Clone Wars,” The New American, January 13, 2003.

3. “Yahoo News”: http://story.news.yahoo.com