Khuachia le minung pehtlaihnak kong cu, Laimi pipu chan in tampi theih a si cang. Chanthar Krihfa chan ah khuachia nih minung harnak a pek hi a tlawm ngaingai cang. Asinain atu i ka tialmi thil hi, mi pakhat lawng nih a chimmi si lo in, minung tampi nih an tonmi le an chimmi tuanbia asi caah, khauruahhar ngai asi. Na zumh le zum, na zumh lo le zum duh hlah. A tuanbia cu hihi a si.
Ahmun: Thingfal Khua (Lunglei District, Mizoram)
Voikhat cu Thingfal khua ka va tlawng. Mamte veng Pu Kheng te inn ah ka thum. Ka tlunnak pa nih, a liamcia kum khat lio ah, an innpa inn ah thil a cangmi kong a ka chimh. Cu kong cu zeidang asi lo. An innpa inn khuachia nih zanchiar an inn a hninhnak kong a si.
Cu kong va hlathlai ding in an innpa inn ahcun, ka le va leng hna. Cu inn cu ka tlun inn in inn 4 nak ah a ummi an si. Innpa dang zong an rak ra cio hna i, bia cu kan i ruah hna.
"Vunga" tiah an an ka auh i, hitin bia cu a vun thawk.
"Vunga, kan tonmi thil cu a mak taktak. Zankhat cu zan 10 (Kawlram caan in 11) tluk ah, kan thu ko hna. Ruahlo pi ah, kan inncung ah ngakchia aa chawkmi bantuk thawng kan theih. Cu vial ahcun kan innpi cu dur..dur in a hnin thluahmah ko. Minute 1 renglo aa hnin. Kan it rih lo. Kan cum zong a thui bak in aa thui. Cun kan khengbel zong an i thui le a cheu cu an tla."
"Li aa hnin rua tiah kan ruah i, cuticun khuaruahhar ngai in zan cu kan it. Voikhat aa hninh hnu cu aa hnin than ti lo. Thaizing kan tho i, kan innpa hna cu 'nizan lihnin cu khuaruahhar a si ko' tiah kan ti hna. An nih an i thawh i ziah lihninh pakhat hmanh kan theih tung lo" tiah an kan ti. "Ziah kha tluk fak aa hninmi kha nan thei lo maw?" tiah kan ti hna le zeihmanh kan thei lo tiah an ti than. Khua chung ah kan va chim tik zongah lihninh kan thei lo an rak ti cio."
"Cuticun a mak tuk aw kan ti le kan khuaruah a har ko. Cuticun chun nitlak kan liam. Zan a van phan than. Zan 10:30 tluk, mileng an um lio ah inn cu a van i hnin than. Mileng cu an lau tuk. Cum zong a van i hnin dih. Ngakchia cu an lau tuk i an tap. Thli le a hrang fawn lo. Cuticun mileng nih cun inncung he, inntang he, inn leng he dahmei an ceuh i zeihmanh an hmu fawn lo. Cun a dai than.
"Cuticun kan inn cu zan chiar in aa hnin. Zan 10 hrawng ah aa hninh chel, zantim aa hninh chel, zinglei ah aa hninh chel asi. Ahnu ahcun kan tih cang. YMA mino pawl nih zanchiar an kan riah. Mifim mi hna kan zohter hna. A cheu nih "Nan inntang a thuhnak vawlei tangah tichuak pakhatkhat fakpi in a um le asi men lai tiah an ti. Vawlei kakmi hna a um hnga maw tiah an ngiat. Zeihmanh an hmu lo. Acheu nih nan mah inn zawn lawng in thli a kal a\\caah asi men lai tiah an ti. A hohmanh nih a ruah awk an thei lo."
Cuticun zanchiar in minute 1 fai lengmang aa hnin. Minung zeitluk an tam zong ah aa hnin. A caan ah zankhat a lak caan a um.
Cutucun zarh tam nawn aa hninh ah Lunglei News tialtu nih an theih i ca zong ah an chuah. Cun Krihfabu kip hruaitu an ra i thla an cam...Presbyterian pastor te, Baptist pastor, IKK pastor, UPC pastor, Evangelist zong an ra, Sabath hruaitu tiin a phunphun an ra i thla an cam nain, a dai hlei lo. Cuticun aa hnin peng ko.
Adonghank ah, Lunglei in RC Father a ra. Cu pa nih cun hihi khuachia thlarau riantuannak asi lai tiah ka ruah. Cucaah hi vailamtah a cuangmi thi hi nan khandan innka hram ah ka thlai lai. Hi thil hi khuachia riantuannak asi ahcun tuzan thawk in a dai lai. A daih zong ah hi thi te hi nan van hlonh lai lo. Nan innchung ah nan chiah peng lai. Nan hlonh ahcun aa hnin than khomi asi.......Cun khuachia sual riantuannak asiloahcun le thil dangdang asi ahcun aa hnin rih men ko lai."
Cun thla a cam i, thi zong cu thluachuah a pek i, khandan luhnak kutka ah a thlai. Cun lo diam in a tjhkal. Cu RC Father nih thi a thlai zan zong ah, zan dang bantuk in hawi riak tampi kan ngei. Asinain cu zan thawk in inn aa hniti lo. Nihin ni tiang zong aa hnin ti lo. Amak taktak" ..........
tiah an tuanbia cu saupi a ka chimh. Cu ka va len lio hna ahcun, RC Father nih a thlaimi vailamtah tung ummi thi-rual te cu aa tlai peng rih ko. Cu thi cu Catholic nih an i awih tawnmi hngawng thirual te khi asi. Vailamtah fate a cuang.
Thingfal khua sang pakhat (Ref.www.google.com)
Hi tuanbia ka theih tikah ka khuaruah ahar. Mi tampi nih cun RC cu Pathian biami hmanh ah kan ruat hna lo nian, hika zawn ahcun khuachia a thawl khotu taktak cu an mah tu an rak si. Baptist, UPC, IKK, Presbyterian, Methodist le Krihfabu dangdang an rak si lo. Cun hi tuanbia nih a ka ruahtermi cu, khuachia hi capo asi lo. Tawn chawmmi asi lo. Minung nifa kan nunnak ah a taktak in kan minung chung ah le kan innlo cung tiang ah pei rian atuanmi si ti a fianter. Ka pa zong an rak vuak. Tang 7 ka kai lio ah, kan innpa pa zongan vuak.
Cucaah khuachia riantuannak hi, "ataktak (real) pei asi. Hihi sual riantuannak asi caah "vailamtah thawnnak lawng in pei tei khawh asi hi" timi a ka hmuhter.
No comments:
Post a Comment