Laimi le JUNE Thla?

LAIMI hi sonhtarh a hmang bikmi miphun (10) thim u sih law pakhat ahcun kan i tel men lai dah tiah ka ruat. Kan i sonhtarhmi thil a tam tuk. Krihfa kan si hlan pipu phung nih a kan zulh peng i, Krihfa kan si hnu zongah cu phung chung in kan chuak kho thlu rih lo. Krihfa zong nih sonhtarh kan hman pin ah a tih zong kan tih rih.

Ka ruat theu tawn. Pipu phung in sonhtarh kan hmanmi, Krihfa kan si hnu zong ah kan buar ngamlo mi le kan hrial rihmi thil hna, ka ruah tikah Laimi kan Krihfa zumhnak hi 100% cun kan nunnak ah rian a tuan lo tiah ka ruat. Kan Jesuh hi a tetuai tuk ko rua ka ti. Kan zumhnak nih pipu phung a lonh ngam rih lo. A lonh kho rih lo. Cucaah Laimi nih kan zum kan timi hi kan zum taktak rih rua lo tiah ruah awk biahalnak nganpi a um.

Laimi nupi thit le va ngeih fate, kan zumhnak a dernak a langhnak cem cu JUNE THLA thitlak kan hrialmi hi asi.

Thal a hung chuah cun, miphun kip cu thit-umh puai tuah a hung si cio. Mirang, Spanish, Minak, Kawl, India, Europe, Australia, Asian miphun kip le Africa ram miphun tiang nih June thla an hrial bal lo. Zeica dah Laimi nih June thla kan hrial peng hnga? Zeidcah dah kan tih hnga?

Cucu ruah lengmang ah, pipu an lungput ah sonhtarh an ngeihmi ruang bik ah asi ko. Laimi cu hlan ah June thla cu a um ko nain June ti zong an rak ngei bal lo. Furpi sawhsawh asi ko. Laimin cun an sak ve len ko lai nain, June (zun) asi ti kan theih cu Mirang kai hnu lawng asi.

Kan nu le pa nih an ti tawnmi cu, "Zun thla thit-umh cu zunmuainak asi" an ti timi nih kan Laimi lungthin vialte a chan in a kan tawl i, June thla hi kan tih ko cang. Sullam zeihmanh a ngei lo mi asi. A phuah tu hi zei bantuk minung dah asi lai timi hi ruah damh khawh ngai a si.

"Sonhtarh thiam, bia siphai thiam, mi ralchia, mi ningtih pang, thil a chia lei rumro a hmumi, vawlei ah cawlcangh a ngamh tuk lo mi, chun um zan kal pa" nih a phuahmi a si hrimhrim lai timi hi chim ngam asi. Khua tuakmi, khuaruatmi, mifim le sullam ngei tein thil a hmumi nih cun hi bia cu an chim bal lai lo. Cucaah kan Laimi nih June thla kan tihmi hi cu, khuaruahhar a si.

Vawleicung miphun ah June thla a tihmi cu kan mah Laimi lawng kan si men lai. 

Ruah ding a um. Hi pin ah hin chan zeizat dah Laimi nih June thla kan tih rih lai? Kan hrial rih lai? June thla kan hrialmi nih zeitluk in dah nihlawh a kan sunghter le thlauter? Zeitluk in dah kan Krihfabu ah buainak a chuahpi? Caan harnak a chuahpi? Hi vialte hi ruat in, chanthar Laimi mino nih June thla thit hi kan thawk ding a herh. Kan tih ding asi lo.

Ruah cia dingmi thil pakhat tu cu a um. Vawlei minung kan si chung paoh cu hihi ruah cia a hau. Krihfa kan si pek ah, Krihfa silo pek ah, ruah cia ahau.

Cucu zeidah asi tiah cun, minung kan si chung paoh, titsa in kan nun chung paoh, hi vawleicung in khua kan sak le kan tlawnlen chung paoh ahcun, hihi a loh-theih lo in a um mi asi. Phungchimtu 3:1-9 nak tiang nih tling khitkhet tein a kan chimh ko. Caan kong ah a chimmi a si.

Cu ve bantuk in vawleicung minung kan si chung ahcun hihi an um phung asi. A tuan le tlai lawng an si hna:-

1. Khawnden a um
2. Zawtfah a um.
3. Tar a um
4. Thihloh aum.
5. Nu le va thih tian a um
6. Nu le va then a um i fonh than zong a um
7. Telefa thlau a um i, telefa thlau lo zong aum
8. Telefa tling tein dam a um i an zatein thih a um
9. Sithat caan a um, sunghbau le zatlak caan a um
10. Nih caan a um i tah caan a um
11. Nuamh caan a um i harsat caan a um

June thla i thit-umah na tuah zong ah siseh, June asilomi thla i na tuah zong ah siseh, acunglei thil hna hi minung nih hrial khawhmi an si lo. June thla i thitlomi nih, hi a cunglei thil hi hrial khawh asi ko ahcun, vawleicung ah hin minung nih sunghbau le zatlak kan tong hnga lo.

Cucaah kan Lai pipu hna zumhnak, ruahnak le pawmmi hi chan thar Laimi Krihfa mino nih zuamcawh a herh. Kan zumhnak in tei a herh ko cang. Ziah miphun dang nih pakhat hmanh nih an hrial lomi kan nih nih va hrial cu? Sullam pakhat zong a ngei lo.

Atanglei ah June thla hi zeitluk in dah thla sunglawi asi timi aa hawknak tuanbia te hi ruah ding ah ka van tial.

Mifim cathiam mi hna nih JUNE aa thawknak cu hitin an ti:-

"JUNE timi hi, nu-pathian (goddess) JUNO timi in aa thawk tiah an ti. Zeicatiah JUNO cu nu hna a rungvengtu nu-pathian asi i, June thla zong hi Rome tuanbia aa thawkka tein nu le va thit-umhnak caah an uar bikmi, an hman bikmi le sunhsak bikmi thla asi caah asi."

Hi ca nih a chim duhmi cu, June thla cu "Rome Miphun hna nih a hramthawk tein thitumhnak caah an uar bikmi le hman bikmi thla asi" ti a si.

Ni le thla rel ning hi, Rome nih an thawk i, French le English le German ah a kal chin viahmah mi an si. Cu Mirang in kan nih Laimi zong nih June (Zun) tiah kan hei ti ve ceu te khi a si.

Calendar siamtu Rome miphun nih thit-umhnak caah an uar cemmi "June Thla" cu kan nih Laimi caah kan tih cemmi le hrial cemmi thla ah a tla. June kha "zunmuainak" ah kan mer daih. Kan pipu ruahnak hi Rome tuanbia he epchun ahcun Laimi hi a lettalam in kan ruahnak a um. June thla kha, Lai awchuah in aw an chuah le an sermon i, tihphang viar in a kan tuah. Cu tihphannak cu Satan duh ci te le lawmhmi te khi a si.

Laimi nih sullam ngei tein ruah a herhmi cu hihi asi. Laimi nih chan tam ngai June thla thitumh kan hrial cang. Asiahcun hi biahalnak hi ruah a herh.

June thla thitlak ruang ah pa zeizat theng te dah an i thihtian cang? June thla aa thila mi hna hi thla dang aa thilami nak in an thi deuh hlei taktak maw? Vanchiat an tong hlei deuh taktak maw? Thla dang ah teh himnak aum hlei maw?

Hihi ruat rih u sih!

June thla thitlak kan hrial ko bu in, thih zaat hlan lo lio caan ah, nu le va zeizat dah kan i thihtian cang ne? Nuhmei zeizat dah kan um cang? Pahmei zeizat dah kan um cang? June thla kan hrial ko bu pi in minung zeizat dah accident in nu va an i thihtian cang? Lairam ah zeizat? US le Malaysia tibantuk ah zeizat dah accident in an i thihtian cang?

June thla kan hrial ko nain kan i thihtian fawn ko ahcun zeidah hrial cu a thahnem? Zei thla dah himnak aum hlei? Ziah June kan hrial ko nain kan him hlei ne lo? Ziah kan him hlei lo ah zeidah June cu kan hrial chan ne?
Cucaah Laimi zong nih, miphun dang cio bantuk in June thla hi thit-umhnak caah kan hrial lo ding le hman kan thawk ding mi hi, a biapi tuk. Pastor le evangelist hrimhrim nih thawk ding asi. Hi kan hrial peng ahcun kan miphun caah sunghnak, harnak, buainak le zumhnak dernak a chuahter.

Cucaah Jesuh Krih a zum i zumhnak biapi a chiami mino hna nih, hi June thla ah thitlak ngam ding a si, June ah thitlak zong kan herh. A diklomi kan Laimi ruahnak hi kan thlen a hau. Cuthlen a thawk tu ah Lai Krihfa zumtu tha a ho dah zumhnak in kar a hlang ngam te lai?

"Bawipa nih a sermi ni le thla vialte cu an tha dih. Thluachuah pek dihmi an si timi a zummi caahcun, zeitik thla thitumh hmanh hi zeihmanh pawihnak a um lo."

Zeicatiah............"BAWIPA nih a kan pekmi ni hi zeitluk in dah a that? Hi ni ah hin i lawm u sih law i nuam hna u sih" (Psalm 118:24) ti pei zumtu nih cun an ti cu!

Bawipa nih a sermi ni le thla paoh cu an tha dih. Thla min tham cu minung sak cawpmi pei asi ko cu. Zei ni le thla paoh hi an that dih ko caah kan hrial dingmi le tih dingmi zeihmanh an um lo!!!!