Laimi Inn Ngeimi Caah Theihtlei

USA hi mifim ram an si caah minung duh dingmi le herh dingmi an thei tuk. Kan herhmi thil vialte a tling dih ngacha ko. Amah belte cu, thil hi a sining te theih, hngalh le hman thiam a herh. Cu lo ahcun harnak le sunghnak tampi a chuak kho.

Nizan ah "Today" show ah innka tawh an hrenh chih ruangah innka on an fialmi hna minung nih, voikhat tawh on man ah, tangka tam taktak a hlei in an cawitermi hna kong an piah. Inn pakhat kha tawh an i thlauter. Innka tawh phawngh thiammi company pakhat hnu pakhat an auh hna. An rak ra thluahmah.

Tawh onnak ah sau an rau lo. Asinain on piak man ah, $220-410 karlak an lak hna. Cawi taktak dingmi nak in a let 2-4 karlak an lak hna ti a si. A ngaingai tiahcun a dikmi company nih cun an caan, an thiamnak le emergency auh asimi vialte tuak tikah, $100 cung dih ding asi lo ti a si. Zeitluk in dah innka tawh tuahtu hna nih mipi an hlen hna timi kha video in a thli tein record an tuah i, mipi ralrin peknak kong an chim. An auhmi hna pawl cu, inn ngeitu min in auh hramhram an si caah, taza cuai khawh an si lo. Mipi fim chimhnak caah show an tuahmi asi.

USA cu a dingmi an um bantuk in a hrawkhrawl taktakmi zong an um ve. Minthut te in mah le hnatlaknak tein thil tuah asi caah, "ta-ya-win" in i dehnak le hlennak ram a si. Cucaah America ah hin thil theih le mi hman he ton a biapi taktak.

Inn Ngeimi Hna Caah Theihtlei

Inn na cawk tik ah na cawkmi inn kong na theihfian a hau. Culo ahcun company bomhnak i hngat peng ahcun midang hlenthawi ton khawh a si.

Columbus kan i thial hlan cu Apartment ah kan um caah, mei, gas, tii le innchung thilri aa rawk tik paoh ah apartment nih tuanvo a kan lak piak i, zeihmanh buai ding arak um lo. Buainak a chuah tik paoh ah, inn ngeitu nih riantuantu an rak thlah hna i an tuah zungzal.

Columbus inn kan cawk tikah a chung ah mah tein theih a rak herhmi a rak tam tuk. Voikhat cu kan tii khat phung aa dil i aa tap ko cang. Zeiti tuah awk ka thei lo. Cucaah atuahtu ka auh hna i suimilam minute 15 hmanh an rau lo. An seh a van i ken. A phonh dih i seh in a chung lei pipe cu a hei  hngerh. Inn cawk hlan i a rak lutmi samvu tawr le cheng in an van chuah. Cu ceu cun tii tha tein a lan.

A hnu ah a pit than lengmang. Tangka tampi dih in minung auh lengmang ding kha asi kho ti lo. Keimah nih le zeiti tuah ding ka thei fawn lo. "Ziahhme fawi tein samvu char khawhnak le lak khawhnak hi an tuah hnga lo?" tiah ka ruat lengmang. .

Ca ka rel lio pi ah "Drano" timi kong Joel Osteen nih tiami ca ka va rel ngelcel. Drano rian tuan ningcang kong a tialmi asi. Drano he aa lo mi zong tampi a um. Kan inn pawng dawr ah tawr le cheng in a um ko. Maw theih lo le hngalh lo fah hi tiah ka ruat. Adih ciami kum 3/4 chung ka lung aa tuaitammi kha atu cu a tliang viar cang.

Samvui thianhnak sii dang kan cawkmi cu, "Hair & Grease" (Drain opener) timi asi. Achung ca ka van rel i, "Na sam vialte minute tlawmte chung ah a kang viar lai" ti a si. Ka zumh setsai lo nin ka toih i, minute 15 ahcun kan pipe tii langhning cu a tha taktak. Tliang cikcek tein pipe cu a tawl dih.

Cupin cu, kan tii a luan khawh lo caan paoh ah, cu haang te cu kan toih i a tha tawn.

Hair and Grease hman ning cu hitin asi.

1. Tii aa tapnak kha ro tein chiahta a hau
2. Cun aa tapnak pipe chung ah drano haang tam nawn in toih a herh
3. Minute 15-20 kar na ngan lai.
4. Drano haang nih a phaknak paoh cu sam an man dih

Hair & Grease cu, poison le acid aa tel caah ralring tein tongh a hau. A rim zong a um lo. A hmuimi le nammi pakhat hmanh a um lo. A khut zong a  khu lo nain pipe chung i aa tapmi sam vialte a kangh dih. USA i inn an sak tik ah, hiti bantuk in samvu hmanh nih innchungkhar harnak tampi a pek khawh. A sining tein thil theih le hman thiam hi USA ah a biapi tuk. A fawi zong a fawi, lungre zong a thei lo; tangka zong tampi dih lo in mah tein zaang dam te le lungre thei lo tein um khawh asi ve.