Theologian: Ka Kawi nang zei rian dah na tuan?
Philosopher: Kei cu ruattuaktu ka si. University ah Philosophy ka chim ko hna hme cu!
Theologian: Zeikong dah na chimh hna?
Philosopher: Van le vawlei, thlapa le arfi kongkau hi zeitindah an umtuning asi timi kong a si.
Theologian: Asiahcun nan cawnmi vialte hi catlang pakhat in a lu ka fun khawh dih lai.
Philosopher: "Van fun tuah. Na fun khawh rulmal ah!
Theologian: "Twinkle twinkle litter star..how i wonder what you are" ti a si ko.
Philosopher: "Um...um.."
Philosopher arfi zoh thiam pa cu chim awk a thei ti lo. A cawnmi le sianginn i a chimhmi vialte cu, van i arfi thep depmap tein a ummi khi zeidah asi hnga? ti lawng in a dong ko cang. A Ph.D zong cu cuka cun a dong. A phi a chuak ti lo. Leh awk a thei ve ti lo i, hitin aa thawh ve.
Philosopher: "Nang zei rian dah na tuan?"
Theologian: "Bible sianginn ah professor rian ka tuan."
Philosopher: "Zei kongkau dah nan cawn le na chimh hna?"
Theologian: "Pathian le bible kong kan cawng ko hme cu!"
Philosopher: "Ee..hmuh khawh lo mi Pathian kong nan cawng ti!
Theologian: Asi. Hmuh khawhlomi Pathian kha bible ca chung in kan cawn ko hme cu!
Philosopher: "A tha. Nan bible ca vialte, Genesis in Biathlam tiang hi catlang pakhat in tling lakin ka chim khawh ve lai.
Cuti a van ti tikah theologian pa cu a lau ve. A mit akau nawn cang. Asinain amah nih khan Philosopher pa kha holh kho lo in a tuah ve cang caah, zeitiawk a tha ti lo. Amit a curdu nawn. Hitin bia a van peh:-
Theologian: "Asiahcun van chim ve tuah? Hi zatzat Bible ca rulmal catlang pakhat in chim khawh ding cu? Van chim ne ca"
Philosopher: "Mi nih ka cungah tuah hna seh ti na duh bantuk in midang cungah va tuah ve" ti asi ko.
Pathian kong cawngmi le bible thei ngangmi pa zong cu, Genesis in Biathlam tiang hi zatzat bible ca vialte hi, catlangkhat te ah pei a tlin tak ko hi ti a van i fiang ve. Tampi cawn le theih le tuah zong a rak hau lo. "Mi nih ka cungah tuah hna seh ti na duh bantuk in midang cung ah va tuah ve" ti pei asi tak ko hi?
Cucu Krihfami hna zumhnak muru a si. Asinain cucu vawleicung ah tuah a har cemmi a rak si fawn. Asinain Jesuh zummi hna le Krih biatak tein kan i tlaih hnu ahcun tuah ve a herh. Ni fatin kan nunnak ah, kan zul kho dih lai lo nain, Jesuh cawnpiaknak hi ruah i a taktak nifatin nunnak ah kan hman a herh. Kan cawn a herh. Cu lawng ahcun Jesuh zultu kan sinak, kan alnak le ceunak a lang kho lai.
Bishop Heather Cook mitsurhang a pek lio
Nizan Dec 29, 2014 ah online newspaper pakhat ka rel. Maryland i Episcopal church Bishop nu pakhat nih cycle aa citmi pa motor in a pah sual i, a zam tak. Cucu Motor upadi ah "hin-and-run" (pah-le-zamtak) timi phung buar ah a tla. Midingmi le upadi zulmi nih hitin tuah phung asi lo. Pah sualmi kha dir piak, tha tein zohkhenh le a thih sual asi le a sining tein thil phisin ding asi. Tuar awk a ummi tuar ding asi.
Ahnu ah cu bishop nu cu Heather Cook asi tiah an ti. Zumtu Krihfa abik in hruaitu asimi hna nih, mi hmuhlonak zawnte zong ah hi bantuk thil tuah sual tikah, "hit-and-run" timi phung buar ding asi lo.
Cu bishop nu cu a zam. Aa ruat than i, ka kir ah a tha lai tiah ati i a kir than. Krihfa hruaitu hna caah cucu a biapi taktak. Krihfa zumtu aa timi vialte zong nih, Samaria Mitha tuanbia philh lo a hau. Midang nih an khawnmi hna zong zohkhenh a herh i, mah nih khawnmi chinchin cu kaltak ding asi hrimhrim lo.
Bishop Heather Cook zong minung asi i mi pah kho le thatnawng kho asi ve ko. Mipa a pah lio kha, mi nih an hmuh lo zong ah, kir than hlah sehlaw, a nun chung a khing a rit lai. Bishop asinak zong sullam a ngei ti lai lo. Aa phuhrung lai. Alungre a thei lai. A sualnak a thlah kho ti lai lo. Cu thil nih cun a thlarau zong hell ah a kalter khawh. A nunchung ah lungrawk taktak zong in um khawh asi.
Cucaah mi hmuh lonak te thial sual kan tuah sualmi a um zong ah, mi nih ka cungah tuah hna seh ti kan duh bantuk in va tuah ve a herh.
Bishop nu nih cycle citmi a pah i a thihnak hmun
USA ah motor 3 accident in ka sung cang. Pakhatnak cu $3400 man Mazada asi. Kan naupa nih a mawngh lio ah midang nih an rak pah sual. A pahtu pa cu a zaam i midang motor nih an dawi, palik an auh i an va tlaih. A dang pakhat cu Dodge Van asi i, kanmah lei driver palh asi caah $8500 in kan cawkmi asi i ka sung. A dang pakhat cu Dodge Van asi i $4000 fai in kan cawkmi asi. Lamkam ah kan nu nih a park i an taih i aa rawk dih. A pahtu a zaam i aho asi kan thei lo. Mawngh awk a that ti lo caah $250 ah ka zuar.
Hika zawn ah thil ruah ding a um. Mi motor kan pah tik zongah, cozah phung bantuk tein dir piak i report tuah ding asi. Asiloah kan address, min, phone number tal chiahta ding asi. A zam in zam hi thil ding lo le upadi buar a si. Kan motor a zam takmi pa kha, nihin ni tiang a sualnak a thiang kho ti lo. Aa phuhrung peng lai. A khing a rit peng lai. A chimlomi sualpalhnak nih a uk peng cang.
Hi bantuk kan si lo nak ding caah, thil ding tuah a tha.
Voikhat cu motor ka mawngh ka te a si. Youth Pastor ka tuannak Normandy United Methodist Church, Dayton, Ohio ah, dinner ropui taktak kan ngei. American ka nu kan sawm. Kan nu he ti in kan kal. Vur a tla. Lam a nal. Ka hnu ah motor aa parkmi le ka motor aa naih tuk. A hmailei le aa naih tuk fawn. Ka chuak kho ti lo. Hnulei ah fak deuh ka van ton sual i, midang motor din tein a engine cungah ka va hnur. Mi pakhat hmanh an um lo. A ka hmumi zong an um lo.Ka hnurmi zong cu a hme tuk i, hmuh khawh hmanh asi setsai lo. Kal diam ahcun ahohmanh nih theih ding khi asi lo.
Asinain ka sia a rem lo. Innchungah ka va lut i, aho motor dek din tein ka hnur sual le tiah ka va hlat. Jim timi pa Krihfa upata a rak si. Zaangfah ka va nawl. Company ta ka hlan ve mi asi a ti. Va piah ko law a dihmi zat ka liam lai tiah ka ti i, $450 a dih an ti i, cucu ka rak liam. Mi motor taih sualmi te cu chimphuang lo tein um peng ning law, nihin ni tiang ka khing a rit lai. Ka palhnak kha ka phuan tik le ngaihthiam ka hal tik hna le cawi ding ka cawi tikah ka luat. Mi luat ka si.
Voikhat zong, kan motor ah ihkhun kan khing. A rit tuk. Ruah lo pi ah aa mer sual i, kan motor pawng ummi motor thar ngaimi Camry a sir lei ah din tein keu lak ka va hnur. Hmete in ka khawnmi asi caah, ngiat setmat dah ti lo ahcun hmuh khawh ding asi lo. Cun a hohmanh zong nih an kan hmuh lo caah kal ahcun theih ding khi asi fawn lo.
Sihmanhsehlaw a keumi te cu, hmuh ahcun a ngeitu caah lung nuamh lonak a chuak kho. Ka motor si ve sehlaw ti khin ruah a herh. Motor a tam tuk caah aho ta dah asi ti theih khawh asi ti lo. Palik va auh le a phu fawn lo. Cucaah ka min, address, phone number ka tial i, motor a hmailei ah benh ding in ka timh cuahmah lio ah, a ngeitu Mirangnu te a rak phan.
"Zeidah na tuah len ko?" tiah a ka hal. "Atu hi inn kan i thial le thil kan khing. Ruahlo pi in kan ihkhun kan thlak sual le hi motor a kam te hi keu lak in kan suk sual. Aho motor dah asi ti kan theih lo caah, a herhmi ca ka tial i hi motor ah ka benh lai ka ti lio asi ka ti."
A van zoh i, "Hihi keimah motor asi. Remh ahcun zeimaw zat a dih ko hnga. Asinain a pawi tukmi asi lo. Na din (honest) caah kai lawm. Zeihmanh pek a hau lo. Lung dam tein va kal ko u" a ka ti i kan kal. Ka lungthin hir a zaang. Ka zaa a lawng. Ka thinlung a dai. Kha ka khawn sualmi te kha, mi nih an ka hmu pat lo ti in va kaltak ko ning law, nihin ni tiang ka thinlung adai lai lo. Ka khing a rit lai. Ka ruah caah paoh ah ka phuhrung lai.
Mi nih ka motor an ka khawn piak i zeihmanh chim lo tein an zammi nih kan chungkhar ah sunghnak a chuahter. Thin hunnak le lung nuamh lo nak a chuahpi. Mi thil pakhatkhat kan hrawh piak sual tik hna zong ah, tha tein chimh, ngaihthiam hal le nawlpat kha a biapi.
Mi nih ka motor an ka suk piak tik i ka cungah tuah hna seh ti ka duhmi lungput bantuk khin, midang motor va suk tik zongah va tuah ve a hau timi kha, ka tonmi chung in fiannak tampi ka ngei.
Cucu Jesuh cawnpiakmi "vawleicung nawlbia nganbik cu a si"
. "Mi nih ka cungah tuah hna seh ti na duh bantuk in midang cung zongah va tuah ve" (Matt. 7:12)
No comments:
Post a Comment