R-40 hi chanthar Highway lianlian an um hlan ah, USA nichuahlei le nitlaklei hlatnak caah an rak hman bikmi highway pakhat a rak si. Tuanbia a ngei ngai. Columbus le Springfield karlak lam cu a phei. Hmun tampi ahcun lam hi catlang rinmi bantuk in a ding i a phei. Lam hlatpi khi hei hmuh khawh asi. Ke kalmi caahcun lamhlat tuk hei hmuh chung khawh asi i, ngaihlah awk a um ngaingai mi lam asi. A lam pawng hrawng hi, lo le zuatkhalhnak hmun asi caah, lam nuam ngaingai a si.
Columbus in kai thawh i, London khua chaklei ka hei phan deng. Culio ahcun lam hlat pi in, minung pakhat thil rit ngai aa phurh i, motor a kham cuahmahmi khi ka hei hmuh. Ka hmai ah motor cu 4-5 tluk zong hnu hmai in an kal ciahmah hna ve hna. Mipa zawn cu an phan i, motor pakhat hmanh an dir lo. An lanhtak dih. Zei can dah motor a rak kham cang ti ka thei lo.
A pawngte ka van phan. Alung a dong cang rua. Ka motor cu a ka kham ti lo. Hnu lei chit in, lam kam te ah, hiangthunh he a kal khi ka hmuh. Motor cu suimilam pakhat ah meng 55 tluk in kan kal lio asi. A ka phar lo tikah, a herh ti rua lo ti khin ka ruah. Asinain a pawngte ka phak ah, a ke a bai i, thilri ner ngai in aa phurh khi ka mitsir in ka zoh pah in ka hei hmuh.
Ka motor mawngh a ran caah ka laklawh. Ka dir kho zawk lo. Pe 100 hrawng ka lonh ah, dir piak ko ning tiah ka lung ah duak tiah a chuak i, ka dir. Motor emergency mei ka ceuter i, "Ra law" tiah ka kut in ka hei auh.
America ah, hi bantuk in theih lo mi lampi a kalmi nan char hna lai lo tiah Laimi dang nih an rak ka cawnpiak bal. Mifir le mi hrockhrol zong an si kho. Hriamnam ngei zong an si kho. An in tlaih hna lai i an in zampi hna lai tiah an ka chimh bal. Cun American Mirang hi tazacuai an hmang tuk. Motor nan phurh cia cung hna ah, nan i khawn sual ahcun taza an in cuai hna lai tiah an rak ka ti bal. Cucaah ka thin a phan pah bu tein, amah cu ka hei auh.
Amah zong cu a van tli pah i, ake bai nawn in a thilrit he a rak ra. Ka sin a phak tikah, pa sang ngaingai le pumrua tha ngai Mirang pa asi kha ka hmuh. Kum 40 kuakap a si. Ka van chonh i, American Mirang asi ti lo. England Mirang (British) taktak te a rak si.
Baltimore in Columbus tiang an meng (403.8 miles) asi (Ref. www.google.com)
A thilri cu motor hnulei ah kan khin. A rit ngai. Cun ahmai ah ka thutter i, kal pah cun biaruah kan thawk. "Khawi ka in dah na rat i, khawidah kal na timh?" tiah ka hal.
"Nihin ni Newark in zingka tein kan i thawh. Minung 30 tluk kan si. Springfield khua i Holiday Inn ah kan riak lai. Ka hawi le cu an phan dih cang. Kei hi ka cai tuk i, ka kal kho ti lo. Cucaah an ka kaltak dih. Motor ka phar lengmang i ahohmanh an dir lo" tiah a ti. Newark khua cu, Columbus nichuah chaklei ummi khuapi pakhat asi.
"Ziah nan ke cun nan kal? Zeidah nan i tinhmi asi?" tiah ka hal. A ka lehmi bia nih ka lung a ka lawmhter lawng siloin ka khuaruah a ka harter.
Achimmi cu:-
"Atu kan mah phu hi minung 30 hrawng kan si. Phu dang a ke in a kalmi an um ve rih. Kei hi NATO ralkap pakhat ka si. Atu hi khonh ka lak lio asi. London (UK) in ka ra. Afghanistan ram ah ral zong ka tu ve. Lamkal (walking) kan tuahnak sullam cu NATO ralkap fale hi college kaimi tampi an um. Nu le pa lahkhah lawng nih an sianginn kainak a zaat lo caah fund raising kan tuah piak hna. Atu lam kan kalmi hi ramkip ah online in thawng kan thanh i, tangka kan kawl. Radio le zeidang tadinca in fund kan kawl. Kan i timhmi cu Baltimore (MD) in Louisville (KY) tiang hi kan ke in thla (1) chung kal ding ti asi i, atu hi thlacheu renglo kan rau i, hika kan phan cang. A dang phu khat zong an kal ve cuahmah i, Louisville, Kentucky ah kan i tong lai" tiah a ti.
Baltimore in Louisville (KY) cu a din cemnak in meng 610 a hla. Columbus lei in an kal tikah aa hel deuh. Cucaah an kalning ka tuak piak hna tikah meng 627.8 tluk (403.8+71.7+152.3=627.8) asi. Zeicatiah an zulhmi lam hi Baltimore-Washington DC-Newark-Columbus-Dayton-Cincinnati-Louisville asi caah asi. Hi vialte meng hi, midang nunnak caah an ke bak in kal an i timh cu, khuaruahhar ngai asi. Upat thangthat awk tlak taktak an si.
Columbus in Dayton hi meng 71.7 a hla (Ref.google.com)
Ka aw a pei caah "Nang khawika ram mi dah na si?" ti in keimah thawngpang le ka riantuanmi pastor rian ka tuannak kong zong cu ka hei chimh pah ve. Hotel kan phan i, a thil ka thumh piak.
"Ka char hlah law, riahnak hmun ka phan kho ti hnga lo. Na ka phurh le kai lawm tuk" tiah a ti.
Dayton-Louisville karlak lam 152.3 miles (Ref. google.com)
Nihin ni ah ka ruat than. Kum 5 chung ah a lut cang nain, kha NATO ralkap pa kha ka philh kho lo. "A va dam ve ti hnga maw? Khawidah a um ve cang hnga? Raltuk nak hna ah athi ve sual hnga maw? Midang fale ca i, kha tluk aa pumpe mi kha? London in USA tiang rat i ke in meng 610 renglo kal cu" ti khi ka ruat theu tawn.
Anih zong nih, USA in lamkalnak an tuahmi kong a chim fate, motor in ka charnak kong kha a chim ve tawn theu lai. Kan mui cu kan i hmu bal ti lai lo. Asinain thih tiang kan i philh bal veve ti lai lo. Kan i tonmi kong ka ruat i, Globalization biatak te in ka fiang.
Zeicatiah Europe ram London khua in a rami NATO ralkap pa le Asia ram Kawlram i a rami pa, North America USA ram ah, min a thangmi lam pakhat (Rd 40) cungah kan i tong. Kan i citmi motor cu Japan siammi Toyota Rav4 asi. Cu motor thilri tampi cu, a cheu USA in an chuah; a cheu China in a chuak; a cheu Japan in a rami an si. Cu thil nih "Globalization" sining kha a langhter. Cucaah kan i tonmi zong cu, phundang ngaite asi.
Ka kirlei cu zinglei 1:00 Am asi cang. "Zeitindah kan i ton khawh?" tiah ka ruat. Aphi ka chuah khawhmi a um lo.
Asinain, midang caah harnak tampi ing in rian a tuannak kha, Pathian nih a philh lo. Cucaah harnak a ton lio le bawmh a herh liote ah, keimah zong R.40 lam ka va hrawng ve ngelcel. Cucu Pathian nih a ka fial tiah ka ruah. Voi tampi cu Highway in ka kal tawn i, cu ni ngelcel cu ka zei lungdek a tho hnga? Cu lam ngelcel cu ka va zul ve.
Minung thluak in tuak ahcun "Aa tong sual; ralkap pa vanthatnak ah ti asi men hnga." Asinain Pathian mit hmuh ahcun "accident" asi lo. Aa tong sual asi lo. Pathian nih amah bawmtu ding ah kha lam thengmang ah, kha caan thengmang ah a ka thlah ko timi ruat. Zeicatiah Pathian cu tinhmi (purpose) a ngei. Kha kan i tonmi kha accident asi lo i, Pathian tinhmi tu asi. Thil fate in minung pakhat lawmhnak fate ka tuah khawhmi nih, nihin ni tiang a ka lawmhter!!!
-------------------------------------------------------
Chinchiah
1. Map hi www.google.com/map in lakmi an si.
No comments:
Post a Comment