Hrial Ding & Ralrin Ding

Minung kan nunnak ah, "Hrial dingmi le ralrin dingmi" tampi an um. Hrial ding na hrial khawh le hi ralrin dingmi na ralrin khawh ahcun, na nunnak thil tampi ruah zia le tuar zia na thiam lai i, "fim" zong na co lai i, midang nih thangthatnak na hmuh lai. Na lam a tluang lai i, vawlei ah nun chan na ngei lai.

1. Mi nih an i thangthat tikah va hlawk tuk lem hlah. Vorvok bang zunput tlak sual a fawite.

2. Mi nih an in nanh tik le na thang an i chiat tik zongah, va cawn tuk lem hlah. "Pit-taing-taung" bantuk in na tlaknak hmun paoh ah a dir khomi si va zuam.

3. An i fak ah siseh, an in namh ah siseh, va thleng lengmang hlah. Zeicatiah an in thangthatnak le namhnak nih, na si ning an thlen ahcun, "na chungah biatak a um lo" tinak asi. Zeibantuk in an i ti zongah, "Nangmah-cu-nangmah va si ko."

4. Toidornak biachim cu a tha. Asinain mi an sia a rem lo tiang in toidornak bia na chimnak hnga lo va ralring. Zeicatiah midang nih "ziar" ah an ruah sual lai.

5. Mi nih an in fak tikah, sang tuk ah va hlorh hlah. An i thangchiatnak tikah na tlaknak a sang tuk sual lai.

6. Mi nih an in doh tikah rawhnak ah na hman ahcun "na der taktak" tinak asi. Thatnak le thazaang ah na hman ahcun, na caah "caantha" (opportunity) tu an si lai.

7. Mi nih ruahnak an in cheuhmi paoh cu va ngai ko. Lak ding le lak lo ding bel, nangmah tein bia va khiak. Na caah a tha bik kha la law, a tha lo mi cu, va ngai duh lem hlah.

8. Midang lungton zuam cu thil tha asi ti kha va thei. Asinain cu thiltha tuah cu va tim tuk hlah. Zeicatiah nangmah le nangmah hmanh na lung na ton lo lio caan ah, midang lungtong in ka nung lai timi cu, na caah thilrit ngai asi kho men.

9. Mi chimmi paoh va zum hlah. Na zumh i na phurh khawh lo sual ahcun, pial nenh in an nenh lai.

10. Chim lo dingmi bia tiah na ruahmi cu, na nupi le na va zong va chim hna hlah. Nangmah le nangmah zong va chim tuk lem hlah.

11. Na ka in a chuakmi bia paoh va chim hlah. A chuah hnu ahcun na zuk kho than ti lai lo.

12. Hlen va hmang hlah. Zeicatiah na hlenmi hna nih an theih ahcun zeitikhmanh ah an in zum ti lai lo. Nangmah le nangmah zong a donghnak ahcun na hleng fawn lai.

13. Biatak chim hi thiltha taktak asi. Cucu va nunpi. Asinain hihi philh hlah. "Biatak paoh hi chim le phuan ding an si lem lo" ti va thei.

14. Midang kong ah va sawhkhih in va buai tuk hlah. Cucu thiltha lo asi. Nangmah le nangmah kong tu ah khan va buai deuh.

15. Tinhmi ngei lo in zeihmanh va tuah hlah. Zeicatiah cucu saram nih an tuahmi ziaza asi caah asi.

16. Tih ding va tih, ngamh ding va ngamh. Cucu fim le ralthat an si.

17. Na tha va thu hlah. Thathutnak nih sal ah an tlaih ahcun, na luat kho ti lai lo.

18. Tangka va duh tuk hlah. Zeicatiah tangka duh tuk cu sualnak vialte an i thawknak thlaici asi.

19. Ihzau hi va duh tuk hlah. Zeicatiah "Zaam Daal dirhmun na phan sual lai."

20. Zudin, sa-ei, ritnak sii tongh hmang hlah. Cu hna cu na thisen ah sualnak thlaici an si.

21. Aungbali thut va hmang hlah. Zeicatiah khika in na hmuhmi tangka paoh cu, midang mitthli in a ra mi an si ti va thei.

22. Nu le pa sualnak tuah va hmang hlah. Zeicatiah ngaihchihnak nih an zulh colh lai i, na nuamhnak vialte cu, ngaichihnak in an dong lai.

23. Mithi topi va daithlang hlah. Zeicatiah cucu nan innchungkhar ah a ra hrimhrim dingmi asi ve.

24. Va khiarcar tuk hlah. Cucu sifah vialte lakah, sifah bik asi timi va thei.

25. Na rum tikah va porhlaw hlah. Zeicatiah vawleicung ah mirum sifak ah aa cangmi tampi an um timi va philh hlah.

26. Na dawh tikah va uangthlar hlah. Zeicatiah dawhnak hi an ziam zau tawn ti va philh hlah.

27. Na dawh ruangah va zumhnai hlah. Ngengpi zong aa dawhnak a ki nih a nunnak asunghter tawn ti va philh hlah.

28.Na dawh tikah va ralring chinchin. Zeicatiah aa dawhmi pangpar cu tawhtuan an tong ti va philh hlah.

29. Na innpa he rem tein um va zuam. Zeicatiah innpa he remlo cu, kedanh tet danh bantuk asi.

30. Midang he dawt a tha. Va dawt tuk lehpek zong a tha. Asinain hihi va philh hlah. Nan i dawt peng khawh lo ahcun, nan i huatnak asi sual lai.

31. Mi na bawmh hna tikah, nangmah amiak hmuhnak ding ca kha, biapi ah va chia hlah. Zeicatiah cucu "athaingmi bawmhnak" asi lo.

32. Mi na thenh-pek tikah a kir than lai timi ruahchannak he va pechan hna hlah. Zeicatiah cucu nangmah le nangmah na pek-thenh pei asi ko cu!

33. Mi bia in nun va tim hlah. Cucu thabatnak men asi.

34. Na kaa nih a duh napat ti in, rawl ei va hmang hlah. Na paw nih a duh ti maw, duh ti lo timi va ruah piak ve tuah!

35. Zeitikhmanh ah, lamkhat lawng in kal va tim hlah. Zeicatiah kalnak lam dang tampi aum timi va philh hlah.

36. Harnak na ton tikah na lung va dong hlah. Cucu na lonh khawh tikah, lunglawmhnak nih a ka hngah ko timi va philh hlah.

37. Thatnak tuah a duhlomi he va kom hlah. An zia an in chonh ahcun na kir kho ti lai lo.

38. Sualnak tuahnaklei ah a khul a rang tukmi kha va zul hna hlah. Zeicatiah zeitindah kan dongh lai timi a tuaklomi hna pawl lamthluan ah a kalmi lam an zulh caah asi.

39. Zan na ih lai ah lungthin dai tein ih va zuam. Zeicatiah thaizing ah thawh ti lo khawh asi.

40. Vawleicung na rumnak, na thawnnak, na fimnak le lianhngannak bochan in tuang va khawng hlah. Zeicatiah cu vialte cu, thlankhur ah na luhpi dingmi pakhat hmanh an um lo.

41. Vawlei ah ruannak pakhatte lawng a um timi va philh hlah. Cucu thlankhur asi ti va hngal.

42. Na fim ko nain na fimnak nih thiltha a chuah pi lo ahcun, cu fimnak cu hruh asi ti va philh hlah.

43. Mi lehrul cham va hmang hlah. Zeicatiah lehrulchamnak cu a dong kho tilomi ral (war) asi.

44. Nun that cu a tha. Asinain na that ruangah na lu cungah midang buu va tuahter hna hlah. Zeicatiah ek an in ek hnawh lai.

45. Mi nih an in thih-phaih ruangah, na ral a chiat i, na thin a phan ahcun, "dirhmun ngei lo mi" na si tinak asi. Nangmah tein va tuak law tih ding va tih, ngamh ding va ngamh ko.

46.  Mi nih voikhat an in hlen ahcun an mah sual asi. Voi hnih an in hlen ahcun nangmah sual asi.

47. Lih hi va vahpi hlah. Zeicatiah adonghnak ah nangmah nih na zumh lai i, cu lih nih an hloh lai.

48. Chiatnak kha thatnak in luphih le donghter va zuam. Zeicatiah, chiatnak kha chiatnak in na donghter ahcun, tuanbia chia vawlei na tialta kha asi.

49. Ahnulei liamcia thil cu remh khawh an si ti lo timi tha tein va chinchiah. Hmailei ca lawng ah saya tha an si timi va philh hlah. Liamcia thil kha saya tha i na hman lo ahcun, "Nang cu saya na ngei ti lo" timi va hngal.

50. Chiatnak lei ah, na sining le thil aa thlen tikah na lung va rawk hlah. Zeicatiah zei thil hmanh hi an hmun lo timi va thei. Thil aa thlen ning hawih in thlen tu va zuam. Cucu na caah thil tha bik a si.

51. Na nunnak ah lungsi-hnangam tein nun khawh va zuam. Zeicatiah cucu a nuam cemmi nunnak asi. Sui le ngun zong nih a cawk khawhlomi nunnak a si.

52. Na zanmang khi, lam hruaitu ah va ser hlah. Zeicatiah zanmang cu, chun ah an lo tawn ti va philh hlah.

53.  Lungchung saduhthahnak ngeih cu a tha ko. A man liam haumi asi lo caah. Asinain na satuhthahmi tlamtlinnak ding cu, "a man a fak tuk" timi va philh hlah.

54. Vawleicung pumpi huap in saduh va that ko. Asinain na umnak khuate ah riantuan va tim.

55. Na thutnak sia a rem ko ahcun va thial duh lem hlah. Thutnak tin lo sual a fawite.

56. Mi toi i dor cu a tha tuk. Asinain toidor tuk lehpek in a hleihluan tiang biachim khi, "uanthlar pakhat asi" timi va philh hlah.

57. Uanthlar hi phun (3) a um ti va ruat. Uanthlar pakhat cu, "Sining nak sangpi in i chim" asi i, cucu "Cunglei uanthlar" ti asi. Adang uanthlar pakhat cu, "Sining nakleng niam tuk in i chim khi asi." Uanthlar phun thumnak cu "Asining tein chim asinain, atu le tu chim lengmang khi" asi.

58. Citi cu a al kha a rian asi. Mei cu a ceu le kangh kha a rian asi. Minung i kan rian cu, Sertu duh ning nun kha asi.

59. Minung nunnak caah riantuan a herh. Asinain rian kha na hruhpi ahcun, cucu hruhnak pakhat na ngeih asi timi va philh hlah.

60. Midang he a thianglomi zuamnak ah va tel ve hlah. Teitu na si tikah na lawm lo sual lai.

61. Na tuanbia kha zeitikhmanh ah va philh hlah. Cucu nangmah le nangmah na philh asi cang.

62. Midang ngaihtiam cu a biapi tuk. Asinain nangmah le nangmah ngaihthiam kha a biapi deuh ti va philh hlah.

63. Nangmah le nangmah kha, ngaihthiam hmasat va philh hlah. Zeicatiah nangmah le nangmah hmanh na ngaihthiam khawh hlan ah, zeitindah midang cu na ngaihthiam khawh hna lai?

63. Mi thil na fir lai ah hihi va ruat. Midang nih an thlantii le an nunnak dih in an kawlmi asi timi va philh hlah.

64. Na va pa inn i a ngam lo ahcun hihi va ruat. "Nupi le nih zei dah palhnak kan tuah?" timi va ruat.

65. Na nupi inn tin a huam lo ahcun, hihi va ruat. "Va le nih palhnak zeidah kan tuah?" timi va ruat.

66. Fanu fapa hna, inn i an ngam lo tikah, "Nu le pa, zeidah kan palhnak aum?" timi ruah a herh.

67. Hmurka thlum tukmi thinlung ah, hling aum kho ve ko timi va philh hlah.

68. Na din dingmi le ei dingmi "tii/rawl" khi, na eidin hlan in tha tein va zoh ta hmasat. Na paw chung i a luh hnu ahcun luak a har cang ti va philh hlah.

69. Na rum lio le na thawn lio i hawikawm kha hawikawm tha an si lo kho men. Na sifah lio le har lio caan i hawikawm tha kha, hawikawm tha taktak an si timi va philh hlah.

70. Vawleicung thil vialte kha theih le hngalh khawh dih va zuam hlah. Cucu minung caah asi kho lomi an si timi kha va thei law, na lungthin a dai ko lai.

71. Khuang an tum tikah va lam lengmang hlah. Tahnak hla an sak tik zongah va tap lengmang hlah. Lam caan aum, tah caan aum timi va thei zungzal.

72. Na lung aa lawmh tik ah va lawm ngai ko. Zeicatiah cucu a dong khomi asi timi va philh hlah.

73. Na ngaih a chiat tik le na lung aa lawmh tik ah hihi va philh hlah. Lunglawmhnak le ngaihchiatnak hi, tlik aa zuammi bantuk an si.

74. A siangngakchia na si chung paoh cu, na saya cungah zeitikhmanh ah kai va tim hlah. Cucu hruh vialte lakah hruh nganbik pakhat asi.

75. Na nu le pa cu, zeibantuk an si zongah va tihzah hna law, va upat zungzal hna. Zeicatiah an mah cun, nangmah na thawknak an si caah asi. An mah lo in ka um kho lo timi kha va philh hlah.

76. Na unau he dawt kha va tlolh hlah. Zeicatiah na thlankhur kam ahcun anmah lawng an tang te lai timi va ruat zungzal.

77. Zan hi a mui zungzal lai ti in va ruat hlah. Niceu a chuak than lai timi va ruat. Zan i na tuahmi vialte kha niceu ah fianter an si lai timi i ruahchan.

78. Mi vialte nih mah le mah cu, a tha bik in i ruah cio asi. Hihi va philh hlah. Nangmah le nangmah aa tha bik in na ruah bantuk in, midang nih an ka ruat lem lo tiah va ruat.

79. Sualpalhnak cu uanthlar ding asi lo. Asinain sualnak na tuah tikah, va phuhrung peng hlah. Zeicatiah na sualnak kong ruah dingah, "mi khi an i manh tuk lem lo" timi va philh hlah.

80. Vawlei ah chukcho a um ti va philh hlah. Chuk na zuan tikah, cho a um timi va ruat.

81. Thil tha thlaici na tuh hmanh ah, thil tha a chuak bak lai timi aamah khan khawh asi lo. "Thil chia thlaici na tuh ahcun thil tha a chuak bak lai lo" timi belte aamah khan khawh asi.

82. Thil tha tuah cu na zuam khawh chung in va zuam. Na tuah cawk le tuah cawk lo tiang in. Asinain thil tha na tuah tik hmanh ah hihi va philh hlah. Thil tha na tuahmi ruang hmanh ah, thangchiatnak cun na luat hlei lai lo.

83. Na nunnak caah hman dingmi thil (2) Pathian nih an pek. Na thluak le lung an si. Na nunnak kha na tluak nih hruai sehlaw, midang he pehtlaihnak caah na thinlung va hmang.

84. Mi thleidannak thinlung va ngei hlah. Cucu Bawipa huatmi thil asi.

85.  Mi kha duh paoh in va ti hna hlah. Midang nih an in ti tik ve sual lai.

86. Hruh cu a nuam an ti. Zeibantuk thil na ton hmanh ah, "aa nuam pengmi" na si ahcun, cucu mihrut cazin chungah tel tluk asi cang.

87. Hmailei kong thil tamtuk hngalh chung khi va duh lem hlah. Zeicatiah nuamhlonak tu tam deuh na chap lai.

88. Zertian in khuaruah le nun va hmang hlah. Zeicatiah cucu nangmah hrawktu an si sual lai.

89. Na nunchung ah tangka nih cawk khawhlomi thil sunglawi taktak ngeih va zuam. Cucu "nun-thatnak" asi.

90. Zeithil hmanh hi "akal lei kir lei" an um ti va philh hlah. "Awka nem in mi na chonh ahcun, awka nem in an in leh lai i, awka hrang na hman ahcun awka hrang in an in leh ve lai."

91. Midang tlaknak caah rap va chiah hlah. Nangmah le nangmah tu na awh sual lai.

92. Na sualnak kha midang va puh hna hlah. Ahohmanh nih midang sualnak thilrit phurh an huam lo.

93. Thil tha tein hlat hlan le theih hlan ah, lunghrin va hmang hlah. Cucu na caah sualnak thlaici pakkhat asi. A keuh sual ahcun, theipar chia a chuak sual lai.

94. "Thil theih pah hruphrap hi tih a nung" ti va philh hlah. Theih le theih lawlaw, theih lo le theih lo lawlaw a tha deuh tawn.

95.   Mifim mi nih an hngalhmi thil pakhat te lawng a um timi va ruat law na fim deuh lai. Cucu "Zeihmanh kan thei rih lo timi asi."

96. Mirum he hawikawmh khi va duh tuk lem hlah. Zeicatiah mi hnuzul ah na chuah sual lai.

97. Thil tampi na thiam zongah, na pawcawmnak caah cun pakhat te lawng va tlaih. Zeicatiah tam tuk na tlaih ahcun fek tein pakhat hmanh na tlaih kho lai lo i, na lam a tluang lai lo.

98. Na nunchung ah tih ding pakhat te lawng a um. Cucu "Na thih ni ah tuanbia chia tial ta" khi asi.

99. Miphun dang sining va uar hlah. Zeicatiah miphun dang nih "Kan miphun na si" an in ti bal lai lo.

100. Nangmah le nangmah va upat tuah. Cuti asiloahcun "Aho nih dah an in upat khawh lai?"

101. Lih in tangka hmuh va tim hlah. Zeicatiah cu tangka nih, na nunchung lih-sal ah an tlaih khawh.

102. Na kut cung ummi pithlung vate khi, van ah a zuangmi varang nakin a sunglawi ti va philh hlah.

103. Nupi na thit hlan ah hihi va ruat. Nupi thit cu thilri cawk le tlanglo thlawh asi lo ti va philh hlah.

104. Thlapa kai khawhnak thazaang hmanh na hei ngei ko hnga. Asinain, "Zeitindah thlapa kai ding asi lai?" timi na ruah lo ahcun na kai bal lai lo.

105. "Pathian nih a tuah khawhlomi thil a um lo" ti va zum. Asinain "Pathian nih na caah, a tuah duhlomi le tuah aa timhlomi thil tam tuk aum" ti va philh hlah.

106. Chawleh khi na pahrang asilo ahcun va let duh hlah. Leiba ngeihnak tu asi lai.

107. Pathian nih tinhmi ngei tein an ser. Pathian tinh piakmi le an ser channak khi va ruat. Na theih khawh ahcun, nun nuam bik mi pakhat na si kho.

108. Hruaitu na si tikah hihi va ruat. Ahohmanh 100% lungtling in ka hruai kho hna lo timi va fiang.

109. Mi sin ah dawt hlawh tein nun va zuam. An in dawt lo tikah "ka sung tuk" tiah va ruat lem hlah.

110. Minung i a rian ngan bik cu, "Minung si hi a si ko." ti va philh hlah. Cu minung sinak cu, "Minung khuaruah in khua ruah le minung nun in nun khi asi ko."

111. Bia na chim lai ah, na pawng ummi hodah an si timi kha, va ruat ta hmasat hna. Mi an i phuhrun dingmi bia na chim sualnak hnga lo va ralring.

112. Bia hi tam tuk in va chim lem hlah. Na chim bantuk in na zulh le nunpi khawhlo ahcun, mi nihsawhnak na tuar lai.

113. "Hi rawl cu ka ei kho lo, ka duh lo" timi tam tuk in va chim hlah. Ei awk a um lo tik ahcun, lungmawt hmanh ei asi theu tawn.

114. Mi thil na thenh tik hna ah, na duh lo fe rumro thenh va hmang hlah.

115. Mi sa na hleh tik zongah ei awk a tha lo mi va hleh hna hlah. Na sahlehmi nih lawmhnak nakin thinhunnak tu a chuahpi deuh sual lai.

116. Mi thilhal va pang tuk hlah. Zeicatiah hal a hmang tukmi cu mi nih an huat tawn hna.

117. Lunglawmh na duh ahcun nun va siang; aa lawmlomi si na duh ahcun na si va khiar.

118. Thahnem va ruat tuk hlah. Zeicatiah sunghnak tu na tong chin kho.

119. Chiatnak fate khi zeirel lo in va um hlah. Zeicatiah meicil fate nih innpi a kangh khawh ti asi.

120. Lahkhah tlinglo in an in pek tik i, na zai huam ahcun, a hlei in an in pek tik zongah va zai than rih. Cucu adingmi thil asi.

121. Cancer zawtnak nak in a dam a har deuhmi cu, lungthin chiakha ngeih asi ti va philh hlah.

122. Sur khuh zia na thiam lo nain sur va chek duh hlah. Nangmah le nangmah na khuh sual lai.

123. Midang nih an tuahmi poah tuah ve va tim duh hlah. Zeicatiah minung hi pahrang kan ngeih cio caah asi.

124. Zan tlaipi ih le zingka tlaipi thawh hi, thathut lak ah thathut fakbik pakhat asi ti va philh hlah.

125. Hringtu nu le pa a sersatmi cu Sertu Pathian serhsat asi timi va philh hlah.

126. Hrin cia na chungchuak fa na dawt lo ahcun, Saram nunzia he ka hlat ti lo timi va ruat zungzal.

127. Minung duhnak tlinter zuam khi thlitu dawi bantuk asi. Zeicatiah, minung duhnak cu khuachia hmanh nih atlinter kho lo timi va thei.

128. Tar khi zeitik hmanh ah va nihsawh hna hlah. Nang zong na tar ve te lai ti va philh hlah.

129. Na no lio ah ningcang lo in khua va sa hlah. Zeicatiah khakha hram na thlak lio asi i, na theipar a vui tikah na lawm lai lo.

130. Nu zuangzam le pa zuangzam he va duh hlah. Zeicatiah ngaichihnak theipar na zun sual lai.

131. Awkhlawh khi va nihsawh hna hlah. An huam ruangah an tuahmi asi lo ti va thei.

132. A lar tukmi si zong va duh lem hlah. Khi zong khi rianhar le retheihnak pakhat asi ve ko.

133. Midang na huat hna hmanh ah, na unau cu va hua hna hlah. Unau cu huat ding ah hrinmi kan si lo timi va thei zungzal.

134. Zeithil na tuahnak hmanh ah, thlachiat va ruat zungzal. Cucu a sunglawi bikmi lungput asi.

135. Upatnak hmuh na duh ahcun midang upat va pe hmasat hna.

136. Ngaihchih zongah a thahnem tilom thil (2) a um: "zawt le no lio caan" hi an si.

137. Thil tha tuahnak ah, na lungsia herhmi te kha tuah va zuam. Zeicatiah hmailei ahcun tuahnak caan dang aum ti lo kho men.

138. Minung nunnak ah a biapi cemmi thil pakhat cu, ngaichih awk um lo tein nun hi a si.

139. Na nunchung ah a tha bik in nun va zuam. Zeicatiah voi khat lawng minung asi dingmi na si caah asi.

140. Thatnak tuahnak leiah na khulran a tha i, chiatnak tuahnak lei khulfum a tha ti va philh hlah.

141. Minung hi thilri bantuk in va ruat hlah. Zeicatiah Pathian kha thilri ah na ruah asi sual lai.

142. Nupi thit le va ngeih na tlolh ahcun thil tam tuk ka tlolh cang ti va philh hlah.

143. Thilri na cawk hlan ah hihi va ruat. Tangka cu zeitik paoh ah thilri ah an cang kho i, thilri cu zeitik paoh ah tangka ah aa chuah kho ti lo.

144. "Nuva thurual tluk lo thennak, Krihfabu thurual tluk lo kuainak" timi va philh hlah.

145. Mi cu a thihhlan ah va sunhsak law, a thihni ah ruak va hngah duh hlah. Zeicatiah a thih tikah, zeidah a ka tuahpiak timi pakhat hmanh a thei ti lo.

146. Mi cu a nun lio ah inntha va sak piak tuah. A thihni ahcun a caah thlan-tha kha sullam a ngei ti lo.

147. Na fel ahcun fel man na hmuh lai, na daithlan ahcun sunghnak na hmuh lai.

148. Khua le mipem va daw hna. Zeicatiah hi vawlei ah a hmunmi khua ka ngei lo ti va thei.

147. Thil-deu zuar va hmang hlah, zeicatiah na thil-deu khi a hmai na khah ding asi lo.

148. Na thannak ah rua bantuk in thang lo in, far bantuk than va zuam. Zeicatiah Rua cu a than a rang i a chan a tawi, Far cu a than a fum i a chan a sau ti khi va philh hlah.

149. Na hmuhmi tangka poh va hlo dih hlah. Zeicatiah na nun ahcun thaizing ah tangka na hmang lai timi a fiang nain, tangka na hmuh lai le hmuh lai lo a fiang lo."

 150. "Kan kawl ve lai, kan hman ve lai" timi hi, biatak alo nain biatak asi lo. "Kan kawl ve lai, kan khawn ve lai, kan hman pah ve lai" timi tu hi biatak asi. Zeicatiah "Na nun ahcun thaizing ah tangka na hlo hrimhrim lai timi a fiang nain, tangka na hmuh lai le hmuh lai lo aa fiang lo."

150. Hihi zulh va zuam. Kawlhawlnak ah, "Tuluk bantuk in kawl, Kala bantuk in khawng law, Kawl bantuk in va hmang hlah" timi Kawl phungthluk hi na zulh ahcun, na caah nun nuamhnak asi lai.

151. "Na chawva bochan in va uangthlar hlah. Na chawva cu thla i serh in an zuang kho viar" timi bia hi va philh hlah.

152. Mi nih dawtnak na cung i an tuah tikah, thil fate zongah lawmhnak chim va philh hlah. Cucu dawt hlawhnak lam pakhat asi.

153. Ngaknu kha aa dawh ruangah biapi chia in va thi hlah. Aa dawhnak ziam sehlaw zeitindah na tuah lai ti va ruat.

154. Harsatnak le sifahnak innka in a luh ahcun, dawtnak le duhnak hna hi thlalangawng in an chuak le an zam timi bia hi va cinken tuah.

155. Hihi va philh hlah. Dawtnak in dirhmi innchungkhar ahcun, harnak le sifahnak an rat zongah a tlu kho lo mi chungkhar asi timi va cinken peng.

156. Hawi rawlhrawn na sawm tikah na lungthin zong va timtuah law na ziachiatnak va thupta rih. Zeicatiah, rawl-ei na sawmmi hna khi, "Rawl-ei lawng ah an ra lo timi khi va thei."

157. "Nupi nih va le mualphoh an huam i, va le nih nupi le zia thuh an huam" timi hi biadik asi. Mileng na ngeih lai ah, na nupi he va si hlah u. Mileng a chimh colh hna lai i, na mual a pho lai.

158. Thaizing caah va timtuah tuah. Culoahcun "Thaizing kha na caah zan mangchi bantuk asi kho."

159. Na dirnak hmun a feh hlan ah, cungah kai va tim rih hlah. Zeicatiah na tluk a rang sual lai.

160. Cacawn hi hlei-dawt kai he aa lo. Cungsang cem dawt phaknak ding cah, dot khatnak in karhlan a hauh bantuk in, BA phaknak ding caah "tangcheu" in thawk a hau.

161. Pathian nih zeizongte a ssr khawh kan ti nain, BA, MA, Ph.D hna cu a ser kho lo timi va thei. Cucu minung nih sermi an si caah asi.

162. Minung kong khi va ruat ruah. "Zeitin dah a thih khawh timi khi khuaruahhar ding pakhat hmanh a um lo. Zeitindah a  nun khawh timi tu khi khuruahhar asi deuh?"

163. Thih khi va tih duh hlah. Zeicatiah na tih zong ah na luat hlei lai lo.

164. Thi khi va ngamh tuk hlah. Zeicatiah na thih hnu ahcun na nung bal ti lai lo.

165. Kum khat ca na ruah ahcun tlanglo va tuah; kum 100 ca na ruah ahcun theikung cing, kum 1000 ca na ruah ahcun minung cing timi Tuluk phungthluk khi va ruat law tlawmte na fim deuh ko lai.

166. Tih-chuk ngamh-chuk in thil a tuahmi cu, a karlak ah an tla tawn timi va philh hlah. Na thil tuahmi ah tlamtlin na duh ahcun, "Tih-chuk ngamh-chuk" lungput tei hmasat va zuam.

167. Zeithil na tuahnak hmanh ah, "uai-ai le khinghram in rian va tuan hlah." Cu nih cun na rian a harter chinchin lai.

168. Mi nih an thiltimi ah tlamtling hna seh ti na duh ahcun, va forh hna. Sung hna seh ti na duh ahcun, thachiatnak bia va chim hna. Na chimhning hna hawih in an theipar a kal lai.

169. Minung cu mei he kan i lo. Mei cu alh deuh seh ti na duh ahcun, chem ahauh bantuk in, minung zong chem le forhnak tu nih a thatter deuh. Na namh ahcun, "Mei tiikik na toih bantuk tu asi lai."

170. "Nupi tha nih rual zapum, nupi chia nih rual then" an timi va philh hlah. Na nupi kha rual thenmi asi ahcun, nupi chia asi timi kha nangmah tein va thei ko.

171. "Nupi fate zeidah an ei lai?" timi ruatlo le tuaktan lo in, duhmi paoh aka chung i aa tuh duk lengmangmi pa cu, "Fano ngeimi mupi lungput a can deuh vak lo" timi va ruat.

172. Zingka na thawhka na lungthin nih chun-ni-tlak na nunnak an hruai ti va philh hlah. Chun ah nuamh na duh ahcun, zingka ah thanuamnak va ruat; ngaihchiat na duh ahcun thachiatnak va ruat.

173.  Thil na tuahmi kip ah na lungdongh a fawi tuk ahcun, thil tlamtlinnak ah thazaang let hnih chuah a hau lai timi va ruat zungzal.

174. Paychek an petu khi a nawl va zul ko. Zeitikhmanh ah, amah caah saya va tuan hlah. Zeicatiah paychek an petu cu na saya a si zungzal.

175. Pakhat le khat pehtlaihnak ah, "biachim thiam" a biapi tuk. Biachim thiam lo ahcun, dawtnak  kha huatnak in a lang kho. Huatnak bantuk in a langh ahcun, dawtnak cu huatnak ah a cang kho.

176. Mi pakhat khat eidin na pek tikah, "eidin lawng va pe hlah. Dawtnak le siaherhnak va pek chih." Cucu na pek chih lo ahcun, "rawl lawng a ei lai i, dawtnak a chungah a luh lo ahcun, a thahnem lo."

177. Thawngtla viale khi misual ah va ruat hna hlah. Vanchiat ruangah thawngtla tampi an um timi theih a hau.

178. Sibawi zong hi amah le mah cu aa tlawp kho lo timi va thei zungzal.

179. Na bia-thli an phuan piaktu hawi cu, hawi tha taktak an si bal lo timi va thei zungzal.

180. Na cawi ahcun va cham than hna, na hlan ahcun va pe than hna.

181. Mi dawtnak khi cham va zuam hlah. Cham ding in an in dawtmi asi lo ti va thei. Dawtnak na cham ahcun, huatnak ah aa chuah sual lai.

182. Mi nih ka daw hna seh timi ruahchannak in mi cungah dawtnak va tuah hlah. Cucu mi na dawt hna siloin nangmah le nangmah na dawt bia tu asi deuh.

183. Bia na chim tikah a dih um-ek in chim va hmang hlah. Na chungah uammi va ngei. Culoahcun na chimmi bia kha na zuk kho than ti lai lo.

184. Mi epchun le zuamcawh va hmang hlah. Zeicatiah vawleicung minung 7,000,000,000 hi pakhat hmanh kan i khat lo i, kan pahrang aa dangmi lawngte kan si timi va ruat.

185. Mi sining zeitik hmanh ah na mit va thi hlah. Mit-thitnak cu sualnak aa thawknak asi.

186. Pathian nih a duhmi hi, phungchim thiam, bible thiam, bible hngalh hi asi lem lo. A duh taktakmi cu dawtnak, zumhnak, ruahchannak ngeih le nun thianhlimnak tu an si deuh.

187. Sualnak thlaici na tuhmi a keuh tikah Satan le Adam va puh hna hlah. Na tuh lio caante kha va ruat law, thlaici tuhtu kha sual va phaw. Cu nih cun na nunnak an remh deuh lai.

188. Vawleicung mi vialte kan sual dih ti hi adik. Chim lio ahcun kan i ti cio nain, "Nangmah hi mi sual na si" ti cu aho hmanh nih kan duh lo timi zong, bia dik asi.

189. Sualnak le palhnak hna hi faphir bantuk an si. Then awk an tha tuk lo.

190. Tangka kong hi va ruat tuah. "Micheu nih tangka hi a kawl a har bantuk in ahman zong har seh law a tha lai" an ti. Tangka hi a kawl a har bantuk in a hman har ve sehlaw, zeitluk in dek a har hnga?

191. Zudingmi le ritnak sii tongh hmangmi cu, nupi le vaa ah va ser hlah. "Lungretheih le buaibai dah ti lo cu na miakmi zeihmanh a um lai lo." Na nunnak tu kha zanmangchia bantuk men asi lai.

192. Mi nih an in forh ruang i na ral a that ahcun forh-ziak timi na si ko cang. An in thihphaih i na ral a chiat zongah forh-ziak thiamthiam na si timi va philh hlah.

193. Zeithil na tuahnak paoh ah, na tuah hlan ah fakpi'n khua va ruat. Thetse cung innsa maw na si? Lungpi cung inn sa dah timi?

194. Fimcawnnak ah hihi va philh hlah. Ph. D pa zong khi tang-cheu a rak si ve ko timi kha.

195. Tinhmi sangpi ngeih cu a tha. Thlapa lak timh zong thil-tha asi ko. Asinain "thlapa laknak ding caah a herhmi fimnak, thluak, thilri le sining na ngei maw, timi na dirhmun cu zoh lengmang ahau.

196. Te le fa lawng ngeih duh i, an mah cawmnak caah riantuan huam lo cu, hruh lak ah hruh fak bik pakhat asi. Zeicatiah hrinmi tefa cawm ding kha, midang rian asi lo. Nu le pa rian asi.

197. Cozah le midang bochan nun hi thil tha asi lo. Mi na bochan paoh ahcun cah hnga tluk in na cak lai lo i, than hnga tluk na thang lai lo. Na bochanmi an der caan paoh na der ve lai.

198. Minung hi sui le ngun he kan i lo. Sui le ngun cu minung nih man ngeihter lo ahcun man an ngeih lo bang, minung zong minung hawi nih man ngeihter lo ahcun, man an ngei lo.

199. Fimnak, rumnak, lungthin aza in na ngeih ahcun, mi nuam taktak na si kho ti hi va philh hlah.

200. Fimnak hi rumnak nih a caw kho lo. rumnak zong fimnak nih a caw kho lo. Cuccah mifim vialte an rum viar lo i, mirum vialte zong an fim viar ve lo.

201. Midang he sikcak a huam tukmi cu, a thinlung ah hma a pu tawn timi khi va philh hlah.

202. Hruaitu aa dohmi ram le miphun cu, buainak le thennak in a khat zungzal timi va philh hlah.

203. Chun le zaan an umnak sullam hi tha tein na fian i nunpi khawh ahcun, mifim ngai na si ko.

204. Zuu le si-ai cu va ri hlah. Zeicatiah na fim hnu ah, "Zuu le sii mawh na phurh sual hna lai."

205. Aa porhlaw mi, lih-chimmi le mi ruamkai cu zeitik hmanh ah an chungah biatak a um lo timi va thei zungzal. Kha hna chimmi kha, na hnakkhaw lawng in va ngai, na thinlung in va ngai hlah.

206. Porhlawt hi phun tampi aum. "Cabuai khat in eidin tawr le cheng in hun i, meh zong kan ngei lo hih" timi zong khi, porhlawt phunkhat asi ve ko.

207. Mi nih na rum le sifah an in theih ko. Motor le inntha tha hna ngeih i, "Kan nih cu mi sifak kan si" timi chim zong khi, mi ziarnak le porhlawt phundang asi ve than.

208. Na fale khi a namh zong va namh tuk hna hlah law, hlorh zong va hlorh tuk hna hlah. Na namh tuk hna ahcun vawlei ah an lut lai i, na hlorh tuk hna ahcun van ah an kai lai i, nan umti kho lai lo.

209. Sikvuaknak nakin thangthatnak nih minung a remh deuh timi va philh hlah.

210. Zei thil na tuahnak hmanh ah, lunglawm thanuam le thazaang tlung ngai in va tuah ko. Cu nih ccun na rian zatceu alim cang ti kha va philh hlah.

211. Na chuah lio zeitindah ka chuah, timi na ruah khawh lo hmanh ah, na thih lai tal ahcun zeitindah ka thih lai timi khi va ruat law, na fim deuh ko lai.

212. Sullam ngei lo le tinhmi ngei lo in nun cu, Cathiang nih "Pawkpawlawng" atimi khi kan si ti va philh hlah. Sullam ngei lo le tinhmi ngeilo in na nun deuhdeuh paoh ah...mi pawkpawlawng deuh deuh ka si timi va theih.

213. Sualnak tuah zong mi a lem. Thatnak tuah zong mi a lem. "Zeidah na lemter deuh lai?" timi duh thimnak tu cu, nangmah cungah a um. Nangmah nawl te a si.

214. Minung hi Pathian lungretheihtertu kan si timi va philh hlah. Zeicatiah minung 7,000,000,000 hi kan duhmi aa khah khawh lo caah asi. "Khua a sih tikah lum kan duh i, a lum tikah kih kan duh; a rocar le linh tikah ruahsur kan duh i, ruahsur tik ah khua rocar kan duh." A ho thlacamnak khi dah Pathian nih a ngaih lai timi khi va ruat tuah?

215. Na nunchung ah "milaklawh" le "micawmpawlawk" cazin ah na tel sualnak hnga lo va ralring. Cu cazin chung i na te chung paoh cu, "hawi dang dirhmun ka phan kho lai lo" timi va theih tuah.

216. Ti na din tik le rawl na ei tikah, thaizing thaithawh-chuncaw-zanriah ruat bu tein va eiding.

217. Na theihmi bia poah khi va chim dih hlah. Chim ding le chim lo ding khi va thleidang. Culoahcun mi nih "mihrut timi degree" an in pek sual lai.

218. Nih hi ngandamnak caah free in hmuh khawhmi si tha bik asi timi va philh hlah. Ngaihchiatni hmanh i na nih khawh asi ahcun, vawlei na tei taktak i, vawlei ah nunchan ngeimi na si taktak.

219. Mit-hmai panh te um zong na thim khawh i, mit-hmai chiapi um zong na thim khawh. Khaw zeidah na thim deuh lai timi tu khi cu, nangmah ah duh-thim-nak aum.

220. Hruaitu na si ahcun zanmang nih an uk awk le hruai awk a si lo. Ruahnak, tuaknak, zumhnak, ruahchannak le a taktak a simi thil tu nih a uk le a hruai awk a si.

221. Bia chim thiam hi a biapi tuk. Bia chim na thiam lo ahcun, dawtnak bia hmanh khi, midang caah fahnak a si kho.

222. Mi chamhbaunak kong na caih hlan ah, an kedan khi va danh hmasat. An sining khi va ruat hmasat. An sining le kedanh na fian hnu ah, an kong va chimrel.

223. Midang caah saya va si zungzal hlah. Zeicatiah saya si zungzal nakin siangngakchia si le a cawngmi si hi fimnak deuh a si tawn.

224. Na tuahmi cu a tha viar in na ruah men lai. Asinain na hnulei ah a chia le a tha tiah a thleidangtu le bia khiaktu mipi an um zungzal timi va philh hlah.

225. Na nunnak ah "Isaac" timi min hi va philh hlah. Cucu "Laughter" (Nih/Mini) tinak asi. Zeibantuk minung na si zongah, zei bantuk dirhmun i na um zong ah, "Ani khomi" na si dingmi a biapi tuk ti va philh hlah. Ani khomi si zong va zuam. Hihi philh hlah. "Ani kho mi" na si lo ahcun, vawlei cu na caah "Tahnak lawng a tang cang."


Bia donghnak:

Hi ca a relmi dihlak Bawipa nih fimnak, rumnak, ngandamnak, nun saunak le nuamhnak laksawng in pe ko hna seh. Cunak in a biapi deuh rih mi, "Zeitluk lungretheihnak le harnak chung i na um tik zongah, nih/mirh khawhnak in pe ko hna seh. Na nunnak A NI khomi, A MIRH khomi le aa lawm khomi na si khawhnak ding caah saduhthahnak nganpi he hi ca ka tial!!!