Arab ram hna caah Israel ram a ummi hi thil pawi taktak asi. Arab ram pawl zong khi Israel caah tihnung taktakmi sahrang bantuk an si ve. Zeitik paoh ah Israel khi dolh an duh; dolh kho an si ahcun dolh khi an duh zungzal ko. Atanglei map hi zoh u law, Israel ram dirhmun hi zeitluk in dah tih a nun timi a fiang ko lai. A senak te khi Israel ram asi i, a hringmi vialte hi Muslim ram an si.Acheu cu Israel he aa hua taktakmi Arab ram an si. Israel a huami le i rawk seh ti a duhmi Arab ram le Muslim ram lawngte an si. Ahleice in Saddam Hussein chan ahcun Israel hloh hi a rak duh bak. Atu nuclear hriamnam ngeih aa zuam tiah an lunghrinhmi Iran zong nih Israel cu "world map" in hloh ding ti tiang in an ti.
Hi ti asi caah Israel cu hriamnam a that le a cah hrimhrim lawng ah a himbawm kho ding asi. Cucaah Israel nih amah le mah aa runvennak ding caah a herhbikmi hriamnam cu nuclear hriamnam an si.
Israel le Arab ram pawl map
Israel khi a ral tihnung bik Arab ram hna nih an kulh peng caah, a dirhmun khi tihnung le thinphang peng asi. A ton ciami tuanbia zong van ruah tikah, amah le mah aa runven khawh lo ahcun Israel cu a lo chawm ding le hi vawlei map in a lo dingmi ram asi ko. Cucaah Israel cu him bawm tein a um khawhnak ding caah, ralkap le ralkap hriamnam leiah a cah le san a herh hringhran.
Cun Pathian thimmi miphun an si bantuk in, an fim i scientist sangsang an ngei. Zeitluk in dah an fim tiahcun, an sermi hriamnam nih alanghter. An scientist nih an sermi Iron Dome timi rocket le bomzuangmi hna kapthla khotu meithal zong an ngei i, America nih an ngeihmi nakin a tha deuh i a khen khawh deuh ti asi. Nai i Gaza in Palestian Hamas ralkap pawl nih an rak kahnak rocket kuan zong, Iron Dome in tampi an kapthlak khawh. Hezabolah pawl zong hi rocket tam taktak angeimi an si i, Israel i vennak ding caahcun hi Iron Dome hi an i bochan bikmi hriamnam pakhat asi.
Palestinian roket Iron Dome in an kah lio
Cucaah Israel nih khin American cozah le Europe cozah nganngan hna sin in hriamnam thatha a cawk hna. Vawleicung raltuknak vanlawng thabik hi a ngeih ve hna. Cu lawng hmanh siloin atom bomb hmanh a ngeih lai tiah ruah asi.Cucaah Israel hi nuclear hriamnam ngeih ding hi a rak i timhnak asau ngai cang ti asi. Cucu a ngeih khawh ahcun an ram a himnak ding caah a biapi tukmi thil asi.
Cucaah 1948 i independence a van hmuh cangka 1950s hnu deuh vak in nuclear hriamnam lei hi Israel nih an rak tuaktan cang ti asi. Negev ramcar ah a ummi Dimona timi ah hin 24 mikawatt asimi nuclear reactor hi an ngei ko ti asi. Nihin ni ah hin Israel hi nuclear hriamnam ngeimi ram 6 nak asi cang tiah an ruah. 1966 ah bomb a rak siam cang tiah an lungrumh.
Dimona Nuclear power plant
1980s ah Saddam Hussein nih nuclear hriamnam ser a rak timh.Cucu Israel nunnak caah tih a nun tuk caah, Iraq nuclear sehzung cu Israel nih bomb an thlak i an rak hrawh dih. Cu lio ah Israel nih EU sinah in atom bomh hmanh ser khawhnak ding, "unranium" lung an rak cawk. French nih Israel ah kuat ding hi, tuanvo a rak lak.
Sihmanhsehlaw, Israel nih Saddam Hussein nuclear power sehzungpi a hrawh ruangah French cozah an thin a hung i, an rak kua duh lo. Cu Israel cawk ciami cu ramdang tu ah kuat an rak timh. Cucaah Israel nih thohhlanzi nu an rak thlah i, cu "uranium" phurtu tilawng cu rili cung a kal lioah, Israel thohhlanzi le commando nih an rak tlaih i Israel ah an zampi. Uranium lung vialte cu Israel ah an luhpi dih. Tilawng zong an kirter ti lo ti asi.
Israel nih hin cu uranium lung hmang in nuclear hriamnam hi a ngei ko lai tiah an ruah. An mah Israel scientist zong nih nih Israel nih nuclear bomb a ngeih ko tiah a rak ti bal. September 22, 1979 ah South Africa scientist he bawm in nuclear testnak zong an rak tuah bal cang ti asi.
1986 ah Dimona i kum 9 riantuan cangmi Mordechai Vanunu zong nih, Israel nih nuclear bomb ser an timhnak program le thermo nuclear bomb ser ding in pungsan an ngeihmi vialte zong Sunday Times ah hmanthlak he a rak phuan dih. Vanunu chimmi bia nih, Israel hi thermo nuclear bomb ser khawhnak fimnak le thawnnak an ngei cang ti a langhter. Israel nih 150 Kilowatt nuclear reactor a ngeihmi le kum khat ah plotonium Kg 40 a chuah khawh tiah an ti i, cu ning in tuak tikah Israel nih hin nuclear bomb hi 75-400 karlak hi a ngeih cang lai tiah an lungrumh. Mi tambik ruahnak ahcun Israel nih hin atom bomb atlawmbik 200 hrawng cu a ngeih lai tiah lungrumh asi.
UNO zong nih Middle East hi nuclear hriamnam umlo ding in kan i zuam lai tiah an ti. Israel nuclear power program zong UNO nih a bia caih ding in an ti tawn nain, US nih a veto lengmang caah UNO Nuclear lei zohkhenhtu zong zeihmanh an tuah kho lo. Cuticun Israel cu zeitin an ti kho lo nain, nuclear reactor siam aa timmi Iran cu heh tiah an khamnak zong asi.
Asinain Israel nih hin nuclear hriamnam hi kan ngei ti zong a chim bal lo. Kan test ti zong a chim bal lo. Ser kan i tim, ser khawhnak thazaang kan ngei ti zong a chim bal lo. Cucaah Israel nih nuclear hriamnak hi a ngei taktak maw? Ngei taktak lo ti zong theih asi lo bantuk in, zeizat set dah a ngeih? A ngei lo zong asi sual maw timi hi theih khawh asi fawn lo.
Cucaah Israel cozah nih nuclear bomb cu zat kha zat a ngeih tiah phungchimtu cheukhat nih an chimmi hi adikmi asi lo. Zeicatiah a ngeih le ngeih lo amah nih a chim bal lo caah le an ngeih taktak le ngeih taktak lo zong fiang tein theih khawh asi lo caah asi.
Columbus ah thawngtha chimtu pakhat nih aa thawh i, "Israel nih atom bomb 200 a ngeih. Vawlei vialte man dih a tuah khawh cang" tiah thihphaihnak bia rak chim lengmang. Asinain cu a chim lio ah, "A ngeih le ngeih lo hi a hohmanh nih an thei lo" timi hi a rak fianlo caah asi. A caan ahcun Pathian kan tanh tuk nakah lihchim sual zong a rak fawite. Theih setsai lo mi zong, minung an thin phang hna sehlaw Pathian leiah i mer hna seh timi duhsaknak lungput he, lih hna hi kan chim theu tawn. A hngal lo mi caahcun apawi lo nain a hngalmi caah a pawi ngaimi phungchim asi.
Keimah lungput tu ahcun Israel hi cu an fimzer tuk i, nuclear bomb hi an ngei ko cang lai tiah ka ruah. Zeicatiah atom bomb a rak ser hmasattu American sceintist pawl zong cu Judahmi an si ko hna. Hi fimnak hi Israel nih an ngeih i, thilri zong an ngeih fawn. An pawngkam hna ram sining ruah ah ngeih zong an herh fawn.
Cu lawnglawng ah Israel hi a himbawm ding le hnangam ding an si caah, an ngeih ko lai tiah ruahnak ka ngei. America he zong hawikawm tha tuk an si caah nuclear bomh taktak an pek hna lo hmanh ah, an fimnak le tuah ningcang cu a thli te zong in an bawmh khawh men ko hna. Cu ruang zong ahcun maw asi? Israel nuclear hriamnam kong UNO nih an caih fate, USA nih veto power a hman i an biatung a thah piak lengmang hna zong asi kho men ko.
No comments:
Post a Comment