Cu chung in innchungkhar i "Va Tha" kong hi tial ka duh. "Va" tiah ka hman duhmi biafang hi Mirang holh in "Husband" ti khi asi ko. Fale caahcun "Father" tinak asi.
Bible ah "Va Tha" hna hmuh ding tampi an um. Abraham, Isaac, Jacob, Joseph, Moses, Joshua tibantuk hna an si. Abraham cu "Zumhnak Pa" ti tiang in timi asi. Isaac cu "A pa vision phurtu" asi. Jacob cu Israel phun dirhtu asi. Moses cu vawleicung hruaitu lian nganbik asi. Joshua cu mi note asi nain miphun a hruai bu in "a innchungkhar dihlak Bawipa hnuzultu ah a sermi asi." An thatnak le sining aa dang cio. Hi acunglei "Va Tha" hna hi, riantuan an zuam i, anupi le fa le nih hgnatchanmi asi.
\Va tha hna cu hitin cerhthlawk lak zongah rian an tuan
Vawlei cung ah 'Va Tha" minthang tampi an um. Cu hna kong kan tial cawk lai lo. Mi pakhat te kong tial ka duh. Amahcu Kawlram General sangbik a rak simi Boyoke Aung San a si. Amah cu Ralbawizik asipin ah Kawlram naingaizi hruaitu "pa" asi. Hmailei ah President/Prime Minister tuan te ding khi a si ko.
Aung San hna hi an rak fim tuk. An fim tikah innchungkhar ah "Va Tha" taktak an si. Nupi fate cungah tuang an khong lo. Aung San Museum kan zoh lio ah Aung San nih a nupi Daw Khin Kyi sin a tialmi ca nih Aung San hi a nupi caah, zeitluk va tha dah an si timi alanghter. Cu ca te ahcun hi tin aa tial:
"Pe-poh neh nan-pya sih in htra-min sa chin de"
Asullam cu"Behrumthu le nanpya a um ahcun rawl ei ka duh ko" ti asi. Hi ca he hi, Aung San a rawl a tam i chunchaw ei a duhnak ca te kha, a library in a tial i, a PA nih an nu Daw Khin Kyi sin ah a rak pekmi asi. Hi ca te nih Aung San hi zei bantuk "va le pa" dah asi timi innchungkhar a nunzia taktak kha alanghter.
Mi tampi cu "meh le buh" a thawt lo tik ah nupi fate sin ah kan ing a puang. Kan thin a hung i kan zai. Nupi fate kan sik hna. "Ziah rawl na chumh lo? Na meh chumhmi a thaw lo?" ti in a phunphun in zai kan hmang.
Hi lio ah Aung San inn ah hin, voksa, cawsa, arsa, ngasa, arti, anhringso le eidin aphunphun a tor in a tor ko lai. Asinain a hlammi chuncaw te hi, Kawlram ah a man aa dengbik, sifak santlai lo taktak eimi tirawl, azeibantuk paoh nih eidin khawhmi tirawl te asi.
Cu lungput nih alanghtermi cu "Aung San hi, General hmanh si ko sehlaw, a nunnak ah uanthlarnak ngei bak lo i toidornak lungput tu in a nunnak a khat" timi hmuh khawh asi. Va Tha hna cu nupi fale cungah tuang an khawng lo. An i hrocer lo. An i toidor i, niam tein an nung. Nupi fate ngaih a chiattertu le lungthin khing a rihtertu an si an si bal lo. Hihi "Va Tha" hna thinlung ah hmuh khawhmi ziaza pakhat asi.
Vawlei tuanbia, minung sining le nifatin kan pawngkam minung nunning zoh tikah, "Va Tha" hna lungput le sining kha, a tanglei bantuk in kan hmuh khawh. Cu sining le lungput hna cu:
1. A zumhnak a thawng i harnak a ton tikah a tlu zau lo.
2. Anupi fate a daw i an zawn a ruat zungzal hna.
3. Innchungkhar pawcawmnakah riantuan a huam.
4. A thathu lo.
5. Mi tlorhciar le miphunzai asi lo.
6. Mi biaduh le hmursaumi asi lo i mi he bia aa chal bal lo.
7. A nupi a fale zawn a ruat i, nupi fate caah tem-innak in a huam.
8. A nupi le fale caah a kaa chung rawl a chuah khomi asi.
9. Tihnak a ngeih hmanh ah raltha tein thil a tuah ngam.
10. Mah zawn lawng aa ruatmi asi lo. Midang zawn a ruat.
11. Lungsau thinfualnak a ngei i a lung a tawi lo.
12. Anunnak ah sullam ngeite le nun zia dawh tein a nung.
13. Nupi fate vuakden le hrocer a hmang lo.
14. Nupi fate sinah aw nem in a um i awkahrang a hmang lo.
15. Biachin holh chia le chiatserhnak bia chim zong ahmang lo.
16. Chunmang manh a huam i vision a ngeimi asi.
16. Semrel tein khua a sa i khuakhing a khak.
17. Hmailei ca a ruat i timhlamhnak tha tein a ngei.
18. Innchungkhar tha tein azohkhenh i a cawm khomi asi.
19. Nupi fate cungah huatnak thinlung a ngei bal lo.
20. Innpa he huatral le tazacuai a hmang lo.
21. Lih a chim lo i biatak tu kha a tanh.
22. Firtlei le rutreuh in khua a sa lo.
23. Zudin sa-ei a hmang lo.
24. Ritnak si-ai a tongtham lo.
25. Khualtlung mileng a daw i an inn chung ah mileng le khual an i nuam.
26. Anupi le chungkhar zong a dawt hna i, nupi le chungkhar nih an i bochan.
27. Mipi caah thazaang chuah a huam in khuami caah a thahnemmi asi.
28. Amit hmai apanh i, a ka a pau.
29. Anupi le fale cungah zumh awk tlak tein a nung zungzal.
30. Intuar khawhnak a ngei i, hmual a ing.
31. Harnak a ton tikah a uai tlek bal lo i nupi fate nih an i hngatchan.
32. A tuahmi kip ah lungsaunak le thinfualnak in rian atuan i a tlam a tling.
33. A thin a tawi lo i tlabulbal in khua a sa lo.
34. Mi he sikcak le vuakden a hmang lo in a nunnak ah daihnak in a khat.
35. Nupi mak le thawl a hmang lo.
36. Ngaihthiamnak thinlung a ngei i mi a ngaithiam kho.
37. Mi lehrul cham a hmang lo.
39. Zei a tuahnak hmanh ah "dinfelnak" a tanh.
40. Daihnak le remnak tuah a duh i mikar ah remnak aser.
41. A zertiang lo i thil ding a tanh.
42. Mi tihzah le upat a thiam.
43. Lungput tha a ngei i, midang nakin ka tha deuh tiah aa ruat lo.
44. Uanthlarnak le uahnak thinlung a ngei lo.
45. Mi zeirellonak lungput a ngei lo i, minung ruang tein a hmu thiam.
46. Thlachiat a ruat i midang duhnak hmuh zia a thiam.
47. Tuaktan le kawlhawl ahuam.
48. Dirhmun fek tein a ngei i a nupi le fale caah himnak lungpi asi.
49. Pathian a thei i biaknak ah aa zuam.
50. "Akhan a thei" i a lam thluan a tluang.
Hi hna hi "Va Tha" nih aa ngeihmi hna lungput, nunzia le sining an si. Hi bantuk va ngeih cu a nuam tuk ding le a tha tuk ding asi. Hi bantuk va a ngeimi hna caahcun, an innchungkhar cu, vawleicung vancungkhua fate asi ko. Sihmanhsehlaw, hihi va philh hlah. "Hi bantuk va hmuh hi cu a fawi lo."
Hi bantuk va ngeih cu a tha tuk ding le asunglawi tuk ding asi. Asinain hi bantuk va na ngeih lo zongah na tha va chia hlah. Zeicatiah "Na ngeihmi va te kha na caah asunglawi bik asi ko." Amah tang khan va dor law, va hmaizah law nan innchungkhar cu "chungkhar nuam" asi zungzal ve ko lai.
"Va le nih nan nupi le cu nan pum nan i dawt bantuk in, nan dawt hna lai i, nupi le nih nan va le cu nan hmaizah hna lai" (Eph. 5:33)
No comments:
Post a Comment