Sangau Khua (Sangau Village)

Sangau khua cu tlangpar ah a ummi khua dawh ngaingai khua pakhat asi. 1970 kuakap ahcun khuate fate a rak si nain, nihin ni ahcun Mizoram Ramkulh khua vialte lakah, a thangcho cuahmahmi le a than a rang bikmi khua pakhat asi ve cang. Hi hnu kum 20 kuakap ahcun khuapi (city) dirhmun a phan kho te dingmi khua pakhat asi.

Sangau Khualai 

 Umnak

Sangau khua hi, India ram nichuah thlanglei ramkulh asimi Mizoram State ah a um. Lawntlai District nichuah chaklei hriang bik ah, a ummi khua pakhat asi. India-Burma ramri ah a luangmi Tipi in nitlaklei, Tipi le Saisihva aa tonak in Km 14 (lamhlun in) tluk hlatnak ah a um. Sangau in Burma ramlei kal ahcun Buntlang le Thau khua pal hnu ah, Thantlang leiah kal khawh asi.

Sangau in nichuahlei ah Pangkhua a um; nitlaklei ah Vanlamphai; thlanglei ah Thaltlang le Nitlakthlanglei ah Ceural khua an um. Sangau khua cu, Mizoram tlang sang bik Phawngpi (Phawngpui) Tlang in chaklei ah a um i, Lungceh Tlang in a thlanglei Sangau Tlangthluan cungah a ummi asi.

Sangau Sang pakhat (Photo: Sui Awr)

Vawlei Muihmai

Mizoram tlang sangbik Phawngpui Tlang he aa pehmi Sangau Tlangthluan cungah a um. Sangau Tlangthluan (Sagau mountain range) hi tlangthluan a rem ngaimi asi. Thau lei in zoh ahcun pheiphah tha ngai in a lang. A dawh zong aa dawh tuk fawn. Sangau hi, tlang sangmi pahnih Phawngpi Tlang le Lungceh Tlang karlak alaiva nawn ah a um. Phawngpi hi Mizos nih cun Phawngpui an ti caah, hi ca zong ah hin, duh paoh in tial khawh asi.

Phawngpui Tlang hi, Mizoram tlang sang bik asi i meter 2,157 a sang. Hi tlanghluan hi a sau ngai i chaklei in thlanglei donghnak tiang Km 14 tluk a sau. Asannak bik hmun in, tlang hi chaklei lei le thlanglei ah an niam ziahmah.

Asannak bik in, chaklei duhsah tein a hung niam ziahmah i, minthangmi Farpak rawn ah a hung chuak; Thaltlang chak deuh vakah ah tanphei ngai in tlanghrawn tha ngai in aa ser. Tlang cungah rawn dawh ngai Farpak rawn aum. Cuka cun tlang cu a van tla duak i, khuathar tlakmi Sentetfiang khua ah a chuak.

Phawngpi Tlang (Sangau in thlakmi; photo: Pu Sui-awr)

Farpak rawn lonh hnu ah, nichuahlei ah tlang cu ava niam ziahmah i, Thaltlang ah tlanghrawn phah tawite a hei siam i, cucun Tipi ah a va tla colh. Sentetfiang khua in Sangau khua Palik Station tiang bo niam tete in as ser i, Sangau khua Muallai rawn a phak tikah a niamnak bik hmun ah a va cang. Cuka zawn ahcun an certual zong aum. Muallai zawn cu Sangau khua ahlunhlainak bik le dawr tamnbik umnak hmun asi.

Muallai zawn in, chaklei ah tlang cu cheng ngai le sang ngai in a bo than. Cuka a sannak cem zawn ah, Ralkap Sakhan a um. Cu Ralkap Sakhan zawn in tlang cu duhsah tein a niam ziahmah than i bo fa nawn tete in an um. Cuticun a va kal ziahmah i, Lungceh Tlang kehram ah a va niam than. Cuka zawn ahcun Vanlaiphai kalnak lam hlun le lamthar aa then. Cuka zawn cun Lungceh Tlang ah a va sang than i, cuka cun Muallianpui khuapawng ummi Lungleng Tlang ah a va chuak than.

Sangau hi rili in pe 5,500 tluk hrawng a sannak ah um dawh asi (fiang tein ka thei kho lo).  Nichuahlei ahcun a rak cheng thluahmah i Tipi ah a tla. Nitlak lei ahcun duhsah deuh in a tum ziahmah i Ceuva timi ah a niamnak bik asi. Burma ram Thau khua he hin rili in an san hi aa can hrawnghrang an si i, ralkah tein an um.

Thau khuahlun in thlakmi Phawngpi Tlang (Photo: No Thawng)

Khuacaaan

Tlangpar ah a um caah thli a pang. Faruahthawh hran lio ahcun thli a fak ngaingai tawn. Tlang sannak ah a um caah khua a lin tuk lo i, khua a dai ngai. Thlihir a tam. Tlangsangmi pahnih-Phawngpui le Lungceh Tlang-karlak ah a um caah a khuacaan a nuam. Khuasik tlakka le thal chuakka hi a nuamh bik lio caan asi i, cu lio caan cu tourist tlawn a rem bik lio caan asi. Tlangpar ah a um caah tii a har ngai nain, Phawngpi tlang in an lakmi tii hi duhdim ngai in an hmang kho rih.

Thingram

Sangau ram hi, tualram asi i, thinghnah a tlawngmi thingram an kheu. A niam deuhnak hmun ah, tihthing ca a thami tthil, fahia, laithing le kuhthing an keu. Tualram thing asimi thanvong atam ngaingai. Tualram asi caah an ram ah mau tampi a keu. Thalteh le adang thing nenno deuh lawngte a keu. An ram hi a phawng ngai. Atu chan ahcun Forestry Department nih farkung le zeidang thing zong khuapawng ah an cin caah an ram hi, a hninghno ngaingai cang.

Phawngpui Tlang le Lungceh Tlang kuakap ah chawkhlei zong an um. Man sungmi thingkawp zong an keu nain an tlawm. Tipi naihniam ahcun mau tampi an keu. Lo ah an vah caah, tu chan ahcun a tlawm ngai cang. Tiva kam ah zuang, chengcher, hriang le zeidang ca i, hluah in ah awk a thami thing tam ngaite an keu. Thing ah ding a tlawm caah, inn saknak caah thing a tlawm ngai cang.

Hnahcang a tam caah mehhang tam ngaite a chuak. Tialbawp zong tam ngaite aum. Hlan ahcun zawngtah kung a tam ngai nain, an hau dih cang caah ramtang ah zawngtah a um ti lo. Inn ah sipuazi ca in an cihmi tam ngaite a um. Hmunkip ka kipah khuahlu le siarsen thingkung hna an keu.

Saram

Minung an chah nain, ramsa an humhim ngai caah ramsa a tam ngai rih. An ram ah ngengpi, sazuk, sakhi, saza, sakuh, ngal, vom, cakei, sathar, saphu, saihrem le adag sachiava phun tam ngai a um. Ceural le Sangau ramri Ceuva dawng ah cozah nih an hualmi saram hual a um i, cuka ahcun Mizoram ramsa an tling. Mizoram ummi va phun kip an tling.

Minthangmi va hna cu vapual, vanvuk, vakok, vavu, varit, artau, vahui, tlenglung, tuklo, vangi, valah le adang tualram le zolo ummi va phunkip an tling. 1980 kuakap ah cu saram hual pawng ahcun fung an rak hmuh i an rak kah. Nihin ni ah fung zong a um kho men ti asi.

Tlang a sang caah, tiva an hme. Tipi dah ti lo ahcun nga tlaih ding a har ngaingai. Cangai le ngaikung tuktak lawng tiva fatete ah an um.

Cinthlak

Sangau hi hmunhma a sang ngaingai nain, Phawngpui Tlang in tii tha tein an lak le an hmuh khawh caah, tii zong duh dim ngai tein a hmang kho dingmi khua an si. Tlangbo cungah a um nain, an vawlei a that ngai caah, cinthlaknak zong a rem ngaingai. Eidin zong tam ngaite a chuak thiamthiam.

Leikuang a tlawm i, tlanglo tu hi a tam deuh. Dumhau tuah in aa cawmmi zong tam ngai an um cang. Facang, fangvui, bete, behrum, bahra, kawhra, thing-bahra, aa-lu hna hi tam bik an cin. Vawlei a van pah caah, antam phunkip a tha duh ngaingai. Daidim, piat, lubuk, tamnem, tampawl, caleri le adang anhringso tam ngai a chuak. An ram nih an i zaat ding tirawl a chuah lem lo caah, India ramchung in an rak phurhmi eidin bochan in nun deuh asi.

Hmailei Sangau

Sangau hi Lawngtlai District ahcun khua lian bik le a thangcho bikmi khua pakhat asi. Cozah lei tanpinak zong atam i, an khua ah tangka aa chawk ngaingai. Block Head Quarter khua pakhat asi i, nifatin tangka lut hi a tlawm ti lo. Khua chung ah tangka aa chawh ngai caaah, apawngkam khua hna nih, tukmatak zuar in Sangau hi pawcawmnak ah an hmannak khua pakhat asi cang.

Sangau Bial (block) ah Sangau rel chin in khua (18) an um: Sangau (Nichuahlei le Nitlaklei), Pangkhua, Thaltlang, Pangrang, Ceural, Lungtian, Vatek, Vatekkai, Rawlbuk, Lungpher, Siacangkawn, Bualphir, Archuag, Tialdonglung, Vombuk, Lungzarhtum, Sentetfiang le Fungkah hna an si.

Anaibikmi khuapi hna cu, Hnahthial le Saiha an si. Sangau in KM 13 tluk a hlatnak ah khua dawh ngaingai Vanlaiphai khua aum. Cucu Lunglei District ummi khua asi. Vanlaiphai le Sangau hi hlan ahcun aa tia bakte an si i, nihin ni ahcun Sangau nih a tei tuk cang.

Sangau khua hi 1993 ah a hnu bik ka phanh asi. Cu lio ahcun, Vanlaiphai Veng, Ceural Veng, Bawi Veng tibantuk in sang 5-6 tluk ah an rak i then. Atawinak cun Nichuaklei le Nitlaklei Sangau tiah an then.

Sangau le Tipi karlak ah ramri khua a simi, Pangkhua a um. Sangau le Pangkhua hi KM 5 tluk aa hlat. Sangau-Pangkhua karlak hi, lam a tha, hmunhma a rem ngai caah, hi hnu kum 50 kuakap ahcun khua aa peh te dingmi an si.

Cun Sangau le Thaltlang karlak ah Sentetfiang khuathar an tlak chap. Kawlram mipem tampi an umnak khua asi i, Burma khua ti tluk asi an ti. Hmailei kum 10 ahcun Sangau le Sentetfiang khua hi aa tlai lai. Cucaah hi hnu kum 50 kuakap ahcun Sangau-Pangkhua-Sentetfiang hna hi an i tlai kho i, khua pakhat ah aa chuah khomi an si. Khi tik ahcun Sangau khua cu khuapi ngaingai asimi "hmunpi" (urban city) ah aa chuah te kho men.

Sentetfiang khuathar 

Milu le Inn

Wikimediamap.org i an tialnak ah, India cozah milurelnak cazin ning in, Nichuahlei Sangau (Eest Sangau) ah minung 2,590 (2011) ah an um i, minu 1,299 le mipa 1,291 an um. Inn 488 an um; Nitlaklei Sangau (West Sangau) ah minung 1,272 an um i, minu 636 le mipa 636 an um; an i zat bak asi; inn 239 a um.

Hi cazin ning in zoh tikah, 2011 ah Sangau ah inn 727 a um i, minung an zapite 4,862 an um tinak asi. Thantlang khua zat dengmang an si cang (Wikimediamap.org nih a tialmi hi, zeitluk in dah a dik timi cu, catialtu nih ka thei kho lo).

2015 ahcun Sangau ah inn 1,000 a um cang. Mizoram in siseh, Kawlram lei in siseh a pemmi an tam caah, Sangau khua milu karhning hi, a rang ngaingai. Mah tining tein an karh ahcun, a rauh hlan ah khuapi (city) pakhat dirhmun ah a phan kho te dingmi khua asi.

Sangau Khualai Hlunhlainak Bik

Sangau khuakam ah Sentetfiang khua an tlak i, cu zong cu Sangau sang pakhat khat khan ah a um cang. 2011 ah inn 63 an um i, minung 309 an um tiah India census ah an tial.

Cozah Zung Ummi

Sangau hi khuapi ngaingai asi cang i, cozah zung zong tam ngai a um ve cang. Hi cozah zung hna le sianginn hna hi, Sangau khua ah tangka tam bik a luhnak an si. Hi department sining zoh tikah Sangau hi hmunpi taktak asi cang timi a lang. Hmailei kum 10 chung ahcun "City" timi ah aa chuah te kho men. Cozah zung biapi hna cu:

1. Inkhun 10 tlum sizung (1)
2. Bank (1)
3. Ralkap Sakhan
4. Police Station
5. Vety Office
6. Revenue Office (Ngunkhuai Zung)
7. CID Office
8. ICDS Office
9. Block Development Office
10. Forestry Dept
11. Post Office
12. Electric Department
13. PHE
14. Tourist Department
15. Telecom Department

Sangau khua ah hin, computer zong tam ngai a um cang. TV channel zong tampi tlaih khawh asi. Western Union in tangka zong fawi tein kuat khawh asi.

Sianginn

Sangau khua hi hmunpi asinak a langhtertu ngaingai cu sianginn a si rih fawn. Nihin ni ah Sangau khuachung ah sianginn (11) atanglei bantuk in an um:

1. Higher Secondary- 1
2. High School-3
3. Middle School-2
4. Primary School-5

Biaknak

Zah ah za in Krihfa an si ti tluk asi. Ralkap cheukhat Hindu le Muslim ummi dah ti lo cu, Krihfa viar an si. IKK, Baptist, Presbyterian an tam bik. Atu lio Sangau khua ah Krihfabu (Denomination) phun (8) an um i, biakinn 13 a um. Biakinn ngei lo Krihfabu zong an um rih ti asi. Kawlram in a rak pekmi pawl zong Krihfabu an dir kho cang i, biakinn zong an rian cuahmah.

Politics

Sangau khua hi politics ah a lar ngaingaimi khua pakhat asi. Ralkap Sakhan zong a um caah MNF chan in atu tiang humhimnak lei zongah min ngeimi khua asi.

Sangau khua in, politics lei ah mi za tampi an chuak i, culak ahcun Mizoram politics ah minthang ngaingai asimi, Pu Sangchuma le Pu Ramawia zong hi Sangau chuak tefa an si. Politician minthang dang zong tampi an um rih. Hmailei zongah Mizoram le Lawngtlai district zong ah hruaitu tampi a chuak te dingmikhua a si. Mizoram le Lawntlai District politics zong hi Sangaumi nih tampi an khuhnenh khawh ve.

Pu Sangchuma he UBCUSA Civui ah

Lawngtlai District cu "Lai kan si" timi zong a aupi cemtu cu Sangau khuami an si. An mah hi um hna hlah sehlaw, Mizoram ah Lai timi biafang hi a lo ding asi. An mah Sangau khuami hruaitu hna an i zuamnak thawng in, Mizoram ah Lai timi biafang zong a thar in aa tharchuahnak le a nunnak asi. Khua fate asinain a khuarup lo in politics sangsang an chuah caah, Mizoram ah a min a thang ngaingaimi khua pakhat asi.


Pehtlaihnak 

Sangau hi India-Burma ramri ummi khua asi nain, Mizoram chung khuapi hna he bus lam in an i peh pin ah, Kawlram lei he zong zip lam a pem kho cang. Ralkap Camp ah helicopter a tum kho. Herhnak ahcun Ralkap Camp ah vanlawng nih eidin le thilri a thlak tawn hna.

Sangau khua in Bus lampi a pem cangmi hna cu atanglei bantuk asi: 


1. Sangau-Hnahthial-Aizawl Lampi
2. Sangau-Hnahthial-Lunglei Lampi
3. Sangau-Saiha-Lawngtlai Lampi
4. Sangau-Saisihchuak-Hakha Lampi

Sangau le Pangkhua kar lampi thar cawhmi

Sangau in Kawlram lei kal duh tik ah, Sangau-Pangkhua-Saisihcuaklam-Thantlang-Hakha Lam zulh in kal asi. Sangau-Saisihchuaklam cu motor lianmi zong an kal kho cang. Lam ropui taktak asi cang.

Hi lampi hi India-Burma pehtlaihnak "Border Trade Road" tha taktak asi caah, hmailei ahcun Haimual le Rih Lam nakin a hlunghlai deuh te dingmi lampi asi. Nihin ni hmanh ah hin, chawletmi hi ni fatin an dong ti lo. Motor cycle le motor khualtlawngmi an tam taktak cang.

Saisihchuaklam (Hriawhva kam/Photo: Dr. C. Duh Kam)

Ramri khua asi bantuk in, Sangau thanchonak hi Saisihchuaklam cungah aa hngatmi asi caah, Sangau uktu hna nih an khua thangcho seh ti an duh ahcun, Saisihchuaklam hi thapek taktak a herh. Saisihchuaklam hi kataya phahmi lam asinak hnga ding ca le Tipi hlei hi akum ning hrawn khawhmi thirhlei tha taktak in donh a herh.

Kawlram cozah nih Saisihchuaklam cu an kauh i an remh chin lengmang. Tiva vialte thirhlei in an donh dih cang. Hriawh hlei hna zong thirhlei in an donh dih cang.

Hriawhva hlei donh lio

Saisihchuaklam cung ummi Hriawhva Thirhlei donh lio

Sipuazi Riantuannak

Sangau khua hi a pawngkam khua hna nih, eidin tirawl an cawknak le zuarnak khua pakhat asi. A khua rup lo in tangka a tam. Khuaruahhar ngai asimi cu a pawngkam khua tampi nih, ni fatin tein eidin an rak zuar i an manh pengmi asi. An lawng in an kir set bal lo. Apawngkam khuafa deuhmi hna caah an bazaar kainak, thil zuarnak le cawknak hmun asi caah, "commercial center" khua pakhat asi cang. Minung tampi cu cawkzorhnak in an i cawm kho cang.

Sangau khuami hna nih tangka tambik an hmuhnak lam pakhat cu, "cawkzorhnak" (trade) in asi. Burma in a rak lutmi thilri le sumdawnnak lei in tangka tampi a lut. Hmailei ahcun a luh ning a tha chin lengmang lai. Zalawng (free) tein India-Burma karah cawkzorhnak (trade) tuahter a herh.

Sangau hi pehtlaihnak a tha. Lunglei, Saiha, Lawngtlai le Hnahthial he an i naih. Cun Saisihchuaklam cungah a um caah Thantlang-Hakha he zong aa naih fawn. Hi bantuk in lamsul pehtlaihnak a that caah, hi tining tein a than ko asi ahcun, Sangau khua hi Champhai khua bantuk ah aa chuah zau dingmi khua asi.

Zeicatiah Sangau cu Hakha-Saisihchuak-Sangau Lampi ah a um i, Saisihchuaklam cu Kawlram cozah nih Pyidaungshu Lanmagyi (National Highway) ah a chiah cang. India cozah zong nih National Highway pakhat ah a chiah ve. A that khunnak cu Sangau in Thantlang-Hakha-Gangaw-Monywa-Mandalay lampi ah ding tein a kalmi asi. Mirang hi an rak fim tuk. Lunglei in Sangau in Saisihchuak in Hakha in Gangaw in Mandalay tiang hi an thluak ah lam an rak chiah dih cang.

Hi Saisihchuaklam hi, nikhat khat ahcun, Lairam ah lam ropui bik pakhat asi te dingmi asi. Zeicatiah, lam kalnak fiangtlai aa hawih tuk; lam an phei pin ah a tawi fawn. Azultu caah tangka dih dingmi a tlawm deuh pinah, caan zong a tawi deuh ngaingai. Angaingai tiahcun Saisihchuaklam ruangah, Mirang cozah chan in nihin ni tiang, Sangau a min a than khunnak le a thancho khunnak zong asi.

Nikhat caan khat ahcun, Saisihchuaklam hi kattaya aa phah dih te lai. Lairam khualipi Hakha le Sangau kar hi, chun hlan ah an phak te lai i, Mandalay thilri khi Sangau ah ni (2) chungah an phan kho te lai. Sittwe thilri zong khi ni (4) chungah Sangau an phan kho te lai. Cuticun Mandalay-Hakha-Sangau-Lawngtlai-Sittwe hi fawi ngai in thilri phurtlunh khawh asi te lai.

Nihin ni dirhmun in zoh tik ah, Sangau cu ramri ah a um caah, ramri cawkzawrhnak khua (border trade center) pakhat ah a tla cang. Kawlram chawlet chawhrawl pawl tampi an um caah, Kawlram in ti cawk lo in thil an lut cang. Fur thal hlan in, Saisihchuaklam in thil a lut i, atu ahcun dawr lianlian zong Sangau khua an um cang. Hmailei ahcun hi khua ahcun, "international trader show" te hna tiang in a um kho te dingmi asi.

Tourism zong hi Sangau khua caah tangka luhnak rian pipa pakhat asi te dingmi asi. Zeicatiah Mizoram tlang minthang Phawngpui Tlang, Lungcehtlang le chak deuh ah Lungleng Tlang hna zong an um rih. Atu chan ahcun, phanh ballomi phanh le midang phak setlomi phak hi uar asi caah, hi tlang pawl hna kai a duhmi pawl sin in, hmailei ahcun tangka lut tampi an hmuh te lai.

Cun Phawngpui Tlang pawng ah cozah nih an hualmi Saram Hual (sanctuary) zong aum i, Phawngpui National Park tiah an ti. Killi area in KM 50 tluk kau a si. Cuka ahcun Mizoram saram le va phun an tling. Va sunghar ngaingai hna zong 2000 ah an hmuh hna. Ramdang tourist zong nih an rak len ngai cang. Atlangpar a nuamh tuk caah, picnic tuahnak ah an hmawn tawnmi hmun asi.

Hi Phawngpui Tlang par ah, "thli in electric mei" lak ding zong mifim mi nih an tuaktan lengmang. Nikhat khat ahcun "windmill power" lianlian zong an um te lai. Tlangpar cung i a ummi Farpak timi rawn hi, min a thang ngaingaimi hmun asi. Tii zong tam ngaite a cungah a um. Hmunhma nuam taktak asi caah, picnic tuahnak ah an hman tawnmi asi. Hi hmun hrawng hi lung a leng ngaingai. Cozah nih Forestry Inn an sak i, farkung zong tam ngaite an cin.

Farpak Rawnkam lungpang (Ref. www.neliv.in)

Acunglei hmanthlak chung i, motor lampi a va langmi khi Ceural phak lai asi. Hi lam ah hin voi tampi sumdawn in kan rak kaltawn. Hi Farpak rawn zong hi voi tampi ka phan. Hmun nuam tuk asi caah, Mizo asimi poahpoah nih cun, chan chan khat chuah ah, Farpak rawn cu phak ding asi. Ngaknu tlangval ca ko ah len nuamh tuknak hmun asi. Mizoram an thancho deuh tik ahcun, hi hmun hi movie tampi chuahnak hmun asi te lai tiah catialtu nih ka ruah.

Farpak Rawn

Cun Tipi in hydro electric power zong an lak khawh rih. Tipi hi a dinnak cun KM 5 tluk lawng asi ko caaah, Tipi tii zong din cawklo in an lak khawh thiamthiam rih. Windmill le hydro electric hna an tuah khawh tik ahcun, Sangau caah tangka hmuhnak a tha ngaingai ding asi.

Mitampi nih cun Tipi le Tio aa tonnak le minthangmi Saisihchuak hmuh duh ruah ah, Pangkhua le Sangau a rak tlawngmi an tam tuk cang. Zeicatiah Saisihchuak cu Mirang an kaika in survey an rak tuahnak ah, a min a thang taktakmi hmun asi caah asi.

Tourist tampi zohmi Tipi le Tio tonnak (Bungtlang khuataw)

Hmailei Sangau Khua (The Future of Sangau)

Khua pakhat a thancho i hmunpi taktak ah aa chuah khawhnak hnga ding caah, khua uktu le hruaitu hna le khuami hna nih, khuaruah ning le riantuan ning a san le kauh aherh. Vision ngan ngeih a herh. Sangau khua zong hmunpi i aa chuah khawhnak hnga ding caah, uktu le mipi hna nih vision ngan ngaingai ngeih a herh ve.

Sangau khua hi 1993 ah a hnu bik ka phanh asi. USA ka phak hnu ah, a thlenning hi a rang ngaingai i, catialtu zong ka khuaruah a har ngaingai. Hmuh zong ka duh hringhran.

Sangau hi, atu lio a thancho ning tein a kal peng ko ahcun, hi hnu kum 50-100 kar ah, Champhai hi sipuazi thanchonak lei ah a tei te lai. Nihin ni zong ah hin, Mizoram chungah Champhai khua a zuamcawh kho bikmi ramri khua cu Sangau khua asi. Nihin ni ahcun an i hmetpuam tuk pinah, Champhai cu leikuang atam, hmunhma a rem, khuapi (city) asinak zong a sau tuk cang. District headquarter umnak khua zong asi caah, phaisa lut a tam tuk.

Asinain Manipur ramri in, Bangladesh tiang Mizoram ramri khua vialte zoh tikah, Champhai a zuamcawh khotu ding khua cu, Sangau lawnglawng asi. Hmailei kum tampi ahcun Sangau nih Champhai hi a tei te khawh men. A tei khawhnak ding aruang cu:

1. Sangau cu Champhai nakin a umnak (location) a tha deuh. Zeicatiah Mizoram khua lianlian le tangka tam taktak aa vorhnak Mara District le Lai District he aa naih pinah Lai Autonomous District khuapi pakhat zong asi caah asi.

2. Mizoram khualianlian Lunglei, Saiha, Lawngtlai, Hnahthial, Tuipang, Bungtlang le adang khua lianlian he an i naih caah Champhai nakin market a tha deuh.

3. Kawlram ah thilri tamtuk a chuahnak Rakhine Ram le Bangladesh he an i naih deuh caah, Kaladan Project highway pi he aa pehtlai te dingmi khua asi. Hmailei ahcun, "Kawlram, Bangladesh le India" ramkomh in trade center pakhat ah aa cang kho mi khua asi.

4. Kawlram ramkulh pahnih (Chin State le Rakhine State) he pehtlaihnak fawi tein a ngeih kho te dingmi khua asi.

5. Sangau Bial ah khua khua (17) a um i, hi vialte hi Sangau ah an i hngat. Cun Lunglei district khuate lian asimi Vanlaiphai, Muallianpi le Lungpitlang hna he zong an i naih rih. Burma ram lei ah Thau, Bungtlang, Sialam, Hmunhalh tiang in Sangau nih thilri le eidin supply a tuah rih hna.

6. Kaladan Project a tlamtlin tik ahcun Sittwe-Paletwa-Lawngtlai in Sangau ah India ram thilchuak vialte le Bangladesh le Rakhine Ramkulh thilchuak vialte hi Sangau ah fawi tuk in a lut te ding a si.

7. Sangau nih tourism hi thazaang a pek taktak ahau. Hmailei ahcun tourism in tangka tampi a hmuh te lai. Champhai nakin tourist tam deuh an ra te lai. Zeicatiah Sangau cu Phawngpi tlang, Lungceh Tlang le Lungleng Tlang he an i naihte. Hi tlang hna hi tlang dawh taktak an si. Tlang kai hi a lar chin lengmang i, tlangkai huammi hna caah cun kai nuam taktak dingmi tlang an si hna. Burma ram ah Thau Tlang le Ciriang Tlang kai duhmi hna zong nih, Sangau lei in an ra te lai. Hi tlang vialte hna hi, hlanlio ah India-Burma cozah nih abawm in survey an rak tuah tawnmi thlang an si hna. Cun Lairam le Mizoram ah minthangbik tivapi cu Tio le Tipi an si i, cu tiva pahnih tonnak hmuh zong hi, mi tampi nih an duh te lai.  Cucaah Saisihchuak lam lawng silo in Tipi le Tio tonnak tiang motor lam cawh chap a herh.

8. Bungtlang khuapawng ah Lotharawn timi nel kau taktak aum. Nikhat khat ahcun azapite in leikuang ah a cang te dingmi asi. Cu hmun in a chuak dingmi facang, fu, theithu le theihai dandang hna hi, Sangau ah tambik a lut te dingmi an si caah, Sangau caah market a kau chinchin rih. Alinhnak hmun asi caah, fur-thal hlan in cinthlak khawhnak hmun asi.

9. Sangau khua hi, India-Burma ramri ummi tiva minthang hna asimi-Tipi, Tio le Hriawh- tiva nelrawn hna he aa naih ngaingai. Hi nelrawn hna hi, cintlaknak hmunhma an rem taktak i, eidin phunkip-theithu, hai, sertlum, ungkung, fu, banhla, rungtuban, hmathak le zeidang anhringso phunkip-tam taktak cin khawh an si. Asian nih kan ei bikmi facang, fangvoi, bete, behrum, baa, bara, thingbahra, hmathak le zong an chuak tuk fawn. Cupinah tlawrthing zong tampi cin khawhnak hmun asi. Rua le mau a tam caah, ruatuai phunphai hmanh hi sipuazi in chuah khawh te dingmi hmunhma zong a si caah, Sangau cu sipuazi caah dirhmun tha taktak a ngeimi khua asi.

10. Nuamhak tuah a herh. USA ah nuamhnak sangbik pakhat cu "Rafting" asi. Palastic in an sermi pum phun i cit i, chun nitlak tiva hrawn i nuamh asi. Tiva ahna lei in bus nih a kan chiah i, tiva sum lei in, bus nih a rak kan don. Chun nitlak cit asi. Tahchunhnak ah Palaknel ah an i thla lai i, Tipi le Tio tonnak ah bus nih a rak don hna lai. Cu bantuk in September in June thla tiang, tii a lianh hlan tiang tuah khawh asi lai. A nuam taktak. Company lianlian an um. Sangau zong ah hi bantuk company hi tuah khawh asi te lai.

Tipi ah hi bantuk hi a um kho ve te lai

Biafunnak

Sangau hi a thancho chin lengmang nak ding caah thil (12) a herh. Hi hna hi Sangau khuami hna le hruaitu hna nih i hmaithlak hrimhrim a herh.

1. Sangau khuami hi sipuazi ah an khuahmuh ning a ngan a herh. Hmailei qah champhai hmanh a lang khote dingmi khua si kha i zuam a herh. Khualak lam zong dawh te le phei tein cawh le fek tein a um khawhnak hnga kilven a herh.

2. Saisihchuaklam hi motor pahnih fawi tein aa kian khomi le kataya phahmi lam asi a herh. A kum ning in hrawn khawhmi, Tipi hlei donh a herh. Hi hlei a um lo ahcun Sangau khua hi a thancho hnga tluk a thangcho kho lai lo.

3. Sangau khua ah Kawlram le Indiaram sipuazi thiammi mirum tampi an pem duhnak ding in khua khan a herh. Burma sumdawng le mirum hna dawt le zalawng tein sipuazi tuahter a herh. Zalawng tein cawkzorhnak (Free Trade policy) hi ram thanchonak ah a herh bikmi asi caah, Sangau khua chungah Burma mi zalawng tein cawkzorhnak nawl pek a herh. Thil tha lo tuahmi le ritnak si-ai zuarmi dah ti lo cu Burma mi hi tlaih lo ding. Zeicatiah Thailand-Burma ramri khua an thancho tuknak hi, zalawng tein duh paoh in, tourism le thilri cawkzorhnak an tuah caah asi. Sangau zong nih cucu cawn ve  aherh.

4. Khua caan a thatnak hnga le innlo him tein a umnak hnga le minung an ngan a dam khawhnak hnga, thingram zohkhenh, thinghual kaupi ngeih le thingram tampi cin chap a herh. Sipuazi ca zong asimi zawngtah, tainamkawng, tiamti, khanghmung tibantuk hna hi, tampi cin a herh.

5. Mifim cathiam an chuah khawhnak hnga, College pakhat in chiah hrimhrim aherh.

6. Khuapi asi cang i, Fire Department um le mei hmittu truck an ngeih a herh. Thinghual apan caah, lo mei le phawng mei in khuapi harnak ton khawh asi.

7. Tlangpang cinthlaknak tha an pek taktak a herh. Ceural lamtlang vawlei rawnh deuhnak paih ah cangdonh cinthlaknak tuah ding asi.

8. Cozah zung dang a luh chapnak hnga ding caah zuam a herh.

9. Sangau khuachung ah tangka aa chawh khawhnak hnga, "movie zung" le zeidang nuamhnak hmunhma (entertainment center) ser a herh.

10. Pangkhua le Sangau karlak hi inn hmun ah samh i, khua peh a herh. Pangkhua nih Sangau lei ah khua kauh ding le Pangkhua nih Sangau lei ah khua kauh ding. Cuticun khua a lianh le minung tam deuhdeuh paoh ahcun, Taxi, bus a herh lai i rian zong a tam deuh lai. Minung tam deuh paoh ah, pawcawmnak a fawi ding asi.

11. Hmunpi sinak ding caah cun "certual tha" ngeih a herh caah, tangka tampi dih in certual tha taktak tuah ding a herh.

12. Sangau nih tourism thanchoter a herh. Tourism athancho nak ding caah thil (4) hmaithlak a herh. (a) Phawngpi tlang, Lungceh Tlang le Phawngpi National Park hna hi biatak tein tourist len duh ding in ser a herh; (b) Tipi ah "rafting" tuah khawhnak ding lam kawl a herh; (c) Tio le Tipi aa tonnak ah motor lam cawh a herh; (d) Sangau khua pawng ah "tourist attraction" timi zoh nuam kawl le ser aherh.

13. Khua hmunhma a chiat ngai caah, inn tampi a karh dingmi ca ruah chung ahau. Hi hnu kum 20-50 chungah Settetfiang-Sangau-Pangkhua City hi a chuak te hrimhrim lai timi vision ngei bu tein Sangau City Town Plan timi vision ngei bu tein khua ser chung a herh. Hi khua hna an i fonh tik ahcun, Sangau nih Champhai a tei te lai. Cucu Sangau uktu hna nih i zuam ding hrimhrim zong asi.

--------------------
Chinchiah

1. Hmanthlak, cozah zung le inn kong hi Pu Sui Awr, High School Headmaster nih ca a ka kuatmi chung in lakmi asi.

2. Milu cazin hi "Wikimepia.org" (http://wikimapia.org/10748541/Sangau) in lak chinmi asi.

3. Sentetfiang khua hmanthlak hi "Mizoramjourney.wordpress.com" in lak chinmi asi.