Semnak Lairam: Riley Children's Hospital Ah Zarh Khat Chung

Tu zan cu zinglei 2:34 Am a si cang. Ka fapa Gabriel Lian te cu dai tein aa hngilh ko. Khua zaza ka ruat I ka lung aa lawmh tuk ah ka hngilh kho lo. Cucaah ka fapa nunnak a khamhtu Riley Hospital for Children timi I kan hmuhtonmi tete tlawmte ka van tial.

Riley Sizung hi a min lawng ka rak theih bal. Ka phan bal lo. Hi sizung ah ka fale an kai te lai timi cu minung sinak in ka rak ruat bal lo. Sihmanhsehlaw, ka nupi le fale July 30 ah accident an ton caah, kan fapa pahnih-Elisha Velngeih Lian le Gabrieal Veltha Lian cu helicopter in an rak zuanpi hna I, July 30 zan 7 tluk ah Emergency Room ka rak phan. Cucu Riley Sizung a voikhatnak ka phanh a si.

Riley sizung hi USA ramchung ngakchia sizung ah lianh ah paruknak (6th) a si. Mizaw ihkhun 379 a um. Riley Main campus ah 280 a um i, Riley Hospital for Chilren at Methodist Hospital ah ah 99 a um. Riley ah hin, kum fatin mizaw 17,868 kuakap a chung ah an rak i thlawp. A leng in 304,790 an rak i thlawp.

Sizung riantuantu (Staff) hi 373 an um i, rian phunphun tlaimi full-time tuanmi 1,943 an um. Cu dirhmun zoh ah, Riley hi Indianapolis khua caah tangka tampi a luhtertu sizung a si lai timi zong a fiang ko.

Riley timi hi Indiana i, catialthiam James Whitcomb Riley min zulh in auhmi a si. Amah cu catial thiam ngaingaimi a si caah, "Ngakchia biazai-tialtu" (Children's poet) tiah an rak ti. Cu pa cu 1916 ah a rak thi cang.

Riley Hospital hi pali ah aa komhmi an si. Clarian Health le Indiana University of Medicine he zong an i tlai. Riley nih hin hmun 30 ah mizaw zohnak an ngei i, hmun 16 ah special zawtnak zohnak an ngei.

U.S.News & World Reports i, USA i ngakchia sizung tha bik timi ah, Riley hi Urology (zun) lei ah that ah pathumnak an pek; zumthlum lei ah pahleihnihnak ah an chiah; hrawm le cuap lei ah 14 nak ah an chiah; chungril lei ah 18 nak ah an chiah; tluak le lu lei ah 27th nak ah an chiah. Cu tluk cun sizung tha a rak si.

Kan fale zong accident an ton lio caah, hi bantuk sizung tha ah an rak kuat hna caah ka lawm taktak. Indianapolis Laimi nih an kan timi cu, "Riley an phan cang le an thi ti lai lo. Riley cu an thiam taktak ti a si ko" tiah an kan ti. Zan 9 sizung kan riah chung ah thil sining ka zoh lengmang ah, sizung tha a rak si timi hmuh khawh a si.

An nurse le doctor te an michonhbiak a that tuk ning cu khuaruahhar a si. An mizaw zoh a tuan tuk fawn. Ka dang ahcun mizaw an zoh i, zinglei 9:00 Am hnu deuh a si tawn i, an nih cu 6:30 Am ah kan zoh tawn. Mit a kuh ning hi chim awk thalo a si. "Ziah mah tluk tuan in a kan zoh?" tiah nurse ka hal i, surgeon pawl hi an phazo lo tuk. An i manh lo tuk caah asi tiah a ka ti.

Pathian nih hi ka sizung ah lam a kan hruai i, ka fale zong pahnih dam tein an thlawp hna caah, Pathian cungah ka lawm. A zohkhenhtu vialte Doctors le nurse te cungah ka lawm. Eidin pe tu in, inn thiantu dihlak cungah ka lawm. Hi sizung kan um chung ah a rak kan zohtu, Indianapolis khuami hna le lamhlat in a rak kan zohmi vialte cungah ka lawm. Pathian nih thluachuah pe cio ko hna seh.

Sizung kan rat lei ahcun, ngaihchiatnak, lungretheihnak le khingrihnak phun zakip he kan ra nain, Gabriel le a nu le a u le dam tein an um caah, lunglawmhnak he a tlung ding kan si. Ka lawmh tuk ah a ih zong ka it kho lo i, hi ca hi, Gabriel room E9229 in ka tialmi a si.

Hi Riley Hospital ah zan (9) kan riahmi hi, ka nunchung ka philh kho ti lai lo. Ngaihchiatnak a si ko nain, kan dam caah lung aa lawm tuk i, kan room E9229 hi "Kan Inn" bantuk ah ka ruah. Chuahtak lai hi sian a um ti lo. Zeicatiah kan pafa tein le kan nupa farual in kan thutdir tinak le tirawl kan eidin tinak a si caah a si. Kan nunchung ah philh khawh ti lo dingmi "Room" pakhat a si.

Riley Hospital kan um chng ah, kan hmuhtonmi tete hnu ah kan peh than te lai. Hi ca hi, sizung kan chuah lai zan ah, philhlonak ah ka tialmi a si. A tanglei ah hmanthlak le Riley Sizung ah thil phun dang tete ka tonmi kan peh than te lai.