Asinain, minung kan nunnak ah, khawn maw ka ah, caan caan khat ah, mi nih kan cungah tuah hna seh ti kan duh bantuk in midang cung ah tuah a herhnak caantha (opportunity) tete kan rak ngei tawn.
Hi lak ah ka philh khawhlomi thil pakhat cu, Mandalay i Paletwa peng male nurse a thimi pa ruak kan vuimi asi. Amah cu nupi a ngei; fa (3) a ngei; a paw a fak i Mandalay sizung ah a rak um. Umpitu a rak ngei lo. Cuka ahcun a thi. Ruak latu le vuitu a ngeih lo i ni 3 tluk asi cang caah, Mandalay Lai Sianghleirun siangngakchia nih rak vui hna seh ti asi.
Cu ruak kan vui lio cu, Mandalay college ah kum khatnak kai lio asi. A caan cu Apirl 1985 kuakap asi. Lai Sianghleirun siangngakchia a kan hruaitu pakhat tleicia Salai Van Tum nih, "Aa Vung ruak vui ding kan ngei i, ruakvui rak i thawh ve" tiah a rak ka sawm. Mandalay siangngakchia tampi kan rak kal hna. Nu he pa he, bus 5 tluk hrawng kan rak khat (Salai Van Tum cu MIT in BD a dih hnu ah, pastor a tuan i, chantim hlan ah mual liammi asi).
Mandalay University (Main Campus)
Mandalay khua April thla cu, a lin ngai cang. Ruak cu aa rawk pah cang ti a kan chimh. Sizung ruak chiahnak cu, inn sawhsawhpi asi ko. Ruak chiahnak cu tikhal cu van chim lo, pangka zong a um lo. Mandalay sizungpi ngengmang a rak niam taktak. Ruak cu kik seh tiah tikik sawhsawh in sur...sur in an kah hna.
"Ziah a kikmi ruak chiahnak a um lo maw?" kan ti hna. "A um ko. A kikmi ruak chiahnak cu, mirum le bawi deuh lawng chiah khawh asi" tiah a kan leh. Kawlram ngaite kha. Thihnak ruak cung tiang in, bawi le chia, sifak le mirum rak i thleidan a rak si i, sifak santlai lo caah ngaihchiat a zual. Atu bantuk in a ho nih theihhngalh lo mi hna cu a kikmi a umlonak hmun ah chiah asi caah, ruak an thut a fawi tuk.
Ruakinn pawng cu kan phan. Nungak pawl cu an hmur lawng an i hup ko cang. Minung fa nih thli hmanh dawp khawh a si ti lo. Inn tual hrawng cu thopaw an zuang lulh ko. Kawl le Kala ruak cawng pawl, mider nawn tete cu, cakuak khal ko an i zuk i, ruakinn hmai ah an thu ko. An hmur zong an i hup lo.
A hodah ruak lak ah a lut lai tiah hruaitu cu van vun au. Tiddim, Falam, Hakha, Thantlang siangngakchia kan tampi nain, ka lut lai a timi cu, an um setsai ti lo.
Khua ka ruat. Thau ka um lio ah, "Tlawm-ngaih nun" timi kong a rak kan cawnpiak tawnmi kha ka thinlung ah a hung chuak. Hi male nurse pa hi, Paletwa a um lio ahcun, mi tam tuk caah thatnak a rak tuahmi, mi tampi damtetu, mi nih hmanmi le herhmi pa a rak si ve lai. A nupi caah dawtmi pasal asi. A fale caah bochantlak pa a si. Nihin ni ah, nupi fate, u le nau hmuh lo nak ah, ruak latu le vuitu hmanh ngei lo in a thihmi cu, a fak tuk. Keimah zong hi bantuk ka si kho ve ko timi mah tanghma benhnak thinlung a hung chuak. Jesuh nih "Ka cungah tuah hna seh ti na duh bantuk in midang cungah va tuah ve" tiah a kan cahtakmi bia zong ka lungchung ah a hung chuak than. Cucaah, hi a ruak lak hi, ka caah caantha pakhat asi. Keimah ka lut lai ka ti i, mi 5 kuakap he kan lut.
Inn chung kan luh tikah, ruak cu a dawtdawt in tam tuk a rak um. Nu ruak he, pa ruak he. Ngakchia he tar he. Ralkap ruak zong kambal puanpipi an rak khuh hna le an rak um. Ruak cu kan kawl i kan hmu kho zawkzawk lo. Ruak cu puan an khuh hna i, an puan kan van on hna. Ruak pakhat cu kan van on i, a vun vialte puan ah aa benh dih. A man ngacha ko cang. Ruakla tu pawl ruak tonghtham ning cu, uico ruak le vok ruak tengh in an tengh ko hna. A fih zong pakhat hmanh an fih lo.
Ruak a tam ngai caah le a thut ngai caah, kan lung zong a mit dih. Pavuah in kan hmur kan i huh. Zeitluk kan i huh zong ah kan dawpmi thli a thut tuk caah, kan celh ti lo. Minung ruak thumi cu a rim celh ding a rak si lo. Minute 4 tluk ceu kan um kho. Ruak hmu lo in kan chuak. A leng thli thiangmi kan va dawp i, kan lut than. Ruak kha number an pek ko hna nain tha tein a changchang in a rak um lo caah, a hmuh a har ngai.
A voihnihnak kan luh hnu ah, minute 3 tluk ah ruak cu kan van hmuh. Ruak latu pawl nih ruak cu a hlonh in an van hlonh hna. Kan nih nih, aa rawk sual lai tiah ruak cu ziaphe tein, ruakkuang chung ah khumh ding in kan van cawi. A rit ngai cang. Ni 3 a lumnak ah chiahmi asi caah a puar dih cang. A lu lei kha puan in kan van cawi i, a ka in a hang a thumi tam tuk a chuak. A nam tuk ah a celh in celh a rak si lo. A hngawng tlongh aa tim i, ziaphe tein kan puan in kan cawi.
Ruak cu kan van chuahpi i, ruak phurtu bus pakhat cungah kan chiah. A hang zong a chuak pah lengmang. Ruak cu kan kalpi. Lampi ah motor, cycle le minung aa tet ngai caah a fum le kan fum tuk fawn i, a rak har ngai. US bantuk in ruak usapek le kianh zong a rak um lo.Thopaw nih ruak kalnak paoh cu an zulh. A hnu in a zulmi motor zong cu kan thaw kan rak dawp kho set lo. Cuticun lampi ah tet ngai in ruak cu kan rak thlah hna.
Mandalay khualak lam. Hitin lamtetnak ah ruak thlah asi.
Thlanmual cu, Mandalay-Maymyo motor lam kam ah a rak si. Mandalay UCF pastor nih a rak vui (Rev. Pa Ni Maung asi rua tiah ka ruah). Thlanmual cu khuahriang ah a kihdaihnak te ah a um. Mandalay in a hlat ngai. Leikung kam ah a ummi thlanmual a si. Pura le thingkung bor tete an um i, thlanmual cu lung a rak leng tuk. Thlanmual kam ah ka dir i, Shan ram lei tlang hna ka hei cuan pah hna. Khua ka ruat. "Aw, a dam lio ah amah cang cun a rak i duh ngai ve mi asi ko lai. Atu a nupi le fale theihlonak ah mual a liam ko hi cu. Hihi kan pa thlan asi ti in a nupi le fale tal nih an hei hmu te hnga maw?" ti ka ruat i, ka ngaih a rak chia tuk.
Cuticun, ngaihchia ngai in inn ah kan rak tin.Inn kan phak cangka in ka kholh. Kan rawl a tam i zanriah ei ding kan van tim. Tiddim kan naupa nih cu zan ngelcel cu, ngapih le kawhra hnah a rak kio ngelcel. Ka rawl a tam i, zei ruat lo in ngapih le kawhra hnah kio cu ka van i suah. A rim a thumi ka van hnimh bak ah, minung thu haw ka theih i, ka luak ka luak. Ka ei kho ti lo. Cu zan cu lakphaktii he lawng ka it. Ahnu Mandalay sianginn kan kai chung vialte, ngapih cu ka ei kho ti lo. Ruak rimchiami kha caan saupi, ka chungril ah a rak cam caah asi.
Kha ruak kan rak fim lio kha, a liamcia kum 30 deng lio asi. Kan rak fim lio ahcun, fih a nung, harnak tampi a um ko nain, nihin ni ahcun i lawmhmi le lunghmuihmi thil pakhat an si cang. Thil fate a si nain, kha ruak lak ah ka tel ve mi te kha, ka nunnak ah ka lungsi ngaimi le ngaichih bak lo mi thil pakhat si. Ka caah midang caah thiltha fate tuah khawhnak caantha a si tiah ka ruat i, lunglawmhnak tampi ka ngei.
Ka nunchung ah ruak voi tampi ka vui cang. Cu vialte lakah, Mandalay i vuitu ngeilomi ruak kan rak vuimi te kha, ka philh khawh lo cemmi, a har cemmi, ka lunghmuih cemmi le lawmh cemmi ruakvuinak asi. Zeicatiah, vuitu ngeilomi ruak vuinak ah ka tel khawh ve caah a si. Kei zong vuitu ngei lo in thi ve ning law timi ka ruah ah, kha ruak ka vui ve mi te kha, ka nunnak ah ka lunghmuihmi ruakvuinak asi zungzal ko lai.
Zeicatiah, "Mi nih ka cungah tuah hna seh ti na duh bantuk in midang cungah ah va tuah ve" ti pei asi kha!
No comments:
Post a Comment