Number 40 Abiapitnak?

Nitlaklei nunphung ah an timi cu, "Life begins at 40" (Nunnak timi cu kum 40 ah aa thawk) ti asi. Zei ruang dah an ti nak chan asi hnga timi cu ka thei lo. Asinain minung sining zoh tik ah hin, kum 40 phak hlan ahcun lung a fim thlu kho lo ti a si. Cauk pipa tial tik zongah, kum 40 tang ahcun va tial hlah u ti asi.

Mifimmi tampi nih an chim tawnmi cu, minung hi  kum 40 tlin hlan ahcun palh khawh ngai asi an ti. Zeicatiah an hmuhtonmi thil a tlawm rih caah asi. Vawleicung hruaitu minthang tam deuh cu kum 40 cung lawngte an si. 40 tang cu an tlawm ngai. Sianginn zongah Ph.D tiang hna phanhnak ding ahcun kum 40 kuakap si a rak hau ko. Ram hruaitu taktak le Party lianpipi hna hruaitu si ding ahcun kum 40 phak a rak herh. University i professor, dean, president hna si ding ahcun kum 40 fai si a rak herh. Sizung uktu si ding zongah kum 40 fai si a rak herh.

Cun minung kan kum hi tuak tikah kum 80 kuakap hi tam cem an nunmi asi. Cucaah kum 40 hi a laiva bak asi. Cucaah 40 ahcun, minung hi zeibantuk minung dah asi lai timi khi a phi a chuak pah cang. Kum 40 phak i na life ah zeihmanh a phi a chuakmi a um rih lo ahcun, khua ruah a hau cang. Na tlolhmi tam tuk a um cang tinak asi. Na timhlamh lo mi tam tuk, tuan ding le tuah ding tlolhmi tam tuk aum cang tinak asi.

Cucaah Pathian zong nih, number 40 hi biapi tuk ah a rak chiah ve nak kha bible hmun tampi ah kan hmuh. Bible cauk ah "40" hi voi 146 a lang. 40 nih hin, thil a tlinnak (fulfillment) timi hi a langhter. Cucaah bible zong ah 40 hi tuanbia tampi ah kan hmuh. Cucu thil khuaruahhar ngai pakhat asi i, Pathian hi number 40 in rian a tuannak kong hi atanglei ah zoh chih ding ah ka tial.

1. Abraham nih Sodom le Gomorrah hrawh lo ding caah "Miding 40" hmuh ding in Pathian a nawl (Gen. 18:29)
2. Exodus cauk hi Daal 40 ah an then.
3. Pathian nih buanchukcho in vawlei hrawhnak caah ni 40 le zan 40 ruah asurter ((Gen.7:12); Noah tilawng tii nih a cawinak ding caah ni 40 a rau (Gen8:6).
4. Noah nih tii a zor i tlangpar a langh hnu ni 40 ah langak kha a thlah (Gen 8:6)
5. Egypt mi hna nih miruak hi thutlo sii an thuh hi ni 40 a rau. Jacob zong ni 40 thutlonak ding sii an thuh (Gen. 50:2-3).
6. Moses cu Pathian riantuan aa thawk ah kum 40 a si (Lam 7:23)
7. Moses Egypt ram in Midian ram ah a zaam tikah kum 40 ramtang ah tuu a cawng (Lam 7:30)
8. Moses cu Sinai Tlang i Nawlbia 10 lak lio ah ni 40 rawl a ul (Deut 9:18,25)
9. Moses cu Kum 40 asi tiang Egypt siangpahrang sinah a um; ahnu k.40 chung Midian ram ah tuu a cawng; a hnu kum 40 ramcar chung ah Israel mi a hruai hna i kum 120 ah a thi. A nunnak le ariantuan kum hna hi 40+40+40=120 in an i then (Deut 34:7)
10. Mi pakhat cu dantat in fung tuk ding asi tikah a tambik ah voi 40 tuk asi (Deut 25:3)
11. Israel mingiatu nih Canaan ngiatnak caah ni 40 an rau (Number 13:25)
12. Israel mi hna Canaan ram luhnak ding caah kum 40 thetse ramcar ah an vai (Deut 8:2-5)
13. Samson nih a tlanh hna hlan ah, Israel mi nih Philistine cu kum 40 an renh hna (Bia 13:1)
14. Biacaihtu Othniel, Deborah, Barak, Eli le Gideon hna nih Israel mi kha kum 40 cio bia an caih hna (Biacaihtu chung)
15. David nih a thah hlan ah Goliath nih Saul ralkap kha ni 40 a hrocer hna (1 Sam 17:16)
16. Elijah kha Mt. Horeb phaknak ding caah ni 40 le zan 40 a rau (1 Siang 19:8)
 17. Prophet Ezekiel cu Judah mi sualnak hmelchunhnak caah a orhlei kap a sirlei in tiding lo le rawl lo in ni 40 a it (Ezekiel 4:6).
18. Jonah nih Nineveh khuami kha ni 40 ah Pathian nih an hrawh hna lai tiah a ti hna (Jonah 3:4)
19. Jesuh cu ni 40 le zan 40 rawl a ul (Matt 4:2)
20. Jesuh cu thawhthan hnu ah a zultu pawl sin ah ni 40 chung vawlei ah khua a sa (Lam 1:3)

Hi acunglei ah hin bible ah number 40 biapi taktak in a  langhnak kan hmuh. Zei ruang dah asi hnga timi cu ka thei kho lo nain, hihi ruah setsat manh tikah, hi thil nih a langhtermi cu, "Pathian cu caan le tinhmi ngeite in rian atuan i, Amah hi number 40 theng te zong hi aa tinh in rian a tuanmi asi ko" timi tu kha fiang tein a langhtermi a si. Hi number 40 hi Pathian number pakhat asi ko timi kha bible nih fiang tein a langher i, asinain a ruang (why?) timi cu kan thei kho rih lo!!!