"Parcel" le "Samhri Sih"

Laimi nih biafang dawh taktak tampi kan ngei hna. Cu lakah biafang dawh bik pakhat cu, "Samhri sih" timi a si. Hi biafang hi, "ngaknu tlangval an i thitlak tik ah hman a si. Nu le va an i thitlak tik le then caan zong ah hman an si. Hi bia hi, aa dawh lawng si lo in, mi thinlung a hnem khotu biafang, thawnnak a ngei taktakmi biafang a si.

"Samhri sih" nih a chim duhmi cu, "Sam cu tam lengluang ko hmanh sehlaw tha tein hri in sih ahcun an i pehtlai viar i, dawh tein sam cu a um ko. An i then kho ti lo. An i fon ko" ti duhnak asi.

Hi "Samhri sih" biafang hi, kan pipu hna nih an rak hman ngaingai. Laimi cu sonhtarh a hmang ngaimi miphun kan si caah, nu le va a duh komi zong an i then sual tik ah, "Samhri sih an si lo caah asi" tiah kan ti hna. Krihfa chan zong ah cu bia cu kan hlaw kho hlei lo. Nu le va an i then ahcun, "Pathian nih samhri a sih hna lo caah asi" tiah kan ti tawn. Cun ngaknu tlangval an i thitlak tik i, thluachuah pek kan duh hna tikah, "Khuazing nih samhri sih ko hna seh" tiah kan ti hna.

Ngaknu tlangval an i duh i, an i hal. Aa um ding an si. Thil pakhat khat ruang ah an i co kho lo; an i pelh. "Khuazing nih aa co ding in a khan lo caah asi" tiah kan ti. Hi kan Lai biafang tete hi an i dawh tuk. An thlum tuk. Nuva then ni le i co lo ni ah, hi biafang hna nih mi thinlung a hnemh khawh tuk.

Ka nun chung ah ngaktu tlangval aa duh taktakmi aa co lo mi tampi an um. Aa duh taktakmi, a comi zong aa thenmi le thih tiang aa then thaimi tampi an um ve. Azeihmanh va sih sehlaw, zei bantuk in an i co le then zong ah, "A comi zong, samhri sih an si" tiah kan ti hna. A co lomi cu, "Samhri sih lo an si caah asi" tiah kan ti i, kan i hnem tawn.

Asiahcun, "Nu le va then te hna hi samhri sih lo ruang maw asi hnga? Nu le fonh te hna zong samhri sih ruang ah maw asi hnga?" timi cu ruah ding ngai a um fawn.

Samhri sih kong ka ruah fate, ka ngakchiat lio i, kan innpa nu va ngeih kong hi ka ruat theu tawn. Kum 4 hrawng ka si lio asi. Kan innpa nu cu va a ngei. Api sin ummi asi. Api nih Laivok sum 5 bak a zuat piak i, a va ngeih ni ah an rak that. Vok cu feikawl in an khawh i, an rak thanh. Kan rak i nuam tuk. Pa inn zong cu innpa thiamthiam a si. Inn khat hmanh an i dang lo. Nu inn le kan inn cu aa chang. Nu inn le va ding inn zong cu a va chang ve than.

Puai cu inn (2) in tuah asi. Sahrawng an i pe. Mei cu a khu cum ko. Mi cu khuapi tein kan chuak. Kan inn hrawng cu a tur bak in kan tur. Kan rak i nuam tuk. Chunh thahnak chuncaw cu kan van ei hna. Chuncaw ei dih ahcun, puai a tuahmi hna cu an tian zuahmah. Puai cu a dai zuahmah i, a dai thai. Zanlei sang ah kan van theihmi cu, "An i then than cang" ti a si. Nihin ni tiang a ruang ka thei lo nain, "Thih tiang an i then thai ko." Cucu "samhri sih an si lo ruang ah maw an i then hnga? Thil dang ruang ah dah?"

Laimi ramdang kan kal hnu in, Laiholh biafang thar aa chapmi cu, "parcel" cah ti a si. Ramdang ummi Lai pa nih, Kawlram tibantuk ummi Lainu a lang in aa cah i, nu le pa hnatlaknak tein, a lang in vaa an ngeihter mi kha, "parcel cah" ti duhnak asi. Hi "parcel" cah ruang ah, chungkhar a dirh khomi tampi an um i, chungkhar saduhthah ning bantuk silo in a vaivuanmi zong tampi an um ve.

Cu chungkhar dirh khomi hna cu "samhri sih an si" tiah maw kan ti hna hnga? A fon kho lo mi le chungkhar dirh kho lo mi tah "Samhri sih lo an si" tiah maw kan ti hna hnga? Cucu careltu na ruah ning asi ko lai. "Parcel" nih hin, chiatnak le thatnak he aa ratpi chih i, "Samhri sih le sih lo zong aa ratpi chih kan ti hnga maw?"



Naite ah, nuva thennak ah phun dang ngaite asimi AFP ah an tial. India zong hi, Laimi bantuk in nu le pa chungkhar nih ngaknu tlangval hi fonhtonh an si ve. Hi India ram ah hin, ngaknu le tlangval an hmuh setsai lo zong ah, nu le pa nih fonhtonh chawm in thitlakter an si tawn hna.

India nu va a ngeimi cu, an puai liopi ah, "Ka vapa ding hi ka va duh lo" tiah ati i, an puai tuahnak inn in lo daih a zaam. An chungkhar vialte le kawhmi hawikawm vialte cu, a hnulei chit in a kaltak dih hna. Zei ti awk thei lo in ar ko in an um hna. An i umnak cu, Uttar Pradesh ramkulh ah a si.

Nu lei chungkhar chimnak ah, "An fanu nih a vatmi pa kha, a catang kong ah a lung a hrin caah nu nih a hniksak i, kanan a awn lo caah a zamtakmi asi" tiah police nih an ti. Nu cu anu le pa, va lei nu le pa, chungkhar nih an nawl len zong ah a duh ti lo i, a chuak i lo ko in a zam. Cu ti a zamnak a ruang cu, a vatmi pa kha, kanan fawimi te a tuakter. Cu kanan cu 15 le 6 fonh ti khi a si. A phi cu 21 ding asi nain, pa nih a phi a chuahmi cu, "17" tiah ati i, nu cu a thin a hung tuk i, a zamnak asi an ti.

"Ngaknu nih, a vatmi pa cu, catang ngeilo asi timi a theih tikah, vaat a duh ti lo i, a zamtaknak asi" tiah an khua police Iddu Hason nih a chim tiah AFP nih an tial.

Palik an auh hna i an remhchun hna nain, nu nih a duh ti lo i an fonh kho ti hna lo. A donghnak ah, nu le pa nih chaw an i manhmi le thilri an i thlenmi vialte an i khirh than i, an puai aa rawk thai.

Hi hna nupa hi tah zei ruang dah an i then kan ti hnga? Samhri sihlo ruang ah maw? Nu le pa hnih fonhtonh chawm ruang ah maw? Asiloah "pa ca a thiam lo ruangah asi kan ti hnga dah?"

Zeihmanh va sih sehlaw, parcel cah asi pek ah, nu le pa fonh asi pek ah, mah duh tein i ton asi pek ah, "thennak" cu micheu zawn ahcun a chuak than theu tawn. Cu thennak a chuahtertu cu, thil pakhat khat a baumi te ruangh ah asi tawn. Asiahcun hihi ruah ding asi.

Dawtmi he samrhi sih sinak ding le co nak dingah cu a baumi te cu zeidah asi hnga?