Biaknak lei hruaitu hna nih, "666 cu a hodah asi hnga?" tiah vawlei hruaitu hna min zoh in, aphunphun in an leh i, an i khat cio hna lo. An i dang dih. An i khahmi pakhat te lawng aum. Cu an i khahmi cu, "An dawngte in an palh dih" mi lawngah an i khat. Cu dah ti lo cu an i khahmi a um lo.
Krihfa hruaitu tampi nih an mah le chan hawih cio i, 666 kong an rak chim tawn i, an rak puhmi hna cheukhat cu hihi an si. Hi hna hi a liamcia kum tam nawn lio ah an rak puhmi hna hruaitu cheukhat an si.
1. Roman Emperor Neo
2. Syria ram uktu Antiochus Epiphanies
3. Emperor Charlemagne
4. Emperor Napoleon Bonarparte
5. Hitler
6. Catholic Hruaitu Pope (Pope phunphun hi an rak puh hna)
Greek Bible hlun pkhat Novum Testamentum Graece timi Biakam Thar cauk ahcun 666 hmang lo in 616 tu a rak hman. Hi kong zongah elnak tampi a um. 616 ca zongah minung aphunphun an puh than hna. Daniel Cauk chung zoh tikah, "Sahrang" tiah a timi hna pawl khi "Minung" (Person) silo in "Empire" (Pennak Ram) tu kha a sawh caah, Biathlam chung i "Sahrang" (Beast) zong hi "Minung si lo in Pennak" tu pei a chim duhmi asi ko cu tiah an ti i, vawleicung pennak he zong a epchun mi an tampi ve than.
Cuticun chan tiluan a kal lengmang i, vawleicung tuanbia zong a kal ve lengmang. Cucaah nihin ni tiang in 666 cu aphunphun in a sullam an leh peng ko rih hna.
Kan mah minung kan si kan i hngalh hnu ah 666 sullam an leh cemmi hna cu hihi an si.
1. WCC hi 666 asi atimi Krihfabu an tampi. Ka blog ah ka tial cang.
2. Pope John Paul kha 666 asi te lai a timi an rak tampi. A thi cang i, chim awk aum ti lo. 666 athi cang tiah leh a hau ding in a um than.
3. Saddam Hussein kha Gulf War lio ah khan, 666 phurtu asi lai tiah an rak ti than. Arab nih an tanh lai i Pathian fale asimi (Israel) an hrawh lai tiah aphunphun in an rak chim than. Saddam zong cu hri in an thlai i alo ve than. 666 athi ti tluk asi than hawi.
4. EU (European Union) hna hi ram (10) an tlin tikah "Sahrang (ki) Pahra" timi an si te lai an rak ti. Magazine le cauk phunkip a chuak. An zungpi hmanh kha, Babylon i an rak sakmi Babel Innsang bantuk asi an rak ti. Atu ahcun ram 28 an si cang hawi. EU zong cu an i rawk dah ti lo ahcun ram (10) ah va chuah awk a har ngai cang.
Kawlram in a rami Evanglist pakhat nih cun, "Vawleicung ram hna hi ram 10 in an i ser thluahmah. ASEAN ram zong ram 10 in an i ser. Cun EU hi ram 28 an si a thei lo i, "Ram 10 an tlin tikah 666 an chuah te lai?" tiah a kan cawnpiak. Kan dih hnu ah, "Saya ram 10 an tlin tikah na ti mi cu, atu ram 28 pei an si cang cu?" tiah ka ti i, "Asi maw? Ka relmi cauk ahcun ram 10 tling rih lo in pei an chim ko cu?" tiah ati. "Saya, na cauk cu zeitik chuahmi dah asi? Aho tial mi dah asi?" tiah ka ti. 1985 hrawng chuahmi asi? Tuluk ram in an chuahmi an lehmi asi" tiah lungthiang tein a ti.
Saya "Na cauk relmi le atu na kan cawnpiak caan hi kum 30 aa thlau cang i, cu chung ah vawleicung tuanbia le thil sining cu tam tuk heih aa dang cang cu? ASEAN ram zong ram 10 in an i ser na ti le atu East Timor hi a luh lai caah ram 11 an si lai. Cuti asiah "Number 10 kha biapi ah na chiah i vawleicung pennak ram hi ram 10, ram 10 in an i ser; EU zong ram 10 an tlin tikah sahrang number an si te lai ti phun in na kan cawnpiak mi hi, ram 28 an si cang; ASEAN zong ram 11 an si lai. Cu tikah zeitindah na kan cawnpiak ne lai?" tiah ka rak hal. Lehnak hrimhrim a thei lo.
Chim ahcun chim awk asi hnga lo. Cucaah hihi ruat u sih.
Hitin an palh lengman ne ah, zeitindah 666 cu kan leh ne lai? Pennak ram asi kan ti lai maw? Minung (person) in dah kan leh lai?
Mizoram in Kawlram in USA tiang, nihin ni zong ah 666 cu "proof" tuah kan i tim peng rih. Cu hlan ah kum 1800 hrawng an rak proof khawh lo mi kha, atu chan zongah "proof" kan i tim peng ko rih. Mizo le Laimi phungchimtu cheukhat zong nih proof tuah kan i tim peng ve. Biatak maw kan chim? Lih dah kan chim?" timi cu mah te nih i theih ding cio khi asi.
Kum 1800 an proof i an palh pengmi cu, atu zong ah minung pakhat cu "Sahrang number phurtu 666 asi" tiah an puhmi minung pakhat a um. Amah cu liberal asi an ti. Muslim asi an ti. Pathian zumlomi asi an ti. Amah nih hin 666 a chuahter lai tiah an ti. Atu zong ah computer chip an ser cang i, an hman cang tiah an ti. Cu pa nih cun mi vialte ban ah computer chip a khumh lai i 666 a chuahter lai an ti. Video le YouTube tiang ah an piah. Cu pa cu midang an si lo; President Barack Obama asi.
Kawlram in a rami phungchimtu cheukhat nih cun, Pre. Obama cu "Sahrang 666 bak asi" tiah an ti. Laimi phungchimtu tampi zong nih kan ti ve tawn. Laimi zumtu aa timi Krihfa tampi nih an ti ve thiamthiam. Kawlram in a rami saya pakhat le bang nih cun, "Obama hi sahrang 666 bak asi. Atu computer chip a chuah cang. 666 hi a chuak zau lai; a rau hrimhrim lai lai lo. Obama nih a chuah cang lai" tiah a ti.
Asinain a rau lo. Obama kuttang ah "Asylum a sawk colh." Ruah a hau. Obama kha 666 asi ti tung ahcun "asylum le refugee" timi kha amah cozah uknak tangah sawk ding asi lo. Hiti thil tuahsernak cu, kan chung ah BIATAK a um lo ti kha a fiang. Kan chimmi bia, zumhmi le tuahsernak a dang in an kal chung paoh cu kan chungmuru ah BIATAK a um lo. Cucu Krihfa hruaitu le zumtu aa timi nih kan fian cikcek a hau.
Obama kha 666 asi kan ti ahcun, amah president atuan chung paohpaoh ahcun, "Tangka bawmhnak hna hi sawk ding asi lo. Obama cozah chuhami Food Stamp hna ei ding asi lo. WIC hna ei ding asi lo. Cun Medicaid hna sawk ding asi lo. Sizung um tik zong ah HCAPP le Care Assurance tibantuk cozah bawmhnak hna sawk ding asi lo. Asylum le Refugee zong sawk ding asi lo.
Laimi USA ah minung zeizat dah refugee kan si? Minung zeizat dah assylum kan si? Minung zeizat dah food stamp kak ei? Minung zeizat dah Obama bawmhnak tangka kan sawk? Minung zeizat dah WIC kan ei? Minung zeizat dah Medicaid kan sawk? Medicaid a thi lai? Food Stamp athi lai an ti hmanh ah kan thinphan kha zeidah a lawh kha? Obama cozah bawmhnak hmuhnak ding caah voi zeizat dah "lih kan chim?" Voi zeizat dah lahkhah hman lo in kan piah? Voi zeizat dah lahkhah kan i zorter? Voi zeizat dah tax hman lo in kan tuah kha?" Amah bawmhnak le amah chung in a chuakmi theipar vial duh ngang tung, amah vial cu 666 a si ti cu lih fangfak bak asi. Kan chung ah BIATAk aum lo.
Hi kong ah hin, Pastor cheukhat le Evangelist cheukhat zong zei hlei hlah. Piangthar zong zei hlei hlah. Khamh fiang zong zei hlei hlah. Baptist zong zei hlei hlah. "Tist lo zong" zeihlei hlah. Zeibu zeibu zong zei hlei hlah. Kawlram Krihfabu kan i lo vek. Obama cozah tangah lih kan chim vek. Cozah bawmhnak la mi vek kan si. USA Obama tangah "himnak" kan kawl vek. Phundang in chim ahcun, "666 tangah kan i khuhlung (refuge) vek" tinak asi.
Kan kaa chimnak ciammam ahcun, a zum tukmi kan lo tawn. President Obama cu "666 asi; Sahrang asi" kan ti. Kan huat tuk. Kan tuahsernak ciammam ahcun, "Amah tuahsernak tangah aa dawrmi kan si. Kan tuahsernak zoh tik ah hin, Laimi hi Obama biami kan si ko hna lo maw? tiah ruah awk aum.
Ziah Obama biami kan lawh? Biak timi cu zeidah asi?
ObamaCare sawk ah a nam in kan i nam. Food Stamp, Medicaid, WIC, Tangka bawmhnak sawk ahcun, Obama cu a nam in kan i nam. Acheu nih "Unemployment" tiang in hmuh kan izuam rih. Tax tuah caan phak ah lih chim ahcun, Laimi hi, "D" (Kung-htoo) hmu ding le Champion hmu ding kan tam tuk.
Laimi Krihfa kan zumhnak le tuahsernak hi, a cuai thlai cikcek a hau cang. Kan chung ah BIATAK tlawm tuk.
Asau tukmi tuanbia kha a tawinak in tial ahcun, President Obama cu 2016 cun a caan a dih cang lai. Kum khat le cheu lawng a caan a duh cang. Asiahcun hi kum khat le cheu chung ah 666 ah aa can tung lo ahcun asiloah number 666 a chuah tung lo ahcun asiloah computer chip kan taksa chung i a rawn tung lo ahcun, zeitindah phung kan chim than te lai?
Careltu nih hihi ruah a herh. Pathian duhmi bia chim thiam le naal hi asi lo. Biatak chim tu hi asi. 2016 a dih tik ahcun, "Naal prophet pawl chimmi bia vialte cu, phozar an si dih te lai." An chimmi a hman ahcun "Prophet hman an si lai i, an hman lo ahcun prophet deu an si lai." Aho dah Prophet hman asi? Ahodah naal prohet asi? timi an mah BIA lila nih bia a khiah te lai. Cu caan cu a ra lio. A ra thluahmah cang. Cu caan nih "BIATAK" cu a phuan te lai.
Cu caan a phak tikah, careltu nih bia khiak te ko. President Obama hi 666 asimaw timi cu!!!
No comments:
Post a Comment