Thlachiat Ruahnak

Voikhat cu "thlachiat ruahnak" timi bia hi ka chim tawn i, kan nu a lung a fiang kho lo. Zeicatiah anih cu Yangon ah a thangmi asi i, Kawl holh lawng a theimi asi. "Cucu zeidah asi?" tiah a ka hal i ka leh piak kho fawn lo. Thlachiat ruah timi hi, Laiholh zong hin leh awk a har ngai thiamthiam. A ruang cu hi biafang a rak chimtu kan pipu hna nih ca an tial lo caah asi. Zawndamh in leh a hau ding asi.

Kan nu nih, "Kawl holh le Mirang holh in tah zeidah asullam asi?" ati than. Ka ruat i ka thei kho lo. Mirang holh in van leh ding tiah ka ruat i, "Love" ka ti ah le a tlinh lo. "Kindess, sympanthy, loving-kindess" ka ti ah le a tlinh lo. Kawl ca in van leh ah le ka harh chinchin. Thlachiat ruahnak timi hi, Kawl le Mirang holh ah ka hmu lo. Dingteu in leh ding bia a um rua lo tiah ka ruat.

Hi bia hi kan pipu hna nih an rak hman ngaingaimi biafang asi. Nihin ni Laimi zong nih kan hman lengmang. Aa thawknak le a sullam taktak cu kan thei kho lo nain, a fawi nakin atanglei zawn ah hin kan hman tawn.

1. Mi nih duh paoh in a kan vuakden le bia fakfak in an kan ti zong i, leh kan duh ko hna zong ah, "A tha lai lo" timi ruat in in le daite in um duh tik ah hman asi.

2. Mi nih a kan vuakden tik le thahnawn tik zongah lehrulh cham lo in, "a tha lai lo" tiah ruat in dai tein um le ngaihthiamnak ngeih khi a si.

3. Mi nih kan cung i chiatnak le sualnak an tuah tik zongah, kan mah nih taza hna va cuai le dan va tat zong khi "a tha lem lai lo" tiah ruah i dai tein in khawhnak ngeih khi asi.

4. Kan palh lo ti kan hngalh ko zong i mi nih a kan ti chih len ko zongah i in peng i daite in um kha asi.

5. Mi nih kan cung i sualpalhnak an tuah sual tik i, kan ngaihthiam khawh hna lo zongah a kan rem i, kan lung a fak ko nana tein in khawh le ngaihthiam kan i harh ko nain ngaihthiam khawhnak thinlung khi asi.

6. Mi nih a kan cawihlam tik i kan sian lo ngai zongah zaangfahnak thinlung van ngeih i, siang lo nana tein mi van cawih le pekthenh khawhnak thinlung asi.

7. Mi nih bawmhnak a kan hal tik i bawmh kan duh lo le kan huam lo zongah, a herh tiah van ruah i van i hnek khawhnak thinlung khi asi.

8. A kan huatu le raltu asi timi kan thinlung tein theih ko zongah, a thei lo bantuk tein i umter le an cung ah lungput tha tein um le nun khawhnak lungput khi asi.

9. Kan kan duh lonak zongah midang caah thatnak aum nak hnga caahcun van i hnek tialmal i va kal khawhnak lungput khi asi.

10. Tuah kan duh dakmak mi zong, ka tuah ahcun a tha lai lo, ka ti ahcun a tha lai lo, timi van ruah i, i sum khawhnak thinlung ngeih khi asi.

11. Kan ral asi ti thei ko nain, minung hawi sinak in zaangfahnak ngeih i amah nih a kan doh bantuk in doh ve lo in, tha tein zohkhenh duhnak thinlung ngeih khawh khi asi.

12. Mi va hlen duhnak le mi caah thil tha lo mi tuah duh ko zong ah, a tha lo timi van theih i, lungthin i ngaichihnak le tuah lo in i sum khawhnak lungthin ngeih khi asi.

13. Kan tei ko mi hna zong, a tha lai lo timi van ruah i, mah le mah hna asungkhannak thinlung van ngeih khawhnak lungput khi asi.

14. Minung hawi zawnruahnak lungput ngeih zong asi.

15. Chim duh dakmak zongah a tha lai lo timi ruahnak in biachim sum khawhnak te hna asi.

16. Mi an palhnak kha a ningzak sual lai timi ruah piak i, mi sin hna i a zo langh sualnak hnga lo ding caah, biachim sum te hna, mi zo va langh te hna tibantuk i sum khawh te hna zong asi.

17. Mi nih nehsawh thlanglamhnak in a kan ti tik zongah va in khawh le an mah bantuk in va nehsawh ve nak thinlung ngeih lo zong khi asi.

18. Hi tin ka tuah ahcun asiloah ka chimrel ahcun a tha lai lo, timi ruat bu tein, in khawh lo mi te zong thinlung in in peng khawhnak thinlung zong khi asi.

19. Mah nakin midang upsapek deuh le kianh deuh khawhnak thinlung zong khi asi.

20. Mah nak in a der deuhmi tei tuk ko mi zong, duh paoh in va ti lo in, mah tanghma ah benh i nunnak ngeih zong khi asi.

Kan chim lengmang rih hnga maw? Chim ahcun tam tuk in chim khawh asi hnga. A tawinak in thlachiat ruah kan timi cu, "Hi ti ka tuah, ka chim, ka kal, ka nun, ka ti, ka vuak, ka den, bia ka el, a zo ka langh" ahcun a tha lai lo" timi zawnruahnak lungput ngeih i duh lo zong le lungthin fah ngai ko zong ah, i sum khawhnak lungthin ngeih khi, thlachiat ruah timicu asi ko.

Ruah tikah hi bia hi a thuk tuk i, aa thawknak hi ka fianh kho lem lai lo. Asinain hitin fianter ka duh.

"Thla" timi cu Laimi pupu hna nih hin, "Minung cu thih hnu ah, thla timi "thlarau" ngeimi kan si ti kan zumh. Mithi khua a um i, cu mithi khua ahcun kan thlarau akal i, khua a sa ti an zumh. Vawleicung kan tuahsermi hawih in, cu kan thla asiloah thlarau nih a va kalnak ding mithi khua ah khin a va tuar ve lai" timi kha an rak zumh. Cucaah zei thil an tuah tik hmanh ah, pipu hna nih atu chan kan taksa a nungmi ca lawng silo in, kan thih hnu, mithi khua i kan va kal te dingmi hmun i, kan thlarau kong tiang khin khua an ruat.

Cu thlarau temtuar ding le harnak ton ding khi an rak ruat kho bak lo. Cucaah an thih tik hmanh ah, ruak an i hngah, thil an i thlak khi, cu an thla asiloah thlarau nih, mithi khua ah thil tha a conak ding hnga khi an ruah caah, an rak tuahmi asi.

Cu caah, "Thlachiat ruah" timi cu hitin abia then khawh asi. "Thla+chiat+ruah" ti khi asi. Cu caah hi cafang hi kan then i, pakhat tete in kan fianter ahcun, "thla" cu "thlarau" asi. "Chiat" cu "cu thlarau nih thil chia ton dingmi khi asi. "Ruah" he van fonh tik ah hitin kan leh khawh.

Thlachiat ruah=kan thlarau nih thih hnu ah thil tha lo a ton sualnak hnga lo ding caah, nun lio ah duhpoh in nun le midang cungah thil chia tuah sual lo ding tein, um le nun kha "thla-chiat ruah" timi cu asi ko.

Cucaah thla-chiat ruatmi hna cu, mi duh poah ti an i sum. Mi nih an ti tik hna le an cung i thatlonak an tuah tik zongah an lehrul hna lo. Biachia holh chia an chim lo. Mi harnak an pe lo. An lehrul hna lo. Midang nih an ti ning hna le an tuahto ning hna in, an nih nih an ral cung zongah an tuah lo i, cuticun nunzia tha tein an nung.

"Thlachiat ruah" a hmangmi hna cu, mifim le lungthin sau an si i, mi nih thangthat le upat hmaizahnak an tong tawn. Thlachiat ruat lomi hna cu, mi nih sawisel le thangchiat an tong tawn. Cucaah hi thlachiat ruahnak timi hi, Krihfa nuncan ziaza lakah kan herh bikmi pakhat asi. Bible cawnpiaknak he zong aa tlak taktakmi biafang asi. Hi nun hi kan chungkhar le Krihfabu ah a nun ahcun, cu innchungkhar le Krihfabu cu a daimi le aa nuammi Krihfabu a si kho peng ko lai timi ruahchannak ka ngei.